ཤིན་ཧྭ་གསར་འགྱུར་ཁང་པེ་ཅིང་ནས་ཟླ་12ཚེས་23ཉིན་གློག་འཕྲིན་འབྱོར་གསལ། ཉིན་ཤས་གོང་། ཀྲུང་དབྱང་དམག་ཨུད་ཀྱིས《དམག་ཡོངས་དངོས་གཞི་ཅན་འཛུགས་སྐྱོང་གི་སྔོན་ཐོན་ཚན་པར་གཟེངས་བསྟོད་བྱ་རྒྱུའི་སྐོར་གྱི་བརྡ་ཁྱབ》བཀྲམ་ནས། དམག་ཡོངས་དངོས་གཞི་ཅན་འཛུགས་སྐྱོང་གི་སྔོན་ཐོན་ཚན་པ་10ལ་གཟེངས་བསྟོད་བྱས་པ་རེད།

བརྡ་ཁྱབ་ནང་བསྟན་དོན། ཉེ་བའི་ལོ་ཤས་རིང་། དམག་ཡོངས་ཀྱི་དཔུང་སྡེས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱེད་པ་དང་། ཞི་ཅིན་ཕིང་གི་དམག་དཔུང་སྟོབས་ཆེར་གཏོང་བའི་དགོངས་པ་ལག་བསྟར་གཏིང་ཟབ་བྱེད་པ། དུས་རབས་གསར་པའི་དམག་དོན་འཐབ་ཇུས་བྱེད་ཕྱོགས་ལག་བསྟར་གཏིང་ཟབ་བྱེད་པ། དམག་གྲབས་དམག་རྒྱག་གི་དུས་བབ་གསར་པ་དང་བླང་བྱ་གསར་པ་དང་འཚམ་གང་ཐུབ་བྱེད་པ། ཁྲིམས་ལྟར་དམག་སྐྱོང་གི་འཐབ་ཇུས་ཕྱོགས་ཡོངས་ནས་ཁོང་དུ་ཆུད་པ། དཔུང་སྡེའི་དོ་དམ་ལ་ཁྲིམས་ལྟར་ཤུགས་སྣོན་ནན་པོ་རྒྱག་པ། དམག་སྐྱོང་བྱ་ཐབས་ལ་རྩ་བའི་རང་བཞིན་གྱི་འགྱུར་ལྡོག་འགྲོ་རྒྱུར་མགྱོགས་མྱུར་སྐུལ་འདེད་གཏོང་བ། སྤྱོད་ཚུལ་དང་སྒྲིག་ཁྲིམས་སྔར་བས་ནན་དུ་གཏོང་བ། དཔུང་སྡེའི་སྒྲིག་ལམ་སྔར་བས་ཚད་ལྡན་དུ་གཏོང་བ་བཅས་བྱས་པར་དངོས་གཞི་ཅན་འཛུགས་སྐྱོང་གི་སྔོན་ཐོན་དཔེ་མཚོན་ཁག་གཅིག་ཐོན་ཡོད།

བརྡ་ཁྱབ་ནང་དམག་ཡོངས་ཀྱི་དཔུང་སྡེས་སྔོན་ཐོན་ཚན་པ་མིག་དཔེར་འཛིན་ཏེ། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར་བྱེད་པ་དང་། ཀྲུང་དབྱང་དམག་ཨུད་ཀྱི《དཔུང་སྡེ་དོ་དམ་ལ་ཕྱོགས་ཡོངས་ནས་ཤུགས་སྣོན་ནན་པོ་རྒྱག་རྒྱུའི་སྐོར་གྱི་བསམ་འཆར》དོན་འཁྱོལ་ནན་ཏན་བྱེད་པ། ཁྲིམས་ལྟར་དམག་སྐྱོང་གི་ཤུགས་རྒྱག་ས་དེ་དམག་གྲབས་དམག་རྒྱག་ལ་ཞབས་འདེགས་ཞུ་བའི་ཐད་འཇོག་རྒྱུ་མཐའ་འཁྱོངས་བྱེད་པ། དམག་དོན་བཅོས་སྐྱོང་ལ་ཕྱོགས་ཡོངས་ནས་ཤུགས་སྣོན་རྒྱག་པ། དོ་དམ་བྱེད་སྟངས་རྒྱུན་ཆད་མེད་པར་གསར་གཏོད་བཅས་བྱས་ནས། དམག་དཔུང་དངོས་གཞི་ཅན་འཛུགས་སྐྱོང་བྱེད་རྒྱུ་དེ་ཆུ་ཚད་དེ་བས་མཐོ་བའི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས་པའི་འབོད་སྐུལ་བྱས་པ་རེད།

（ལྷག་ཚེ་དང་བུ་ཁྲིད་ཀྱིས་སྒྱུར་ཞུས་བྱས）