འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་24ཉིན་གློག་འཕྲིན་འབྱོར་གསལ། ཚེས་24ཉིན། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱི་2025ལོའི་དཔྱིད་གསར་དུས་ཆེན་གྱི་མཉམ་སྤྲོའི་དགོང་ཚོགས་ཀྱིས་ས་གནས་བཞིའི་ཡན་ལག་ཚོགས་ར་ཁྱབ་བསྒྲགས་བྱས་ཤིང་། ཁྲུང་ཆིང་དང་། ཧུའུ་པེའི་ཝུའུ་ཧན། བོད་ལྗོངས་ཀྱི་ལྷ་ས། ཅང་སུའུ་ཡི་ཝུའུ་ཞི་བཅས་ཀྱི་ཉམས་འགྱུར་མངོན་གསལ་དོད་ཅིང་རང་རང་གི་ཁྱད་ཆོས་ལྡན་པའི་ཡན་ལག་ཚོགས་ར་བཞིས་པེ་ཅིང་གི་ཚོགས་ར་གཙོ་བོ་དང་མཉམ་འབྲེལ་གྱིས་རྒྱལ་ཡོངས་མི་རིགས་ཁག་གི་མི་དམངས་དང་མཉམ་དུ་དུས་ཆེན་ལ་རྟེན་འབྲེལ་ཞུས་ཏེ་ལོ་གསར་གྱི་གནམ་གང་དགོང་མོར་གོ་ལ་ཧྲིལ་པོའི་ལྟད་མོ་བར་བརྩེ་སེམས་ཀྱིས་ཕྱུག་པ་དང་སྤྲོ་སྣང་གིས་ཁེངས་པའི་རིག་གནས་ཀྱི་སྟོན་མོ་གཟབ་རྒྱས་ཤིག་བཤམ་རྒྱུ་རེད།

བྱེད་སྒོ་སྤེལ་རིང་། སྤྱི་ཁྱབ་ལས་ཁུངས་ཀྱི་དཔྱིད་གསར་དགོང་ཚོགས་ཀྱི་ཡན་ལག་ཚོགས་ར་བཞིས་སི་ཁྲོན་གྱི་ཁྲང་ཞི《ཀྲུང་གོའི་ས་གཞི་ཆེན་པོར་མཉམ་དུ་རྟེན་འབྲེལ་ཞུ》དང་། རོལ་དབྱངས་ཞབས་བྲོ《གྲོགས་པོ་བློས་ཐུབ་འཕྲད》སོགས་ཀྱི་ལེ་ཚན་འཁྲབ་སྟོན་བྱས་ཏེ་གྲོང་ཁྱེར་ཁག་གི་མངོན་གསལ་དོད་པའི་ས་གནས་ཀྱི་ཁྱད་ཆོས་དང་ཐུན་མོང་མ་ཡིན་པའི་མི་ཆོས་རིག་གནས་དང་ཡུལ་སྲོལ་གོམས་གཤིས་མངོན་པར་བྱ་རྒྱུ་རེད།

（པ་ཚེ་དང་པད་ཆོས་ཀྱིས་སྒྱུར་ཞུས་བྱས）