འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་25ཉིན་གློག་འཕྲིན་འབྱོར་གསལ། གསར་འགོད་པར་བཟོ་ལས་དང་ཆ་འཕྲིན་ཅན་པུའུ་ནས་ཤེས་རྟོགས་བྱུང་བར། 2024ལོའི་ཟླ་11པའི་ཟླ་མཇུག་བར། རང་རྒྱལ་གྱི་5Gསྒུལ་བདེའི་ཁ་པར་སྤྱོད་མཁན་དུང་ཕྱུར་10.02ཟིན་པ་དེ་ལོ་གོང་མའི་ལོ་མཇུག་ལས་སྤྱོད་མཁན་དུང་ཕྱུར་1.8འཕར་ནས་སྒུལ་བདེའི་ཁ་པར་སྤྱོད་མཁན་བསྡོམས་འབོར་གྱི་56%བཟུང་བ་དང་། བཟུང་ཚད་ལོ་གོང་མའི་ལོ་མཇུག་ལས་བརྒྱ་ཆའི་གྲངས་9.4འཕར་ཡོད།

ཁྱབ་རྒྱ་ཆེ་རུ་ཕྱིན་ནས་དྲ་རྒྱའི་རྨང་གཞིའི་སྒྲིག་བཀོད་གོ་ལ་ཧྲིལ་པོའི་སྔོན་ཚུད་དུ་སླེབས་པ། 2024ལོའི་ཟླ་11པའི་ཟླ་མཇུག་བར། རིམ་རྩིས་བརྒྱབ་ན་རང་རྒྱལ་གྱིས་5Gསྦྲེལ་ཚུགས་ཁྲི་419.1བཙུགས་པ་དེ་ལོ་གོང་མའི་ལོ་མཇུག་ལས་ཁྲི་81.5འཕར་ནས་སྒུལ་བདེའི་སྦྲེལ་ཚུགས་བསྡོམས་འབོར་གྱི་33.2%བཟུང་བ་དང་། བཟུང་ཚད་ལོ་གོང་མའི་ལོ་མཇུག་ལས་བརྒྱ་ཆའི་གྲངས་4.1འཕར་ཡོད།

གསར་གཏོད་ལ་སྐུལ་འདེད་བཏང་ནས་འགག་རྩའི་ལྟེ་བའི་ལག་རྩལ་ལ་ཚད་བརྒལ་ཟམ་མི་ཆད་པར་བྱུང་བ། རང་རྒྱལ་གྱི་5Gཚད་གཞིའི་དགོས་ངེས་ཀྱི་ཁེ་བེད་བདག་ཐོབ་གསལ་བསྒྲགས་བྱེད་ཚད་ཀྱིས་གོ་ལ་ཧྲིལ་པོའི་བརྒྱ་ཆའི་གྲངས་བཟུང་ཚད་42%ཟིན་པ་དང་གོ་ལ་ཧྲིལ་པོར་ཐེངས་དང་པོ་བཀྲམ་པའི་5G—A(5.5Gཡང་ཟེར)ཚོང་དོན་ཐད་སྤྱོད་པའི་བཀོད་སྒྲིག་བྱེད་མགྱོགས་སུ་ཕྱིན་ཡོད།

ནུས་པ་སྦྱིན་ནས་གྲངས་དངོས་དཔལ་འབྱོར་མཉམ་འདྲེས་བེད་སྤྱོད་ཀྱི་ཕན་འབྲས་མངོན་གསལ་དོད་དུ་ཕྱིན་པ། རང་རྒྱལ་གྱི་5Gབཀོལ་སྤྱོད་དེ་རྒྱལ་དམངས་དཔལ་འབྱོར་གྱི་རིགས་ཆེན་པོ་97ཁྲོད་ཀྱི་ཁག་74ལ་མཉམ་འདྲེས་ཐུབ་པ་དང་། 5Gལས་རིགས་ཀྱི་རྟོག་བཟོའི་ཆེད་དོན་དྲ་བ་འཛུགས་ཚད་ཁྲི་4ལས་བརྒལ་ཡོད། བཟོ་ལས་ཁྱབ་ཁོངས་སུ་5Gདེ་རིམ་བཞིན་ཕྱི་རོལ་གྱི་ལྷུ་ཚིགས་ནས་ཞིབ་སྤེལ་ཇུས་འགོད་དང་ཐོན་སྐྱེད་བཟོ་སྐྲུན་སོགས་འགག་རྩའི་ལྷུ་ཚིགས་ནང་གཏིང་ཟབ་སྤྱོད་ཐུབ་ནས། མིག་སྔར། “5Gདང་བཟོ་ལས་མཉམ་སྦྲེལ་དྲ་རྒྱའི”རྣམ་གྲངས་ཁྲི་1.5ལས་བརྒལ་ནས་བཟོ་ལས་རིགས་ཆེན་པོ་ཁག་41ཚང་མར་ཁྱབ་ཐུབ་པ་བྱུང་སྟེ་བཟོ་སྐྲུན་ལས་རིགས་རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་སུ་འཕེལ་རྒྱས་འགྲོ་བར་སྐུལ་ཁྲིད་ནུས་ལྡན་ཐུབ་ཡོད།

（ཚེ་དབང་ལྷ་མོས་བསྒྱུར། པ་སངས་ཚེ་རིང་གིས་ཞུས）