འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་13ཉིན་གློག་འཕྲིན་འབྱོར་གསལ། ཟླ་12ཚེས་13ཉིན་རྒྱལ་ཁབ་བསྡོམས་རྩིས་ཅུས་ཀྱིས་ཡོངས་བསྒྲགས་བྱས་པའི་གྲངས་གཞི་ནས་མངོན་པར་གཞིགས་ན། 2024ལོར་རྒྱལ་ཡོངས་ཀྱི་འབྲུ་རིགས་ཀྱི་སྤྱིའི་ཐོན་འབོར་རྒྱ་མ་དུང་ཕྱུར་14130ཟིན་པ་དེ་ལོ་གོང་མ་ལས་རྒྱ་མ་དུང་ཕྱུར་222འཕར་ནས་1.6%འཕར་ཏེ། ལོ་9བསྟུད་མར་རྒྱ་མ་དུང་ཕྱུར་ཁྲི་1.3ཡན་བརྟན་པོ་བྱུང་བའི་རྨང་གཞིའི་ཐོག་རྒྱ་མ་དུང་ཕྱུར་ཁྲི་1.4ཡི་སྐས་རིམ་གསར་པར་ཐོག་མར་སླེབས་ཡོད།
འདི་ལོ་ནས་བཟུང་། ས་ཁུལ་ཁག་དང་སྡེ་ཚན་ཁག་གིས་རྨོ་ཞིང་སྲུང་སྐྱོང་དང་འབྲུ་རིགས་བདེ་འཇགས་ཀྱི་འགན་འཁྲི་དོན་འཁྱོལ་ནན་པོ་བྱས་ནས་ཚབས་ཆེ་ཙམ་གྱི་རང་བྱུང་གནོད་འཚེ་སོགས་ཀྱི་ཤུགས་རྐྱེན་ངན་པ་ཁྱད་བསད་བྱས་ཏེ། འབྲུ་རིགས་ཐོན་སྐྱེད་ལས་དོན་ལ་མུ་མཐུད་དམ་འཛིན་ཡག་པོ་བྱས་པས་ལོ་ཧྲིལ་པོའི་འབྲུ་རིགས་ལ་སླར་ཡང་ཐོན་འབབ་ལེགས་པོ་བྱུང་ཡོད།
རྒྱལ་ཡོངས་ཀྱི་འབྲུ་རིགས་འདེབས་ཁྱོན་མུའུ་དུང་ཕྱུར་17.90ཟིན་པ་དེ་ལོ་གོང་མ་ལས་མུའུ་ཁྲི་525.8འཕར་ཏེ་0.3%འཕར་ནས། ལོ་5བསྟུད་མར་འཕར་རྒྱུ་རྒྱུན་འཁྱོངས་ཐུབ་ཡོད། 2024ལོར་ཀྲུང་དབྱང་གིས་འབྲུ་རིགས་ཐོན་སྐྱེད་ལ་རྒྱབ་སྐྱོར་བྱེད་ཤུགས་མུ་མཐུད་ཆེ་རུ་བཏང་ནས་གྲོ་དང་སྔ་སྨིན་འབྲས་ཀྱི་ཉོ་སྒྲུབ་རིན་གོང་དམའ་ཤོས་མུ་མཐུད་མཐོ་རུ་གཏོང་བ་དང་། རྨོ་ཞིང་གི་ས་བཅུད་སྲུང་སྐྱོང་ཁ་གསབ་དང་མ་རྨོས་ལོ་ཏོག་དང་སྲན་ཆེན་ཐོན་སྐྱེད་བྱེད་མཁན་ལ་ཁ་གསབ་དང་འབྲས་ཀྱི་ཁ་གསབ་སོགས་ཀྱི་སྲིད་ཇུས་བརྟན་པོ་ཡོང་བ་བྱས་ཏེ། ཐབས་མང་མཉམ་སྤྱོད་ཀྱིས་ཞིང་པའི་འབྲུ་འདེབས་ཀྱི་ཧུར་སེམས་ཆེ་རུ་བཏང་ཡོད། ས་གནས་ཁག་གིས་འབྲུ་རིགས་བདེ་འཇགས་ཀྱི་ཏང་སྲིད་འགན་འཁྲི་གཅིག་མཚུངས་དོན་འཁྱོལ་ནན་པོ་བྱས་ནས་རྨོ་ཞིང་སྲུང་སྐྱོང་དང་སྤྱོད་སྒོར་དོ་དམ་ཚོད་འཛིན་བྱེད་པར་ཤུགས་སྣོན་བརྒྱབ་ཡོད།
རྒྱལ་ཡོངས་ཀྱི་འབྲུ་རིགས་མུའུ་རེའི་ཐོན་འབབ་སྤྱི་རྒྱ་394.7ཟིན་པ་དང་མུའུ་རེའི་ཐོན་འབབ་ལོ་གོང་མ་ལས་སྤྱི་རྒྱ་5.1འཕར་ནས་1.3%འཕར་ཡོད། ས་གནས་ཁག་གིས་ཚད་གཞི་མཐོ་བའི་ཞིང་ཁ་འཛུགས་སྐྲུན་ལ་མུ་མཐུད་སྐུལ་འདེད་གཏོང་བ་དང་། ཞིང་ལས་ཐོན་སྐྱེད་ཀྱི་ཆ་རྐྱེན་ལེགས་སུ་གཏོང་བ། འབྲུ་རིགས་དང་པད་ཁ་སོགས་ལོ་ཏོག་གཙོ་བོའི་མུའུ་རེའི་ཐོན་འབབ་མཐོར་གཏོང་གི་བྱ་སྤྱོད་ལ་སྐུལ་འདེད་གཏིང་ཟབ་གཏོང་བ། ལུགས་མཐུན་གྱི་ཚགས་སྟུག་ཏུ་དང་ཆུ་ལུད་གཞི་གཅིག་སོགས་ཀྱི་ལག་རྩལ་ཁྱབ་གདལ་གཏོང་བ་བཅས་བྱས་པས་འབྲུ་རིགས་མུའུ་རེའི་ཐོན་ཚད་མཐོ་རུ་ནུས་ལྡན་ཕྱིན་ཡོད།
2024ལོར་རྒྱལ་ཡོངས་ཀྱི་དབྱར་འབྲུའི་ཐོན་འབབ་རྒྱ་མ་དུང་ཕྱུར་2997.8ཟིན་པ་དང་སྔ་སྨིན་འབྲས་ཀྱི་ཐོན་འབབ་རྒྱ་མ་དུང་ཕྱུར་563.5ཟིན་ཡོད། རྒྱལ་ཡོངས་ཀྱི་སྟོན་འབྲུ་འདེབས་ཁྱོན་བརྟན་པོའི་ངང་འཕར་བ་དང་ས་ཁུལ་ཁ་ཤས་ལ་གནོད་འཚེ་ཕོག་ནས་སྟོན་འབྲུའི་ཐོན་འབབ་ཆག་པ་ཕུད། ཞིང་ཁུལ་ཕལ་ཆེ་བར་གནོད་འཚེ་ཆེན་པོ་ཕོག་མེད་པས་སྟོན་འབྲུའི་ཐོན་འབབ་འཕར་ཡོད། འདེབས་འཛུགས་ཀྱི་གྲུབ་ཆ་ལེགས་སྒྲིག་བྱས་པས་ཐོན་འབབ་ཆེ་བའི་ལོ་ཏོག་མ་རྨོས་ལོ་ཏོག་གི་འདེབས་ཁྱོན་ཅུང་ཆེ་རུ་བཏང་བས་སྟོན་འབྲུའི་ཐོན་འབབ་མང་དུ་ཕྱིན་ཡོད། རྒྱལ་ཡོངས་ཀྱི་སྟོན་འབྲུའི་ཐོན་འབབ་རྒྱ་མ་དུང་ཕྱུར་10568.7ཟིན་པ་དེ་ལོ་གོང་མ་ལས་རྒྱ་མ་དུང་ཕྱུར་150.3འཕར་ནས་1.4%འཕར་ཡོད།
རྒྱལ་ཁབ་བསྡོམས་རྩིས་ཅུས་གྲོང་གསེབ་སིའི་འབྲེལ་ཡོད་འགན་འཁུར་བས། 2024ལོར་རྒྱལ་ཡོངས་ཀྱི་འབྲུ་རིགས་ཐོན་འབབ་རྒྱ་མ་དུང་ཕྱུར་ཁྲི་1.4ཡི་སྐས་རིམ་གསར་པར་ཐོག་མར་སླེབས་ནས་རྒྱལ་ཁབ་ཀྱི་འབྲུ་རིགས་བདེ་འཇགས་ཀྱི་རྨང་གཞི་སྔར་བས་བརྟན་དུ་ཕྱིན་ཏེ། གྲོང་གསེབ་ཕྱོགས་ཡོངས་ནས་དར་རྒྱས་དང་ཞིང་ལས་སྟོབས་ཆེའི་རྒྱལ་ཁབ་འཛུགས་སྐྲུན་ལ་སྐུལ་འདེད་གཏོང་ཆེད་རྨང་གཞི་བརྟན་པོ་བཏིང་བ་དང་། དཔལ་འབྱོར་ལེགས་ཕྱོགས་སུ་འཕེལ་བའི་རྣམ་པ་སྲ་བརྟན་དང་ཤུགས་ཆེར་གཏོང་བ། སྤུས་ཚད་མཐོ་བའི་འཕེལ་རྒྱས་ལ་རྒྱུན་མཐུད་སྐུལ་འདེད་གཏོང་བར་འདེགས་སྐྱོར་ནུས་ལྡན་བཅས་བྱས་ཡོད་ལ། གོ་ལ་ཧྲིལ་པོའི་འབྲུ་རིགས་ཁྲོམ་ར་བརྟན་པོ་ཡོང་བ་དང་འཛམ་གླིང་གི་འབྲུ་རིགས་བདེ་འཇགས་སྲུང་སྐྱོང་བྱ་ཆེད་ལེགས་སྐྱེས་ཧུར་ཐག་ཕུལ་ཡོད་ཅེས་བརྗོད་པ་རེད།
（པ་སངས་སྒྲོན་ལགས་ཀྱིས་བསྒྱུར། བསོད་ནམས་བདེ་སྐྱིད་ཆེ་བས་ཞུས）