—— ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་སློབ་ སྦྱོང་དང་ལག་བསྟར་བྱེད་པའི་སྐོར་གླེང་བ།
ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐོག“ཏང་གིས་དཔལ་འབྱོར་ལས་དོན་ལ་འགོ་ཁྲིད་བྱེད་ཤུགས་ཆེ་རུ་བཏང་ནས་ལས་སྒྲུབ་གཙོར་བཟུང་མཐའ་འཁྱོངས་ཀྱིས་གདེང་ཚོད་ཆེར་གཏོང་དང་། དཀའ་སྤྱད་མདུན་སྐྱོད། འབད་འབུངས་ཡར་བརྩོན་བཅས་བྱས་ཏེ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཁག་དོན་ཐོག་ཏུ་འཁྱོལ་བའི་འགན་ལེན་བྱེད་དགོས”ཞེས་ནན་བཤད་བྱས་ཡོད།
དུས་རབས་གསར་པ་ཤར་ཚུན། ང་ཚོས་ཉེན་ཁ་དང་འགྲན་སློང་སྣ་ཚོགས་ལས་རྣམ་པར་རྒྱལ་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ངོ་མཚར་གསར་པ་ཟམ་མི་ཆད་པར་གཏོད་ཐུབ་དོན་ནི། མི་དམངས་དུང་ཕྱུར་མང་པོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་སེམས་ཤུགས་གཅིག་ཏུ་སྒྲིལ་བ་དང་། ནུས་ཤུགས་གཅིག་ཏུ་འདོན་པ། རྡོག་རྩ་གཅིག་སྒྲིལ། སེམས་ནུས་གཅིག་སྒྲིལ། དཀའ་སྤྱད་འབད་སྒྲུབ་བཅས་བྱས་ཏེ་བྱ་གཞག་འཕེལ་རྒྱས་ཀྱི་གནམ་ས་གསར་པ་བཏོད་ཡོད། མིག་སྔར། རང་རྒྱལ་གྱི་དཔལ་འབྱོར་འཁོར་རྒྱུག་ལ་སྔར་བཞིན་དཀའ་ངལ་དང་འགྲན་སློང་མི་ཉུང་བ་ཞིག་འཕྲད་བཞིན་ཡོད། སྤྱི་ཡོངས་ནས་བལྟས་ན། འདི་དག་ཚང་མ་འཕེལ་རྒྱས་གཏོང་རིང་གི་གནད་དོན་དང་མདུན་སྐྱོད་བྱེད་རིང་གི་འགྲན་སློང་ཡིན་པས། འབད་བརྩོན་བྱས་ན་ཁྱད་བསད་བྱེད་ཐུབ། ཏང་ཀྲུང་དབྱང་གི་གཅིག་སྡུད་གཅིག་གྱུར་གྱི་འགོ་ཁྲིད་ཀྱི་མངོན་གསལ་དོད་པའི་ལེགས་ཆ་བཏོན་ནས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཁག་ཇི་མ་ཇི་བཞིན་ལག་བསྟར་དོན་འཁྱོལ་བྱེད་པ་དང་ཕྱོགས་ཁག་གི་མཐུན་རྐྱེན་དེ་དག་འཕེལ་རྒྱས་ཀྱི་གྲུབ་འབྲས་དངོས་ལ་གང་ཐུབ་སྒྱུར་ཚེ་ང་ཚོའི་སྔོན་དཔག་དམིགས་ཚད་མངོན་འགྱུར་ཐུབ་ངེས་ཡིན་ལ། རང་རྒྱལ་གྱི་དཔལ་འབྱོར་གྲུ་གཟིངས་རླུང་བརྟེན་རླབས་གཤགས་ཀྱིས་བརྟན་བགྲོད་རྒྱང་འཁྱོལ་ཐུབ་རྒྱུར་སྐུལ་འདེད་གཏོང་ཐུབ་ངེས་རེད།
ད་ཐེངས་ཀྱི་ཚོགས་འདུའི་ཐོག་དོན་འཁྱོལ་ལ་དམ་འཛིན་ཡག་པོ་བྱེད་པའི་ཐད་བླང་བྱ་ཁ་གསལ་རབ་དང་རིམ་པ་བཏོན་ཞིང་། དྲང་ཕྱོགས་ཀྱི་ལྕག་སྐུལ་གཏོང་ཤུགས་ཆེ་རུ་གཏོང་བ་དང་། བློ་བརྟན་འགྱུར་མེད་ཀྱི་སྒོ་ནས་རུལ་སུངས་ལ་ཆད་པ་གཅོད་པ། དངོས་ཐོག་བདེན་འཚོལ་མཐའ་འཁྱོངས་བྱེད་པ། འཕེལ་རྒྱས་དང་བདེ་འཇགས་ལ་སྤྱི་འདོམས་བྱེད་པ། མཐུན་སྦྱོར་མཉམ་འགུལ་བྱེད་ཤུགས་ཆེ་རུ་གཏོང་བ། སྔོན་དཔག་དོ་དམ་ལ་ཤུགས་སྣོན་རྒྱག་པ་སོགས་ཚང་མར་དོན་དངོས་ཀྱི་དམིགས་སའི་རང་བཞིན་དང་མཛུབ་ཁྲིད་རང་བཞིན་ཆེན་པོ་ལྡན་པ་དང་། དམིགས་ཡུལ་ནི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་མཉམ་ཤུགས་གཅིག་སྒྲིལ་དེ་བས་ལེགས་པར་བྱས་ཏེ། སང་ལོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་ལས་འགན་ཕྱོགས་ཡོངས་ནས་ལེགས་སྒྲུབ་བྱ་ཆེད་རེད། འདི་གར་རྒྱལ་ཡོངས་ཀྱི་གཅིག་འགྱུར་ཁྲོམ་ར་ཆེན་པོ་མགྱོགས་མྱུར་བསྐྲུན་རྒྱུར་དཔེ་བཞག་ནས་དོན་འཁྱོལ་ལ་དམ་འཛིན་བྱེད་པའི་ནུས་ཕྱོད་ཆེ་རུ་གཏོང་བར་གོ་བ་ལེན་པ་དང་ཁོང་དུ་གཏིང་ཟབ་ཆུད་པར་བྱེད་དགོས།
དོན་འཁྱོལ་ལ་དམ་འཛིན་བྱེད་པའི་འགག་རྩ་ནི“དམ་པ་དོན་གཉེར”ལ་ཐུག་ཡོད་དེ། བྱ་སྤྱོད་མགྱོགས་པོ་སྤེལ་བ་དང་བྱེད་ཐབས་ཏན་ཏིག་སྤྱོད་དགོས་པ་ལག་ལེན་ལས་ར་འཕྲོད་ཡོད། དེར་བརྟེན་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལ་དམ་འཛིན་ལྷོད་མེད་བྱས་ཏེ་ཇི་མ་ཇི་བཞིན་དང་ཐོག་ལྟར་དྲག་ལ་རླུང་ལྟར་མྱུར་བའི་སྒོ་ནས་དོན་འཁྱོལ་ལ་དམ་འཛིན་བྱེད་དགོས། “རྟག་ཏུ་བློ་བཟོད་མི་བདེ་བའི”འགན་འཁྲི་འཁུར་སེམས་ཆེ་རུ་གཏོང་བ་དང་འབྲེལ“དོན་དག་ཚང་མར་གདེང་ཚོད་ཡོད་པའི”ལག་ལེན་དུ་ཏན་ཏིག་བསྒྱུར་ཏེ་ཁ་བཤད་ལག་བསྟར་དང་དམ་འཛིན་མྱུར་སྒྲུབ་བྱེད་པ་ལས་དལ་དལ་ལྷོད་ལྷོད་དང་ཐང་ངེ་ཐེང་ངེ་བྱེད་མི་རུང་།
དུས་བབ་རྙོག་འཛིང་ཇི་ཙམ་ཆེ་བ་དང་ལས་འགན་དཀའ་ཚེགས་ཇི་ཙམ་ཆེ་ན་དེ་ཙམ་གྱིས་བྱས་རྗེས་དངོས་འཇོག་པ་དང་། བྱ་ཐབས་དངོས་འདོན་པ། ཕན་འབྲས་དངོས་ཐོན་པ་བཅས་བྱེད་དགོས། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི《གཏན་འབེབས》ནང་ས་གནས་ཀྱི་ཚོང་འགུགས་མ་འདྲེན་གྱི་ཁྲིམས་སྲོལ་ལམ་ལུགས་ཚད་ལྡན་དུ་གཏོང་བ་དང་རྒྱུ་རྐྱེན་གཙོ་བོའི་ཁྲོམ་རའི་ལམ་ལུགས་དང་སྒྲིག་སྲོལ་འཐུས་སྒོ་ཚང་དུ་གཏོང་བ་སོགས་ཀྱི་སྒྱུར་བཅོས་བྱེད་ཐབས་བཏོན་ཞིང་། དེ་ནི་ཐོན་སྐྱེད་ཀྱི་རྒྱུ་རྐྱེན་གཙོ་བོ་ཐོགས་མེད་འཁོར་རྒྱུག་དང་། ཐོན་ཁུངས་སྣ་ཚོགས་བཀོད་སྒྲིག་ནུས་ལྡན། ཁྲོམ་རའི་མི་མངོན་པའི་སྟོབས་ཤུགས་གང་ལེགས་འདོན་པ་བཅས་ལ་སྐུལ་འདེད་གཏོང་བར་དམིགས་པ་ཞིག་རེད། ད་ཐེངས་ཀྱི་ཚོགས་འདུའི་ཐོག་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོ་འཛུགས་སྐྲུན་གྱི་ཁྲིད་སྟོན་བཟོ་དགོས་ཞེས་ཁ་གསལ་བཏོན་ཡོད། དེ་ནི་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོ་མགྱོགས་མྱུར་སྐྲུན་པའི་མཚོན་རྟགས་རང་བཞིན་གྱི་སྒྱུར་བཅོས་བྱེད་ཐབས་ཤིག་ཡིན་ལ། ས་གནས་ཀྱི་སྲུང་སྐྱོང་དང་ཁྲོམ་ར་ཁག་བགོས་སོགས་ཀྱི་འགལ་རྐྱེན་ནུས་ཤུགས་སྔར་བས་ཆེ་བའི་སྒོ་ནས་སེལ་བ་དང་ལས་རྣམ་གསར་པ་དང་ཁྱབ་ཁོངས་གསར་པའི་ཁྲོམ་རའི་འཇུག་འཐུས་ཁོར་ཡུག་ལེགས་སུ་གཏོང་བའི་ཁ་ཚ་དགོས་གཏུགས་ཀྱི་བླང་བྱའང་རེད།
དོན་འཁྱོལ་ལ་དམ་འཛིན་བྱེད་པར་ད་དུང་མཐུན་སྦྱོར་མཉམ་འགུལ་བྱེད་ཤུགས་ཆེ་རུ་བཏང་ནས་སྤྱི་ཡོངས་ཀྱི་འདུ་ཤེས་ཟབ་ཏུ་གཏོང་རྒྱུ་ནི་གལ་ཆེའི་ནང་གི་འགངས་ཆེ་ཡིན། རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོ་འཛུགས་སྐྲུན་ལ་སྐུལ་འདེད་གཏོང་བ་ནི་བརྒྱུད་རིམ་རང་བཞིན་གྱི་སྒྱུར་བཅོས་ཤིག་ཡིན་པ་དང་དེ་ཕྱོགས་གང་ས་ཅི་ཐད་དང་འབྲེལ་བ་ཡོད། རྒྱལ་ཡོངས་གཞི་གཅིག་ཅན་གྱི་ལག་རྩལ་དང་གྲངས་གཞིའི་ཁྲོམ་ར་སྐྱེད་སྲིང་བྱེད་པ་ནས་གྲོང་ཁྱེར་དང་གྲོང་གསེབ་གཅིག་གྱུར་གྱི་འཛུགས་སྐྲུན་ས་ཆའི་ཁྲོམ་ར་གཏོད་པའི་བར་དང་དེ་ནས་འདྲ་མཉམ་འགྲན་རྩོད་ཀྱི་ཞིབ་བཤེར་ལམ་ལུགས་དོན་འཁྱོལ་གཏིང་ཟབ་བྱེད་པ་དང་གཉེར་སྐྱོང་བྱེད་པོ་ཁྲོམ་རའི་འདྲ་མཉམ་འགྲན་རྩོད་ནང་ཞུགས་པའི་ཚད་གཞི་རྒྱུན་མཐུད་ངང་མེད་པར་བཟོ་བ་སོགས་སྲིད་ཇུས་ཀྱི་མཐུན་སྦྱོར་ལ་ཤུགས་སྣོན་དང་སྡེ་ཚན་གྱི་རོགས་ལས་ལ་ཤུགས་སྣོན་བརྒྱབ་ནས་ས་གནས་ཀྱི་སྲུང་སྐྱོང་དང་ཁྲོམ་ར་ཁག་བགོས་ཀྱི་སྣང་ཚུལ་མེད་པར་ནུས་ལྡན་བཟོས་ཏེ། གཏོར་འཛུགས་གལ་ཆེ་མཉམ་འཛིན་ཁྲོད་དེ་བས་འདྲ་མཉམ་དྲང་བདེན་གྱི་ཁྲོམ་རའི་ཁོར་ཡུག་ཅིག་བཏོད་ཡོད།
སྤྱི་ཡོངས་ལ་གཞིགས་ནས་བསམ་བློ་གཏོང་བ་དང་། སྤྱི་ཡོངས་ལ་གཞིགས་ནས་ཇུས་འགོད་བྱེད་པ། སྤྱི་ཡོངས་ལ་གཞིགས་ནས་བྱ་སྤྱོད་སྤེལ་བ་བཅས་བྱེད་དགོས། ས་ཁུལ་ཁག་དང་སྡེ་ཁག་ཁག་དང་དེ་བཞིན་རིམ་ཁག་འགོ་ཁྲིད་ལས་བྱེད་པས“རྒྱལ་ཁབ་ཀྱི་དོན་ཆེན”སེམས་སུ་བཅངས་ནས་གནད་དོན་ལ་བསམ་གཞིག་གིས་ཇུས་ཐག་གཅོད་པ་དང་། རྩིས་ཆེན་པོ་དང་ཕུགས་ཀྱི་རྩིས་མང་ཙམ་རྒྱག་པ་དང་ཁོག་རྩིས་ཆུང་ཆུང་དང་འཕྲལ་རྩིས་ཉུང་ཙམ་རྒྱག་དགོས། རང་གནས་རིང་ལུགས་ལ་ངོ་རྒོལ་བྱས་ཏེ་སྲིད་ཇུས་བཟོ་བ་དང་ལག་ལེན་བསྟར་བའི་བརྒྱུད་རིམ་ཧྲིལ་པོའི་མཐུན་སྦྱོར་རང་བཞིན་ཆེ་རུ་གཏོང་བ་དང་སྲིད་ཇུས་ཕན་འབྲས་ཀྱི་གཅིག་མཐུན་རང་བཞིན་ཆེ་རུ་གཏོང་དགོས། བརྟག་དཔྱད་ཞིབ་འཇུག་དང་ཞིབ་བསྡུར་དང་རིགས་པས་ཁུངས་སྐྱེལ་བྱེད་ཤུགས་ཆེ་རུ་བཏང་ནས་ས་ཁུལ་མི་འདྲ་བ་དང་ལས་རིགས་མི་འདྲ་བར་རིགས་དབྱེ་མཛུབ་ཁྲིད་བྱེད་ཤུགས་ཆེ་རུ་གཏོང་དགོས། སྡེ་ཚན་གྱི་མཐུན་སྦྱོར་དང་གོང་འོག་མཉམ་འགུལ་བྱེད་ཤུགས་ཆེ་རུ་བཏང་ནས་བར་གྱི་གེགས་ཆ་བསལ་ཏེ་སྲིད་ཇུས་ཀྱི་སྤྱི་ཡོངས་ཀྱི་ནུས་ཕྱོད་ཆེ་རུ་གཏོང་དགོས།
ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་འགག་རྩའི་དུས་སྐབས་སུ་གནས་པར་བརྟེན། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དེས་ང་ཚོར་བླང་བྱ་སྔར་ལས་མཐོ་བ་བཏོན་ཡོད། རྒྱ་ཆེའི་ཏང་ཡོན་དང་ལས་བྱེད་པས་སྟོང་བཤད་རྒྱལ་ཕུང་དང་དངོས་སྒྲུབ་རྒྱལ་དར་གྱི་གནས་ལུགས་བློ་ལ་བརྟན་པོར་ངེས་ནས་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་གྱི་ལག་ལེན་པ་དང་དངོས་སྒྲུབ་མཁན་ཡག་པོ་བྱེད་པ་དང་གནད་ལ་འཁེལ་པོས་དམིགས་ཚེ་དམ་འཛིན་གྱིས་བསྒྲུབས་པ་དང་། སྤུས་ཚད་མཐོ་བའི་འཕེལ་རྒྱས་ཀྱི་ཕན་འབྲས་དངོས་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་དགོས།
（ཚེ་བརྟན་སྒྲོལ་དཀར་གྱིས་བསྒྱུར། ཚེ་སྒྲོལ་དང་བསྟན་བཟང་གིས་ཞུས）