འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་12ཉིན་གློག་འཕྲིན་འབྱོར་གསལ། ཚེས་12ཉིན། རྒྱལ་ཁབ་ཀྱིས་སྒྲིག་འཛུགས་བྱས་པའི་སྨན་རྫས་གཅིག་སྡུད་ཉོ་སྒྲུབ་ཁག་བཅུ་པའི་གདམ་བྱའི་འབྲས་བུ་དོན་ཞིང་། ད་ཐེངས་ཀྱི་གཅིག་སྡུད་ཉོ་སྒྲུབ་ནང་སྨན་རྫས་རིགས་62ཉོ་སྒྲུབ་ལེགས་གྲུབ་བྱུང་བ་ཚང་མ་ཁེ་བེད་བདག་ཐོབ་ཀྱི་དུས་ཚོད་ཡོལ་བ་དང་། ཁེ་ལས་མང་པོ་ཞིག་གིས་ཐོན་སྐྱེད་བྱས་པ། འགྲན་རྩོད་ཆེན་པོ་ཡོད་པ་བཅས་ཀྱི་སྨན་རྫས་ཡིན་ཞིང་། དེའི་ནང་ཁྲག་ཤེད་མཐོ་བ་དང་། གཅིན་སྙི་ཟགས་ཁུའི་ནད། འབྲས་སྐྲན། སྙིང་ཁམས་ཁྲག་རྩའི་ནད། འགོས་ནད། སྨྱོ་ནད་སོགས་ཀྱི་ཁྱབ་ཁོངས་ཚུད་ཡོད། སྨན་རྫས་ཁེ་ལས་ད་ཐེངས་ཀྱི་གཅིག་སྡུད་ཉོ་སྒྲུབ་ནང་ཧུར་ཐག་ཞུགས་ནས་ཁེ་ལས་234ཡི་ཐོན་རྫས་385ལ་གདམ་བྱའི་ཐོབ་ཐང་རག་པ་དང་། བདམས་ཐོན་བྱུང་བའི་སྨན་ཚང་མ་ནི་སྤུས་ཀ་དང་སྨན་ནུས་གཅིག་མཐུན་རང་བཞིན་གྱི་གདེང་འཇོག་ཐོབ་པའི་སྤུས་ཀ་ལེགས་པའི་སྨན་རྫས་ཤ་སྟག་ཡིན་པ་རེད།
རྒྱལ་ཁབ་སྨན་བཅོས་འགན་སྲུང་ཅུས་ཀྱི་འབྲེལ་ཡོད་འགན་འཁུར་བས་ད་ཐེངས་ཀྱི་གཅིག་སྡུད་ཉོ་སྒྲུབ་ཀྱིས་གཅིག་ནས་ནད་པའི་སྨན་སྤྱོད་སྤུས་ཚད་མཐོ་རུ་ནུས་ལྡན་ཕྱིན་ནས་སྤུས་ཀ་དང་སྨན་ནུས་གཅིག་མཐུན་རང་བཞིན་གྱི་གདེང་འཇོག་ཐོབ་པའི་སྨན་གྱིས་དཔྱད་འདེམས་མ་བྱས་པའི་སྨན་གྱི་ཚབ་བྱེད་རྒྱུར་སྐུལ་མ་ཐེབས་རྒྱུ་དང་། ཕྱོགས་གཞན་ཞིག་ནས་སྨན་སྤྱོད་གྲུབ་ཆ་ལེགས་སུ་བཏང་སྟེ་སྨན་བཅོས་ཁྱབ་ཁོངས་གཅིག་གི་ནུས་པ་མི་འདྲ་བའི་རྐྱེན་རྩའམ་ཡང་ན་སྨན་ནུས་སྔར་བས་ལེགས་སུ་གཏོང་བ་དང་སྔར་བས་སྟབས་བདེ་བའི་སྨན་རྫས་ནད་ཐོག་རྒྱ་ཁྱབ་སྤྱད་དེ། ནད་པའི་སྨན་སྤྱོད་སྤུས་ཚད་མཐོར་གཏོང་རིམ་སྤོར་ལ་ཕྱོགས་བསྡུས་སྐུལ་འདེད་གཏོང་རྒྱུ་རེད། དཔེར་ན། ནུ་མའི་འབྲས་སྐྲན་གྱི་རིམ་པ་དང་པོར་སྤྱོད་པའི་ཚྭ་སྐྱུར་དོ་ཁུ་སི་རུ་པི་སིན་ཚིལ་རྫས་གཟུགས་ཀྱི་སྨན་ཆུ་དེ་སྤྱིར་བཏང་གི་དོ་ཁུ་སི་རུ་པི་སིན་གྱི་ཐོན་རྫས་དང་བསྡུར་ན་སྨན་མི་འཕྲོད་པའི་སྣང་ཚུལ་ཇེ་ཆུང་དུ་གཏོང་ཐུབ་ལ། སྨན་གྱི་བདེ་འཇགས་རང་བཞིནཡང་མངོན་གསལ་དོད་པོས་ཆེ་རུ་གཏོང་ཐུབ་ཀྱི་ཡོད་ཅེས་ངོ་སྤྲོད་བྱས།
2018ལོ་ནས་བཟུང་། རྒྱལ་ཁབ་སྨན་བཅོས་འགན་སྲུང་ཅུས་ཀྱིས་འབྲེལ་ཡོད་སྡེ་ཚན་དང་མཉམ་དུ་རྒྱལ་ཁབ་ཀྱིས་སྒྲིག་འཛུགས་བྱས་པའི་སྨན་རྫས་གཅིག་སྡུད་ཉོ་སྒྲུབ་ཁག་བཅུ་ཡིས་རིམ་རྩིས་བརྒྱབ་ན་སྨན་རྫས་རིགས་435ཉོ་སྒྲུབ་བྱས་ཤིང་། གཅིག་སྡུད་ཉོ་སྒྲུབ་བྱས་པ་བརྒྱུད་ཁེ་བེད་བདག་ཐོབ་ཀྱི་དུས་ཚོད་ཡོལ་བའི་སྨན་རྙིང་པ་གྲགས་ཅན་འབོར་ཆེན་ཚང་མ་སྤུས་ཀ་དང་སྨན་ནུས་གཅིག་མཐུན་རང་བཞིན་གྱི་གདེང་འཇོག་ཐོབ་པའི་ཁེ་ལས་ཀྱིས་རྒྱལ་ཡོངས་ལ་མཁོ་སྤྲོད་བྱེད་ཀྱི་ཡོད། མང་ཚོགས་ཀྱི་སྨན་རྙིང་པ་ཉོ་བའི་འགྲོ་གྲོན་གྱི་ཁུར་པོ་ཡང་དུ་གཏོང་བ་དང་ཆབས་ཅིག་སྨན་རིན་གྱི་བར་མཐོངས་བཏོད་དེ་སྨན་གསར་པ་སྨན་བཅོས་འགན་བཅོལ་གྱི་ཁྱབ་ཁོངས་སུ་འཇུག་རྒྱུར་རྒྱབ་སྐྱོར་བྱ་ཆེད་ཆ་རྐྱེན་བསྐྲུན་པ་དང་། རྒྱལ་ཁབ་ཀྱི་སྨན་བཅོས་འགན་བཅོལ་སྨན་རྫས་ཀྱི་དཀར་ཆག་རེས་སྐོར་བདུན་བསྟུད་མར་ལེགས་སྒྲིག་བྱས་ཏེ། རིམ་རྩིས་བརྒྱབ་ན་དེའི་ནང་སྨན་གསར་པ་རིགས་530འཇུག་རྒྱུའི་གྲོས་མོལ་བྱས་ནས་མང་ཚོགས་ཀྱི་སྨན་སྤྱོད་གྲུབ་ཆ་རྒྱུན་ཆད་མེད་པར་ལེགས་སུ་བཏང་བ་དང་སྦྲགས། སྨན་རྫས་ཐོན་ལས་ཀྱི་སྤུས་ཚད་མཐོར་གཏོང་རིམ་སྤོར་ལ་སྐུལ་འདེད་ཀྱང་བཏང་ཡོད་པ་རེད། （མཚམས་གཅོད་ཀྱིས་བསྒྱུར། ཚེ་སྒྲོལ་གྱིས་ཞུས）