“དེ་ནི་ཕྱུག་འགྱུར་གྱི་ལམ་ཞིག་རེད”ཅེས་ན་སྨི་པི་ཡ་བྱང་རྒྱུད་ཏུང་ཁཱ་དབན་ཀེ་ཁུལ་ལུན་ཏུའུ་གྲོང་ཁྱེར་མུའུ་པོ་ལཱ་གྲོང་ཚོའི་གྲོང་མི་ཤིན་པོ་ཏིས་མི་ཚེའི་འགྱུར་ལྡོག་ཆེན་པོ་བརྗོད།

ཟླ་10པའི་ཟླ་མཇུག་ཏུ། ཀྲུང་གོ་ཧོ་ནན་རྒྱལ་སྤྱི་མཉམ་ལས་ཚོགས་པ་ཚད་ཡོད་ཀུང་སིས(ཧོ་ནན་རྒྱལ་སྤྱི)སྐྲུན་འགན་འཁུར་བའི“གྲོང་ཚོ་ཀུན་ཁྱབ”རྣམ་གྲངས་ལས་གྲྭ་དངོས་སུ་ལས་མཇུག་འགྲིལ་བ་དང་རྣམ་གྲངས་དེའི་སྤྱིའི་རིང་ཚད་ལ་སྤྱི་ལེ་13ཡོད་པ་དང་གྲོང་ཚོ་10ལྷག་ཙམ་གྱི་གྲོང་ཚོའི་ལམ་བུ་11དང་འབྲེལ་བ་ཡོད་པ་རེད།

ལོ་60ལ་སླེབས་པའི་ཤིན་པོ་ཏིས་སེམས་འགུལ་ཐེབས་བཞིན་ད་ཆ་རླངས་འཁོར་དང་བདལ་གཏོང་རླངས་འཁོར་གྲོང་ཚོར་ཤར་གཏོང་ཐུབ་ནས་ཁོ་མོའི་ར་ཚང་བར་སྐྱོད་ཀྱི་ཡོད་པས་ར་ཚོང་བའི་ཡོང་འབབ་དེ་སྔར་ལས་མང་དུ་ཕྱིན་འདུག་ཅེས་གསར་འགོད་པར་བཤད།

མུའུ་པོ་ལཱ་གྲོང་ཚོའི་གྲོང་དཔོན་མུའུ་ཁ་ཝ་ཡིས་བསྐྱར་བཟོ་བྱས་པའི་ལམ་བུས་ལམ་བར་གྱི་དུས་ཚོད་ཐུང་དུ་ཕྱིན་པ་མ་ཟད། གྲོང་ཚོའི་ཕྱུགས་ལས་སྔར་བས་འཕེལ་རྒྱས་འགྲོ་བར་མཐུན་རྐྱེན་བསྐྲུན་ཡོད་ལ། དེ་གར་འཚོ་བ་སྐྱེལ་མཁན་གྲོང་མི་རྣམས་ལ་རེ་བའང་སྦྱིན་ཡོད་ཅེས་བཤད།

ལུན་ཏུའུ་གྲོང་སྲིད་ཨུ་ལྷན་གྱི་མཐོ་རིམ་དཔོན་རིགས་ཧྲའོ་ཕ་ཏིས་གསར་འགོད་པར“ལོ་ཤས་གོང་ལུན་ཏུའུ་གྲོང་ཁྱེར་གྱི་ལམ་ཡག་པོ་མེད་པར་བརྟེན་མ་འཇོག་བྱེད་མཁན་ཡོང་འདོད་བྱེད་ཀྱི་མེད། སྨྱན་སྦྱོར་གྱིས་ཀྱང་རྨང་གཞིའི་སྒྲིག་བཀོད་ཞན་པ་དང་འབྱུང་འགྱུར་འཕེལ་རྒྱས་ལ་འགོག་རྐྱེན་བཟོ་བ་སོགས་ཀྱི་འཕྲིན་སྤེལ་མང་པོ་སྤེལ་བས་འགྲོ་ལམ་གྱི་གནས་ཚུལ་ཞན་པའི་རྐྱེན་གྱིས་ས་གནས་ཀྱི་དཔལ་འབྱོར་འཕེལ་རྒྱས་ལ་འགོག་རྐྱེན་ཚབས་ཆེན་བཟོས་ཡོད”ཅེས་བཤད།

ཧྲའོ་ཕ་ཏིས“གྲོང་ཚོ་ཀུན་ཁྱབ”ཀྱི་རྣམ་གྲངས་ཀྱིས་གྲོང་གསེབ་དང་། སློབ་གྲྭ སྨན་ཁང་། ཁྲོམ་ར་བཅས་དབར་གྱི་ལམ་ཤར་གཏོང་ཐུབ་ཡོད། འགྲོ་ལམ་འགྲིམ་འགྲུལ་ལེགས་སུ་ཕྱིན་པར་བརྟེན་མ་འཇོག་བྱེད་མཁན་དང་ཡུལ་སྐོར་བའང་དེ་དང་ཆབས་ཅིག་ཇེ་མང་དུ་ཕྱིན་ཡོད་ཅེས་བཤད།

མུའུ་པོ་ལཱ་གྲོང་ཚོ་ཙམ་མིན་པར་ལུན་ཏུའུ་གྲོང་ཁྱེར་གྱི་ཐག་རིང་ས་ཁུལ་གྱི་འགྲོ་ལམ་ཡང་ལེགས་སུ་ཕྱིན་ནས་སྟབས་བདེ་བྱུང་ཡོད། ཨེན་ཏ་མཱ་གྲོང་ཚོའི་གྲོང་མི་ཨའེ་ལི་ཡཱ་སིས་འགྲོ་ལམ་རིམ་སྤོར་བྱས་རྗེས་སྤྱི་པའི་འགྲིམ་འགྲུལ་གནས་ཚུལ་མངོན་གསལ་དོད་པོས་ལེགས་སུ་ཕྱིན་པ་དང་། ཕྱིར་སྐྱོད་དཀའ་བའི་གནད་དོན་ཐག་གཅོད་བྱུང་བ་མ་ཟད། འགྲོ་ལམ་གྱི་བདེ་འཇགས་དང་འཚོ་བར་སྟབས་བདེ་སྐྲུན་པའི་ངོས་འཛིན་བྱས།

ཧོ་ནན་རྒྱལ་སྤྱི་ལུན་ཏུའུ་གྲོང་ཁྱེར་རྣམ་གྲངས་ཀྱི་ཅིང་ལི་ཝང་ཆང་གིས་ཁེ་ལས་ཀྱིས་ས་གནས་དེ་གར་རིམ་རྩིས་བརྒྱབ་ན་གཞུང་ལམ་རྣམ་གྲངས་15ལག་བསྟར་བྱས་པའི་ནང་སྐྲུན་བཞིན་པའི་གཞུང་ལམ་1ལ་རིམ་རྩིས་བརྒྱབ་ན་ལམ་ཐག་སྤྱི་ལེ་260ཙམ་ཡོད་པ་དང་། ས་གནས་དེ་གའི་ཁེ་ལས་འབྲིང་ཆུང་40ལྷག་ཙམ་དང་མཉམ་ལས་ཀྱི་འབྲེལ་བ་བཙུགས་པར་བརྟེན་ས་གནས་དེ་གའི་མི་ཐེངས་3000ཙམ་གྱི་ལས་ཞུགས་གནད་དོན་ཐག་གཅོད་བྱས་ཡོད་ཅེས་བཤད།

ཀྲུང་གོ་དང་ན་སྨི་པི་ཡའི་མཉམ་ལས་རྒྱུན་ཆད་མེད་པར་ཟབ་ཏུ་ཕྱིན་པར་བརྟེན་ན་སྨི་པི་ཡའི་ཐག་རིང་ས་ཁུལ་གྱི་རྨང་གཞིའི་སྒྲིག་བཀོད་ཞན་པའི་གནད་དོན་རིམ་གྱིས་ལེགས་སུ་ཕྱིན་ཡོད། འབྱུང་འགྱུར་ཀྲུང་ན་ཕྱོགས་གཉིས་པོས་རྨང་གཞིའི་སྒྲིག་བཀོད་དང་སློབ་གསོ་སོགས་ཁྱབ་ཁོངས་ཐད་མུ་མཐུད་མཉམ་ལས་བྱས་ནས་ས་གནས་དེ་གའི་དཔལ་འབྱོར་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་བཏང་སྟེ་ཀྲུང་གོ་དང་ཨ་ཧྥེ་རི་ཁའི་མཉམ་ལས་ཀྱི་དཔེ་མཚོན་གསར་པ་གཏོད་རྒྱུ་རེད།

ཀྲུང་གོའི་ཁེ་ལས་ཀྱིས་སྐྲུན་འགན་འཁུར་བའི་ན་སྨི་པི་ཡའི“གྲོང་ཚོ་ཀུན་ཁྱབ”རྣམ་གྲངས་ཀྱིས་ས་གནས་དེར་ཕྱུག་འགྱུར་ལམ་བསྐྲུན་པ།