འདི་ག་ཚགས་པར་ཁང་དུ་སེང་གེ་ཁ་འབབ་ནས་གློག་འཕྲིན་འབྱོར་གསལ། བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར། བོད་ལྗོངས་མངའ་རིས་ས་ཁུལ་ནུས་རྒྱུ་ཅུས་ཀྱིས་རྒྱལ་ཁབ་གློག་དྲ་མངའ་རིས་གློག་འདོན་ཀུང་སི་དང་མཉམ་དུ་སྒར་རྫོང་སེང་གེ་ཁ་འབབ་གྲོང་རྡལ་རྒྱ་མོ་གྲོང་ཚོར་བསྐྱོད་དེ“གཞི་རིམ་དུ་ལྗང་མདོག་ནུས་རྒྱུ་ཁྱབ་གདལ་གཏོང་། གློག་ཤུགས་ཞབས་ཞུར་བརྟེན་ནས་དམངས་སེམས་ལ་དྲོ་སྐྱིད་སྦྱིན་པའི”བྱེད་སྒོ་སྤེལ་བ་རེད།
བྱེད་སྒོ་སྤེལ་རིང་། ལས་དོན་པས་ཞིང་འབྲོག་མང་ཚོགས་ལ་བདེ་འཇགས་ངང་གློག་སྤྱོད་པ་དང་གློག་གྲོན་ཆུང་བྱེད་པ་སོགས་ཀྱི་ཤེས་བྱ་སྒྲོག་འགྲེལ་བྱས་པ་དང་ཆབས་ཅིག མང་ཚོགས་ཁྱིམ་གྱི་གློག་སྐུད་རྙིང་པ་ཆགས་པ་དང་། གློག་གནོན་བརྟན་པོ་མེད་པ། གློག་འཛུགས་ལ་སྐྱོན་ཤོར་བ་སོགས་གློག་སྤྱོད་བདེ་འཇགས་ཀྱི་མངོན་མེད་རྐྱེན་ངན་ལ་དམིགས་ནས། གློག་ཤུགས་ཆེད་ལས་པས་གྲལ་བཤེར་ཞིབ་བཟོ་དང་བརྗེ་པོ་བརྒྱབ་པ་དང་། ད་དུང་ས་གནས་ས་ཐོག་ཏུ་ནུས་རྒྱུ་གྲོན་ཆུང་གི་ཤེལ་ཏོག་དང་། གློག་འཛུགས། སྒྲོག་ཞུ་སོགས་དངོས་ཟོག་རིན་མེད་ངང་སྤྲད་པ་རེད།
གཞན་ཡང་། མངའ་རིས་ས་ཁུལ་ནུས་རྒྱུ་ཅུས་ཀྱི་ཏང་ཡོན་ལས་བྱེད་པས་ཏང་ཡོན་གྱི་གདོང་ལེན་དཔེ་བཟང་གི་ནུས་པ་བཏོན་ཏེ་རྒྱ་མོ་གྲོང་ཚོའི་མཐའ་འཁོར་གྱི་གད་སྙིགས་དང་། ཐ་མག་ཕྲུག་ལྷག ཤིང་ལོ་སོགས་ཀྱི་གད་སྙིགས་སྣ་ཚོགས་གཙང་སེལ་བྱས་པ་རེད། (ཚེ་རིང་བུ་ཁྲིད་ཀྱིས་བསྒྱུར། ལྷག་པ་ཚེ་རིང་གིས་ཞུས)