ཤིན་ཧྭ་གསར་འགྱུར་ཁང་ནན་ཅིང་ནས་ཟླ་12ཚེས་13ཉིན་གློག་འཕྲིན་འབྱོར་གསལ། ཚེས་13ཉིན་གྱི་སྔ་དྲོར། ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ནན་ཅིང་དམར་གསོད་ཆེན་པོའི་ཁྲོད་རྐྱེན་ལམ་དུ་ཤོར་མཁན་གྱི་2024ལོའི་རྒྱལ་ཁབ་ཀྱི་སྤྱི་མཆོད་མཛད་སྒོ་ནན་ཅིང་དུ་གཟབ་རྒྱས་ངང་འཚོགས་པ་རེད། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཀྲུང་དབྱང་དྲིལ་བསྒྲགས་པུའི་པུའུ་ཀྲང་ལི་ཧྲུའུ་ལེ་ཞུགས་ནས་གསུང་བཤད་གནང་བ་རེད།

སྤྱི་མཆོད་མཛད་སྒོ་དེ་ཀྲུང་གོར་བཙན་འཛུལ་བྱེད་མཁན་རི་པིན་དམག་གི་ནན་ཅིང་དམར་གསོད་ཆེན་པོར་རྐྱེན་ལམ་དུ་ཤོར་མཁན་སྤུན་ཟླའི་དྲན་གསོ་ཁང་གི་འདུ་འཛོམས་ཐང་ཆེན་དུ་འཚོགས་ཤིང་། ས་གནས་ས་ཐོག་གི་རྣམ་པ་སྒམ་བརླིང་ལྡན་ལ་རྒྱལ་དར་ཕྱེད་ཀ་ཕབ་ཡོད་པ་རེད། ལས་རིགས་ཁག་གི་འཐུས་མི་8000ལྷག་ཙམ་གྱིས་བྲང་ཁར་མེ་ཏོག་དཀར་པོ་བཏགས་ནས་གུས་སྟབས་ཀྱིས་ཁུ་སིམ་པོར་ལངས་ནས་བསྡད། ཆུ་ཚོད་10པ་ཏག་ཏག་ལ། སྤྱི་མཆོད་མཛད་སྒོ་འགོ་ཚུགས་ཏེ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་བླངས་པ་རེད། རྒྱལ་གླུ་བླངས་རྗེས་ཚོགས་ར་ཡོངས་ཀྱིས་ནན་ཅིང་དམར་གསོད་ཆེན་པོའི་ཁྲོད་རྐྱེན་ལམ་དུ་ཤོར་མཁན་ལ་ངག་བསྡམས་ནས་མྱ་ངན་ཞུས་ཤིང་། ནན་ཅིང་གྲོང་ཁྱེར་གྱིས་མཁའ་ཟོན་ཉེན་བརྡ་བཏང་བ་དང་། རླངས་འཁོར་གཏོང་མཚམས་བཞག་ནས་དུང་བརྡ་གྲགས་པ། ལམ་མིས་རང་སར་ངག་བསྡམས་ནས་མྱ་ངན་ཞུས་པ་རེད། ངག་བསྡམས་ནས་མྱ་ངན་ཞུས་རྗེས། བཅིངས་འགྲོལ་དམག་གི་དམག་དཔུང་རོལ་དབྱངས་ཚོགས་པས་དཀྲོལ་བའི《རྒྱལ་ཁབ་ཀྱི་སྤྱི་མཆོད་རོལ་དབྱངས》ཀྱི་འགྱུར་ཁུག་ཁྲོད་བཅིངས་འགྲོལ་དམག་གི་གཟབ་སྦྲེང་སིའི་གུས་དམག་རུ་ཆེན་གྱི་གུས་དམག་16གིས་འདས་མཆོད་མེ་ཏོག་ཕྲེང་བ་8ཡར་བཀྱགས་ནས་སྤྱི་མཆོད་སྟེགས་བུར་ཕུལ་བ་རེད།

དེ་རྗེས་ལི་ཧྲུའུ་ལེས་གསུང་བཤད་གནང་ཞིང་། ཁོང་གིས་དེ་རིང་ང་ཚོ་འདུ་འཛོམས་གཟབ་རྒྱས་བྱས་ནས་ནན་ཅིང་དམར་གསོད་ཆེན་པོའི་ཁྲོད་ཉེས་མེད་རྐྱེན་ལམ་དུ་ཤོར་མཁན་ལ་རྗེས་དྲན་ཟབ་མོ་དང་། རི་པིན་བཙན་འཛུལ་བས་དམར་གསོད་བཏང་བའི་སྤུན་ཟླར་རྗེས་དྲན། ཀྲུང་གོའི་མི་དམངས་ཀྱི་རི་འགོག་དམག་འཁྲུག་ལ་རྒྱལ་ཁ་ཐོབ་ཆེད་རང་སྲོག་བློས་བཏང་བའི་གསར་བརྗེའི་སྔོན་གཤེགས་དཔའ་བོ་དང་མི་རིགས་ཀྱི་དཔའ་བོར་རྗེས་དྲན།

(པར་ངོས་གཉིས་པར་གཟིགས)(པར་ངོས་དང་པོར་མཐུད) ཀྲུང་གོའི་མི་དམངས་དང་མཉམ་དུ་རི་པིན་བཙན་འཛུལ་བར་འགོག་རྒོལ་བྱེད་མཁན་རྒྱལ་ཁབ་ཁག་གི་སྔོན་གཤེགས་དཔའ་བོར་རྗེས་དྲན་བཅས་ཞུས་ནས། ཀྲུང་གོའི་མི་དམངས་ཀྱིས་བློ་བརྟན་འགྱུར་མེད་ངང་ཞི་བདེ་འཕེལ་རྒྱས་ཀྱི་ལམ་བུར་བསྐྱོད་པའི་བླ་ན་མེད་པའི་འདུན་པ་མཚོན་པར་བྱས་ཡོད་ཅེས་གསུངས་པ་རེད།

ལི་ཧྲུའུ་ལེས། ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་ཀྱིས་ཀུན་སེམས་གཅིག་སྒྲིལ་དང་འབད་འབུངས་ཆེར་སྐྱེད་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་ཆེད་འབད་འཐབ་ཧུར་ཐག་བྱས་ཐོག མིའི་རིགས་ཀྱི་ཞི་བདེ་དང་འཕེལ་རྒྱས་ཀྱི་བླ་ན་མེད་པའི་བྱ་གཞག་ཆེད་ལེགས་སྐྱེས་དེ་བས་ཆེ་བ་འབུལ་དགོས་ཞེས་གསུངས་པ་རེད།