འདི་ལོའི་ཟླ་7ཚེས་4ནས་6ཉིན་བར། ཀྲུང་གོའི་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཐ་ཇིག་སི་ཐན་དུ་རྒྱལ་དོན་འཚམས་འདྲི་གནང་ཞིང་། དེ་ནི་ཀྲུའུ་ཞི་ཞི་ཅིན་ཕིང་ཕེབས་ཐེངས་གསུམ་པ་དེ་ཡིན་ལ། ལོ་ལྔའི་རྗེས་སུ་སླར་ཡང་འཚམས་འདྲིར་ཕེབས་པ་ཞིག་ཡིན་པས། ཐ་ཇིག་སི་ཐན་གྱིས་གུས་ལུགས་རྒྱས་ཤོས་ཀྱི་ཐོག་ནས་བསུ་བ་ཞུས་པ་དང་རྒྱལ་ས་དུ་ཤང་པེར་སྤྲོ་སེམས་འཁོལ་བའི་དགའ་སྟོན་རྟེན་འབྲེལ་གྱི་རྣམ་པས་ཁེངས་ཡོད། ངས་ཁྱད་འཕགས་དོན་སྙིང་མངའ་བའི་དོན་ཆེན་དེ་དངོས་སུ་མིག་མཐོང་ལག་ཟིལ་བྱུང་ལ། ས་གནས་ས་ཐོག་ནས་ཀྲུའུ་ཞི་ཞི་ཅིན་ཕིང་གིས་ཐ་ཇིག་སི་ཐན་གྱི་ཙུང་ཐུང་ལཱ་ཧོ་མོང་ལ“མཛའ་གྲོགས་གཟེངས་རྟགས”གནང་བར་བདེན་དཔང་བྱེད་རྒྱུ་བྱུང་།

ཟླ་7ཚེས་5ཉིན་གྱི་ཕྱི་དྲོར། ཙུང་ཐུང་ལས་ཤག་ཏུ་གཟེངས་རྟགས་སྤྲོད་པའི་མཛད་སྒོ་གཟབ་རྒྱས་འཚོགས་པ་རེད། བྱེད་སྒོ་མ་སྤེལ་གོང་ཐ་ཇིག་སི་ཐན་གྱི་བརྙན་འཕྲིན་ལས་ཁུངས་དང་། རླུང་འཕྲིན་ལས་ཁུངས། ཚགས་པར་དང་དུས་དེབ་བཅས་གཙོ་བོའི་གསར་འགོད་པ་སྔ་ས་ནས་དེ་གར་འབྱོར་ཏེ་དུས་སྐབས་གལ་ཆེན་དེ་ཟིན་ཐོར་འགོད་རྒྱུའི་རེ་སྒུག་བྱས་ནས་བསྡད་ཡོད། ལོ་ལྔའི་གོང་དུའང་འདི་གར་ཙུང་ཐུང་ལཱ་ཧོ་མོང་གིས་ཀྲུའུ་ཞི་ཞི་ཅིན་ཕིང་ལ་ཐ་ཇིག་སི་ཐན་རྒྱལ་ཁབ་ཀྱི་གཟེངས་རྟགས་མཐོ་ཤོས“རྒྱལ་ཞྭའི་བྱས་རྗེས་གཟེངས་རྟགས”གནང་བ་རེད།

གཟེངས་རྟགས་སྤྲོད་པའི་མཛད་སྒོའི་ཐོག་ཚོགས་ཞུགས་སྐུ་མགྲོན་ཚོས་ཐེངས་བཅུ་ལྷག་ཙམ་ཡར་ལངས་ནས་སྤྲོ་སེམས་འཁོལ་བའི་དགའ་བསུ་ཡུན་རིང་གྲགས་པ་ལས་ཡུལ་དངོས་ཀྱི་རྣམ་པ་ནི་མི་རྣམས་ལ་སེམས་འགུལ་ཆེན་པོ་ཐེབས་ཡོད། ཕན་ཚུན་བརྩི་འཇོག་དང་། ཕན་ཚུན་ཡིད་ཆེས། ཕན་ཚུན་བསམ་ཤེས། ཕན་ཚུན་རྒྱབ་སྐྱོར་བཅས་ཀྱི་ཐོག་ནས་ཐ་ཀྲུང་རྒྱལ་ཁབ་གཉིས་ཀྱིས་བྱ་སྤྱོད་དངོས་ལ་བརྟེན་ཏེ་མིའི་རིགས་ཀྱི་ལས་དབང་གཅིག་མཐུན་ཚོགས་པའི་འདུ་ཤེས་ཀྱི་བདེན་དོན་གསལ་བཤད་བྱས་ཡོད། མཛད་སྒོ་འཚོགས་ཡུལ་གྱི་ཞིབ་ཕྲའི་གནས་ཚུལ་མང་པོ་ཞིག་ལས་ངས་ཐ་ཀྲུང་རྒྱལ་ཁབ་གཉིས་པོའི་དབར་གྱི་ཟོལ་མེད་ཀྱི་མཛའ་གྲོགས་གང་ལེགས་ཚོར་བྱུང་། དེ་ནི་ངས་ཐག་ཉེ་པོས་ཀྲུའུ་ཞི་ཞི་ཅིན་ཕིང་དང་ཐུག་ཐེངས་དང་པོ་ཡིན། ལོ་རྒྱུས་གསལ་མཐོང་གཏིང་ཟབ་དང་གོ་ལ་ཧྲིལ་པོའི་མཐོང་རྒྱ་ཡངས་ཤིང་རྒྱ་ཆེ་བའི་ཀྲུང་གོའི་འགོ་ཁྲིད་པ་དེས་བྱ་སྤྱོད་དངོས་ཀྱི་ཐོག་ནས་ཐ་ཀྲུང་མཉམ་ལས་རྒྱུན་ཆད་མེད་པར་གཏིང་ཟབ་ཏུ་འགྲོ་རྒྱུར་སྐུལ་འདེད་གཏོང་བཞིན་ཡོད།

གཟེངས་རྟགས་སྤྲོད་པའི་མཛད་སྒོ་འཚོགས་རྗེས། རྒྱལ་ཁབ་གཉིས་པོའི་གཙོ་བདག་ལག་གདང་སྦྲེལ་ནས་དབྱི་ཧུའེ་གྲོས་ཚོགས་ཐོག་ཁང་དུ་ཕེབས་ཏེ་མཉམ་དུ་ཀྲུང་གོ་ཕྱོགས་ཀྱིས་ཐ་ཇིག་སི་ཐན་ལ་སྐྲུན་རོགས་བྱས་པའི་གྲོས་ཚོགས་ཐོག་ཁང་དང་སྲིད་གཞུང་ཐོག་བརྩེགས་ཁང་ཆེན་གྱི་སྒོ་བྱང་གི་ཡོལ་བ་ཕྱེ་བ་རེད། ཐོག་བརྩེཌ་ཁང་ཆེན་དེ་གཉིས་ལ་ཐ་ཇིག་སི་ཐན་གྱི་འཛུགས་སྐྲུན་གྱི་ཉམས་འགྱུར་དང་ཀྲུང་གོའི་འཛུགས་སྐྲུན་གྱི་ལག་རྩལ་མཉམ་འདྲེས་གཏིང་ཟབ་ཡོད་ཅིང་། ཐ་ཇིག་སི་ཐན་གྱི་དབྱི་ཧུའེ་གྲོས་ཚོགས་དང་སྲིད་གཞུང་གི་གཞུང་དོན་སྒྲུབ་སའི་ཆ་རྐྱེན་ལེགས་སུ་ཤུགས་ཆེན་བཏང་ཡོད། དེ་ཐ་ཀྲུང་མཛའ་གྲོགས་མཉམ་ལས་ཀྱི་ས་གནས་ཀྱི་མཚོན་རྟགས་གསར་པ་ཞིག་ཏུ་གྱུར་ལ། ཐ་ཀྲུང་གི་མཛའ་གྲོགས་ཟབ་མོ་མཚོན་པའི་བདེན་དཔང་གཞན་ཞིག་ཀྱང་རེད།

ཐ་ཀྲུང་འབྲེལ་བ་ནི་ཐོག་མཐའ་བར་གསུམ་དུ《མི་དམངས་གླེང་སྟེགས་ཚགས་པར》གྱི་སྤེལ་བྱའི་གསར་འགྱུར་གནས་ཚུལ་གཙོ་གནད་ཅིག་རེད། ད་ཐེངས་འཚམས་འདྲི་བྱེད་རིང་རྒྱལ་ཁབ་གཉིས་པོའི་གཙོ་བདག་གིས་ནང་དོན་ཕུན་སུམ་ཚོགས་པ་དང་གྲུབ་འབྲས་གཡུར་དུ་ཟ་བའི་གྲོས་མོལ་གནང་བ་དང་། ཐུན་མོང་ཐོག་མཉམ་འབྲེལ་གསལ་བསྒྲགས་ལ་མཚན་རྟགས་བཀོད་པ། དུས་རབས་གསར་པའི་ཐ་ཀྲུང་འཐབ་ཇུས་མཉམ་ལས་རོགས་ཟླའི་འབྲེལ་བ་འཛུགས་རྒྱུའི་ཁྱབ་བསྒྲགས་གནང་བ། འགོ་ཚུགས་ས་སྔར་ལས་མཐོ་བའི་ཐོག་ལག་གདང་སྦྲེལ་ནས་མི་རབས་བར་མཛའ་མཐུན་དང་། སྐྱིད་སྡུག་མཉམ་མྱོང་། གཉིས་ཁེ་གཉིས་ཕན་བཅས་ཀྱི་ཐ་ཀྲུང་གི་ལས་དབང་གཅིག་མཐུན་ཚོགས་པ་འཛུགས་རྒྱུའི་ཐག་མགྲིན་གཅིག་ཏུ་བཅད་པ་རེད། ཐ་ཇིག་སི་ཐན་གྱི་སྨྱན་སྦྱོར་གྱིས་འཚམས་འདྲི་དེའི་གྲུབ་འབྲས་གཅིག་རྗེས་གཉིས་མཐུད་ངང་སྤེལ་གཏོང་བྱས་པ་དང་། 《མི་དམངས་གླེང་སྟེགས་ཚགས་པར》གྱིས་ཀྱང་གནས་ཚུལ་མང་པོ་སྤེལ་ཡོད། ཐ་ཇིག་སི་ཐན་གྱི་དམངས་ཚོགས་ཀྱིས་རྒྱལ་ཁབ་གཉིས་པོས་ཁྱབ་ཁོངས་ཁག་གི་གཉིས་ཁེ་མཉམ་ལས་ལ་ཤུགས་སྣོན་རྒྱག་རྒྱུར་སེམས་གཏིང་ནས་རེ་སྒུག་བྱེད་པ་དང་རྒྱལ་ཁབ་གཉིས་པོའི་འབྲེལ་བའི་འོད་སྟོང་འཕྲོ་བའི་མདུན་ལམ་ལ་ཡིད་ཆེས་ཀྱིས་ཁེངས་ཡོད།

ང་རང་ད་ལོའི་དབྱར་ཁ་གདན་ཞུས་ལྟར་མི་དམངས་ཉིན་རེའི་ཚགས་པར་ཁང་གིས་གཙོ་གཉེར་བྱས་པའི་2024ལོའི“རྒྱུད་གཅིག་ལམ་གཅིག”སྨྱན་སྦྱོར་མཉམ་ལས་གླེང་སྟེགས་ལ་ཞུགས་པ་དང་སྦྲགས། ཡོ་རོབ་དང་ཨེ་ཤེ་ཡའི་སྨྱན་སྦྱོར་རྟོག་ཞིབ་ཚོགས་པ་དང་མཉམ་དུ་ཀྲུང་གོའི་ས་ཆ་མང་པོར་འཚམས་འདྲིར་སྐྱོད་པ་ཡིན། ངས་འཕེལ་རྒྱས་འགྲོ་མགྱོགས་པའི་ཀྲུང་གོ་ཞིག་དངོས་སུ་མཐོང་བ་དང་སྒྱུར་བཅོས་སྒོ་དབྱེ་ལས་ཀྲུང་གོ་འདི་ཉིད་རྒྱལ་ཁབ་སྟོབས་ཆེན་ཞིག་ཏུ་གྱུར་པར་མྱོང་ཚོར་ཟབ་མོ་ཚོར་བྱུང་།

“ཁྱེད་ཀྱིས་ཇི་ལྟར་བྱས་ནས་མི་འབོར་དུང་ཕྱུར་14ལས་བརྒལ་བའི་རྒྱལ་ཁབ་ཅིག་ལ་གྲུབ་འབྲས་ཐོབ་པའི་ངང་འགོ་ཁྲིད་གནང་བ་ཡིན་ནམ། ཁྱེད་ནས་ཇི་ལྟར་བྱས་ན་ད་གཟོད་འཛམ་གླིང་གི་རྒྱལ་ཁབ་ཆེན་པོའི་འགོ་ཁྲིད་ཡག་པོ་བྱེད་ཐུབ་བམ”གལ་ཏེ་མ་འོངས་པར་གོ་སྐབས་བྱུང་ཚེ་ངས་ཀྲུའུ་ཞི་ཞི་ཅིན་ཕིང་ལ་གནད་དོན་འདི་གཉིས་བཅར་འདྲི་ཞུ་འདོད་ཡོད། གནད་དོན་དེ་གཉིས་བཅར་འདྲི་ཞུ་འདོད་པའི་རྒྱུ་མཚན་ནི་ང་མི་སྒེར་གྱིས་དོ་ཁུར་ཙམ་མ་ཡིན་པར་དེ་ནི་ཐ་ཇིག་སི་ཐན་དམངས་ཚོགས་ཀྱིས་ཀྲུང་གོའི་འཕེལ་རྒྱས་ཀྱི་གྲུབ་འབྲས་ལ་དོ་སྣང་ཆེན་པོ་བྱེད་པ་དང་དགའ་མགུ་ཡིད་རང་བྱེད་པས་ཡིན། （བདེ་སྐྱིད་དང་པ་སངས་སྒྲོན་ལགས་ཀྱིས་སྒྱུར་ཞུས་བྱས）