ཤིན་ཧྭ་གསར་འགྱུར་ཁང་གྲོང་ཁྱེར་རེ་ནེ་ཝ་ནས་གློག་འཕྲིན་འབྱོར་པ་གཞིར་བཟུང་། ཉེ་ཆར། འཛམ་གླིང་དཔལ་འབྱོར་གླེང་སྟེགས་ཀྱི་སྔོན་ཐོན་བཟོ་སྐྲུན་ལས་རིགས་དང་མཁོ་སྤྲོད་འཁོར་འབྲེལ་ལྟེ་གནས་ཀྱི་ཀྲུའུ་རེན་ཨའོ་ཨེར་ཀུའུ་ཏེས་ཤིན་ཧྭ་གསར་འགྱུར་ཁང་གི་གསར་འགོད་པའི་ཡིག་ཐོག་བཅར་འདྲི་དང་ལེན་བྱེད་སྐབས། ཉི་ནུས་དང་། རླུང་ནུས། གློག་སྒུལ་རླངས་འཁོར། གློག་རྫས་ལག་རྩལ་བཅས་ཀྱི་ཐད་ཀྲུང་གོར་འཕེལ་རྒྱས་ཆེན་པོ་བྱུང་ནས་འགྱུར་རྡོའི་འབུད་རྫས་ལ་བརྟེན་ཚད་ཉུང་དུ་གཏོང་བ་དང་འབྲེལ་གོ་ལ་ཧྲིལ་པོའི་ནུས་རྒྱུ་གཙང་མ་ཕྱོགས་སྒྱུར་ལ་སྐུལ་འདེད་གཏོང་བར་ལེགས་སྐྱེས་ཕུལ་ཡོད་ཅེས་བརྗོད་པ་རེད།

ཚེས་10ཉིན་འཛམ་གླིང་དཔལ་འབྱོར་གླེང་སྟེགས་ཀྱིས་བཟོ་སྐྲུན་ལས་རིགས་དང་མཁོ་སྤྲོད་འཁོར་འབྲེལ་གྱི་འབྱུང་འགྱུར་སྐོར་གྱི་སྙན་ཞུ་ཁྱབ་བསྒྲགས་བྱས་ཤིང་། ཨའོ་ཨེར་ཀུའུ་ཏི་ནི་སྙན་ཞུ་འདིའི་འགན་འཁུར་བའི་གྲས་ཤིག་རེད།

སྙན་ཞུའི་ནང་ས་འབྲེལ་ཆབ་སྲིད་དང་། ལག་རྩལ། ཁོར་ཡུག་སོགས་རྒྱུ་རྐྱེན་གྱིས་གོ་ལ་ཧྲིལ་པོའི་བཟོ་སྐྲུན་ལས་རིགས་དང་མཁོ་སྤྲོད་འཁོར་འབྲེལ་བསྐྱར་སྒྲིག་ལ་སྐུལ་འདེད་གཏོང་བཞིན་ཡོད། མ་གནས་ཕུད་ཕྱི་རྒྱལ་གྱི་མ་འཇོག་མཁན་གྱིས་རྨང་གཞིའི་སྒྲིག་བཀོད་དང་། ནུས་རྒྱུའི་ཐོན་ཁུངས། ངལ་རྩོལ་ནུས་ཤུགས། ནོར་སྲིད། ལྟ་འདོམས་སྲིད་ཇུས། སྤྱི་ཚོགས་བཅོས་སྐྱོང་སོགས་ཁྱབ་ཁོངས་སུ་མ་འཇོག་ཧུར་ཐག་བྱེད་པ་མ་ཟད་སྲིད་ཇུས་ནུས་ལྡན་ཡོད་པའི་རྒྱལ་ཁབ་ལ་དེ་བས་དགའ་པོ་བྱེད་ཀྱི་ཡོད་ཅེས་འཁོད་ཡོད། སྙན་ཞུའི་ནང་རྨང་གཞིའི་སྒྲིག་བཀོད་ཀྱི་མ་འཇོག་ཁྱབ་ཁོངས་ནང་ཀྲུང་གོ་འབུར་དུ་ཐོན་ནས་གོ་ལ་ཧྲིལ་པོའི་སྣེ་ཁྲིད་པར་གྱུར་པའི་ངོས་འཛིན་བྱས་ཡོད་པ་རེད།