འདི་ག་ཚགས་པར་ཁང་དུ་ཀོང་ཀྲོའུ་ནས་གློག་འཕྲིན་འབྱོར་གསལ། གོ་ལ་ཧྲིལ་པོའི་རླུང་གློག་རྐྱང་པའི་ཤོང་ཚད་ཆེ་ཤོས་ཀྱི་ལས་སྟེགས“མིང་དབྱང་རང་གྲུབ་རྟགས་ཅན”ཉེ་ཆར་ཀོང་ཏུང་ཞིང་ཆེན་དབྱང་ཅང་གྲོང་ཁྱེར་དུ་དངོས་སུ་འཁོར་སྐྱོད་བྱས་པ་རེད། “མིང་དབྱང་རང་གྲུབ་རྟགས་ཅན”གྱི་ཆུ་འབུད་ཚད་བསྡོམས་འབོར་ཏུན་ཁྲི་1.5ལྷག་ཙམ་ཟིན་པ་དང་། མཚོ་ངོགས་དང་བར་ཐག་སྤྱི་ལེ་70དང་ཆུའི་གཏིང་ཚད་ལ་སྨི་45ཡོད་པའི་མིང་དབྱང་རླུང་གློག་ཁང་གིས་ལོ་རེར་ཆུ་ཚོད་ཆན་ཝ་ཁྲི་5400ལྷག་ཙམ་གྱི་ལྗང་མདོག་གློག་ཤུགས་མཁོ་འདོན་ཐུབ་རྒྱུ་རེད། རྣམ་གྲངས་ཀྱི་འགན་འཁུར་བས“མིང་དབྱང་རང་གྲུབ་རྟགས་ཅན”འཁོར་སྐྱོད་བྱས་ཏེ་སྒྲིག་ཆས་གསར་གཏོད་ལ་བརྟེན་ནས་རྒྱ་མཚོའི་ནུས་རྒྱུའི་གསར་སྤེལ་ཆོག་པའི་རྒྱ་ཁྱོན་ཆེ་རུ་གཏོང་བ་མ་ཟད། ད་དུང་ནུས་རྒྱུ་སྣ་མང་ཕན་ཚུན་སྦྲེལ་མཐུད་དང་ཕན་ཚུན་རོགས་སྐྱོར་བྱ་རྒྱུར་སྐུལ་འདེད་བཏང་སྟེ། རྒྱ་མཚོའི་ནུས་རྒྱུ་ཕྱོགས་བསྡུས་མཉམ་འདྲེས་གསར་སྤེལ་བྱས་ནས་རྒྱང་རིང་གཏིང་ཟབ་ཀྱི་རྒྱ་མཚོར་སྐྱོད་པར་རམ་འདེགས་བྱེད་རྒྱུ་རེད་ཅེས་བཤད།