འདི་ག་ཚགས་པར་གྱི་དཔྱད་གཏམ་མཁན་གྱིས།

ཉིན་ཤས་གོང་འཚོགས་པའི་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རང་རེའི་ཏང་གིས་དཔལ་འབྱོར་ལས་དོན་ལ་འཛིན་པའི་ཆོས་ཉིད་རང་བཞིན་གྱི་ངོས་འཛིན་ལ་ཕྱོགས་སྡོམ་དང་སྙིང་དོན་བསྡུ་ལེན་གནང་ནས་ནུས་ལྡན་གྱི་ཁྲོམ་ར་དང་བྱས་པ་ཅན་གྱི་སྲིད་གཞུང་དང་། སྤྱིའི་མཁོ་སྤྲོད་དང་སྤྱིའི་དགོས་མཁོ། འགུལ་ནུས་གསར་པ་སྐྱེད་སྲིང་དང་འགུལ་ནུས་རྙིང་པ་གསར་བརྗེས། འཕར་འབོར་ལེགས་སུ་གཏོང་བ་དང་གསོག་འབོར་ཕན་སྒྱུར། སྤུས་ཚད་མཐོར་གཏོང་དང་སྤྱི་འབོར་ཆེར་གཏོང་བཅས་ཀྱི་འབྲེལ་བ་གལ་ཆེན་ཆ་ལྔ་ངེས་པར་དུ་སྤྱི་འདོམས་ཡག་པོ་བྱས་ཏེ། སྤུས་ཚད་མཐོ་བའི་འཕེལ་རྒྱས་ལ་བརྟེན་ནས་ཀྲུང་གོའི་ལུགས་ཀྱི་དེང་རབས་ཅན་ལ་ཕྱོགས་ཡོངས་ནས་སྐུལ་འདེད་གཏོང་ཆེད་ཚན་རིག་དང་མཐུན་པའི་མཛུབ་ཁྲིད་གནང་ཡོད།

“ངེས་པར་དུ་སྤྱི་འདོམས་བྱེད་དགོས་པ”ལྔ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དུས་རབས་གསར་པའི་དཔལ་འབྱོར་འཕེལ་རྒྱས་ཀྱི་ཆོས་ཉིད་ལ་གནང་བའི་ཆོད་གཏམ་གལ་ཆེན་ཞིག་ཡིན་པ་དང་། དེ་ནི་ད་ཡོད་ཀྱི་ལག་ལེན་ལ་ཕྱོགས་སྡོམ་དང་སྙིང་བསྡུས་བྱས་པ་ཞིག་ཡིན་ལ། འབྱུང་འགྱུར་འཕེལ་རྒྱས་ལ་བློ་འབྱེད་ཁྲིད་སྟོན་བྱས་པ་ཞིག་དེ་བས་ཀྱང་ཡིན་པས། ཞི་ཅིན་ཕིང་གི་དཔལ་འབྱོར་དགོངས་པ་སྔར་བས་ཕུན་སུམ་ཚོགས་སུ་དང་འཕེལ་རྒྱས་བཏང་བ་ཞིག་རེད། ང་ཚོས་ངོས་འཛིན་གཏིང་ཟབ་བྱེད་དགོས་པ་ཞིག་ལ། ནུས་ལྡན་གྱི་ཁྲོམ་ར་དང་བྱས་པ་ཅན་གྱི་སྲིད་གཞུང་དབར་གྱི་འབྲེལ་བར་ངེས་པར་དུ་སྤྱི་འདོམས་ཡག་པོ་བྱེད་དགོས་པ་དང་དེ་ནི“གློད་ཐུབ”ལ“སྡོམ་ཐུབ་པའི”དཔལ་འབྱོར་སྒྲིག་ལམ་ཆགས་པའི་འགག་གནད་ཅིག་ཡིན། སྤྱིའི་མཁོ་སྤྲོད་དང་སྤྱིའི་དགོས་མཁོའི་དབར་གྱི་འབྲེལ་བར་ངེས་པར་དུ་སྤྱི་འདོམས་ཡག་པོ་བྱེད་དགོས་པ་དང་དེ་ནི་རྒྱལ་དམངས་དཔལ་འབྱོར་འཁོར་རྒྱུག་ཤར་གཏོང་ཡོང་བའི་རྨང་གཞི་གལ་ཆེན་ཞིག་ཡིན། འགུལ་ནུས་གསར་པ་སྐྱེད་སྲིང་དང་འགུལ་ནུས་རྙིང་པ་གསར་བརྗེས་དབར་གྱི་འབྲེལ་བར་ངེས་པར་དུ་སྤྱི་འདོམས་ཡག་པོ་བྱེད་དགོས་པ་དང་དེ་ནི་ཡུལ་བབ་དང་བསྟུན་ཏེ་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་བའི་ནང་གནས་ཀྱི་བླང་བྱ་ཞིག་ཡིན།

(པར་ངོས་གཉིས་པར་གཟིགས)(པར་ངོས་དང་པོར་མཐུད)

འཕར་འབོར་ལེགས་གཏོང་དང་གསོག་འབོར་ཕན་སྒྱུར་དབར་གྱི་འབྲེལ་བར་ངེས་པར་དུ་སྤྱི་འདོམས་ཡག་པོ་བྱེད་དགོས་པ་དང་དེ་ནི་ཐོན་ཁུངས་བཀོད་སྒྲིག་གི་ཕན་འབྲས་ཕྱོགས་ཡོངས་ནས་གོང་མཐོར་གཏོང་བར་སྐྱོད་དགོས་ངེས་ཀྱི་ལམ་བུ་ཞིག་རེད། སྤུས་ཚད་མཐོར་གཏོང་དང་སྤྱི་འབོར་ཆེར་གཏོང་དབར་གྱི་འབྲེལ་བར་ངེས་པར་དུ་སྤྱི་འདོམས་ཡག་པོ་བྱེད་དགོས་པ་དང་། དེ་ནི་ཀྲུང་གོའི་ལུགས་ཀྱི་དེང་རབས་ཅན་གྱི་དངོས་པོའི་རྨང་གཞི་བརྟན་དུ་གཏོང་བའི་ལྡོག་མེད་ཀྱི་བླང་བྱ་ཞིག་རེད།

རང་རྒྱལ་གྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་འགག་རྩའི་དུས་མཚམས་སུ་སླེབས་ཡོད་པས། ལ་བརྒལ་ཉག་སྒྲོལ་དང་འགག་སྒྲོལ་དཀའ་སེལ་ཇི་ཙམ་བྱེད་པར་དེ་ཙམ་གྱིས་འཕེལ་རྒྱས་ཀྱི་ཆོས་ཉིད་ལ་བརྩི་འཇོག་དང་། ཚན་རིག་དང་མཐུན་པའི་ཐབས་ཤེས་ལ་དམ་འཛིན། ལས་ཀའི་རང་འགུལ་མཐོར་གཏོང་བཅས་བྱེད་དགོས། ང་ཚོས“ངེས་པར་དུ་སྤྱི་འདོམས་བྱེད་དགོས་པ”ལྔ་ཁོང་དུ་གཏིང་ཟབ་ཆུད་པ་དང་བེད་སྤྱོད་བྱས་ཏེ། དུས་རབས་གསར་པའི་དཔལ་འབྱོར་འཕེལ་རྒྱས་ཀྱི་ཆོས་ཉིད་དེ་དཔལ་འབྱོར་ལས་དོན་གྱི་ཕྱོགས་ཁག་དང་བརྒྱུད་རིམ་ཧྲིལ་པོར་ལག་བསྟར་དོན་འཁྱོལ་ཏན་ཏིག་བྱེད་དགོས།

འདིར་སྤྱིའི་མཁོ་སྤྲོད་དང་སྤྱིའི་དགོས་མཁོའི་དབར་གྱི་འབྲེལ་བར་སྤྱི་འདོམས་འཆར་འགོད་ཡག་པོ་བྱེད་པར་དཔེ་བཞག་ནས་དབྱེ་ཞིབ་དང་གོ་བ་གཏིང་ཟབ་ལེན་རྒྱུ་སྟེ།

རང་རྒྱལ་ལ་གོ་ལ་ཧྲིལ་པོར་གཞི་ཁྱོན་ཆེ་ཤོས་དང་སྣ་ཁ་འཛོམས་ཤོས་ཀྱི་བཟོ་སྐྲུན་ལས་རིགས་ཀྱི་མ་ལག་ཡོད་པ་དང་། བཟོ་ལས་ཐོན་རྫས་གཙོ་བོ་རིགས་500ཡི་ནང་ནས་ཐོན་རྫས་རིགས་220ལྷག་གི་ཐོན་འབོར་གོ་ལ་ཧྲིལ་པོའི་ཨང་དང་པོར་སླེབས་ཡོད། མཁོ་སྤྲོད་ནུས་པ་ཆེན་པོ་དེས་རང་རྒྱལ་གྱི་ཕྱི་ཕྱོགས་ཚོང་དོན་བརྟན་པོ་འཕར་བར་འདེགས་སྐྱོར་ཐུབ་ནས་དངོས་ཟོག་ཕྱིར་གཏོང་གི་རྒྱལ་སྤྱིའི་ཁྲོམ་རའི་ཐོབ་སྐལ་གོ་ལ་ཧྲིལ་པོའི་ཨང་དང་པོ་ལོ་15བསྟུད་མར་རྒྱུན་འཁྱོངས་ཐུབ་ཡོད་ལ། སྤུས་ཚད་མཐོ་བའི་མཁོ་སྤྲོད་ལ་བརྟེན་ནས་ནུས་ལྡན་གྱི་དགོས་མཁོ་ཟམ་མི་ཆད་པར་བཏོད་དེ་དཔལ་འབྱོར་འཕར་བར་རྫོགས་མཐའ་མེད་པའི་སྒུལ་ཤུགས་ཀྱི་འདེགས་སྐྱོར་མཁོ་འདོན་ཐུབ་ཡོད།

མཁོ་སྤྲོད་ལ་བརྟེན་ནས་གསར་གཏོད་ཀྱི་དགོས་མཁོ་བསྐངས་ཡོད། མཁོ་སྤྲོད་མ་ལག་གི་སྤུས་ཚད་དང་ལས་ཕྱོད་ཆེ་རུ་ཤུགས་ཆེན་བཏང་ཚེ་དགོས་མཁོ་གསར་པ་གསར་གཏོད་དང་རྒྱ་ཆེར་གཏོང་ཐུབ། ནུས་རྒྱུ་གསར་པའི་རླངས་འཁོར་ཐོན་ལས་ལ་ཆ་མཚོན་ན། ལོ་རེར་རླངས་འཁོར་ཁྲི་ལྷག་ཙམ་ཐོན་སྐྱེད་བྱེད་པ་ནས་ལོ་རེར་རླངས་འཁོར་ཁྲི་བརྒྱ་ཐོན་སྐྱེད་ཀྱི་འགག་སྒོ་ལས་ཐོག་མར་སྒྲོལ་བར་དུས་ཡུན་ལོ་6ལས་འགོར་མེད། དེ་དང་འདྲ་བར་དུས་ཡུན་ལོ་6ལས་མ་འགོར་བར་རང་རྒྱལ་གྱི་ནུས་རྒྱུ་གསར་པའི་རླངས་འཁོར་ཐོན་ལས་ལ་ལོ་རེར་རླངས་འཁོར་ཁྲི་བརྒྱ་ཐོན་སྐྱེད་བྱེད་པ་ནས་ཁྲི་སྟོང་ཐོན་སྐྱེད་བྱེད་པའི་བར་གྱི་མཆོང་སྐྱོད་མངོན་འགྱུར་བྱུང་ཡོད། ཟླ་7པ་ནས་ནུས་རྒྱུ་གསར་པའི་རླངས་འཁོར་གྱི་སིལ་ཚོང་བྱེད་ཚད་འབར་སྣུམ་རླངས་འཁོར་ལས་མང་བ་ཡོད། ནུས་རྒྱུ་གསར་པའི་རླངས་འཁོར་ལ་ཁྲོམ་ར་ནས་དགའ་བསུ་ཐོབ་དོན་དང་འགྲན་རྩོད་དྲག་པོའི་ཁྲོད་ནས་འབུར་དུ་ཐོན་དོན་ནི་ཕྱོགས་གཅིག་ནས་ཚན་རྩལ་གསར་གཏོད་ལ་བརྟེན་ནས་སྤུས་ཚད་ཟམ་མི་ཆད་པར་མཐོ་རུ་བཏང་བ་དང་། ཕྱོགས་གཞན་ཞིག་ནས་མི་དམངས་མང་ཚོགས་ཀྱི་སྤུས་ཚད་མཐོ་བའི་འཚོ་བའི་རེ་སྒུག་དང་འཚམ་པས་རེད།

མཁོ་སྤྲོད་ཕྱོགས་ཀྱི་གྲུབ་ཆའི་རང་བཞིན་གྱི་སྒྱུར་བཅོས་གཏིང་ཟབ་ཏུ་གཏོང་བའི་སྲོག་ཤིང་ནི་ཚན་རྩལ་གསར་གཏོད་ལ་བརྟེན་ནས་ཐོན་ལས་གསར་གཏོད་ལ་སྐུལ་འདེད་གཏོང་རྒྱུ་དེ་རེད། ད་ཐེངས་ཀྱི་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐོག་ཚན་རྩལ་གསར་གཏོད་ལ་བརྟེན་ནས་ཐོན་སྐྱེད་ནུས་ཤུགས་གསར་མའི་འཕེལ་རྒྱས་ལ་སྣེ་ཁྲིད་བྱེད་པར་དམིགས་ཏེ་བཀོད་སྒྲིག་གལ་ཆེན་བྱས་ནས། ལག་རྩལ་གསར་པ་དང་། ཐོན་རྫས་གསར་པ། ཡུལ་ལྗོངས་གསར་པ་བཅས་གཞི་ཁྱོན་ཆེན་པོས་སྤྱོད་པའི་དཔེ་སྟོན་བྱ་སྤྱོད་སྤེལ་དགོས་ཞེས་བཏོན་ཡོད། འབྱུང་འགྱུར་ལ་ཁ་ཕྱོགས་ཏེ་སྤུས་ཚད་མཐོ་བའི་མཁོ་སྤྲོད་ལ་བརྟེན་ནས་འཛད་སྤྱོད་ཀྱི་དགོས་མཁོ་གསར་པ་གཏོད་པ་དང་འཛད་སྤྱོད་ཀྱི་སྤུས་ཚད་མཐོར་གཏོང་རིམ་སྤོར་ལ་སྐུལ་འདེད་བཏང་ཚེ། འཁོར་རྒྱུག་བཟང་པོ་དང་ནུས་ཤུགས་མཉམ་འདོན་མངོན་འགྱུར་ཐུབ་ངེས་རེད།

དགོས་མཁོས་མཁོ་སྤྲོད་ལ་སྣེ་ཁྲིད་བྱས་ཡོད། ཉེ་བའི་ལོ་ཤས་རིང་། ཏང་ཀྲུང་དབྱང་གིས་ནང་མཁོ་རྒྱ་ཆེར་གཏོང་བ་དང་མཁོ་སྤྲོད་ཕྱོགས་ཀྱི་གྲུབ་ཆའི་རང་བཞིན་གྱི་སྒྱུར་བཅོས་ཟབ་གཏོང་ལ་སྤྱི་འདོམས་བྱས་ནས། ནང་མཁོ་རྒྱ་ཆེར་གཏོང་བའི་འཐབ་ཇུས་ཀྱི་གཞི་གནས་ལ་སྟངས་འཛིན་ནན་པོ་བྱས་ཏེ། རྒྱལ་ནང་གི་རྒྱུན་འཁོར་ཆེན་པོ་སྔར་བས་བདེ་བླག་ཡོང་བ་དང་ཕྱི་ནང་ཁྲོམ་ར་སྦྲེལ་མཐུད་ལ་སྔར་བས་ཕན་ནུས་ཆེན་པོ་ཐོན་པར་སྐུལ་འདེད་བཏང་ཡོད། ལྷག་པར་དུ་ད་ལོ་ཚུན་དུ“གལ་ཆེན་གཉིས”དང“གསར་གཉིས”ཀྱི་སྲིད་ཇུས་ལ་ཤུགས་སྣོན་རྒྱུན་མཐུད་བརྒྱབ་སྟེ་འཛད་སྤྱོད་ཀྱི་མངོན་མེད་སྟོབས་ཤུགས་ཟམ་མི་ཆད་པར་མངོན་པ་དང་མ་འཇོག་འཕར་བར་ཡར་སྐུལ་བྱས་ཡོད། འཛད་སྤྱོད་དངོས་ཟོག་རྙིང་པ་གསར་བརྗེས་སྲིད་ཇུས་ཀྱིས་ཕྱོགས་ཡོངས་ནས་འབྲེལ་ཡོད་ཐོན་རྫས་ཀྱི་ཕྱིར་ཚོང་གྲངས་འབོར་སྒོར་དུང་ཕྱུར་ཁྲི་1ལྷག་ཙམ་ཟིན་པར་སྐུལ་ཁྲིད་བྱས་ཡོད། ཟླ་དང་པོ་ནས་བཅུ་པའི་བར། རྒྱལ་ཡོངས་ཀྱི་གཏན་འཇགས་རྒྱུ་ནོར་ལ་མ་འཇོག་བྱེད་ཚད་དུས་མཚུངས་ལས་3.4%འཕར་བ་དང་། དེའི་ནང་རྨང་གཞིའི་སྒྲིག་བཀོད་ལ་མ་འཇོག་བྱེད་ཚད་དུས་མཚུངས་ལས་4.3%འཕར་བ་དེ་ཟླ་དང་པོ་ནས་དགུ་པའི་བར་ལས་བརྒྱ་ཆའི་གྲངས་0.2ཀྱིས་མགྱོགས་པ་དང་། བཟོ་སྐྲུན་ལས་རིགས་ལ་མ་འཇོག་བྱེད་ཚད་9.3%འཕར་བ་དེ་ཟླ་དང་པོ་ནས་དགུ་པའི་བར་ལས་བརྒྱ་ཆའི་གྲངས་0.1གིས་མགྱོགས་པ་ཡོད།

ད་ཐེངས་ཀྱི་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐོག་སང་ལོའི་ལས་དོན་གྱི་གཙོ་གནད་ལས་འགན་བཀོད་སྒྲིག་བྱས་ཡོད་ཅིང་། དེ་དག་ལས་ཨང་དང་པོ་ནི“འཛད་སྤྱོད་བྱེད་ཤུགས་དང་མ་འཇོག་གི་ཕན་འབྲས་ཆེ་རུ་བཏང་སྟེ། རྒྱལ་ནང་གི་དགོས་མཁོ་ཕྱོགས་ཡོངས་ནས་རྒྱ་ཆེར་གཏོང་དགོས”ཞེས་པ་དེ་ཡིན་པ་དང་། དེ་ཐོག་ནས་སྤྱིའི་མཁོ་སྤྲོད་དང་སྤྱིའི་དགོས་མཁོར་སྤྱི་འདོམས་ནུས་ལྡན་བྱས་པ་དང་དཔལ་འབྱོར་གྱི་ཆོས་ཉིད་བཀོལ་སྤྱོད་གཏིང་ཟབ་བྱས་པ་མཚོན་གྱི་ཡོད། འཛད་སྤྱོད་བྱེད་ཤུགས་ཆེ་རུ་གཏོང་བའི་ཆེད་དོན་བྱ་སྤྱོད་ལག་ལེན་བསྟར་བ་དང་། “གསར་གཉིས”སྲིད་ཇུས་ལག་བསྟར་བྱེད་ཁྱོན་ཆེ་རུ་གཏོང་བ། ནུས་ཤུགས་སྔར་བས་ཆེན་པོས“གལ་ཆེན་གཉིས”ཀྱི་རྣམ་གྲངས་ལ་རྒྱབ་སྐྱོར་བྱེད་པ་བཅས་ཀྱི་སྲིད་ཇུས་དང་བྱེད་ཐབས་དེ་དག་མིག་སྔར་གཞི་ཚུགས་པ་དང་ཕུགས་ལ་དམིགས་ཡོད་པས། ནང་མཁོའི་མངོན་མེད་ནུས་པ་ནུས་ལྡན་འཕེལ་བ་དང་། རྒྱལ་ནང་གི་རྒྱུན་འཁོར་ཆེན་པོ་བརྟན་དུ་དང་ཆེ་རུ་འགྲོ་བ། རྒྱལ་ནང་དང་རྒྱལ་སྤྱིའི་རྒྱུན་འཁོར་གཉིས་ལ་སྐུལ་ཁྲིད་དེ་བས་ལེགས་པ་ཐུབ་ངེས་རེད།

（རིག་རྡོར་གྱིས་བསྒྱུར། མཚམས་གཅོད་ཀྱིས་ཞུས）