ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་པ་གཞིར་བཟུང་། ཉིན་ཤས་གོང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཀྲུང་དབྱང་ཕྱི་ཕྱོགས་གཞུང་དོན་ཁང་གི་ཀྲུའུ་རེན་ཝང་དབྱི་ཡིས་པེ་ཅིང་དུ་ཧྥ་རན་སེའི་ཙུང་ཐུང་གི་ཕྱི་དོན་བློ་འདྲི་བ་པུའོ་ནཱ་དང་ལྷན་དུ་ཀྲུང་ཧྥའི་འཐབ་ཇུས་གླེང་མོལ་ཐེངས་ཉེར་དྲུག་པ་བྱས་པ་རེད།

ཝང་དབྱི་ཡིས་གསུངས་དོན། ཀྲུའུ་ཞི་ཞི་ཅིན་ཕིང་དང་ཙུང་ཐུང་མཱ་ཁེ་ལུང་དབར་མཉམ་འགུལ་དམ་ཟབ་གནང་བ་དེས་ཀྲུང་ཧྥ་དང་ཀྲུང་ཡོའི་དབར་གྱི་འབྲེལ་བའི་འཕེལ་རྒྱས་ལ་ཁ་སྒྱུར་ཕྱོགས་སྟོན་གནང་ཡོད། སང་ལོ་ནི་ཀྲུང་ཧྥའི་དབར་གྱི་འབྲེལ་བའི“རབ་བྱུང”གསར་པའི་འགོ་འཛུགས་ལོ་ཞིག་ཡིན། ཀྲུང་གོ་ཕྱོགས་ཀྱིས་ཧྥ་རན་སེ་ཕྱོགས་དང་མཉམ་དུ་རང་བཙན་རང་བདག་དང་། ཕན་ཚུན་བསམ་ཤེས། གཟིགས་རྒྱང་རིང་བ། གཉིས་ཁེ་གཉིས་ཕན་བཅས་ཀྱི“ཀྲུང་ཧྥའི་སྙིང་སྟོབས”མཐའ་འཁྱོངས་བྱས་ཏེ་ཀྲུང་ཧྥའི་དབར་གྱི་འབྲེལ་བ་ཐོག་མཐའ་བར་གསུམ་དུ་ཀྲུང་ཡོའི་འབྲེལ་བའི་འཕེལ་རྒྱས་ལ་ཁྲིད་སྟོན་དང་འཛམ་གླིང་གི་ཞི་བདེ་བརྟན་ལྷིང་ལ་སྐུལ་འདེད་གཏོང་བའི་ཡར་ཐོན་གྱི་སྟོབས་ཤུགས་ཤིག་ཏུ་འགྱུར་འདོད་ཡོད།

པུའོ་ནཱ་ཡིས་གསུངས་དོན། ཧྥ་རན་སེ་ཕྱོགས་ཀྱིས་ཧྥ་ཀྲུང་དབར་གྱི་སྲོལ་རྒྱུན་མཛའ་གྲོགས་དང་རྒྱལ་ཁབ་གཉིས་པོའི་གཙོ་བདག་དབར་གྱི་ཡིད་ཆེས་དམ་ཟབ་ལ་ཚད་མཐོའི་མཐོང་ཆེན་བྱེད་ཀྱི་ཡོད། ང་ཚོས་མུ་མཐུད་ཀྲུང་གོ་གཅིག་གི་སྲིད་ཇུས་བརྟན་སྲུང་བྱས་ཏེ་ཀྲུང་གོ་ཕྱོགས་དང་མཉམ་དུ་མཐོ་རིམ་འགྲོ་འོང་དམ་ཟབ་བྱས་ནས་ལམ་སྲོལ་གླེང་མོལ་ཡག་པོ་བྱེད་ཀྱི་ཡིན། ཀྲུང་གོ་ཕྱོགས་དང་མཉམ་དུ་བརྗིད་ཆེའི་དམིགས་ཚད་བཟོས་ནས་ཁྱབ་ཁོངས་ཁག་གི་ནུས་པ་ལྡན་པ་དང་གསར་གཏོད་རང་བཞིན་གྱི་མཉམ་ལས་རྒྱ་ཆེར་གཏོང་རྒྱུའི་རེ་བ་ཡོད། ཧྥ་རན་སེས་ཤོག་ཁག་ཁ་གཏད་དུ་ལངས་པར་ངོ་རྒོལ་བྱས་ཏེ་རང་བཙན་རང་བདག་གི་ཕྱི་འབྲེལ་སྲོལ་རྒྱུན་མཐའ་འཁྱོངས་བྱེད་ཀྱི་ཡིན།