འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་21ཉིན་གློག་འཕྲིན་འབྱོར་གསལ། ཚེས་20ཉིན། 2024ལོའི་ཀུའུ་ལིང་གླེང་སྟེགས་པེ་ཅིང་དུ་གཉེར་ཞིང་། “ཀུའུ་ལིང་གི་གྲོགས་པོའི”ཁོངས་མི་ཚུད་པའི་ཀྲུང་གོ་དང་ཨ་རི་རྒྱལ་ཁབ་གཉིས་པོའི་སྐུ་མགྲོན་150ལྷག་ཙམ་གླེང་སྟེགས་ལ་ཞུགས་ཏེ“ཀྲུང་གོ་དང་ཨ་རིའི་མཛའ་གྲོགས་སྤེལ་རེས་བརྟན་བགྲོད་རྒྱང་འཁྱོལ་ལ་སྐུལ་འདེད་ཧུར་ཐག་གཏོང་བ”དང“ཀྲུང་གོ་དང་ཨ་རིའི་ཡང་དག་མཉམ་གནས་ཀྱི་ལམ་བུ་ཐུན་མོང་ཐོག་འཚོལ་བ”སོགས་ཀྱི་གྲོས་དོན་གལ་ཆེན་ལ་དམིགས་ནས་སྤེལ་རེས་དང་གྲོས་བསྡུར་གཏིང་ཟབ་བྱས་པ་རེད།

ཀུའུ་ལིང་གི་གཏམ་རྒྱུད་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་ཀྲུང་གོ་དང་ཨ་རིའི་དམངས་ཁྲོད་ཀྱི་མཛའ་གྲོགས་སྤེལ་རེས་ལ་སྐུལ་འདེད་བཏང་གནང་བའི་གཏམ་སྙན་ཞིག་ཡིན་ཞིང་། དེ་ལས་རྒྱལ་ཁབ་གཉིས་པོའི་མི་དམངས་ཀྱི་ལྷག་བསམ་ཟོལ་མེད་ཀྱི་བརྩེ་སེམས་མཚོན་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀུའུ་ལིང་གི་གཏམ་རྒྱུད་ཡག་པོ་ཤོད་པ་དང་ཀུའུ་ལིང་གི་བརྩེ་སེམས་དང་ལས་འཕྲོའི་རྒྱུན་སྐྱོང་བའི་ཐད་ཐུགས་རེ་ནན་པོ་བཅོལ་གནང་ཡོད། མི་དམངས་ཉིན་རེའི་ཚགས་པར་གྱིས་ཀུའུ་ལིང་གི་གཏམ་རྒྱུད་ཀྱི་འགོ་འཛུགས་ས་དང་རྒྱུན་འཛིན་གྱི་བདེན་དཔང་བྱས་པ་དང་ཟིན་ཐོར་བཀོད་ཡོད་ལ། ཀུའུ་ལིང་གི་བརྩེ་སེམས་དང་ལས་འཕྲོ་ལས་མངོན་པའི་ཀྲུང་གོ་དང་ཨ་རིའི་མཛའ་གྲོགས་འགྲོ་འོང་གི་གཏམ་སྙན་དེ་བས་རྒྱུན་ཆད་མེད་པར་སྔོག་འདོན་དང་ཁྱབ་གདལ་བཏང་ཡོད། ཚོགས་ཞུགས་སྐུ་མགྲོན་ཚོས། སྨྱན་སྦྱོར་གྱིས་ཀུའུ་ལིང་གི་གཏམ་རྒྱུད་ཡག་པོ་བརྗོད་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་ཀྲུང་གོ་དང་ཨ་རིའི་དམངས་ཁྲོད་མཛའ་གྲོགས་སྤེལ་རེས་ལ་སྣེ་ཁྲིད་དང་སྐུལ་འདེད་བཏང་གནང་བའི་གཙོ་འཛིན་གྱི་ཉམས་འགྱུར་མངོན་པར་བྱེད་པ་དང་། བརྩེ་སེམས་དང་ལས་འཕྲོའི་རྒྱུན་བསྐྱངས་ནས་ཀྲུང་གོ་དང་ཨ་རིའི་དམངས་ཁྲོད་ཀྱི་མཛའ་གྲོགས་སྤེལ་རེས་ཀྱི་མི་སེམས་འགུལ་བའི་གཏམ་རྒྱུད་དེ་བས་མང་བ་སྔོག་འདོན་བྱེད་པ། ཀུའུ་ལིང་གི་ཕན་ནུས་ཤུགས་ཆེན་བཏོན་ནས་ཀྲུང་གོ་དང་ཨ་རིའི་དམངས་ཁྲོད་ཀྱི་མཛའ་གྲོགས་སྤེལ་རེས་ལ་སྐུལ་འདེད་གཏོང་བར་ཕན་པའི་ལས་སྟེགས་དང་འབྲེལ་ཟམ་ཧུར་ཐག་བསྐྲུན་ཏེ་དུས་སྐབས་གསར་པའི་ཀྲུང་གོ་དང་ཨ་རིའི་ཡང་དག་མཉམ་གནས་ཀྱི་ལམ་བུར་སྐྱོད་པར་རམ་འདེགས་བྱེད་དགོས་པ་བཅས་ཀྱི་ངོས་འཛིན་བྱས་ཡོད་པ་རེད། （པ་ཚེས་བསྒྱུར། པ་ཚེ་དང་པད་ཆོས་ཀྱིས་ཞུས）