འདི་ག་ཚགས་པར་ཁང་དུ་གྲོང་ཁྱེར་ཨབ་ཀྲ་པེ་ནས་གློག་འཕྲིན་འབྱོར་གསལ། ཀྲུང་གོ་དང་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་དབར་ཕྱི་འབྲེལ་བཙུགས་ནས་ལོ་40འཁོར་བར་རྟེན་འབྲེལ་ཞུ་ཆེད། ཉིན་ཤས་གོང་། ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱི་རྒྱལ་ས་ཨབ་ཀྲ་པེར་ཀྲུང་གོའི་མཉམ་སྒྲོག་རོལ་དབྱངས་ཚོགས་པས་ཆེད་དོན་རོལ་དབྱངས་འདུ་ཚོགས་གཉེར་བ་རེད། ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཏུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཀྲང་དབྱི་མིང་དང་། ཧྲ་ཅ་ཚོ་དཔོན་རྒྱལ་ཁབ་ཀྱི་སྲས་མོ་ལུའུ་པུའུ་ནཱ་སོགས་ཆབ་སྲིད་དང་ཚོང་དོན་ལས་རིགས་ཀྱི་མི་སྣ་དང་། ཕྱིར་སྡོད་རང་མི། ཕྱི་ཁོངས་ཀྲུང་གོ་བ། ཕྱི་སྦྱོང་སློབ་མ་བཅས་ཀྱི་འཐུས་མི་སོགས་ཀྱིས་འཁྲབ་སྟོན་ལ་གཟིགས་པ་རེད།
ཤེས་རྟོགས་བྱུང་བར་གཞིགས་ན། ད་ཐེངས་ཀྱི་བྱེད་སྒོ་ནི་ཀྲུང་ཨ་རྒྱལ་ཁབ་གཉིས་དབར་ཕྱི་འབྲེལ་བཙུགས་ནས་ལོ་40འཁོར་བར་རྟེན་འབྲེལ་ཞུ་བའི་རིམ་སྤེལ་བྱེད་སྒོའི་བྱེད་སྒོ་མཇུག་ཤོས་དེ་རེད། ཉིན་དེར་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཏུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་དང་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྲུང་གོའི་རིག་གནས་ལྟེ་གནས་ཀྱིས་ད་དུང་ས་གནས་ས་ཐོག་ཏུ་ཀྲུང་ཨ་རྒྱལ་ཁབ་གཉིས་དབར་གྱི་མཛའ་གྲོགས་བརྙན་པར་འགྲེམས་སྟོན་བྱས་ནས་ཀྲུང་ཨ་རྒྱལ་ཁབ་གཉིས་ཀྱི་མི་ཆོས་རིག་གནས་སྤེལ་རེས་ཀྱི་གཡུར་ཟའི་གྲུབ་འབྲས་འགྲེམས་སྟོན་བྱས་པ་རེད།