ཤིན་ཧྭ་གསར་འགྱུར་ཁང་གི་གསར་འགོད་པ། ཀྲང་ཙི་ཆི། ཝང་ཙི་ཧན།

ཅི་ཧྲི་ཧྲན་ཡོམ་ལྟེ་དང་བར་ཐག་སྤྱི་ལེ་15ལྷག་ཙམ་ཡོད་པའི་ཀོན་ཐིང་གྲོང་རྡལ་ལྟེ་བའི་སློབ་གྲྭར་ས་ཡོམ་གྱི་གནོད་འཚེ་ཚབས་ཆེན་ཕོག་ཡོད་ཅིང་། ད་ཆ་ཉམས་གསོ་བརྟན་གཏོང་བྱས་པའི་སློབ་གྲྭ་གསར་པའི་རྣམ་པ་གསར་རྐྱང་དུ་གྱུར་ཡོད། ཝང་ཤན་ཀྲེན་གྱིས་མཚོ་ཤར་གྲོང་ཁྱེར་གྱི་གནོད་འཚེ་ཕོག་པའི་སློབ་གྲྭ་གཞན་དག་དང་འདྲ་བར་ས་ཡོམ་རྒྱག་སྐབས་སློབ་གྲྭའི་དགེ་རྒན་གྱིས་འཕྲལ་མར་སློབ་མ་སྒྲིག་འཛུགས་བྱས་ཏེ་གོ་རིམ་ལྡན་པའི་ངང་ཁ་གྲམ་དུ་བཅུག་ནས་བདེ་འཇགས་ཁུལ་དུ་ཕྱིར་འཐེན་བྱས་པས་མི་ཤི་རྨས་གཅིག་ཀྱང་བྱུང་མེད།

2024ལོའི་ཟླ་དང་པོ་ནས་བཟུང་། མཚོ་ཤར་གྲོང་ཁྱེར་གྱིས་སློབ་གསོའི་རིགས་ཀྱི་གེགས་རྗེས་བསྐྱར་སྐྲུན་གྱི་རྣམ་གྲངས་ཁག་47ལག་ལེན་བསྟར་བ་དང་། སློབ་གྲྭ་60སྐྲུན་པ། སློབ་གྲྭའི་ཉལ་ཁང་སྟར་པ་125ཉམས་གསོ་བརྟན་གཏོང་བཅས་བྱས་པར་འཛུགས་སྐྲུན་གཞི་ཁྱོན་སྨི་ངོས་གྲུ་ཁྲི་22ཙམ་ཟིན་ཞིང་། མིག་སྔར་ཚང་མ་ལེགས་གྲུབ་ཟིན་ནས་བེད་སྤྱོད་བྱེད་གོ་ཚུགས་ཡོད།

“སློབ་གྲྭའི་འགྱུར་ལྡོག་ནི་ཉམས་གསོ་ཙམ་མིན་པར་དེ་བས་རིམ་སྤོར་བྱས་ཡོད། ལས་དོན་དེ་སྲིད་གཞུང་དང་སྤྱི་ཚོགས་ལས་རིགས་ཁག་གི་རོགས་རམ་དང་རྒྱབ་སྐྱོར་དང་ཁ་འབྲལ་ཐབས་མེད”ཅེས་ལྔ་གཅིག་ལྟེ་བའི་སློབ་གྲྭའི་སློབ་སྤྱི་གཞོན་པ་ཀྲུའུ་ཅིན་ཞའོ་ཡིས་བཤད་ཅིང་། ཁོང་གིས་ས་ཡོམ་གྱིས་སློབ་ཁྲིད་ཐོག་ཁང་དང་། ཉལ་ཁང་། ཟ་ཁང་སོགས་སྐྲུན་དངོས་ཞིག་རལ་སོང་བ་དང་སེར་ཁ་རྒྱུག་ཡོད། རྒྱལ་ཡོངས་སྤྱི་ཁྱབ་བཟོ་ཚོགས་དང་ཀྲུང་གོ་ལས་བཟོ་འཕེལ་རྒྱས་ཐེབས་རྩ་ལྷན་ཚོགས་སོགས་སྡེ་ཚན་གྱིས་སྔ་རྗེས་སུ་ཀྲུང་ཁྲོན་ཤང་ལྔ་གཅིག་ལྟེ་བའི་སློབ་གྲྭར་ཞལ་འདེབས་དངུལ་སྒོར་ཁྲི་2700ལྷག་ཙམ་གྲབས་གསོག་བྱས་ནས། སློབ་གྲྭའི་སློབ་ཁང་དང་ཉལ་ཁང་སོགས་ཉམས་གསོ་བརྟན་གཏོང་དང་། ཁང་ཕྱིའི་སྒྲིག་བཀོད་སྒྱུར་བཀོད། སློབ་ཁྲིད་སྒྲིག་ཆས་ཉོ་སྒྲུབ་སོགས་ཀྱི་རྣམ་གྲངས་ལག་བསྟར་བྱེད་རོགས་བྱས་ཡོད་ཅེས་བཤད།

སློབ་གསེང་སྐབས་ཕྲུ་གུ་ཚོ་སློབ་ཁང་ནས་དོན་ཏེ་ཉི་འོད་རབ་ཏུ་འཕྲོ་བའི་ལུས་རྩལ་ཐང་དུ་རྩེད་འཇོར་རོལ་བཞིན་འདུག “སློབ་ཁང་གི་མཁྲེགས་ཆས་སྒྲིག་བཀོད་སྒྱུར་བཀོད་བྱས་པ་དེས་སློབ་ཁྲིད་ཀྱི་ཆུ་ཚད་མཐོ་རུ་འགྲོ་རྒྱུར་ཕན་ཐོགས་ཡོད་པ་དང་། འགྱིག་བཟོས་ལུས་རྩལ་ཐང་སོགས་རྨང་གཞིའི་འཛུགས་སྐྲུན་སྒྱུར་བཀོད་རིམ་སྤོར་བྱས་པ་ལས་ཕྲུ་གུ་ཚོར་དེ་བས་བདེ་འཇགས་དང་སྐྱིད་སྣང་དོད་པའི་བྱེད་སྒོ་སྤེལ་ཡུལ་མཁོ་འདོན་ཐུབ་ཡོད”ཅེས་ལྔ་གཅིག་ལྟེ་བའི་སློབ་གྲྭའི་དགེ་རྒན་ལི་ཞའོ་ཧྥེས་བཤད།

ལྔ་གཅིག་ལྟེ་བའི་སློབ་གྲྭའི་ལོ་རིམ་བདུན་པའི་སློབ་མ་ཝང་ཁྲུན་ཞ་ཡི་ཁྱིམ་ཀྲུང་ཁྲོན་ཤང་ཞིང་ར་གྲོང་ཚོར་ཡོད། ས་ཡོམ་རྒྱག་སྐབས་ཁོ་ཚོའི་སྒོ་རའི་གྱང་ལོག་ནས་ཁང་པའི་ནང་ཐལ་རྡུལ་གྱིས་ཁེངས། “ད་ཆ་ཁང་པ་གསར་པ་བརྒྱབ་ཚར་བས་ང་ཚོ་ནང་མི་དྲུག་པོ་ཁང་པ་གསར་པའི་ནང་ལོ་གསར་གཏོང་རྩིས་ཡོད”ཅེས་ཁང་པ་གསར་པའི་སྐོར་གླེང་སྐབས་ཝང་ཁྲུན་ཞའི་ངོ་གདོང་ལས་དགའ་བའི་འཛུམ་མདངས་འཕྱུར་བཞིན་བཤད། ཁོ་མོས“ས་ཡོམ་བརྒྱབ་རྗེས་སློབ་གྲྭས་དྲ་ཕྱིའི་སློབ་ཁྲིད་སླར་གསོ་གང་མགྱོགས་བྱས་པས་སློབ་སྦྱོང་ལ་ཤུགས་རྐྱེན་གང་ཡང་ཐེབས་མེད། ད་ཐེངས་ནི་ཁང་པ་གསར་པ་བརྒྱབ་རྗེས་ཀྱི་གནམ་ལོ་གསར་ཚེས་དང་པོ་དེ་ཡིན་པས་ནང་མི་ཚང་མས་རེ་སྒུག་ཆེན་པོ་བྱེད་ཀྱི་ཡོད། སྐབས་དེ་དུས་གཉེན་ཉེ་གྲོགས་པོ་ཁྱིམ་དུ་གདན་ཞུ་བྱས་ནས་དགའ་སྤྲོའི་ངང་ལོ་གསར་བསུ་རྒྱུ་ཡིན”ཞེས་བཤད།

（ལྷག་ཚེ་དང་བུ་ཁྲིད་ཀྱིས་སྒྱུར་ཞུས་བྱས）