“ཀྲུང་གོར་བརྟན་ལ་ཐོགས་མེད་ཀྱི་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་གྱི་མ་ལག་ལྡན་ཡོད། ཀྲུང་གོས་ཐོན་སྐྱེད་ནུས་ཤུགས་གསར་མ་མགྱོགས་མྱུར་འཕེལ་རྒྱས་བཏང་ནས་འབྱུང་འགྱུར་གྱི་འཕེལ་རྒྱས་དེ་ཚན་རྩལ་གསར་གཏོད་དང་རྒྱུན་མཐུད་ཆོག་པའི་འཕེལ་རྒྱས་སོགས་ཁྱད་ཆོས་སུ་བྱ་རྒྱུ་རེད། ཀྲུང་གོའི་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ཀྱི་མདུན་ལམ་ལ་ང་ཚོས་ལྟ་སྟངས་ཡག་པོ་འཛིན་གྱི་ཡོད”ཅེས་སོ་ཏི་ཨ་རབ་རྒྱལ་ཁབ་རྡོ་སྣུམ་ཀུང་སིའི(གཤམ་དུ“སོ་ཏི་ཨ་རབ་ཨ་མེ་ཀུང་སི”ཞེས་བསྡུ་རྒྱུ)གཤམ་འོག་ལས་སྒོའི་ཙུང་ཚའེ་མུའུ་ཧན་མོ་ཏེ·ཁ་ཐ་ཉིས་ཉིན་ཤས་གོང་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས་དེ་ལྟར་བརྗོད།

སོ་ཏི་ཨ་རབ་ཨ་མེ་ཀུང་སི་ནི་གོ་ལ་ཧྲིལ་པོའི་གཞི་གཅིག་ཅན་གྱི་ནུས་རྒྱུ་དང་རྫས་འགྱུར་བཟོ་ལས་ཐོན་རྫས་ཀྱི་ཁེ་ལས་ཤིག་ཡིན་པ་དང་ཀུང་སིའི་གཤམ་འོག་ལས་སྒོ་གཙོ་བོ་ནུས་རྒྱུ་ཚོང་དོན་དང་རྡོ་སྣུམ་ཐོན་རྫས་ཐོན་སྐྱེད་དང་དེ་བཞིན་སིལ་ཚོང་ལས་སྒོ་སོགས་སུ་གཅིག་སྡུད་བྱས་ཡོད་པ་རེད། སོ་ཏི་ཨ་རབ་ཨ་མེ་ཀུང་སི་དང་ཀྲུང་གོའི་རོགས་ཟླའི་དབར་མཉམ་ལས་ཀྱི་འབྲེལ་བ་ཡུན་རིང་ལྡན་ཡོད། ཁ་ཐ་ཉི་ཡིས། ཀྲུང་གོའི་ཡངས་ཤིང་རྒྱ་ཆེ་བའི་ཁྲོམ་ར་དང་། སྣ་ཁ་འཛོམས་པའི་བཟོ་སྐྲུན་ལས་རིགས་ཀྱི་མ་ལག ཕུན་སུམ་ཚོགས་པའི་ངལ་རྩོལ་ནུས་ཤུགས་ཐོན་ཁུངས། ཤེས་ལྡན་མི་སྣ་གྲབས་གསོག་བཅས་ཀྱིས་ཕྱི་རྒྱལ་གྱི་མ་འཇོག་ཁེ་ལས་ཀྲུང་གོར་འཕེལ་རྒྱས་འགྲོ་བར་གོ་སྐབས་ཧ་ཅང་ཆེན་པོ་མཁོ་འདོན་བྱས་ཡོད་ཅེས་བརྗོད།

2016ལོར། ཀྲུང་གོ་རྡོ་སྣུམ་རྫས་འགྱུར་དང་སོ་ཏི་ཨ་རབ་ཨ་མེ་ཀུང་སིས་ཐུན་མོང་ཐོག་མ་དངུལ་བཏང་ནས་བཙུགས་པའི་ཡན་པུའུ་བཙོ་སྦྱངས་བཟོ་གྲྭའི་རྣམ་གྲངས་དངོས་སུ་ཐོན་སྐྱེད་བྱེད་འགོ་ཚུགས་པ་དང་། ཧྥུའུ་ཅན་ཞིང་ཆེན་དང་། ཀྲུང་གོ་རྡོ་སྣུམ་རྫས་འགྱུར། སོ་ཏི་ཨ་རབ་ཨ་མེ་ཀུང་སི་བཅས་ཀྱིས་མ་རྩ་མཉམ་འཇོག་བྱས་ནས་བསྐྲུན་པའི་ཧྥུའུ་ཅན་ཀུའུ་ལུའེ་བཙོ་སྦྱངས་དང་རྫས་འགྱུར་གཞི་གཅིག་ཅན་གྱི་ལས་གྲྭའི་དུས་ཐེངས་གཉིས་པའི་རྣམ་གྲངས་2024ལོའི་ཟླ་11ལ་ལས་འགོ་ཚུགས་ཡོད། ཁ་ཐ་ཉི་ཡིས“མཉམ་ལས་དེ་དག་གིས་ཞུགས་མཁན་ཕྱོགས་ཀྱི་ལེགས་ཆ་གསབ་རེས་ལ་སྐུལ་མ་ཐེབས་པ་དང་གཉིས་ཁེ་གཉིས་ཕན་བྱུང་ནས་སོ་ཏི་ཨ་རབ་དང་ཀྲུང་གོའི་མཉམ་ལས་ཀྱི་མཛེས་སྡུག་ལྡན་པའི་ལེའུ་ཐུན་མོང་ཐོག་བརྩམས་ཡོད”ཅེས་བཤད།

ཁ་ཐ་ཉི་ཡིས། སོ་ཏི་ཨ་རབ་ཨ་མེ་ཀུང་སིས་ནུས་རྒྱུའི་དགོས་མཁོ་དང་། དཔལ་འབྱོར་འཕར་ཚད། མི་འབོར་གྱི་གཞི་ཁྱོན། འཚོ་བའི་ཆུ་ཚད་སོགས་ཕྱོགས་ཚང་མའི་ཐད་ནས་ཕྱི་ཕྱོགས་མ་འཇོག་གི་འཐབ་ཇུས་ལ་ཕྱོགས་བསྡུས་བསམ་གཞིག་བྱེད་ཀྱི་ཡོད། “ཕྱོགས་བསྡུས་བཟོ་སྐྲུན་ལས་རིགས་ཕྱི་མ་ནས་སྔོན་ཐོན་གྱི་བཙོག་འབུད་ཉུང་གཏོང་ལག་རྩལ་བར་དང་། དེ་ནས་གྲངས་འཛིན་ཁྱབ་ཁོངས་བར་ཀྲུང་གོ་ནི་ང་ཚོའི་འཐབ་ཇུས་རོགས་ཟླ་གལ་ཆེན་གྱི་གྲས་ཤིག་ཡིན”གོ་ལ་ཧྲིལ་པོའི་དཔལ་འབྱོར་དངོས་ཚན་ཆེ་གྲས་གཉིས་པ་ཡིན་པའི་ངོས་ནས་ཀྲུང་གོས་ཨེ་ཤེ་ཡ་དང་ཞི་བདེ་རྒྱ་མཚོ་ཆེ་མོ་ཁུལ་དུ་གལ་འགངས་ཆེ་བའི་ནུས་པ་འདོན་སྤེལ་བྱེད་ཀྱི་ཡོད། “སོ་ཏི་ཨ་རབ་ཨ་མེ་ཀུང་སིའི་གོ་ལ་ཧྲིལ་པོའི་མ་འཇོག་འཐབ་ཇུས་ཁྲོད་ཨེ་ཤེ་ཡ་དང་ལྷག་པར་དུ་ཀྲུང་གོར་དམིགས་བསལ་གྱི་གནས་བབ་ལྡན་ཡོད། ང་ཚོ་ཀྲུང་གོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་འཕེལ་རིམ་ཁྲོད་མཉམ་ལས་ཀྱི་རོགས་ཟླར་འགྱུར་རྒྱུའི་རེ་བ་ཡོད”ཅེས་བརྗོད།

ཁ་ཐ་ཉི་ཡིས། སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་གྱི་སྒྲོམ་གཞིའི་འོག་སོ་ཏི་ཨ་རབ་དང་ཀྲུང་གོའི་མཉམ་ལས་ཀྱི་སྤུས་ཚད་ཟམ་མི་ཆད་པར་མཐོ་རུ་དང་རིམ་སྤོར་བྱུང་བ་མ་ཟད། གྲངས་འཛིན་དང་རྒྱུན་མཐུད་ཆོག་པའི་འཕེལ་རྒྱས་ཀྱི་ཁྱབ་ཁོངས་སུ་ཡང་རྒྱ་ཆེར་ཕྱིན་ཡོད། ཕྱོགས་གཉིས་པོས་གྲངས་འཛིན་དང་། འཕྲིན་གཏོང་། རིག་ལྡན་གྲོང་ཁྱེར་སོགས་ཀྱི་འབྲེལ་ཡོད་ལག་རྩལ་སྤྱོད་པ་དང་གློག་འཕྲིན་གྱི་རྨང་གཞིའི་སྒྲིག་བཀོད་དང་དྲ་ཐོག་ཚོང་དོན་ལས་སྟེགས་ལ་བརྟེན་ནས་ཕན་ཚུན་སྦྲེལ་མཐུད་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་རྒྱུ་རེད།