འདི་ག་ཚགས་པར་ཁང་དུ་གློག་འཕྲིན་འབྱོར་གསལ། བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ད་ལོ་ཚུན་དུ་ཆབ་མདོ་གྲོང་ཁྱེར་གྱིས་རྒྱལ་ཁབ་དང་བོད་རང་སྐྱོང་ལྗོངས་ཀྱི“གཞི་ཁྱོན་ཆེན་པོས་སྒྲིག་ཆས་གསར་པར་བརྗེ་བ་དང་། འཛད་རྫས་རྙིང་པ་གསར་པར་བརྗེ་བའི”ལས་དོན་གྱི་བཀོད་སྒྲིག་བླང་བྱར་བརྡ་ལན་ཧུར་ཐག་ཞུས་ནས། རླངས་འཁོར་དང་། ཁྱིམ་ཆས། ས་མཐོའི་ཐབ་ཆས་སོགས་ཀྱི་འཛད་རྫས་རྙིང་པ་གསར་བརྗེའི་བྱེད་སྒོར་སྐུལ་འདེད་ཧུར་ཐག་བཏང་ནས་ཁྲོམ་རའི་འཛད་སྤྱོད་ཀྱི་མི་མངོན་པའི་སྟོབས་ཤུགས་སྔར་བས་འཕེལ་བར་བྱས་པས། འཛད་སྤྱོད་པར་ཕན་པ་སྔར་ལས་མང་བ་ཐོབ་ཡོད།
ཟླ་12ཚེས་8ཉིན། ཇ་རྟའི་ཐང་ཆེན་དུ་མི་ཚོགས་ཀྱིས་ཁེངས་ནས་འཁྲུག་ཆ་ཧ་ཅང་དོད་། ཆབ་མདོ་གྲོང་ཁྱེར་འཕེལ་སྒྱུར་ཨུ་ལྷན་དང་ཚོང་དོན་ཅུས་སོགས་སྡེ་ཚན་གྱིས་མཉམ་དུ་དྲིལ་བསྒྲགས་ས་ཚུགས་24བཙུགས་ནས། “སྐྱེལ་འདྲེན་ཟོག་འཁོར་དང་། བེད་མེད་རླངས་འཁོར། འཛད་སྤྱོད་མི་སྒེར་གྱི་རླངས་འཁོར། ཁྱིམ་སྤྱོད་གློག་ཆས། ཁྱིམ་ཆས་བཅས་རྙིང་པ”སོགས་ཁྱབ་ཁོངས་ཀྱི་རྙིང་པ་གསར་བརྗེའི་སྲིད་ཇུས་གསར་པ་དྲིལ་བསྒྲགས་བྱས་ཏེ་གྲོང་མིར་རྙིང་པ་གསར་བརྗེར་སྟབས་བདེ་ཡོང་བ་དང་གཟིགས་སྐྱོང་སྐོར་ཕྱོགས་ཡོངས་ནས་ངོ་སྤྲོད་བྱས་ཡོད།
ས་མཐོའི་ཐབ་ཆས་རྙིང་པ་གསར་པར་བརྗེ་བའི་ཁྲོམ་བཀྱག་མདུན་དུ། ལས་དོན་པས་ངང་རྒྱུད་རིང་པོས་གྲོང་མིའི་དྲི་བར་ལན་བཏབ་ནས་བཟོ་རྟགས་མི་འདྲ་བའི་ཐབ་ཆས་གསར་རྙིང་བརྗེ་བའི་ལས་རིམ་དང་ཁ་གསབ་ཀྱི་སྲིད་ཇུས་ངོ་སྤྲོད་ཞིབ་ཕྲ་བྱེད་བཞིན་ཡོད་པ་དང་། གྲོང་མི་ཚོས་ཁྲོམ་བཀྱག་གི་མཐའ་བསྐོར་ནས་སྒྲིག་ཆས་གསར་རྙིང་བརྗེ་བའི་དོགས་གནད་དྲིས་ཏེ་ས་གནས་ས་ཐོག་ཏུ་འཁྲུག་ཆ་ཧ་ཅང་དོད་པོ་ཡོད།
ཧུའེ་ཧྲེང་གྲགས་ཅན་རླངས་འཁོར་གྱི་འགྲེམས་ཁང་དུ་རླངས་འཁོར་གྱི་བདག་པོས་རླངས་འཁོར་གསར་པའི་ལྡེ་མིག་བླངས་ནས་མི་རིང་བར། རྟེན་འབྲེལ་ཞུ་བའི་ཤོག་སྦག་གི་སྒྲས་ཁེངས་ཤིང་། གསར་རྙིང་བརྗེ་བའི་བྱེད་སྒོ་སྤེལ་ཚུན། ཚོང་ཁང་དེའི་རླངས་འཁོར་བྲིན་ཚོང་བསྡོམས་འབོར་ཤུགས་ཆེན་འཕར་ནས་ཚོང་གཉེར་གྱི་ཡོང་འབབ་སྒོར་ཁྲི་1200དང་སྲིད་གཞུང་གི་ཁ་གསབ་སྒོར་ཁྲི་60ཙམ་ཟིན་གྱི་ཡོད།
བྱེད་སྒོ་སྤེལ་ཉིན་གྲུབ་འབྲས་མངོན་གསལ་དོད་པོ་ཐོབ་ཅིང་། བསྡོམས་རྩིས་ལ་གཞིགས་ན། རྒྱལ་ཁབ་ཀྱི་ཁ་གསབ་མ་དངུལ་སྒོར་ཁྲི་31.23སྤྱད་དེ་འཛད་སྤྱོད་དངུལ་འབོར་སྒོར་ཁྲི་229འཕར་རྒྱུར་སྐུལ་ཁྲིད་ཐུབ་ནས་མང་ཚོགས་མི་ཐེངས་4300ལ་ཕན་པ་ཐོབ་ཡོད།
ཤེས་རྟོགས་བྱུང་བར་གཞིགས་ན། ཟླ་བཅུ་པར“གསར་རྙིང་བརྗེ་བའི”བྱེད་སྒོ་སྤེལ་ཚུན། མིག་སྔའི་བར་སྲིད་གཞུང་གིས་མ་དངུལ་སྒོར་ཁྲི་2500ཙམ་བཏང་ནས་འཛད་སྤྱོད་མ་དངུལ་སྒོར་དུང་ཕྱུར་1.56ཟིན་རྒྱུར་སྐུལ་ཁྲིད་ཐུབ་ཡོད།
（ཚེ་དབང་ལྷ་མོས་བསྒྱུར། པ་སངས་ཚེ་རིང་གིས་ཞུས）