འདི་ལོའི་ཟླ་5པར་ཀྲུང་གོའི་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཧང་ག་རིར་རྒྱལ་དོན་འཚམས་འདྲི་གནང་བ་དེ་ནི་ལོ་རྒྱུས་རང་བཞིན་གྱི་འཚམས་འདྲི་ཞིག་རེད། པུ་ཏ་ཕེ་སིར་རྒྱལ་ཁབ་གཉིས་པོའི་འགོ་ཁྲིད་ཀྱིས་ཧང་ཀྲུང་འབྲེལ་བ་དེ་དུས་རབས་གསར་པའི་དུས་དང་རྣམ་པ་ཀུན་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བར་རིམ་སྤོར་བྱས་ནས་རྒྱལ་ཁབ་གཉིས་ཀྱི་མཉམ་ལས་ལ་སྒུལ་ཤུགས་ཆེན་པོ་གསར་པ་བསྣན་རྒྱུའི་ཁྱབ་བསྒྲགས་གནང་བ་རེད། ད་ཐེངས་ཀྱི་འཚམས་འདྲིའི་རིང་ང་ལ་ཧང་ག་རིའི་ཙུང་ལི་ཨོར་པན་གྱི་རྒྱ་སྐད་སྐད་སྒྱུར་གྱི་འགན་འཁུར་བའི་གོ་སྐབས་བྱུང་བ་དང་ཀྲུའུ་ཞི་ཞི་ཅིན་ཕིང་གི་རྒྱལ་ཁབ་ཆེན་པོའི་གཙོ་འཛིན་གྱི་ཉམས་བཟང་སླར་ཡང་ཐག་ཉེ་ས་ནས་ཚོར་བྱུང་།

2009ལོར། སྐབས་དེ་དུས་ཀྲུང་གོའི་རྒྱལ་ཁབ་ཀྱི་ཀྲུའུ་ཞི་གཞོན་པའི་འགན་བཞེས་བཞིན་པའི་ཞི་ཅིན་ཕིང་གིས་ཧང་ག་རིར་འཚམས་འདྲི་གནང་སྐབས། ང་རང་གིས་སྐད་སྒྱུར་བའི་མིང་ཐོག་ནས་ཁོང་ཧང་ག་རིའི་ཁྱད་ཆོས་ཀྱིས་ཕྱུག་པའི་མི་རིགས་རི་མོའི་བར་ཁྱམས་ལ་གཟིགས་སྐོར་གནང་བར་ཕེབས་རོགས་ཐེངས་དང་པོ་ཞུས་པ་ཡིན། ངས་ས་གནས་ས་ཐོག་ཏུ་འགྲེལ་བཤད་རྒྱག་སྐབས་ཁོང་གིས་ནན་ཏན་ངང་གསན་པ་དང་ཧང་ག་རིའི་ལོ་རྒྱུས་རིག་གནས་ལ་སྤྲོ་སྣང་ཆེན་པོ་གནང་གི་འདུག ཁོང་ནི་མཁྱེན་རྒྱ་ཡངས་པའི་འགོ་ཁྲིད་གཅིག་ཡིན་པ་ཚོར་བྱུང་།

ཧང་ག་རིར་རྒྱལ་དོན་འཚམས་འདྲི་གནང་ཉེའི་སྐབས་སུ་ཀྲུའུ་ཞི་ཞི་ཅིན་ཕིང་གིས《ཧང་ག་རིའི་མི་རིགས་ཚགས་པར》ཐོག《ལག་གདང་སྦྲེལ་ནས་ཀྲུང་ཧང་འབྲེལ་བ“བགྲོད་ལམ་ཡག་ཤོས”ཐོག་བསྐྱོད་རྒྱུར་སྣེ་ཁྲིད་བྱེད་དགོས》ཞེས་འགོ་བརྗོད་དུ་འཁོད་པའི་མཚན་བཀོད་རྩོམ་ཡིག་སྤེལ་ཏེ་ཀྲུང་ཧང་དབར་ཕྱི་འབྲེལ་བཙུགས་ནས་ལོ་75རིང་གི་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་ཀྱི་གྲུབ་འབྲས་ཐོབ་པའི་ཉམས་མྱོང་དང་གཡུར་ཟའི་གྲུབ་འབྲས་ཕྱོགས་སྡོམ་གཏིང་ཟབ་གནང་བ་རེད། ངས་རྩོམ་ཡིག་དེ་ཧང་ག་རིའི་ཡི་གེར་བསྒྱུར་བའི་འགན་འཁུར་བ་ཡིན། དེ་ནི་ངའི་ངོས་ནས་བརྗོད་ན་སློབ་སྦྱོང་གི་བརྒྱུད་རིམ་ཞིག་ཡིན་པ་དང་དེ་ལས་ཀྲུའུ་ཞི་ཞི་ཅིན་ཕིང་གི་གཟིགས་རྒྱང་དང་དགོངས་པར་ཤེས་རྟོགས་དེ་བས་མང་བ་བྱུང་།

དོན་དངོས་ཐོག་འདི་ནི་ངས་ཀྲུའུ་ཞི་ཞི་ཅིན་ཕིང་གི་བརྩམས་ཆོས་དང་རྩོམ་ཡིག་ཡིག་སྒྱུར་བྱེད་ཐེངས་དང་པོ་མིན། ང་རང《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》ཞེས་པའི་ཧང་ག་རིའི་ཡི་གེའི་དཔར་མའི་ཡིག་སྒྱུར་ལས་དོན་ནང་ཞུགས་མྱོང་ཡོད། ཀྲུའུ་ཞི་ཞི་ཅིན་ཕིང་གིས་རྣམ་བཤད་ནང་ཀྲུང་གོའི་ལོ་རྒྱུས་དང་རིག་གནས་ཀྱི་གཏམ་རྒྱུད་མང་པོ་དྲངས་ཡོད་པས། ངས་དཔྱད་གཞིའི་ཡིག་རིགས་ལ་བརྩོན་ཞིབ་བྱས་ནས་གནད་ལ་འཁེལ་ཤོས་ཐོག་ནས་མཚོན་པར་བྱས་པ་ཡིན། ཡིག་སྒྱུར་བྱེད་པའི་བརྒྱུད་རིམ་ནང་ངའི་བློ་སྒོ་ཆེན་པོ་ཕྱེ་སོང་།

ཀྲུའུ་ཞི་ཞི་ཅིན་ཕིང་གིས་ནན་བཤད་གནང་བའི“རྒྱལ་ཁབ་དབར་གྱི་མཛའ་གྲོགས་འབྲེལ་བའི་འགག་རྩ་མི་དམངས་དབར་གྱི་མཛའ་གཅུགས་ལ་རག་ལུས་པ་དང་། མི་དམངས་དབར་གྱི་མཛའ་གཅུགས་ཀྱི་འགག་རྩ་དམངས་སེམས་གཅིག་སྦྲེལ་ལ་རག་ལུས་ཡོད”ཅེས་པའི་གཏམ་དེར་ང་ཧ་ཅང་དགའ་པོ་ཡོད། ཧང་ཀྲུང་འབྲེལ་བ“བགྲོད་ལམ་ཡག་ཤོས”ཐོག་སྐྱོད་པར་དམངས་སེམས་གཅིག་སྦྲེལ་ནི་རྨང་རྡོ་གལ་ཆེན་ཞིག་རེད། ཧང་ག་རིའི་མི་དམངས་དང་ཀྲུང་གོའི་མི་དམངས་དབར་འདྲ་བའི་ཆ་ཧ་ཅང་མང་པོ་ཡོད་པ་དང་ཚང་མས་ཁྱིམ་ཚང་འཆམ་མཐུན་ལ་མཐོང་ཆེན་པོ་བྱེད་ཀྱི་ཡོད། ཧང་ག་རིའི་མི་དམངས་ཀྱིས་ཀྲུང་གོའི་རིག་གནས་ལ་ཧ་ཅང་དགའ་པོ་བྱེད་ཅིང་། ཧང་ག་རིར་ཁུང་ཙི་སློབ་གླིང་དང་ཀྲུང་ལུགས་གསོ་རིག་སྨན་བཅོས་ཁང་མང་པོ་ཡོད་པ་དང་ཧང་ཀྲུང་སྐད་གཉིས་སློབ་གྲྭས་རྒྱལ་ཁབ་གཉིས་ཀྱི་རིག་གནས་སྤེལ་རེས་ཐད་ན་གཞོན་ཤེས་ལྡན་པ་མང་པོ་གསོ་སྐྱོང་བྱས་ཡོད། ཧང་ག་རིའི་ཕྱི་ཁོངས་ཀྲུང་གོ་བས་ཀྱང་རྒྱལ་ཁབ་གཉིས་ཀྱི་མཛའ་གྲོགས་ཟབ་ཏུ་གཏོང་ཆེད་ལེགས་སྐྱེས་ཧ་ཅང་ཆེན་པོ་ཕུལ་ཡོད། མི་ཆོས་རིག་གནས་ཀྱི་མཉམ་ལས་སྤེལ་རེས་ལ་རྒྱུན་ཆད་མེད་པར་ཤུགས་སྣོན་བརྒྱབ་ནས་རྒྱལ་ཁབ་གཉིས་ཀྱི་མཉམ་ལས་ལ་རྨང་གཞི་བརྟན་པོ་ཞིག་བཏིང་ཡོད།

ང་དང་ཀྲུང་གོའི་ལས་དབང་ནི་སློབ་ཆུང་ལོ་རིམ་གསུམ་པའི་སྐབས་འགོ་ཚུགས་ཡོད། སྐབས་དེ་དུས་དཔེ་མཛོད་ཁང་ནས་ཀྲུང་གོའི་དམངས་ཁྲོད་ཀྱི་གཏམ་རྒྱུད་མང་པོ་ཞིག་བལྟས་པ་ལས་ངར་བག་ཆགས་ཟབ་མོ་བཞག་བྱུང་། མཐོ་རིམ་སློབ་འབྲིང་ཐོན་སྐབས་ངས་ཀྲུང་གོར་སློབ་སྦྱོང་བྱེད་པར་འགྲོ་བའི་གོ་སྐབས་བརྩོན་ལེན་བྱས་ནས་ཀྲུང་གོར་ལོ་དྲུག་བསྡད་པས་ངའི་མི་ཚེར་ཤུགས་རྐྱེན་ཆེན་པོ་ཐེབས་བྱུང་། ད་ལྟའི་བར་ང་སྔར་བཞིན་ཀྲུང་གོའི་དམངས་ཁྲོད་གཏམ་རྒྱུད་དང་བྱིས་པའི་རྩོམ་རིག་ཀློག་རྒྱུར་དགའ་པོ་ཡོད་ལ་དེ་དག་ཧང་ག་རིའི་ཡི་གེར་བསྒྱུར་བ་མ་ཟད། ད་དུང་ཧང་ག་རིའི་ཕྲུ་གུ་ཚོ་སྒྲིག་འཛུགས་བྱས་ནས་ལྟ་ཀློག་བྱེད་དུ་འཇུག་གི་ཡོད། ཁོང་ཚོས་ཀྱང་ང་དང་འདྲ་བར་གཏམ་རྒྱུད་འདི་དག་ལ་དགའ་པོ་བྱེད་པས་ང་རང་དགའ་ཚོར་ཆེན་པོ་སྐྱེ་གི་འདུག ཀྲུང་གོ་བས“ནམ་འཚོའི་བར་དུ་སློབ་སྦྱོང་བྱེད”ཅེས་བརྗོད་ཀྱི་ཡོད། ངས་སྔར་བཞིན་རྒྱུན་ཆད་མེད་པར་སློབ་སྦྱོང་དང་ཡར་རྒྱས་བརྩོན་ལེན་བྱེད་བཞིན་ཡོད། རང་ཉིད་ཀྱིས་སྒྲུབ་པའི་ལས་དོན་བརྒྱུད་རྒྱལ་ཁབ་གཉིས་པོའི་མི་དམངས་དབར་ཕན་ཚུན་ཤེས་རྟོགས་ཟབ་ཏུ་བཏང་ནས་གྲོགས་པོ་ཀྲུང་གོ་བ་དང་མཉམ་དུ་མཛའ་གྲོགས་འགྲོ་འོང་གི་གཏམ་རྒྱུད་གསར་པ་མུ་མཐུད་བརྩམ་རྒྱུའི་རེ་བ་བྱེད་ཀྱི་ཡོད།

（རྩོམ་པ་པོ་ནི་ཧང་ག་རིའི་རྒྱ་རིག་པ་མཁས་ཅན་དང་ལོ་ཙཱ་བ་ཡིན། འདི་ག་ཚགས་པར་གྱི་གསར་འགོད་པ་ལིའུ་ཀྲུང་ཧྭ་དང་ཡུས་ལི་མིན་གྱིས་བཅར་འདྲི་ལེགས་སྒྲིག་བྱས） （ལྷག་ཚེ་དང་བུ་ཁྲིད་ཀྱིས་སྒྱུར་ཞུས་བྱས）