འདི་ག་ཚགས་པར་གྱི་དཔྱད་གཏམ་མཁན་གྱིས།

ཟླ་12ཚེས་11དང་12ཉིན། ཀྲུང་དབྱང་གི་དཔལ་འབྱོར་ལས་དོན་འདུ་ཚོགས་པེ་ཅིང་དུ་འཚོགས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཚོགས་འདུར་ཕེབས་ནས་གསུང་བཤད་གལ་ཆེན་གནང་སྟེ། སང་ལོའི་དཔལ་འབྱོར་ལས་དོན་ལ་བརྒྱུད་རིམ་ལྡན་པའི་བཀོད་སྒྲིག་གནང་ནས་མིག་སྔ་དང་སླད་ཕྱིན་དུས་སྐབས་ཤིག་རིང་གི་དཔལ་འབྱོར་ལས་དོན་ཡག་པོ་བསྒྲུབ་རྒྱུར་ང་ཚོར་གཞི་འཛིན་ས་གལ་ཆེན་མཁོ་འདོན་གནང་ཡོད།

འདུས་གྲུབ་གློག་ལམ་དང་། མི་ཐབས་རིག་ནུས། ཚད་རྡུལ་ཚན་རྩལ་སོགས་ཚན་རྩལ་གསར་གཏོད་ལ་འཕེལ་རྒྱས་གལ་ཆེན་བྱུང་བ་ནས་སྲོལ་རྒྱུན་ཐོན་ལས་རིག་ནུས་ཅན་གྱི་སྒྱུར་བཀོད་དང་གྲངས་འཛིན་ཅན་གྱི་ཕྱོགས་སྒྱུར་ལ་རྒྱུན་མཐུད་ངང་སྐུལ་འདེད་བཏང་བའི་བར་དང་། དེ་ནས་ནུས་རྒྱུ་གསར་པའི་རླངས་འཁོར་གྱི་ལོའི་ཐོན་འབོར་ཁྲི་1000ལས་ཐོག་མར་བརྒལ་བ་དང་། འབྲུ་རིགས་ཐོན་འབབ་རྒྱ་མ་དུང་ཕྱུར་ཁྲི་1.4ལས་ཐོག་མར་བརྒལ་བའི་བར་སོགས་ཐོན་སྐྱེད་ནུས་ཤུགས་གསར་མས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་འདེགས་སྐྱོར་གལ་ཆེན་མཁོ་འདོན་བྱས་ནས་ལོ་འཁོར་མོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་དང་ལས་འགན་གཙོ་བོ་མི་རིང་བར་ལེགས་གྲུབ་ཐུབ་རྒྱུ་རེད། གོ་ལ་ཧྲིལ་པོར་བལྟས་ཚེ། རང་རྒྱལ་ནི་སྔར་བཞིན་འཛམ་གླིང་གི་དཔལ་འབྱོར་འཕར་བའི་སྒུལ་ཤུགས་གལ་ཆེན་ཞིག་ཡིན་པས་འཛམ་གླིང་གི་དཔལ་འབྱོར་སླར་གསོ་ཡོང་བར་སྒུལ་ཤུགས་དང་གཏན་འཁེལ་རང་བཞིན་སྔར་བས་མང་བ་སྣོན་གྱི་ཡོད།

ལྷག་པར་དུ་དུས་ཚིགས་གཉིས་པ་དང་གསུམ་པའི་རིང་མར་ཆག་པའི་གནོན་ཤུགས་ཆེ་རུ་འགྲོ་བ་དང་དཔལ་འབྱོར་གྱི་དམིགས་ཚད་གཙོ་བོའི་འཕར་ཚད་ཆག་པར་དམིགས་ཏེ། ཟླ་9ཚེས་26ཉིན་ཀྲུང་དབྱང་ཆབ་སྲིད་ཅུས་ཀྱི་ཚོགས་འདུའི་ཐོག་འཕར་ཚད་ཀྱི་སྲིད་ཇུས་སྦབ་ཆ་གཅིག་འཕྲལ་ཐག་ཆོད་པོས་བཀོད་སྒྲིག་བྱས་པས་སྤྱི་ཚོགས་ཀྱི་ཡིད་ཆེས་ནུས་ལྡན་ངང་འཕེལ་བ་དང་དཔལ་འབྱོར་མངོན་གསལ་དོད་པོས་བསྐྱར་འཕར་བྱུང་སྟེ། ལོ་འཁོར་མོའི་དམིགས་ཚད་མངོན་འགྱུར་ཡོང་བར་སྐུལ་འདེད་ཐེབས་པ་མ་ཟད་སང་ལོའི་དཔལ་འབྱོར་འཕེལ་རྒྱས་ལ་རྨང་གཞི་ཡག་པོ་བཏིང་ཡོད། དེ་ཐོག་ནས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་ཞིབ་འཇུག་བརྡར་གཅོད་ཡང་དག་དང་། ཐབས་ཇུས་འཕྲལ་ཐག་ཆོད་པ། བཀོད་སྒྲིག་ནུས་ལྡན། བྱེད་ཐབས་གོ་ཆོད་བཅས་ཡིན་པ་ར་སྤྲོད་གང་ལེགས་བྱུང་བ་དང་། རང་རེའི་ཏང་གིས་དུས་བབ་ཀྱི་འགྱུར་ལྡོག་དང་བསྟུན་ནས་དུས་ཐོག་ཏུ་ཚན་རིག་དང་མཐུན་པའི་གནད་སྨིན་ཇུས་བསྟར་ལ་སྔར་བས་སྣང་ཆེན་དང་སྲིད་ཇུས་མཐུན་སྦྱོར་མཉམ་འགུལ་དང་སྲིད་ཇུས་ཀྱི“སྣ་འདུས་ཐབས་བཟང”ཞིག་ཆགས་རྒྱུར་མཉམ་ཤུགས་འདོན་པར་སྔར་བས་སྣང་ཆེན་བྱེད་པ་མཚོན་ཡོད། ལོ་རྒྱུས་ཀྱི་འཕེལ་རིམ་ནས་བལྟས་ན། ད་ཐེངས་ཀྱི་ཚོགས་འདུར་ལམ་ཚད་རྡོ་རིང་ལྟ་བུའི་དོན་སྙིང་ལྡན་ཡོད།

ད་ཐེངས་ཀྱི་ཀྲུང་དབྱང་གི་དཔལ་འབྱོར་ལས་དོན་ཚོགས་འདུར་སྲིད་ཇུས་ཀྱི་ཕན་པ་མང་པོ་བཏོན་ནས་སྤྱི་ཚོགས་ཀྱི་སྔོན་དཔག་བརྟན་དུ་ནུས་ལྡན་བཏང་བ་དང་ཁྲོམ་རའི་གདེང་ཚོད་འཕེལ་བར་བྱས་ཡོད། སྔར་ལས་དགེ་མཚན་ལྡན་པའི་ནོར་སྲིད་ཀྱི་སྲིད་ཇུས་ཐོག་མར་བཏོན་ནས“གལ་ཆེན་གཉིས”ཀྱི་རྣམ་གྲངས་དང“གསར་གཉིས”ཀྱི་སྲིད་ཇུས་ལག་ལེན་བསྟར་བར་རྒྱུན་མཐུད་རྒྱབ་སྐྱོར་དང་། དམངས་འཚོར་ཕན་པ་དང་། འཛད་སྤྱོད་ལ་སྐུལ་འདེད། གཏིང་ཤུགས་ཆེ་རུ་གཏོང་བ་བཅས་ལ་སྔར་བས་སྣང་ཆེན་བྱས་པ་ནས་ལོ་བཅུ་བཞིའི་རིང་ཐེངས་དང་པོར་འོས་འཚམ་ལྷུག་གཏོང་གི་དངུལ་ལོར་སྲིད་ཇུས་ལ་བསྒྱུར་བའི་བར། དངོས་ཚན་དཔལ་འབྱོར་ལ་རྒྱབ་སྐྱོར་བྱེད་པའི་སྤྱི་ཡོངས་ཀྱི་ཕན་ནུས་ཆེ་རུ་བཏང་ཡོད། འཛད་སྤྱོད་ཡར་སྐུལ་ཤུགས་ཆེར་གཏོང་བ་དང་། ཡོང་འབབ་འབྲིང་དམའི་ཚོགས་སྤྱིའི་འབབ་འཕར་དང་ཁུར་པོ་ཡང་དུ་གཏོང་བར་སྐུལ་འདེད་གཏོང་བ། སྟོབས་ཤུགས་སྔར་བས་ཆེན་པོས་སྤྱི་ཚོགས་ཀྱི་མ་རྩ་ལས་གཏོད་མ་འཇོག་ནང་འགུག་ཐབས་བྱེད་པ་བཅས་ནས་དུས་ཡུན་རིང་འབྲིང་གི་མ་དངུལ་ཁྲོམ་རར་ཞུགས་པའི་འགག་གནད་ཤར་གཏོང་བྱེད་པ་དང་། ངེས་མཁོའི་སྡོད་ཁང་དང་ལེགས་བཅོས་རང་བཞིན་གྱི་སྡོད་ཁང་གི་དགོས་མཁོའི་མི་མངོན་པའི་སྟོབས་ཤུགས་འདོན་སྤེལ་གང་ལེགས་བྱེད་པ། གཙོ་གནད་ཁྱབ་ཁོངས་དང་། གཙོ་གནད་ལས་རིགས། གྲོང་ཁྱེར་དང་གྲོང་གསེབ་ཀྱི་གཞི་རིམ། ཁེ་ལས་འབྲིང་ཆུང་ཕྲན་གསུམ་བཅས་ཀྱི་ལས་ཞུགས་རྒྱབ་སྐྱོར་འཆར་གཞི་ལག་བསྟར་བྱེད་པ་སོགས་བར། སྲིད་ཇུས་ཀྱི་ཁ་ཕྱོགས་སམ་ཡང་ན་གཙོ་གནད་ལས་འགན་གང་ཞིག་ཡིན་རུང་། སང་ལོའི་དཔལ་འབྱོར་ལས་དོན་གྱི་རིན་ཐང་གི་གཙོ་དོན་ཧ་ཅང་ཁ་གསལ་ཡིན་པ་སྟེ། དཔལ་འབྱོར་རྒྱུན་མཐུད་ལེགས་སུ་འགྲོ་བར་སྐུལ་འདེད་བཏང་ནས་མི་དམངས་ཀྱི་འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་རྒྱུ་དེ་རེད།

སྲིད་ཇུས་ཀྱི་ཁ་ཕྱོགས་ནས་བལྟས་ན། འོས་འཚམ་ལྷུག་གཏོང་གི་དངུལ་ལོར་སྲིད་ཇུས་ལག་ལེན་བསྟར་བར་དོ་ཁུར་ཆེན་པོ་བྱེད་ཀྱི་ཡོད། དངུལ་ལོར་སྲིད་ཇུས་ཀྱི་ནང་དོན་ལྟེ་བ་དེ“བརྟན་པོ”ནས“འོས་འཚམ་ལྷུག་གཏོང”དུ་ལེགས་སྒྲིག་བྱས་པ་དེ་ནི་ལོ་བཅུ་བཞིའི་རིང་ཐེངས་དང་པོ་ཡིན་པ་དང་། དེ་ཐོག་ནས་དགེ་མཚན་ལྡན་ལ་ཁ་གསལ་བའི་བརྡ་རྟགས་ཤིག་སྔར་ལས་ལྷག་པར་བརྒྱུད་སྤྲོད་བྱས་ཡོད་པ་རེད།

ལས་འགན་གཙོ་བོ་ནས་བལྟས་ན། “འཛད་སྤྱོད་ལ་ཡར་སྐུལ་ཤུགས་ཆེན་གཏོང་བ”དེ་ཐོག་ནས་འཛད་སྤྱོད་ཀྱི་སྒུལ་ཤུགས་གཙོ་བོའི་ནུས་པ་འདོན་རྒྱུར་མཐོང་ཆེན་བྱེད་པ་མཚོན་ཡོད། རང་རྒྱལ་གྱི་འཛད་སྤྱོད་བར་མཐོངས་རྒྱ་ཆེ་ལ་མི་མངོན་པའི་སྟོབས་ཤུགས་ཀྱང་ཧ་ཅང་ཆེན་པོ་ཡོད། འཛད་སྤྱོད་ལ་ཡར་སྐུལ་བྱེད་པའི་ཆེད་དོན་བྱ་སྤྱོད་ལག་ལེན་བསྟར་བ་བརྒྱུད“གསར་གཉིས”ཀྱི་སྲིད་ཇུས་ལག་ལེན་བསྟར་ཤུགས་ཆེ་རུ་བཏང་ནས་སྣ་མང་ཅན་གྱི་འཛད་སྤྱོད་རྣམ་པ་གསར་གཏོད་བྱེད་པ་དང་རིག་གནས་དང་ཡུལ་སྐོར་སོགས་ཞབས་ཞུའི་འཛད་སྤྱོད་བྱེད་རྒྱ་ཆེ་རུ་བཏང་སྟེ། རང་རྒྱལ་གྱི་འཛད་སྤྱོད་ཀྱི་མི་མངོན་པའི་སྟོབས་ཤུགས་སྔར་བས་འདོན་རྒྱུ་རེད།

སང་ལོ་ནི“ལོ་ལྔ་ཚན་བཅུ་བཞི་པའི”འཆར་འགོད་ཀྱི་མཇུག་འགྲིལ་ལོ་ཞིག་ཡིན་པས། སང་ལོའི་དཔལ་འབྱོར་ལས་དོན་ཡག་པོ་བསྒྲུབ་པར་དོན་སྙིང་གལ་ཆེན་ལྡན་ཡོད། ང་ཚོས་བསམ་བློ་དང་བྱ་སྤྱོད་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ཐོག་གཅིག་འགྱུར་ཡོང་བར་བྱས་ཏེ། ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་བཀོད་སྒྲིག་ལག་བསྟར་དོན་འཁྱོལ་ཡག་པོ་བྱེད་པ་དང་། ལས་སྒྲུབ་གཙོ་བོར་འཛིན་པ་མཐའ་འཁྱོངས་ཀྱིས་ཡིད་ཆེས་ཆེར་གཏོང་དང་། དཀའ་ངལ་ལ་མི་འཛེམ་པར་མདུན་སྐྱོད། འབད་འབུངས་ཡར་བརྩོན་བཅས་བྱས་ཏེ་ཕྱོགས་གང་ཅིའི་དགེ་མཚན་ལྡན་པའི་རྒྱུ་རྐྱེན་དག་འཕེལ་རྒྱས་ཀྱི་གྲུབ་འབྲས་དངོས་ལ་བསྒྱུར་ན། “ལོ་ལྔ་ཚན་བཅུ་བཞི་པའི”འཆར་འགོད་ཀྱི་དམིགས་ཚད་ལས་འགན་སྤུས་ཚད་མཐོ་པོས་ལེགས་གྲུབ་ཐུབ་ངེས་རེད་ལ“ལོ་ལྔ་ཚན་བཅོ་ལྔ་པའི”འགོ་ཡག་པོ་ཞིག་འཛུགས་པར་རྨང་གཞི་བརྟན་པོའང་འདིང་ཐུབ།

（གནམ་ཕྱུག་རྒྱལ་གྱིས་བསྒྱུར། ཚེ་བརྟན་སྒྲོལ་དཀར་གྱིས་ཞུས）