འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་12ཉིན་གློག་འཕྲིན་འབྱོར་གསལ། ཚེས་12ཉིན《2024ལོའི་ཀྲུང་གོའི་ཞིང་ལས་ཀྱི་ཚན་རྩལ་དཔྱད་རྩོམ་དང་ཁེ་བེད་བདག་ཐོབ་ཀྱི་གོ་ལ་ཧྲིལ་པོའི་འགྲན་རྩོད་ནུས་པའི་དབྱེ་ཞིབ》པེ་ཅིང་དུ་ཁྱབ་བསྒྲགས་བྱས་ཤིང་། སྙན་ཞུ་ལས་མངོན་པར། 2018ལོ་ནས་བཟུང་ཀྲུང་གོའི་ཞིང་ལས་ཀྱི་ཚན་རྩལ་དཔྱད་རྩོམ་གྱི་སྤྱིའི་འགྲན་རྩོད་ནུས་པའི་སྟོན་གྲངས་དང་འགྲེམས་སྤེལ་བྱེད་ཚད་གོ་ལ་ཧྲིལ་པོའི་ཨང་དང་པོར་རྒྱུན་མཐུད་སླེབས་ཡོད་པ་རེད།

སྙན་ཞུ་གཞིར་བཟུང་། ཞིང་ལས་ཀྱི་གོ་ལ་ཧྲིལ་པོའི་སྒྲིག་གཞིའི་ཚན་རྩལ་དཔྱད་རྩོམ་གྱི་སྤྱིའི་འགྲན་རྩོད་ནུས་པའི་མདུན་གྲལ་གྱི་ཨང་རིམ་100ཡི་ནང་ཀྲུང་གོའི་སྒྲིག་གཞི་29ཚུད་ཡོད། ཀྲུང་གོའི་ཞིང་ལས་ཀྱི་ཚན་རྩལ་དཔྱད་རྩོམ་གྱི་གྲངས་འབོར་སྔོན་ལ་རྒྱུན་མཐུད་སླེབས་པ་དང་ཆབས་ཅིག སྤུས་ཚད་ཀྱང་སྔར་བས་ལེགས་སུ་ཕྱིན་ཡོད། སྙན་ཞུ་ལས་མངོན་པར། 2019ལོ་ནས་2023ལོའི་བར། CNS(《ཕྲ་ཕུང》 《རང་བྱུང》 《ཚན་རིག》)དུས་དེབ་ཐོག་ཀྲུང་གོའི་ཞིང་ལས་ཀྱི་ཚན་རྩལ་དཔྱད་རྩོམ་སྤེལ་ཚད་གོ་ལ་ཧྲིལ་པོའི་ཨང་གསུམ་པ་ནས་ཨང་གཉིས་པར་འཕར་བ་དང་། དཔྱད་རྩོམ་འདྲེན་ཚད་གོ་ལ་ཧྲིལ་པོའི་ཨང་དང་པོར་རྒྱུན་མཐུད་སླེབས་པ། གཙོ་ཁྲིད་རྣམ་པའི་རྒྱལ་སྤྱིའི་མཉམ་ལས་དཔྱད་རྩོམ་གྱི་གྲངས་འབོར་གོ་ལ་ཧྲིལ་པོའི་ཨང་བཞི་པ་ནས་ཨང་དང་པོའི་བར་འཕར་ཡོད་པ་རེད།

ཀྲུང་གོའི་ཞིང་ལས་ཀྱི་ཁེ་བེད་བདག་ཐོབ་ཀྱི་འགྲན་རྩོད་ནུས་པའི་སྟོན་གྲངས་ཨང་གཉིས་པ་ནས་ཨང་དང་པོར་ཐོག་མར་འཕར་ཞིང་། ལོ་ཏོག་གི་སོན་རྩའི་ཐོན་ཁུངས་དང་སོན་གསོ་དང་། སྲོག་ཆགས་ཀྱི་འཚོ་བཅུད་དང་གཟན་ཆག སྲོག་ཆགས་གསོ་སྤེལ་དང་དོ་དམ། སྲོག་ཆགས་ཀྱི་རིམས་ནད་སྔོན་འགོག་དང་ཚོད་འཛིན། ལོ་ཏོག་གི་གནོད་ལྡན་སྐྱེ་དངོས་སྔོན་འགོག་དང་ཚོད་འཛིན། སྐྱེ་དངོས་ཞིང་སྨན། ཞིང་ལས་ཐོན་རྫས་ལས་སྣོན། རྩི་ཤིང་གི་འཚོ་བཅུད་དང་ལུད་བཅས་ལག་རྩལ་ཁྱབ་ཁོངས་8ཀྱི་ཀྲུང་གོའི་ཁེ་བེད་བདག་ཐོབ་ཀྱི་འགྲན་རྩོད་ནུས་པ་ཨང་དང་པོར་སླེབས་ཡོད་པ་རེད། (ཚེ་རིང་བུ་ཁྲིད་ཀྱིས་བསྒྱུར། ཉི་དོན་གྱིས་ཞུས)