འདི་ག་ཚགས་པར་གྱི་དཔྱད་གཏམ་མཁན་གྱིས།
ཨའོ་མོན་མེས་རྒྱལ་གྱི་པང་དུ་ལོག་ནས་ལོ་25འཁོར་བར་རྟེན་འབྲེལ་ཞུ་བའི་སྐབས་སུ་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་ཨའོ་མོན་ལ་གཟིགས་ཞིབ་གནང་བར་ཕེབས་པ་ནི་ཨའོ་མོན་འཕེལ་རྒྱས་ལོ་རྒྱུས་ཐོག་གི་དོན་ཆེན་ཞིག་རེད། དེ་ལས་སྤུན་ཟླ་ཨའོ་མོན་བ་ཚོར་སྐུལ་ལྕག་ཆེན་པོ་ཐེབས་ལ་སྙིང་སྟོབས་ཀྱང་རབ་ཏུ་འཕེལ་ཡོད། ལྷག་པར་དུ་ཀྲུའུ་ཞི་ཞི་ཅིན་ཕིང་གིས་ཨའོ་མོན་མེས་རྒྱལ་གྱི་པང་དུ་ལོག་ནས་ལོ་25འཁོར་བར་རྟེན་འབྲེལ་ཞུ་བའི་ཚོགས་ཆེན་དང་ཨའོ་མོན་དམིགས་བསལ་སྲིད་འཛིན་ཁུལ་སྲིད་གཞུང་སྐབས་དྲུག་པའི་འགན་བཞེས་མཛད་སྒོའི་ཐོག་གནང་བའི་གསུང་བཤད་གལ་ཆེན་ནང་ཨའོ་མོན་མེས་རྒྱལ་གྱི་པང་དུ་ལོག་ཚུན་ཐོབ་པའི་འོད་སྟོང་འཕྲོ་བའི་གྲུབ་འབྲས་ཕྱོགས་ཡོངས་ནས་ཕྱོགས་སྡོམ་གནང་བ་དང་། ཤང་ཀང་དང་ཨའོ་མོན་ཡུན་རིང་དར་རྒྱས་བརྟན་ལྷིང་རྒྱུན་འཁྱོངས་ཐུབ་པར་བྱས་ནས“རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལག་ལེན་བརྟན་བགྲོད་རྒྱང་འཁྱོལ་ཐུབ་རྒྱུར་མུ་མཐུད་སྐུལ་འདེད་གཏོང་བའི་ཐད་ཉམས་མྱོང་གལ་ཆེན་4ཁོང་དུ་ཡག་པོ་ཆུད་པར་བྱེད་དགོས་ལུགས་བསྟན་གནང་བ། སྐབས་གསར་པའི་ཨའོ་མོན་དམིགས་བསལ་སྲིད་འཛིན་ཁུལ་གྱི་སྲིད་གཞུང་ལ་རེ་བ་4བཏོན་གནང་བ་བཅས་ལས་ཨའོ་མོན་གྱི་སྤྱི་ཚོགས་ལས་རིགས་ཁག་ལ་ཚུར་སྣང་ལན་ཆ་ཆེན་པོ་བྱུང་ཡོད།
“ཧའོ་ཅང་གཏམ་རྒྱུད”གསར་པ་བརྩམས། “བསྐལ་བཟང་པད་མ”རབ་ཏུ་བཞད། མེས་རྒྱལ་གྱི་པང་དུ་ལོག་ཚུན་གྱི་ལོ་25ནི་ཨའོ་མོན་གྱི་ལོ་རྒྱུས་ཐོག་འཕེལ་རྒྱས་འགྲོ་མགྱོགས་ཤོས་དང་། འཕེལ་རྒྱས་ཀྱི་སྤུས་ཚད་མཐོ་ཤོས། གྲོང་མིའི་བདེ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཆེ་ཤོས་ཀྱི་དུས་སྐབས་ཤིག་རེད། “རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལམ་ལུགས་མ་ལག་ཟམ་མི་ཆད་པར་འཐུས་སྒོ་ཚང་དུ་ཕྱིན་པ་དང་། དཔལ་འབྱོར་དང་སྤྱི་ཚོགས་འཕེལ་རྒྱས་ལ་ལོ་རྒྱུས་རང་བཞིན་གྱི་མཆོང་སྐྱོད་བྱུང་བ། ཕྱི་ཕྱོགས་དང་མཉམ་ལས་བྱེད་རྒྱ་མུ་མཐུད་ཆེ་རུ་ཕྱིན་པ། ཨའོ་མོན་གྱི་ལོ་རྒྱུས་ཐོག་འཕེལ་རྒྱས་ཀྱི་རྣམ་པ་ཡག་ཤོས་བཏོད་པ། ཨའོ་མོན་གྱི་ཁྱད་ཆོས་ལྡན་པའི“རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལག་ལེན་ལ་འཛམ་གླིང་ཀུན་གྱིས་ཁས་ལེན་པའི་གྲུབ་འབྲས་ཧ་ཅང་ཆེན་པོ་ཐོབ་ཡོད།
ལམ་ལུགས་འཛུགས་སྐྱོང་ཕྱོགས་ནས་བལྟས་ན། གཞི་རྩའི་བཅའ་ཁྲིམས་ཀྱི་དོན་ཚན་ཉེར་གསུམ་པའི་ཁྲིམས་འཛུགས་ལས་དོན་བདེ་བླག་ངང་གྲུབ་པ་ནས་རྒྱལ་ཁབ་ཀྱི་བདེ་འཇགས་སྲུང་སྐྱོང་བྱེད་པའི་བཅའ་ཁྲིམས་ལམ་ལུགས་དང་ལག་བསྟར་ལམ་སྲོལ་བརྒྱུད་རིམ་ལྡན་པའི་སྒོ་ནས་བཙུགས་པའི་བར་དང་། དེ་ནས་སྲིད་འཛིན་དཔོན་དང་ཁྲིམས་འཛུགས་ཨུ་ལྷན་འདེམས་བསྐོའི་ཁྲོད་དུ“རྒྱལ་གཅེས་པས་ཨའོ་མོན་སྐྱོང་བའི”རྩ་དོན་ཕྱོགས་ཡོངས་ནས་དོན་འཁྱོལ་བྱས་ཏེ་དམིགས་བསལ་སྲིད་འཛིན་ཁུལ་གྱི་རྩ་ཁྲིམས་སྲིད་ལུགས་ཀྱི་སྒྲིག་ལམ་བརྟན་པོར་བཙུགས་པའི་བར་ལ་བཅོས་སྐྱོང་གི་མ་ལག་ཉིན་རེ་བཞིན་འཐུས་སྒོ་ཚང་དུ་ཕྱིན་ཡོད། དཔལ་འབྱོར་འཕེལ་རྒྱས་ཀྱི་ཕྱོགས་ནས་བལྟས་ན། ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་1999ལོའི་ཨའོ་མོན་གྱི་སྒོར་དུང་ཕྱུར་519ནས་2023ལོའི་ཨའོ་མོན་གྱི་སྒོར་དུང་ཕྱུར་3795བར་འཕར་བ་དང་། མི་རེའི་ཆ་སྙོམས་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་ཨ་སྒོར་ཁྲི་1.5ནས་ཨ་སྒོར་ཁྲི་6.9བར་འཕར་བས་འཛམ་གླིང་གི་མདུན་གྲལ་དུ་སླེབས་པ། དཔལ་འབྱོར་འོས་འཚམ་དང་སྣ་མང་འཕེལ་རྒྱས་བརྟན་པོ་བྱུང་ནས་དམངས་འཚོ་འགན་ལེན་ཏན་ཏིག་དང་ནུས་ལྡན་བྱུང་ཡོད། ཕྱི་ཕྱོགས་འགྲོ་འོང་ཕྱོགས་ནས་བལྟས་ན། རྒྱལ་སྤྱིའི་རྩ་འཛུགས་དང་སྒྲིག་གཞིའི་ནང་ཞུགས་པའི་གྲངས་འབོར་190ལྷག་ཙམ་བར་འཕར་སྣོན་བྱུང་བ་དང་། རྒྱལ་ཁབ་དང་ས་ཁུལ་120ལྷག་ཙམ་དང་དཔལ་འབྱོར་ཚོང་དོན་གྱི་འབྲེལ་བ་བརྟན་པོ་བཙུགས་པས། གོ་ལ་ཧྲིལ་པོའི“གྲོགས་ཚོགས”ཀྱི་གཞི་རྒྱ་ཇེ་ཆེར་ཕྱིན་ལ་རྒྱལ་སྤྱིའི་ཤུགས་རྐྱེན་ཡང་ཇེ་ཆེར་ཕྱིན་ཡོད། མེས་རྒྱལ་གྱི་སྙིང་གི་ནོར་བུ་ལྟ་བུ་ཡིན་པའི་ཨའོ་མོན་དུ་རྒྱལ་སྲིད་དར་ཞིང་མི་སེམས་མཐུན་པ་དང་། རྒྱུ་ནོར་འཕེལ་ཞིང་དམངས་རྣམས་ཕྱུག་པ། སྙན་གྲགས་ཕྱོགས་བཅུར་ཁྱབ་ནས་རྒྱལ་སྤྱིའི་གྲོང་ཁྱེར་ཆེན་པོའི“གསེར་བྱང”གི་བཀྲག་མདངས་རྒྱུན་ཆད་མེད་པར་ཆེ་རུ་སོང་ཡོད།
ཨའོ་མོན་མེས་རྒྱལ་གྱི་པང་དུ་ལོག་ཚུན་གྱི་འོད་སྟོང་འཕྲོ་བའི་གྲུབ་འབྲས་ནི་ཀྲུང་དབྱང་སྲིད་གཞུང་དང་མེས་རྒྱལ་ནང་སའི་རྒྱབ་སྐྱོར་ཤུགས་ཆེན་འོག་ཐོབ་པ་དང་དམིགས་བསལ་སྲིད་འཛིན་ཁུལ་སྲིད་གཞུང་གིས་སྤྱི་ཚོགས་ལས་རིགས་ཁག་ལ་མཐུན་སྒྲིལ་སྣེ་ཁྲིད་ཀྱིས་མུ་མཐུད་འབད་འཐབ་བྱས་པའི་ཁྲོད་མངོན་འགྱུར་བྱུང་བ་ཞིག་ཡིན་པས“རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལམ་ལུགས་ཀྱི་ལེགས་ཆ་མངོན་གསལ་དོད་པོ་དང་གསོན་ཤུགས་ཧ་ཅང་ཆེན་པོ་གང་ལེགས་མངོན་ཡོད། ལྷག་པར་དུ་དུས་རབས་གསར་པ་ནས་བཟུང་ཀྲུང་དབྱང་གིས་མཐོང་རྒྱ་ཆེ་ཞིང་མིག་རྒྱང་རིང་བ་དང་ལྷད་མེད་བརྩེ་བ་ཧའོ་ཅང་ལ་བཅངས་ཏེ། “རྒྱལ་ཁབ་གཅིག་ལ་ལམ་ལུགས་གཉིས”དང་། “ཨའོ་མོན་བས་ཨའོ་མོན་སྐྱོང་བ” ཚད་མཐོའི་རང་སྐྱོང་བཅས་ཀྱི་བྱེད་ཕྱོགས་ཕྱོགས་ཡོངས་དང་། ཡང་དག བློ་བརྟན་འགྱུར་མེད་བཅས་ཀྱི་སྒོ་ནས་ལག་བསྟར་བྱས་པ་དང་། ཨའོ་མོན་ལ“ལྟེ་བ་གཅིག་དང་། སྟེགས་བུ་གཅིག རྟེན་གཞི་གཅིག”བཅས་ཀྱི་འཕེལ་རྒྱས་ངེས་གནས་སྤྲོད་པ། “རྒྱུད་གཅིག་ལམ་གཅིག”སྤུས་ཚད་མཐོ་པོས་མཉམ་སྐྲུན་དང་། གཡོད་ཀང་ཨའོ་ཁུག་ཆེན་ཁུལ་འཛུགས་སྐྲུན། ཧེང་ཆིན་གཡོད་ཨའོ་མཉམ་ལས་གཏིང་ཟབ་ཁུལ་འཛུགས་སྐྲུན་སོགས་ལ་སྐུལ་འདེད་གཏོང་རྒྱུའི་བཀོད་སྒྲིག་བྱས་པ། ཨའོ་མོན་ལ་རྒྱལ་ཁབ་འཕེལ་རྒྱས་ཀྱི་སྤྱི་ཡོངས་ཁྲོད་དུ་རང་ཉིད་དེ་བས་འཕེལ་རྒྱས་ཡག་པོ་ཡོང་བའི་ཁྲིད་སྟོན་བྱས་ཡོད།
ལོ་ཉེར་ལྔ་ཡི་འཕོ་འགྱུར་ཆེན་པོ་ལས། ཨའོ་མོན་འདི་ཉིད་གྲོང་ཁྱེར་ཆུང་ངུ་ཞིག་ནས་རྒྱལ་སྤྱིའི་ཐོག་སྐད་གྲགས་ཆོད་པའི་གྲོང་ཁྱེར་ཞིག་ཏུ་འཕེལ་རྒྱས་ཕྱིན་ཏེ། འཛམ་གླིང་ལ“རྒྱལ་ཁབ་གཅིག་ལ་ལམ་ལུགས་གཉིས”ཀྱི་རླབས་ཆེན་གྱི་གསར་གཏོད་དེ་ནི“ལག་ལེན་བསྟར་ཐུབ་པ་དང་། སྒྲུབ་ཐུབ་པ། མི་སེམས་ལ་ཟུག་ཐུབ་པ”བཅས་ཡིན་པ་ར་སྤྲོད་བྱས་ཡོད། “གལ་སྲིད་ཁྱེད་རང་ལོ་20ཡི་གོང་དང་ལོ་15ཡི་གོང་དུ་ཨའོ་མོན་ལ་ཡོང་མྱོང་ཚེ་གྲོང་ཁྱེར་འདི་ཉིད་ད་བར་རྒྱུན་མི་ཆད་པར་འཕེལ་རྒྱས་ཕྱིན་པ་མཐོང་ཐུབ”ཅེས་པ་ནི་ཨའོ་མོན་སློབ་ཆེན་དུ་སློབ་སྦྱོང་བྱེད་བཞིན་པའི་ཕྱི་སྦྱོང་སློབ་མའི་མྱོང་ཚོར་ཞིག་རེད། “ཨའོ་མོན་བ་ཞིག་ཡིན་པའི་ངོས་ནས་དུས་དང་རྣམ་པ་ཀུན་ཏུ་མེས་རྒྱལ་སྟོབས་ཆེར་འགྲོ་བ་དང་ཨའོ་མོན་ལ་བརྩེ་སེམས་ཟབ་མོ་འཆང་བ་ཚོར་བ་ལས། བདེ་སྐྱིད་ཆེན་པོ་དང་བཀའ་དྲིན་ཆེན་པོ་ཡིན་ལུགས་ཀྱང་ཚོར་གྱི་འདུག”ཅེས་པ་ནི་ཨའོ་མོན་གྱི་གྲོང་མིའི་སེམས་གཏིང་གི་བསྔགས་བརྗོད་ཞིག་རེད། “རྒྱལ་ཁབ་གཅིག་ལ་ལམ་ལུགས་གཉིས”ནི་ཤང་ཀང་དང་ཨའོ་མོན་ཡུན་རིང་དར་རྒྱས་དང་བརྟན་ལྷིང་རྒྱུན་འཁྱོངས་བྱེད་པའི་ལམ་ལུགས་ཡག་པོ་དང་། རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཞབས་འདེགས་ཞུ་བའི་ལམ་ལུགས་ཡག་པོ། སྤྱི་ཚོགས་ཀྱི་ལམ་ལུགས་མི་འདྲ་བ་ཞི་བདེ་མཉམ་གནས་དང་མཉམ་ལས་མཉམ་ཁེ་མངོན་འགྱུར་བྱེད་པའི་ལམ་ལུགས་ཡག་པོ་བཅས་ཡིན་པས། ངེས་པར་དུ་ཡུན་རིང་རྒྱུན་འཁྱོངས་བྱེད་དགོས་པ་དང་། “རྒྱལ་ཁབ་གཅིག་ལ་ལམ་ལུགས་གཉིས”ཀྱི་ནང་འདུས་པའི་ཞི་བདེ་དང་། བསྟུན་མཁས། སྒོ་དབྱེ། མཉམ་སྤྱོད་བཅས་ཀྱི་རིན་ཐང་གི་འདུ་ཤེས་ནི་ཀྲུང་གོའི་ཡིན་ལ་འཛམ་གླིང་གི་ཡང་རེད། དེར་ཐུན་མོང་ཐོག་སྲུང་སྐྱོང་བྱེད་རིན་ཡོད་པ་ལག་ལེན་དངོས་ལས་མཚོན་གྱི་ཡོད།
མིག་སྔ་དང་སླད་ཕྱིན་དུས་སྐབས་ཤིག་ནི་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་རླབས་པོ་ཆེའི་བྱ་གཞག་ལ་ཕྱོགས་ཡོངས་ནས་སྐུལ་འདེད་གཏོང་བའི་འགག་རྩའི་དུས་སྐབས་ཤིག་ཡིན་པ་མ་ཟད། “རྒྱལ་ཁབ་གཅིག་ལ་ལམ་ལུགས་གཉིས”ལག་བསྟར་བྱེད་པའི་དུས་མཚམས་གསར་པར་ཡང་སླེབས་རྒྱུ་རེད། ཤང་ཀང་དང་ཨའོ་མོན་འཕེལ་རྒྱས་དེ་བས་ལེགས་པ་ཡོང་བ་བྱས་ཏེ་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་ཆེད་ལེགས་སྐྱེས་དེ་བས་ཆེན་བ་འབུལ་རྒྱུ་ནི་དུས་རབས་གསར་པའི“རྒྱལ་ཁབ་གཅིག་ལ་ལམ་ལུགས་གཉིས”ལག་ལེན་བསྟར་རྒྱུའི་འགན་འཁྲི་གལ་ཆེན་ཞིག་རེད། ཀྲུའུ་ཞི་ཞི་ཅིན་ཕིང་གིས“ཤུགས་སྣོན་རྒྱག་དགོས་པ་བཞི”བཏོན་གནང་ནས་ཨའོ་མོན་གྱིས“རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལམ་ལུགས་ཀྱི་ལེགས་ཆ་དེ་བས་ལེགས་པའི་ངང་འདོན་སྤེལ་དང“རྒྱལ་ཁབ་གཅིག་ལ་ལམ་ལུགས་གཉིས”ཀྱི་བྱ་གཞག་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་གསར་པ་རྒྱུན་ཆད་མེད་པར་གཏོད་རྒྱུར་འབད་བརྩོན་བྱེད་ཕྱོགས་གསལ་སྟོན་གནང་ཡོད། འབྱུང་འགྱུར་ལ་ཕྱོགས་སྐབས། ཀྲུང་དབྱང་གི་རྒྱབ་སྐྱོར་སྲིད་ཇུས་གང་ལེགས་སྤྱོད་པ་དང་དཔལ་འབྱོར་འོས་འཚམ་དང་སྣ་མང་འཕེལ་རྒྱས་ལ་སྐུལ་འདེད་གཏོང་བའི་འཐབ་ཇུས་ལས་འགན་ལ་དམིགས་ཏེ། གོ་སྐབས་དམ་འཛིན་དང་། བློ་ཐག་ཆོད་པོས་སྒྱུར་བཅོས། འགན་འཁྲི་འཁུར་ཕོད་པ་བཅས་བྱས་ཚེ“མེས་རྒྱལ་ཡག་པོ་བྱུང་ན་ཨའོ་མོན་ཡང་དེ་བས་ཡག་པོ་ཡོང་བའི”ངོ་མཚར་ཆེ་བའི་གཏམ་རྒྱུད་ཡག་པོ་རྩོམ་ཐུབ་ངེས་རེད།
（སྤེན་པ་ཚེ་རིང་དང་པ་སངས་སྒྲོན་ལགས་ཀྱིས་སྒྱུར་ཞུས་བྱས）