འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་24ཉིན་གློག་འཕྲིན་འབྱོར་གསལ། གསར་འགོད་པར་རྒྱལ་ཁབ་ཤེས་བྱའི་བདག་དབང་ཅུས་ནས་ཤེས་རྟོགས་བྱུང་བར། ཟླ་11པའི་བར། རྒྱལ་ནང་གི་གོ་ཆོད་གསར་གཏོད་ཀྱི་ཁེ་བེད་བདག་ཐོབ་ཁྲོད་ཁེ་བེད་བདག་ཐོབ་དབང་མཁན་ཁེ་ལས་ཡིན་པའི་བསྡུར་གྲངས་ཀྱིས་བཟུང་ཚད་73.5%ཟིན་པ་དེ་ལོ་གོང་མའི་དུས་མཚུངས་ལས་བརྒྱ་ཆའི་གྲངས་2.5འཕར་ཡོད། ཁེ་ལས་འབྲིང་ཆུང་གིས་ཁེ་བེད་བདག་ཐོབ་ཞིབ་སྤེལ་བྱེད་པའི་སྒུལ་ཤུགས་རྒྱུན་ཆད་མེད་པར་ཆེ་རུ་ཕྱིན་པ་དང་། 2024ལོར་རང་རྒྱལ་གྱི་ཁེ་ལས་འབྲིང་ཆུང་གི་གོ་ཆོད་གསར་གཏོད་ཀྱི་ཁེ་བེད་བདག་ཐོབ་ནང་རང་ཚུགས་ཞིབ་སྤེལ་ལས་ཐོན་པའི་བསྡུར་གྲངས་75.3%ཟིན་པ་དེ་ལོ་གོང་མ་ལས་བརྒྱ་ཆའི་གྲངས་3.9འཕར་བ་དང་ཞིབ་སྤེལ་འགྲོ་གྲོན་སྒོར་ཁྲི་100ཡན་བཏང་བའི་བསྡུར་གྲངས་16.8%ཟིན་པ་དེ་ལོ་གོང་མ་ལས་བརྒྱ་ཆའི་གྲངས་0.6འཕར་ཡོད།

རང་རྒྱལ་གྱི་ཁེ་ལས་འབྲིང་ཆུང་གི་གསར་གཏོད་ཀྱི་ཁེ་བེད་བདག་ཐོབ་ཐོན་ལས་ཅན་དུ་འགྱུར་བའི་ཆུ་ཚད་མུ་མཐུད་མཐོ་རུ་ཕྱིན་ཡོད། 2024ལོར་ཁེ་ལས་འབྲིང་ཆུང་གི་གོ་ཆོད་གསར་གཏོད་ཀྱི་ཁེ་བེད་བདག་ཐོབ་ཐོན་ལས་ཅན་དུ་གྱུར་ཚད་55.1%ཟིན་པ་དེ་ལོ་གོང་མ་ལས་བརྒྱ་ཆའི་གྲངས་3.6འཕར་ཡོད། དེའི་ནང་ཁེ་ལས་ཆུང་གྲས་དང་ཕྲན་ཚེགས་ཁེ་ལས་ཀྱི་གསར་གཏོད་ཁེ་བེད་བདག་ཐོབ་ཐོན་ལས་ཅན་དུ་གྱུར་ཚད་57.8%དང་36.7%ཟིན་ནས་ལོ་གཉིས་བསྟུད་མར་འཕར་བ་དང་ཆབས་ཅིག“ལོ་ལྔ་ཚན་བཅུ་བཞི་པ”ཚུན་གྱི་ཟིན་ཐོ་གསར་པ་བཏོད་ཡོད། 2024ལོར་ཁེ་ལས་འབྲིང་ཆུང་ལ་ཁེ་བེད་བདག་ཐོབ་ཀྱི་དབང་ཆར་བཙན་གནོད་ཕོག་རྗེས་དབང་སྲུང་བྱེད་ཐབས་སྤྱད་པའི་བསྡུར་གྲངས་84%བཟུང་བ་དེ་ལོ་གོང་མ་ལས་བརྒྱ་ཆའི་གྲངས་1.3འཕར་ཡོད། ཁེ་ལས་འབྲིང་ཆུང་བཅུ་ཆ་བཞི་ཙམ་ལ་ཆེད་བསྐོས་སམ་ཡང་ན་ལས་འགན་གཅིག་ལྕོགས་ཀྱི་ཤེས་བྱའི་བདག་དབང་གི་དོ་དམ་སྡེ་ཚན་བཙུགས་ཡོད།

རྒྱལ་ཁབ་ཤེས་བྱའི་བདག་དབང་ཅུས་སོགས་སྡེ་ཚན་དང་ས་གནས་ཀྱིས་ཁེ་ལས་འབྲིང་ཆུང་ཁྲི་2ཙམ་སྒྲིག་འཛུགས་བྱས་ཏེ་ཁེ་བེད་བདག་ཐོབ་ཐོན་ལས་ཅན་ལ་བརྟེན་ནས་ཁེ་ལས་འབྲིང་ཆུང་འཚར་ལོངས་ཡོང་བའི་འཆར་གཞིའི་ནང་ཞུགས་ཡོད། འདི་ལོའི་དུས་ཚིགས་དང་པོ་ནས་གསུམ་པའི་བར་ཁེ་ལས་འབྲིང་ཆུང་ལ་ཕྱོགས་པའི་ཀུན་ཕན་རང་བཞིན་གྱི་དངུལ་བུན་གྱིས་ཁེ་ལས་ཁྲི་2.6ལ་ཕན་པ་ཐོབ་ནས་ཁེ་ལས་ལ་ཕན་པ་འདོགས་པའི་བསྡོམས་འབོར་གྱི་80%བཟུང་སྟེ་གསར་གཏོད་རྣམ་པའི་ཁེ་ལས་འབྲིང་ཆུང་གིས་ཤེས་བྱའི་བདག་དབང་སྤྱད་ནས་མ་དངུལ་བསྡུ་རྒྱུག་ངང་འཕེལ་རྒྱས་གཏོང་བར་རྒྱབ་སྐྱོར་ནུས་ལྡན་བྱས་ཡོད། ངོས་འཛིན་གཏན་འཁེལ་བྱ་རྩིས་ཡོད་པའི་2024ལོའི་ལོ་འཁོར་གྱི་ཁེ་བེད་བདག་ཐོབ་ཀྱི་འདུས་ཆེའི་ཐོན་རྫས་ཁྲོད་76%ནི་ཁེ་ལས་འབྲིང་ཆུང་ནས་ཐོན་པ་དང་ལོ་འཁོར་གྱི་ཐོན་རྫས་རིན་ཐང་བསྡོམས་འབོར་སྒོར་དུང་ཕྱུར་3100ལྷག་ཙམ་ཟིན་ནས་འཕར་ཚད་20%ལྷག་ཙམ་ཟིན་ཏེ་ཁེ་བེད་བདག་ཐོབ་ཐོན་རྫས་ཅན་དང་ཐོན་ལས་ཅན་གྱིས་ཁེ་ལས་འབྲིང་ཆུང་འཕེལ་རྒྱས་དང་སྟོབས་ཆེར་འགྲོ་རྒྱུར་སྔར་བས་རམ་འདེགས་ཐུབ་ཡོད་པ་རེད།