“བོད་སྐྱོར་གྱི་དུས་ཚོད་ལོ་གསུམ་རེད། གལ་སྲིད་ཉིན་གཅིག་ཉིན་གཉིས་ལ་བརྩིས་ནས་ལས་ཀ་བྱས་ཚེ་ལོ་དྲུག་གི་ལས་ཀའི་དུས་ཚོད་ཡོད”ཅེས་མཱ་པིང་གིས་རྒྱུན་དུ་དེ་ལྟར་ཤོད་ཀྱི་ཡོད། ལོ་གཉིས་ལྷག་ཙམ་རིང་། དུས་ཚོད་སྐར་ཆ་ཙམ་ཡང་བརྩོན་ལེན་བྱེད་པའི་ཡར་བརྩོན་གྱི་སྙིང་སྟོབས་དང་རང་འགན་གཞན་ལ་དཀྲི་ཐབས་མེད་པའི་ཧུར་བརྩོན་གྱི་རྣམ་འགྱུར་ཐོག་ནས་མཱ་པིང་གིས་བོད་ལྗོངས་ཉིང་ཁྲི་གྲོང་ཁྱེར་དུ“5+2”དང་ཉིན་མཚན་ལྟོས་མེད་ཀྱིས་བོད་སྐྱོར་ལས་དོན་ཁག་ལ་སྐུལ་འདེད་བཏང་བས་ཕན་འབྲས་ཆེན་པོ་ཐོན་ནས་ས་གནས་དེ་གའི་ལས་བྱེད་པ་དང་མང་ཚོགས་ཀྱི་ཚད་མཐོའི་ཁས་ལེན་ཐོབ་པ་མ་ཟད། “རྒྱལ་ཡོངས་ཀྱི་ཁ་གཏད་བོད་སྐྱོར་གྱི་སྔོན་ཐོན་མི་སྣའི”གཟི་བརྗིད་མཚན་སྙན་ཡང་ཐོབ་ཡོད།

2022ལོའི་ཟླ་6པར། མཱ་པིང་གིས་ཁག་བཅུ་པའི་ཀོང་ཏུང་ཞིང་ཆེན་གྱི་བོད་སྐྱོར་ལས་དོན་རུ་ཁག་ཧྲེན་ཀྲེན་ལས་དོན་ཚོགས་ཆུང་གི་ཙུའུ་ཀྲང་གི་འགན་ཁུར་ནས་ཁོང་གིས“ཕ་ཡུལ་གཉིས་པ”ཞེས་བརྗོད་པའི་ས་ཆར་བསྐྱོད་དེ་ཉིང་ཁྲི་གྲོང་ཨུད་ཀྱི་དྲུང་ཆེ་གཞོན་པ་དང་ཉིང་ཁྲིའི་དཔལ་འབྱོར་གསར་སྤེལ་ཁུལ་ཏང་གི་ལས་དོན་ཨུ་ལྷན་གྱི་ཧྲུའུ་ཅིའི་འགན་འཁུར།

སྒྲིག་སྲོལ་དང་ལམ་སྲོལ་ད་དུང་ཁ་གསལ་མེད་པ་དང་། འཕེལ་རྒྱས་ཀྱི་བསམ་ཕྱོགས་གསལ་པོ་མེད་པ། འཆར་འགོད་འཛུགས་སྐྲུན་འཐུས་སྒོ་ཚང་པོ་མེད་པ་མ་ཟད་ལོ་རྒྱུས་ཀྱི་ཤུལ་དུ་ལུས་པའི་གནད་དོན་མང་པོ་ཞིག་འཕྲལ་དུ་ཐག་གཅོད་བྱེད་དགོས་པ་སོགས་ལ་མཱ་པིང་གིས་རང་ཉིད་ཀྱི་ལས་འགན་ཧ་ཅང་ལྕི་པོ་ཡིན་པའི་ཚོར་སྣང་བྱུང་བ་རེད།

མཱ་པིང་གིས་དོ་དམ་གྱི་ཉམས་མྱོང་ཕུན་སུམ་ཚོགས་པོར་བརྟེན་ནས་དངུལ་རྩའི་ཆེད་ལས་ཀྱི་ལེགས་ཆ་དང་དཔལ་འབྱོར་སྡེ་ཚན་དུ་ལས་ཀ་བྱས་པའི་ཉམས་མྱོང་འདོན་སྤེལ་གང་ལེགས་བྱས་ཏེ། ཁོང་གིས་སྣེ་ཁྲིད་དེ་ཉིང་ཁྲིའི་དཔལ་འབྱོར་གསར་སྤེལ་ཁུལ་གྱི་ཐོན་ལས་འཕེལ་རྒྱས་ཀྱི་སྲིད་ཇུས་ཐོག་མ་བཏོན་པ་དང་། གྲོང་ཁྱེར་དང་རྫོང་ཁོངས་མི་སྣ་ཡོངས་ཀྱི་མཉམ་འགུལ་ཚོང་འགུགས་ལས་ཀའི་ལམ་སྲོལ་བཟོས་པ། ཡན་ལག་རུ་ཁག་ཆུང་ངུ་བཙུགས་ནས་ཐེངས་གྲངས་མང་བ་དང་ལས་ཕྱོད་ཆེ་བའི་ངང་ཚོང་འགུགས་ཧུར་ཐག་བྱས་པ་རེད། འབད་བརྩོན་ལྷོད་མེད་བྱས་པ་བརྒྱུད། 2023ལོའི་ལོ་ཧྲིལ་པོར་ཚོང་འགུགས་མ་དངུལ་སྒོར་དུང་ཕྱུར་17.51དམིགས་སར་འབྱོར་ནས་ལོ་ཧྲིལ་པོའི་དམིགས་ཚད་ཚད་བརྒལ་ངང་ལེགས་གྲུབ་བྱུང་ཡོད།

མཚོ་འགྲམ་གྲོང་ཁྱེར་ནས་གངས་ལྗོངས་ས་མཐོའི་བར་དང་། སྒྱུར་བཅོས་སྒོ་དབྱེའི་གཡུལ་ས་མདུན་མ་ཀོང་ཏུང་ནས་བོད་ཀྱི་སྒྱུར་བཅོས་སྒོ་དབྱེའི་སྔོན་སྐྱོད་ཁུལ་འཛུགས་གཏོད་བྱེད་བཞིན་པའི་ཉིང་ཁྲིའི་བར་མཱ་པིང་གིས་བོད་སྐྱོར་ལས་དོན་ལེགས་སྒྲུབ་བྱེད་རྒྱུ་བློ་ལ་བཅངས་ཤིང་། ཧྲེན་ཀྲེན་ལས་དོན་ཚོགས་ཆུང་གི་ཙུའུ་ཀྲང་ཡིན་པའི་ཁོང་གིས་ད་དུང་རྫ་ཡུལ་རྫོང་ལ་ཁ་གཏད་རོགས་སྐྱོར་གཏིང་ཟབ་བྱེད་པའི་འགན་འཁྲི་ཕྲག་ཏུ་ཁུར་ཡོད།

ལོ་གཉིས་རིང་མཱ་པིང་གིས་སྔ་རྗེས་སུ་རྫ་ཡུལ་རྫོང་མི་དམངས་སྲིད་གཞུང་དང་ལྷོ་ཕྱོགས་གསོ་རིག་སློབ་ཆེན་ཧྲེན་ཀྲེན་སྨན་ཁང་དབར་སྨན་བཅོས་རོགས་སྐྱོར་གྱི་མཉམ་ལས་གཏིང་ཟབ་ཀྱི་གྲོས་མཐུན་འཇོག་པར་སྐུལ་མ་བཏང་བ་དང་། ཧྲེན་ཀྲེན་གྱི་འབྲེལ་ཡོད་སྡེ་ཚན་དང་མཐུན་སྦྱོར་གྱིས་སྨན་བཅོས་ཤེས་ལྡན་པ་ཁག་གཅིག་འདེམས་གཏོང་བྱས་པ། ཧྲེན་ཀྲེན་གྲོང་ཁྱེར་དགེ་སྒྲུབ་ལྷན་ཚོགས་ཀྱིས་རྫ་ཡུལ་རྫོང་གི་འཕྲོད་བསྟེན་བདེ་ཐང་བྱ་གཞག་འཕེལ་རྒྱས་ཐད་སྒོར་ཁྲི་30ཞལ་འདེབས་འབུལ་བར་མཐུན་སྦྱོར་བྱས་པ་རེད། ཧྲེན་ཀྲེན་སློབ་ཆེན་གྱིས་རྫ་ཡུལ་རྫོང་དང་ཧྲེན་ཀྲེན་སློབ་འབྲིང་ལུང་ཀང་སློབ་གྲྭ(ཚོགས་པ)དང་རྫ་ཡུལ་རྫོང་སློབ་འབྲིང་དབར་ཆ་སྒྲིག་མཉམ་སྐྲུན་བྱ་རྒྱུར་སྐུལ་འདེད་བཏང་སྟེ། ས་གནས་དེ་གའི་སྨན་བཅོས་སློབ་གསོའི“འཇམ་ཤུགས”རྒྱུན་ཆད་མེད་པར་ཆེ་རུ་བཏང་ནས་རྫ་ཡུལ་རྫོང་གི་མང་ཚོགས་ཚོས་ཀྱང་ཁུག་ཆེན་ཁུལ་གྱི་སྨན་བཅོས་དང་སློབ་གསོའི་ཐོན་ཁུངས་ལོངས་སྤྱོད་ཐུབ་པ་བྱས་ཡོད།

རྫ་ཡུལ་རྫོང་གི་འགྲིམ་འགྲུལ་སྟབས་བདེ་མེད་པ་དང་ཐོན་རྫས་ཕྱིར་ཚོང་གི་ཐབས་ལམ་ཡངས་པོ་མེད་པས་ཇི་ལྟར་བྱས་ནས་འདི་གའི་ཞིང་ལས་ཀྱི་ཁྱད་ལྡན་ཐོན་རྫས་ཕྱིར་ཚོང་བྱེད་པའི་ཐད། མཱ་པིང་དང་ལས་དོན་ཚོགས་ཆུང་གི་ལས་རོགས་ཚོས་2023ལོའི་དཔྱིད་གསར་དུས་ཆེན་དང་། བོད་ཀྱི་ལོ་གསར། ཁམ་བུའི་མེ་ཏོག་གི་ཡུལ་སྐོར་རིག་གནས་དུས་ཆེན་བཅས་ཀྱི་འཛད་སྤྱོད་སྐུལ་འདེད་བྱེད་སྒོ་སྤེལ་རྒྱུའི་ཇུས་འགོད་བྱས་ནས་མཁོ་ཚོང་མཉམ་ལས་ཁང་ཞིང་རོགས་ས་ཚིགས་དང་། གྲགས་ཅན་སྤུས་ལེགས་ཞིང་ལས་ཁྱད་ལྡན་ཐོན་ཟོག་འགྲེམས་ཚོང་ཁང་སྣེ་ཁྲིད་དེ་བཙུགས་ནས་ས་གནས་དེ་གའི་དྲ་ཐོག་ཚོང་དོན་ཁེ་ལས་དང་དྲ་ཐོག་ཚོང་ཟོག་སྤུས་རྟགས་གཏོད་རྒྱུ་དང་སྟོབས་ཆེར་བཏང་སྟེ་ཉིང་ཁྲིའི་གྲོང་གསེབ་ཀྱི་དྲ་ཐོག་ཚོང་དོན་འཕེལ་རྒྱས་ལ་སྐུལ་འདེད་ཧུར་ཐག་བཏང་བ་རེད། “རྫ་ཡུལ་གྱི་ཐོན་རྫས་དང་ཉིང་ཁྲིའི་ཞིང་ལས་ཀྱི་ཁྱད་ལྡན་ཐོན་རྫས་ཕྱིར་གཏོང་བྱས་ཚེ། གཞི་ནས་ཁེ་ལས་ཀྱིས་ཚོང་ལས་ཀྱི་གོ་སྐབས་མཐོང་ཐུབ་པ་དང་། ས་གནས་དེ་གའི་མང་ཚོགས་ཀྱི་འབབ་འཕར་ཕྱུག་འགྱུར་གྱི་ཐབས་ལམ་རྒྱུན་ཆད་མེད་པར་རྒྱ་ཆེར་བཏང་ན་གཞི་ནས་ཁོང་ཚོ་དེ་བས་བདེ་སྐྱིད་ལྡན་པའི་འཚོ་བ་སྐྱེལ་ཐུབ”ཅེས་མཱ་པིང་གིས་བཤད།

ཉིང་ཁྲིའི་དཔལ་འབྱོར་གསར་སྤེལ་ཁུལ“བཙུགས་ནས་ལོ་3སོང་ཡང་ཆེད་གཏོགས་གཟིགས་སྐྱོང་སྲིད་ཇུས་མེད་པ”ནས་2023ལོའི་ལོ་ཧྲིལ་པོར་ཚོང་འགུགས་མ་དངུལ་སྒོར་དུང་ཕྱུར་17.51དམིགས་སར་འབྱོར་བའི་བར་དང་། ཞིང་ལས་ཀྱི་དམིགས་བསལ་ཐོན་རྫས་རི་ཁུག་ཏུ་ཡོད་པ་ཤེས་མཁན་མེད་པ་ནས་གཡོད་ཀང་ཨའོ་ཁུག་ཆེན་ཁུལ་གྱི་མང་ཚོགས་ཀྱི་གསོལ་ལྕོག་ཐོག་མཁོ་མང་བའི་བར་མཱ་པིང་གིས་བྱ་སྤྱོད་དངོས་ལ་བརྟེན་ནས་བོད་སྐྱོར་གྱི་འགན་འཁྲི་ལག་ལེན་བསྟར་བ་དང་། ཉིང་ཁྲིའི་ལས་བྱེད་པ་དང་མང་ཚོགས་དང་མཉམ་དུ་དཀའ་སྤྱད་འབད་འབུངས་ཀྱི་རྔུལ་ཆུ་བཏོན་ཡོད།

（བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང）