འདི་ག་ཚགས་པར་གྱི་གསར་འགོད་པ། ལོན་ཡུས་ཅ།
བརྗིད་ཆགས་གངས་རིས་བསྐོར་ཞིང་། མུ་མེད་རྩྭ་ཐང་ཡངས་པའི་རྨ་ལྷོ་བོད་རིགས་རང་སྐྱོང་ཀྲོའུ་རྩེ་ཁོག་རྫོང་གི་ས་གཞི་འདིའི་སྣོད་བཅུད་མཐའ་དག་རང་བྱུང་ཁམས་ཆེན་པོས་བསྩལ་བ་ལྟར་སྣང་། ཟླ་11ཚེས་28ཉིན་ཆ་སྐོར་ཤང་དགོ་རྩེ་གྲོང་ཚོའི་ཧྲེ་གཉིས་པའི་བཀྲ་ཤིས་མཚོའི་ཁྱིམ་དུ་སྐྱོད་སྐབས། ཁོང་ནང་ལས་ལ་བྲེལ་བཞིན་འདུག
བཀྲ་ཤིས་མཚོས་གཟན་རྩྭ་ཆག་པ་གཅིག་འཕྲལ་དུ་བསྡམས་ནས་སྒོ་རའི་ནང་གི་ཕྱུགས་རའི་ཕྱོགས་སུ་བསྐྱོད་པ་དང་། ཕྱུགས་རའི་ནང་ཤ་ཤེད་རྒྱས་པའི་ནོར་གནག་འགས་གློ་བུར་དུ་མིག་འབུར་ཚུགས་སུ་ལྟ་ཞིང་། སྣ་ཁུང་ནས་དབུགས་འབུད་བཞིན་དུ་ཁོ་མོའི་འཁྲིས་སུ་འོང་ནས་གོས་ཀྱི་ཟུར་ནས་འཐེན་ཙམ་བྱས་པས། བཀྲ་ཤིས་མཚོས་གཟན་རྩྭ་གཟན་གཞོང་ནང་སྙོམས་པོར་བླུགས་ནས་ནོར་གནག་གི་སྒལ་པར་བྱིལ་བྱིལ་བྱས་རྗེས། ནོར་གནག་གིས་དེ་མ་ཉིད་དུ་གཟན་རྩྭའི་ནང་མགོ་བཅུག་ནས་ཟས་ལ་ཞིམ་མདོག་གིས་རོལ།
དེ་རྗེས་ཁོང་གིས་སླར་ཡང་གཟན་རྩྭ་ཆག་པ་གཅིག་ཁྱེར་ནས་ལུག་ཚང་དུ་བསྐྱོད། “ནོར་ལུག་དེ་དག་ནི‘ཕྱུག་འགྱུར་གྱི་ནོར་བུ’ཡིན་པས་དེ་དག་ལ་གཡོག་ཡག་པོ་བྱས་ནས་ཤ་ཤེད་ཉམས་པ་དང་ནད་ཕོག་ཏུ་གཏན་ནས་འཇུག་རྒྱུ་མིན། དུས་སང་ད་དུང་རིན་གོང་མཐོ་པོ་ཞིག་རག་ནས་ང་ཚོ་ནང་མི་རྣམས་དེ་བས་བདེ་སྐྱིད་ལྡན་པའི་འཚོ་བ་སྐྱེལ་ཐུབ་པའི་རེ་བ་ཡོད”ཅེས་བཀྲ་ཤིས་མཚོས་ལུག་ལ་གཟན་རྩྭ་དང་ཆུ་མུ་མཐུད་སྟེར་ནས་དགུན་ཁ་གྲང་ཟུག་ཁྱོག་ཐུབ་པའི་འགན་ལེན་བྱེད་བཞིན་དུ་བཤད།
སྔར་སོང་གི་གནས་ཚུལ་ཕྱིར་དྲན་བྱེད་སྐབས་རང་ཁྱིམ་ལ་ད་ལྟའི་སྐྱེ་སྟོབས་ཀྱི་རྣམ་པ་འདི་ལྟ་བུ་གཏན་ནས་མེད། 2015ལོར་བཀྲ་ཤིས་མཚོར་གཏན་འཇགས་ཀྱི་ཡོང་འབབ་མེད་སྟབས་འཚོ་བ་ཡང་འཕྱིད་ཙམ་ལས་མེད།
“ང་ཚོས་བཅར་འདྲི་ཞིབ་ཕྲ་བྱས་རྗེས། བཀྲ་ཤིས་མཚོ་ནི་བཟའ་ཟླ་མེད་པའི་བུད་མེད་ཅིག་ཡིན་པ་དང་། ཁོང་གཅིག་པུས་དཀའ་ངལ་ཁྱད་བསད་ཀྱིས་བུ་མོ་གསོས་ཚུལ་ཤེས་བྱུང་། བུ་མོ་ནར་སོན་ནས་མནའ་མར་ཕྱིན་རྗེས་ཁྱིམ་དུ་ཁོང་རང་གཅིག་པུར་ལུས། ལོ་ན་རིམ་བཞིན་ཆེ་རུ་སོང་ཡང་ཁེར་རྐྱང་དུ་འཚོ་བ་སྐྱེལ་དགོས་བྱུང་བས་དངོས་གནས་ཡ་ང་བ་ཞིག་འདུག”ཅེས་དགོ་རྩེ་གྲོང་ཚོའི་ཏང་ཀྲི་པུའི་ཧྲུའུ་ཅི་གུ་རུ་བསྟན་འཛིན་གྱིས་ཕྱིར་དྲན་བྱེད་བཞིན་དུ་བཤད་པ་དང་། ཁོང་གིས“ཁྱིམ་གྱི་རྩྭ་ར་ལག་མཐིལ་ཙམ་ལས་མེད་པའི་ཁར། ནོར་ལུག་ཧ་ཅང་ཉུང་བས་ཕྱུགས་རིགས་རྒྱུད་སྤེལ་དང་ཕྱིར་ཚོང་ཟེར་བ་གླེང་ཐབས་བྲལ། ང་ཚོས་སྲིད་ཇུས་གཞིར་བཟུང་སྟེ་ཁོང་མ་མཐའི་འཚོ་བ་འགན་ལེན་ནང་བཅུག་ནས་ཁོང་ལ་འཚོ་རྟེན་ཡོད་པ་བྱས་ཡོད”ཅེས་བཤད།
བཀྲ་ཤིས་མཚོར་མ་མཐའི་འཚོ་བ་འགན་ལེན་གྱི་དངུལ་ཐེངས་དང་པོ་རག་སྐབས་སེམས་འགུལ་ཆེན་པོ་ཐེབས། ཡིན་ན་ཡང་ཁོང་གིས་ད་ལྟའི་འཚོ་བར་འདོད་བློ་ཚིམ་ནས་བསྡད་མེད། ཁོང་གིས“མ་མཐའི་འཚོ་བའི་འགན་ལེན་ནི་འཁྱག་དུས་གོས་དང་ལྟོགས་དུས་ཟས་ལྟ་བུ་རེད། འོན་ཀྱང་འཚོ་བ་ཡག་པོ་ཞིག་སྐྱེལ་འདོད་ན་རང་ཉིད་ཀྱི་ལག་གཉིས་ལ་བརྟེན་དགོས་པ་ངས་གསལ་པོར་ཤེས་ཀྱི་ཡོད”ཅེས་བཤད། བཀྲ་ཤིས་མཚོའི་སེམས་ནང་ཐོག་མཐའ་བར་གསུམ་དུ་རང་དར་རང་ཚུགས་ཀྱི་མེ་ལྕེ་རབ་ཏུ་འབར་བཞིན་ཡོད། བཀྲ་ཤིས་མཚོས“ནོར་ལུག་ནི་འབྲོག་པའི་ནོར་བུ་ཡིན་པས་དཀའ་ཚེགས་ཇི་འདྲ་ཆེ་རུང་གང་ལྟར་རང་ཉིད་ལ་ཡངས་པའི་མདུན་ལམ་ཞིག་ཡོང་ཐབས་བྱེད་ཀྱི་ཡིན”ཞེས་བཤད།
ཁོང་གི་གཡོག་བྱེད་ཞིབ་ཚགས་འོག ནོར་ལུག་སྤུ་མདོག་ཡག་ལ་ཤ་ཤེད་རྒྱས་པ་མ་ཟད། འོ་མའི་ཐོན་འབབ་ཀྱང་འཕར་ཡོད་པ་རེད། སྟོན་བསྡུའི་དུས་ཚིགས་སུ་ཁོང་གི་ནོར་ལུག་ཤ་ཤེད་ཡག་པས་ཁྲོམ་རའི་ཐོག་བྲིན་ཁ་ཧ་ཅང་རྒྱུག་པོ་ཡོད།
གསོ་ཚགས་བྱ་གཞག་ཉིན་རེ་བཞིན་གོང་འཕེལ་འགྲོ་བ་དང་ཆབས་ཅིག་བཀྲ་ཤིས་མཚོའི་ཁྱིམ་ཚང་གི་དཔལ་འབྱོར་གནས་ཚུལ་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཡོད། ཁོང་གིས“དེ་དག་རྒྱལ་ཁབ་ཀྱི་རོགས་རམ་ལ་བརྟེན་ནས་བྱུང་བ་ཞིག་རེད། ད་ཆ་རང་ཉིད་ལ་འཇོན་ཐང་ལྡན་པས་མ་མཐའི་འཚོ་བ་འགན་ལེན་གྱི་མིང་གཏན་ནས་བཟུང་གི་མིན”ཞེས་བཤད།
2023ལོའི་ཉི་འོད་རབ་ཏུ་འཚེར་བའི་ཉིན་ཞིག བཀྲ་ཤིས་མཚོ་གྲོང་ཚོ་ཨུ་ལྷན་དུ་ཡོང་ནས“ངས་མ་མཐའི་འཚོ་བ་འགན་ལེན་ནས་དོན་རྒྱུའི་རེ་འདུན་ཞུ་གི་ཡིན”ཞེས་བཤད། ཁོང་གི་སྐད་ཤུགས་དེ་ཙམ་ཆེན་པོ་མེད་ཀྱང་། དེ་གར་ཡོད་པའི་གྲོང་ཚོའི་ལས་བྱེད་པ་ཚོས་གཅིག་རྗེས་གཉིས་མཐུད་ངང་མགོ་བོ་བཏེགས་ནས་གུས་བཀུར་གྱི་མིག་ཟུང་ཞིག་བཀྲ་ཤིས་མཚོར་ལྟ་བར་ཤོར།
གུ་རུ་བསྟན་འཛིན་གྱིས་སེམས་ཁུར་ཆེན་པོས“བཀྲ་ཤིས་མཚོ། ཁྱོད་ཀྱིས་དངོས་གནས་བསམ་བློ་ཡག་པོ་བཏང་བ་ཡིན་ནམ། དེ་ནི་འགན་ལེན་བརྟན་པོ་ཞིག་རེད”ཅེས་བཤད།
“ངས་བསམ་བློ་ཡག་པོ་བཏང་བ་ཡིན། ང་ལ་དཀའ་ངལ་འཕྲད་དུས་རྒྱལ་ཁབ་ཀྱིས་རོགས་རམ་གནང་བྱུང་། ད་ཆ་ངས་རང་ཉིད་ཀྱི་འབད་བརྩོན་ལ་བརྟེན་ནས་འཚོ་བ་ཡག་པོ་ཞིག་སྐྱེལ་ཐུབ་ཀྱི་འདུག ངས་དབུལ་སྐྱོར་གྱི་མིང་མུ་མཐུད་བཟུང་གི་མིན། དེ་དགོས་མཁོ་སྔར་བས་ཆེ་བའི་མིར་སྤྲོད་རོགས”ཞེས་བཀྲ་ཤིས་མཚོས་ཚིག་ཐག་ཆོད་པོས་བཤད།
དུས་དེ་ནས་བཟུང་བཀྲ་ཤིས་མཚོས་རང་འགུལ་ངང་མ་མཐའི་འཚོ་བ་འགན་ལེན་ནས་དོན་པའི་གནས་ཚུལ་གྲོང་ཚོའི་གང་སར་ཁྱབ་པ་དང་། ཡུལ་མི་ཚོས་ཀྱང་ཁོང་ལ་བསྔཌ་བརྗོད་བྱེད་པ་དང་ཆབས་ཅིག ཁོང་གི་ཁ་དན་ཚིག་གནས་ཀྱི་ཀུན་སྤྱོད་ལས་ཚང་མར་སྐུལ་མ་ཆེན་པོ་ཐེབས་ཤིང་། ཁོང་གིས་རང་ཉིད་ཀྱི་བྱ་སྤྱོད་ལ་བརྟེན་ནས་ཁ་དན་ཚིག་གནས་ཀྱི་སྲོལ་བཟང་དར་སྤེལ་བཏང་སྟེ། ཀུན་སྤྱོད་བཟང་པོ་དེ་གྲོང་ཚོར་མུ་མཐུད་ཁྱབ་སྤེལ་བྱུང་ཡོད། （མཚོ་སྔོན་ཉིན་རེའི་ཚགས་པར་ཐོག་སྤེལ་བའི་གནས་ཚུལ་གཞིར་བཟུང）