འདི་ག་ཚགས་པར་ཁང་དུ་ཆབ་མདོ་ནས་ཟླ་12ཚེས་10ཉིན་གློག་འཕྲིན་འབྱོར་གསལ། ཉེ་དུས། གསར་འགོད་པས་ཏ་ཐང་བོད་ལྗོངས་ནུས་རྒྱུ་གསར་སྤེལ་ཚད་ཡོད་ཀུང་སི་ནས་ཤེས་རྟོགས་བྱས་པར། ཀུང་སི་དེའི་ཁོངས་གཏོགས་ཀྱི་འཛམ་གླིང་ཐོག་གི་ས་བབ་མཐོ་ཤོས་ཀྱི་རླུང་ཤུགས་གློག་ཁང་སྟེ། ཆབ་མདོ་གྲོང་ཁྱེར་དཔའ་ཤོད་རྫོང་དུ་གནས་པའི་ཏ་ཐང་དཔའ་ཤོད་རླུང་ཤུགས་གློག་ཁང་ནས་ཟླ་10ཚེས་31ཉིན་གློག་གཏོང་འགོ་ཚུགས་པ་ནས་ཟླ་12ཚེས་10ཉིན་གྱི་ཆུ་ཚོད་8པ་བར་རིམ་རྩིས་བྱས་ན་གློག་ཆུ་ཚོད་ཆན་ཝ་ཁྲི་2200ལྷག་ཙམ་བཏང་ཡོད།

ཏ་ཐང་དཔའ་ཤོད་རླུང་ཤུགས་གློག་ཁང་ནི་ཆབ་མདོ་གྲོང་ཁྱེར་དཔའ་ཤོད་རྫོང་སྤོམ་མདའ་གྲོང་རྡལ་དུ་གནས་ཤིང་། རླུང་ཤུགས་གློག་ཤིང་འཛུགས་སའི་ས་བབ་མཐོ་ཤོས་སྨི་5200ཟིན་པ་དང་གློག་གསོག་འཕྲུལ་འཁོར་སྒྲིག་སྦྱོར་བྱེད་སའི་ས་བབ་མཐོ་ཤོས་ལ་སྨི་5305ཟིན་གྱི་ཡོད། དེ་ནི་ཏ་ཐང་བོད་ལྗོངས་ཀུང་སི་དང་ཆབ་མདོ་གྲོང་ཁྱེར་ཁང་ཏན་ནུས་རྒྱུ་གཙང་མའི་མ་འཇོག་འཕེལ་རྒྱས་ཚོགས་པ་ཚད་ཡོད་ཀུང་སིས་མཉམ་ལས་བྱས་ཏེ་ཆབ་མདོའི་ས་ཁོངས་སུ་གསར་སྤེལ་འཛུགས་སྐྲུན་བྱས་པའི་རླུང་ཤུགས་གློག་ཁང་གི་རྣམ་གྲངས་ཐོག་མ་དེ་ཡིན་པ་དང་། དེ་ནི་མིག་སྔར་གློག་གཏོང་འགོ་ཚུགས་པའི་རླུང་ཤུགས་གློག་ཁང་རྣམ་གྲངས་ཁྲོད་ཀྱི་ས་བབ་མཐོ་ཤོས་དང་ས་བབ་ཆེས་མཐོ་ཤོས་ཀྱི་ས་ཁུལ་དུ་འཕྲུལ་ཆས་རྐྱང་པ་ནས་གློག་གཏོང་ཚད་མང་ཤོས་ཀྱི་རླུང་ཤུགས་གློག་ཁང་གི་རྣམ་གྲངས་ཤིག་རེད།

“དེ་ནི་ས་བབ་སྨི་5305སར་བཙུགས་པའི‘ས་མཐོའི་རླུང་འཁོར’ལྟ་བུ་རེད། རིང་ཚད་སྨི་95ཡོད་པའི་སྒྲོ་གཤོག་འཁོར་ཐེངས་རེར་གློག་ཏུའུ་9.5གཏོང་ཐུབ་ཀྱི་ཡོད། དེས་ཆ་སྙོམས་ལོ་རེར་ནུས་རྒྱུ་གཙང་མའི་གློག་ཏུའུ་ཁྲི་1600ལྷག་ཙམ་གཏོང་ཐུབ་ཀྱི་ཡོད་པས། མི་ཁྲི་23ཙམ་གྱི་ལོ་ཧྲིལ་པོའི་འཚོ་བའི་གློག་སྤྱོད་ཀྱི་དགོས་མཁོ་སྐོང་ཐུབ་ཀྱི་ཡོད་པ་དེ་ནི་ལོ་ལྟར་ཚད་ལྡན་རྡོ་སོལ་ཏུན་5000གྲོན་ཆུང་ཐུབ་པ་དང་དབྱང་གཉིས་ཐཱན་འགྱུར་ཕྱིར་འབུད་བྱེད་ཚད་ཏུན་ཁྲི་1.23ཉུང་འཕྲི་དང་འདྲ་པོ་ཡོད”ཅེས་རྣམ་གྲངས་ཀྱི་འགན་འཁུར་བ་ཞུས་ཆི་ཏུའོ་ཡིས་ངོ་སྤྲོད་བྱས་པ་དང་། ཁོང་གིས་དེ་ལས་ཐོན་པའི་གློག་ནུས་ཆབ་མདོའི་ཡུག་ཁུལ་གྱི་གློག་དྲ་དང་སྦྲེལ་མཐུད་བྱས་ཏེ་གློག་མང་ཆེ་བ་ས་གནས་དེ་རང་དུ་བཏང་ནས་ས་གནས་དེ་གའི་གློག་ཤུགས་ཀྱི་དགོས་མཁོ་སྐོང་གི་ཡོད་ཅེས་ངོ་སྤྲོད་བྱས།