འདི་ནི་ཟི་ལིང་གྲོང་ཁྱེར་གྱི“འབུ་སྐྱོགས་ཀྱི་འོད་སྣང”བློ་རིག་ཉམས་པའི་དབང་པོ་སྐྱོན་ཅན་ཀོག་ཧྥེ་ཉམས་ལེན་ཁང་དུ་ཝང་ཉི་ནཱ་ཡིས་གཙང་སྦྲ་བྱེད་བཞིན་པ།

འདི་ནི་ཟི་ལིང་གྲོང་ཁྱེར་རིག་གནས་སྤྱི་གླིང་དུ་དང་བླངས་པས(གཡོན)དབང་པོ་སྐྱོན་ཅན་དང་མཉམ་དུ“རྒྱུག་རོགས”ཀྱི་བྱེད་སྒོར་ཞུགས་བཞིན་པ།

སྔ་དྲོའི་ཆུ་ཚོད་10པ་ཙམ་ལ། ཝང་ཉི་ནཱ་ཡིས་སྔར་རྒྱུན་ལྟར་དུས་ཐོག་ཏུ་ལས་གནས་སུ་བསྐྱོད་དེ་གཙང་སྦྲ་ཁང་ནས་རས་ཕྱགས་རློན་པ་བཟོས་ཏེ་རྒྱ་ཁྱོན་ལ་སྨི་ངོས་གྲུ་100ལྷག་ཙམ་ཡོད་པའི་ཚོམས་ཆེན་གཙང་མར་ཕྱིས་ཤིང་། འགྲུལ་པ་སླེབས་ཚེ་ཁོང་གིས་འཛུམ་དམུལ་དམུལ་ངང་མགོ་བོ་ལྕོག་ལྕོག་བྱེད་ཀྱི་ཡོད། གཞན་གྱིས་ངོ་སྤྲོད་མ་བྱས་ཚེ་ཁོང་ནི་བློ་རིག་ཉམས་པའི་རིམ་པ་གསུམ་པའི་དབང་པོ་སྐྱོན་ཅན་ཞིག་ཡིན་པ་ཤེས་ཁག་པོ་རེད།

ལོ་46ལ་སླེབས་པའི་ཝང་ཉི་ནཱ་ཉིན་ལྟར་ལས་ཀར་སླེབས་སྔ་ཤོས་ཡིན་པ་དང་ཀོག་ཧྥེ་ཁང་གི་ཞབས་ཞུ་བའི་ལས་ཀ་འདི་ནི་ཁོང་གི་མི་ཚེའི་ཁྲོད་ཀྱི་ལས་ཀ་དང་པོ་དེ་རེད། ཁོང་ལས་ཀ་བྱ་ཡུལ་ནི་མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་བློ་རིག་ཉམས་པའི་དབང་པོ་སྐྱོན་ཅན་གྱི་ཀོག་ཧྥེ་ཉམས་ལེན་ཁང་དང་པོར་ཡིན་པ་དང་དེའི་མིང་ལ“འབུ་སྐྱོགས་ཀྱི་འོད་སྣང”ཟེར་གྱི་ཡོད། དེར་ལས་ཀ་བྱེད་མཁན་ཁྲོད་བློ་རིག་ཉམས་པའི་མི་10ལྷག་ཙམ་ཡོད་པ་དང་ཁོང་ཚོ་རང་ཁྱིམ་ནས་ཐོན་ཏེ་ལས་ཞུགས་ཀྱི་གོ་སྐབས་ཐོབ་ནས་དེ་གར་རང་ནུས་གང་ཡོད་ཀྱིས་སྤྱི་ཚོགས་ཀྱི་འཚོ་བར་དེ་བས་འཕྲོད་གང་ཐུབ་བྱེད་བཞིན་ཡོད།

“འབུ་སྐྱོགས་ཀྱི་འོད་སྣང”ཀོག་ཧྥེ་ཉམས་ལེན་ཁང་གི་འགན་འཁུར་བའི་མིང་ལ་ཝང་ཅིང་ཟེར། 2021ལོར་ཁོང་གིས་ཟི་ལིང་གྲོང་ཁྱེར་དབང་པོ་སྐྱོན་ཅན་མཉམ་འབྲེལ་ལྷན་ཚོགས་སོགས་སྡེ་ཚན་གྱི་རྒྱབ་སྐྱོར་འོག་ལོ་ན་གཞོན་པའི་དབང་པོ་སྐྱོན་ཅན་གྱི་གཞོགས་འདེགས་རང་བཞིན་གྱི་ལས་ཞུགས་རྟེན་གཞི་བཙུགས་ཏེ། ལོ་ཚད་ལོན་པ་དང་ལས་ཞུཌ་ཀྱི་འདུན་པ་ཡོད་པའི་བློ་རིག་ཉམས་པའི་དབང་པོ་སྐྱོན་ཅན་ལ་ལས་ཞུགས་བཀོད་སྒྲིག་བྱ་ཡུལ་མཁོ་འདོན་བྱས་ཡོད།

“བློ་རིག་ཉམས་པའི་མི་ཚོགས་ལས་ཞུགས་ཐུབ་ཚད་དམའ་བ་དང་ལས་ཞུགས་ཀྱི་དཀའ་གནད་ཆེན་པོ་ཡོད། ད་ལོ་ང་ཚོས་བསམ་ཕྱོགས་རྒྱ་ཆེར་བཏང་ནས་ཀོག་ཧྥེ་ཉམས་ལེན་ཁང་སོགས་གཞོགས་འདེགས་རང་བཞིན་གྱི་ལས་ཞུཌ་རྟེན་གཞི་ནས་བློ་རིག་ཉམས་པའི་ཚོགས་སྤྱིར་སྤྱི་ཚོགས་ཅན་གྱི་སྦྱོང་བརྡར་སྤྲས་ཏེ། གཅེས་སེམས་རྩ་འཛུཌ་ཟུར་ཁྲིད་གསོ་སྦྱོང་ནང་ཞུགས་སུ་བཅུག་པ་དང་ཚང་མའི་བཀྲག་མདངས་འཚེར་ས་སྔོག་འདོན་བྱས་ནས། ཁོང་ཚོར་རང་ཉིད་ཀྱི་རིན་ཐང་མངོན་པའི་གོ་སྐབས་དེ་བས་མང་བ་ཐོབ་པ་བྱེད་ཀྱི་ཡོད”ཅེས་ཝང་ཅིང་གིས་བཤད།

ཉེ་བའི་ལོ་ཤས་རིང་། མཚོ་སྔོན་ཞིང་ཆེན་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས་དབང་པོ་སྐྱོན་ཅན་གྱི་ལས་ཞུགས་ལས་གཏོད་སྲིད་ཇུས་འཐུས་སྒོ་ཚང་དུ་རྒྱུན་ཆད་མེད་པར་བཏང་ནས་དབང་པོ་སྐྱོན་ཅན་གྱི་ལས་རིགས་གསོ་སྦྱོང་རྟེན་གཞི་དང་། ལས་གཏོད་སྐྱོང་གསོ་རྟེན་གཞི། གཅིག་སྡུད་ལས་ཞུགས་རྟེན་གཞི། གཞོགས་འདེགས་རང་བཞིན་གྱི་ལས་ཞུགས་རྟེན་གཞི་བཅས་ཚད་ལྡན་བཙུགས་ཡོད། མིག་སྔར། མཚོ་སྔོན་ཞིང་ཆེན་གྱིས་དབང་པོ་སྐྱོན་ཅན་གྱི་ལས་རིགས་གསོ་སྦྱོང་རྟེན་གཞི་19དང་ལས་གཏོད་སྐྱོང་གསོ་རྟེན་གཞི་8བཙུགས་ནས། དབང་པོ་སྐྱོན་ཅན་མི་ཐེངས་2314ལ་ལས་རིགས་རྩལ་ནུས་གསོ་སྦྱོང་བྱས་པ་རེད།

ཟླ་11ཚེས་30ཉིན། ཟི་ལིང་གྲོང་ཁྱེར་རིག་གནས་སྤྱི་གླིང་དུ“རྒྱུག་རོགས”བྱེད་སྒོ་སྤེལ་བ་དང་། མཚོ་སྔོན་ཞིང་ཆེན་འོན་པའི་མཐུན་ཚོགས་དང་བློ་རིག་ཉམས་པའི་དབང་པོ་སྐྱོན་ཅན་དང་དེ་བཞིན་གཉེན་གྲོགས་མཐུན་ཚོགས་སོགས་མི་180ལྷག་ཙམ་ཞུགས་ཡོད། གནམ་གཤིས་གྲང་ངར་ཆེ་ཡང་མི་རྣམས་སྤྲོ་སེམས་ཀྱིས་ཕྱུག་ཅིང་། སྤྱི་གླིང་གི་ལྗང་ལམ་དུ་དབང་པོ་སྐྱོན་ཅན་དང་། གཉེན་གྲོགས་ཚོགས་པ། དང་བླངས་པ་བཅས་མཉམ་དུ་རྒྱུག་སྟེ་དགའ་སྤྲོའི་རྣམ་པའི་ཁྲོད་ལུས་རྩལ་གྱི་སྤྲོ་སྣང་ཚོར་བར་བྱས་པ་རེད།

ཟི་ལིང་གྲོང་ཁྱེར་གྲོང་ནུབ་ཆུས་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱི་ལས་འཛིན་ལི་ཤན་ཡུན་གྱིས། རྒྱལ་སྤྱིའི་དབང་པོ་སྐྱོན་ཅན་གྱི་ཉིན་མོ་འཆར་ཉེར་ཡོད་པས། བྱེད་སྒོ་སྣ་ཚོགས་སྤེལ་བ་བརྒྱུད་དབང་སྐྱོན་གྲོགས་པོ་ཚོའི་ཧུར་བརྩོན་ཡར་སྐྱེད་ཀྱི་འཚོ་བའི་རྣམ་འགྱུར་མངོན་པ་དང་ཆབས་ཅིག སྤྱི་ཚོགས་ལ་དབང་པོ་སྐྱོན་ཅན་ལ་གཅེས་སྐྱོང་དང་དབང་པོ་སྐྱོན་ཅན་གྱི་བྱ་གཞག་ལ་རྒྱབ་སྐྱོར་བྱེད་པའི་དྲང་ནུས་བརྒྱུད་སྤྲོད་ཐུབ་རྒྱུའི་རེ་བ་བྱེད་ཀྱི་ཡོད་ཅེས་བརྗོད་པ་རེད། (ལྷག་ཚེ་དང་བུ་ཁྲིད་ཀྱིས་སྒྱུར་ཞུས་བྱས)