ཤིན་ཧྭ་གསར་འགྱུར་ཁང་པེ་ཅིང་ནས་ཟླ་12ཚེས་23ཉིན་གློག་འཕྲིན་འབྱོར་གསལ། 2024ལོར་རང་རྒྱལ་གྱི་ས་ཁོངས་ལས་བརྒལ་བའི་མི་སྣ་འགྲུལ་བཞུད་བྱེད་ཚད་སྔོན་དཔག་བྱས་ན་མི་ཐེངས་དུང་ཕྱུར་645ཙམ་ཟིན་རྒྱུ་ཡིན་པ་དེ་དུས་མཚུངས་ལས་5.2%ཡས་མས་འཕར་རྒྱུ་རེད།

འདི་ནི་ཚེས་23ཉིན་གསར་འགོད་པས་འགྲིམ་འགྲུལ་སྐྱེལ་འདྲེན་པུས་འཚོགས་པའི་2025ལོའི་རྒྱལ་ཡོངས་ཀྱི་འགྲིམ་འགྲུལ་སྐྱེལ་འདྲེན་ལས་དོན་ཚོགས་འདུ་ནས་ཤེས་རྟོགས་བྱུང་བ་ཞིག་རེད།

འགྲིམ་འགྲུལ་སྐྱེལ་འདྲེན་པུའི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། ད་ལོ་རང་རྒྱལ་གྱི་དངོས་ཟོག་སྐྱེལ་འདྲེན་བྱེད་ཚད་འཕར་རྒྱུ་རྒྱུན་འཁྱོངས་ཐུབ་ཡོད་ཅིང་། སྔོན་དཔག་བྱས་ན་ལོ་ཧྲིལ་པོར་ཚོང་གཉེར་རང་བཞིན་གྱི་དངོས་ཟོག་སྐྱེལ་འདྲེན་བྱེད་ཚད་ཏུན་དུང་ཕྱུར་565ཙམ་ཟིན་རྒྱུ་ཡིན་པ་དེ་དུས་མཚུངས་ལས་3.5%ཡས་མས་འཕར་རྒྱུ་དང་། གྲུ་ཁའི་དངོས་ཟོག་འདོན་འཇུག་བྱེད་ཚད་ཏུན་དུང་ཕྱུར་175ཙམ་ཟིན་རྒྱུ་ཡིན་པ་དེ་དུས་མཚུངས་ལས་3.4%ཡས་མས་འཕར་རྒྱུ་ཡིན་པ་དེའི་ནང་། རྒྱལ་ནང་ཚོང་དོན་དང་ཕྱི་ཕྱོགས་ཚོང་དོན་གྱི་འདོན་འཇུག་བྱེད་ཚད་དུས་མཚུངས་ལས་1.9%ཡས་མས་དང་7%ཡས་མས་སོ་སོར་འཕར་རྒྱུ་རེད།

འགན་འཁུར་བ་དེས་བརྗོད་དོན། སྔོན་དཔག་བྱས་ན་ལོ་ཧྲིལ་པོར་འགྲིམ་འགྲུལ་གཏན་འཇགས་རྒྱུ་ནོར་གྱི་མ་དངུལ་སྒོར་དུང་ཕྱུར་ཁྲི་3.8ཙམ་གཏོང་རྒྱུ་ཡིན་ཞིང་། ལྕགས་ལམ་གྱི་ལས་གཉེར་ལམ་ཚད་སྤྱི་ལེ་ཁྲི་16ལས་བརྒལ་བ་དེའི་ནང་མྱུར་བགྲོད་ལྕགས་ལམ་སྤྱི་ལེ་ཁྲི་4.6ལས་བརྒལ་བ་དང་། གཞུང་ལམ་ཐོག་རླངས་འཁོར་ཤར་གཏོང་ཐུབ་པའི་ལམ་ཚད་སྤྱི་ལེ་ཁྲི་5ཙམ་གསར་དུ་འཕར་བ་དེའི་ནང་གསར་སྐྲུན་དང་། བསྐྱར་སྐྲུན། རྒྱས་སྐྲུན་བཅས་བྱས་པའི་མྱུར་བགྲོད་གཞུང་ལམ་སྤྱི་ལེ་8000ལས་བརྒལ་བ། དམངས་སྤྱོད་སྐྱེལ་འདྲེན་གནམ་ཐང་5ལ་གསར་དུ་ལག་ཁྱེར་སྤྲད་པ་བཅས་རེད།

འགྲིམ་འགྲུལ་གསར་གཏོད་འཕེལ་རྒྱས་ཀྱི་ནུས་པའི་ཐད་འགན་འཁུར་བ་དེས་བརྗོད་དོན། ད་ལོ་རང་རྒྱལ་གྱིས་རིག་ལྡན་ལྗང་མདོག་བདེ་འཇགས་རང་བརྟེན་ཚོད་འཛིན་ཐུབ་པའི་རང་འགུལ་ཅན་གྱི་གྲུ་ཁ་ཁག་གཅིག་བསྐྲུན་པས། རྒྱལ་ཡོངས་ཀྱི་གློག་རྡུལ་གྲུ་ལམ་པར་རིས་ནས་ཡོངས་བསྒྲགས་བྱས་པའི་ལམ་ཚད་སྤྱི་ལེ་7800ལས་བརྒལ་ཡོད། རིམ་རྩིས་བརྒྱབ་ན་C909གནམ་གྲུ་བདེ་འཇགས་འཕུར་སྐྱོད་བྱས་ཚད་ཆུ་ཚོད་ཁྲི་50ལས་བརྒལ་བ་དང་C919ཚོང་ལས་འཕུར་སྐྱོད་བྱས་ཚད་ཆུ་ཚོད་ཁྲི་1.7ལས་བརྒལ་ནས་བདེ་འཇགས་ངང་འགྲུལ་པ་མི་ཐེངས་ཁྲི་100ལྷག་ཙམ་སྐྱེལ་འདྲེན་བྱས་ཡོད། མི་མེད་གནམ་གྲུས་མྱུར་སྐྱེལ་བསྐུར་མ་ཁྲི་270ཙམ་སྐྱེལ་འདྲེན་བྱས་ཡོད་པ་རེད།

(ཚེ་རིང་བུ་ཁྲིད་ཀྱིས་བསྒྱུར། ལྷག་ཚེས་ཞུས)