ཤིན་ཧྭ་གསར་འགྱུར་ཁང་པེ་ཅིང་ནས་ཟླ་12ཚེས་24ཉིན་གློག་འཕྲིན་འབྱོར་གསལ། སྔོན་གཤེཌ་དཔའ་བོར་རྗེས་དྲན་ཞུ་བའི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ། སྔོན་གཤེགས་དཔའ་བོའི་དྲན་གསོའི་སྒྲིག་བཀོད་འཛུགས་སྐྲུན་ཚད་ལྡན་བྱེད་པའི་ཆུ་ཚད་མཐོ་རུ་བཏང་ནས། དུས་རབས་གསར་པའི་སྔོན་གཤེགས་དཔའ་བོར་རྗེས་དྲན་ཞུ་བའི་ལས་དོན་འཕེལ་རྒྱས་ཀྱི་དགོས་མཁོ་དང་ཧུར་ཐག་འཚམ་པར་བྱེད་ཆེད། ཉེ་ཆར། དམག་ཞབས་ཐིམ་པའི་དམག་མིའི་ལས་དོན་པུས《སྔོན་གཤེགས་དཔའ་བོའི་དྲན་གསོའི་སྒྲིག་བཀོད་འཛུགས་སྐྲུན་ཚད་ལྡན་སྐོར་གྱི་ལག་རྩལ་མཛུབ་ཁྲིད》（གཤམ་དུ《མཛུབ་ཁྲིད》ཞེས་བསྡུ་རྒྱུ）བཀྲམ་ནས་ས་གནས་ཁག་ལ་སྔོན་གཤེགས་དཔའ་བོའི་དྲན་གསོའི་སྒྲིག་བཀོད་གསར་སྐྲུན་དང་སྒྱུར་བཀོད་རྒྱས་སྐྲུན་སོགས་ཀྱི་ལས་དོན་ཁྲོད་དཔྱད་གཞིར་འཛིན་རྒྱུར་མཁོ་འདོན་བྱས་ཡོད།

《མཛུབ་ཁྲིད》ནང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ཏེ། སྔོན་གཤེགས་དཔའ་བོའི་དྲན་གསོའི་སྒྲིག་བཀོད་འཛུགས་སྐྲུན་ཁྲོད་གནས་པའི་ཇུས་འགོད་ཚད་གཞི་མི་འདྲ་བ་དང་རྣམ་པ་ཚད་ལྡན་མིན་པ་སོགས་ཀྱི་གནད་དོན་ནུས་ཤུགས་ཡོད་རྒུས་ཐག་གཅོད་དང་། ས་གནས་ཁག་གི་སྔོན་གཤེཌ་དཔའ་བོའི་དྲན་གསོའི་སྒྲིག་བཀོད་འཛུགས་སྐྲུན་གྱི་ཐུན་མོང་དགོས་མཁོ་དང་ཟུང་འབྲེལ་བྱས་ཏེ། ཡོངས་ཁྱབ་ཏུ་སྤྱོད་གོ་ཆོད་པའི་ཐག་གཅོད་དང་དཔྱད་གཞིའི་ཇུས་གཞི་མཁོ་འདོན་བྱས་ཡོད།

《མཛུབ་ཁྲིད》ནང་། སྔོན་གཤེགས་དཔའ་བོའི་དྲན་གསོའི་སྒྲིག་བཀོད་འཆར་འགོད་འཛུགས་སྐྲུན་བྱེད་པར་དགོས་ངེས་དང་གྲོན་ཆུང་གི་རྩ་དོན་མཐའ་འཁྱོངས་བྱེད་པ་དང་། ས་གནས་དེ་གའི་གསར་བརྗེའི་ལོ་རྒྱུས་དང་། ས་ཁོངས་ཀྱི་ཁྱད་ཆོས། ཁྱད་ལྡན་རིག་གནས་ཀྱི་གཞི་རྒྱུ་བཅས་དང་ཟུང་འབྲེལ་གང་ལེགས་བྱེད་པ། བྱེད་ནུས་ས་ཁོངས་འཆར་འགོད་ལུགས་མཐུན་བྱེད་པ། ཨར་སྐྲུན་གཞི་རྒྱ་ཆེན་པོ་དང“ཆེ་རྔམ་ཕྱི་གཉེར”མི་བྱེད་པ། གཟབ་ནན་དང་། རྔམ་བརྗིད། གཙང་སྒྲིག་བཅས་ཀྱི་ཁོར་ཡུག་ཧུར་ཐག་བསྐྲུན་ནས་རྒྱལ་གཅེས་རིང་ལུགས་ཀྱི་སློབ་གསོའི་གཡུལ་ས་གཙོ་བོའི་ནུས་པ་འདོན་དགོས་པའི་བླང་བྱ་བཏོན་ཡོད།

(སྤེན་པ་ཚེ་རིང་གིས་བསྒྱུར)