ཤིན་ཧྭ་གསར་འགྱུར་ཁང་གྲོང་ཁྱེར་ཏེ་ཧ་ནས་གློག་འཕྲིན་འབྱོར་པ་གཞིར་བཟུང་། ཉེ་ཆར། ཏེ་ཧའི་གླེང་སྟེགས་སྐབས་ཉེར་གཉིས་པ་གྲོལ་ཞིང་། ཚོགས་ཞུགས་སྐུ་མགྲོན་གྱིས། གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་ངོས་ནས་བརྗོད་ན། རྒྱལ་ཁབ་ཆེ་ཆུང་གང་ཞིག་ཡིན་རུང་མཐུན་སྒྲིལ་མཉམ་ལས་བྱེད་དགོས་པ་དང་། ཀྲུང་གོས་གོ་ལ་ཧྲིལ་པོའི་ལྷོ་ཕྱོགས་དབར་གྱི་མཉམ་ལས་ལ་སྐུལ་འདེད་ཧུར་ཐག་བཏང་ནས། དེ་བས་ཀུན་ཕན་བསྟུན་མཁས་ཀྱི་གོ་ལ་ཧྲིལ་པོའི་བཅོས་སྐྱོང་མ་ལག་མངོན་འགྱུར་ཡོང་ཆེད་ལེགས་སྐྱེས་གལ་ཆེན་ཕུལ་ཡོད་ཅེས་བརྗོད།

རུ་ཝང་ཏའི་ཙུང་ཐུང་ཁཱ་ཅ་མེ་ཡིས། ཨ་ཧྥེ་རི་ཁའི་རྒྱལ་ཁབ་ཀྱིས་རྒྱལ་ཁབ་རང་བཙན་དང་མི་རིགས་བཅིངས་འགྲོལ་དོན་དུ་གཉེར་རིང་ཀྲུང་གོའི་རྒྱབ་སྐྱོར་ཤུགས་ཆེན་ཐོབ་ཡོད། རུ་ཝང་ཏར་དཔེ་བཞག་ན། 2023ལོར་རུ་ཝང་ཏ་དང་ཀྲུང་གོའི་དབར་གྱི་ཉོ་ཚོང་གྲངས་འབོར་2018ལོ་ལས་274%འཕར་བ་དང་། རུ་ཝང་ཏར་ཀྲུང་གོའི་སྒོ་ཁྲལ་ཆག་པའི་ཕན་པ་ཐོབ་ཡོད་ཅེས་བརྗོད།

ན་སྨི་པི་ཡའི་ཙུང་ཐུང་མུའུ་པེན་པཱ་ཡིས། ཀྲུང་གོའི་ཁེ་ལས་ཀྱིས་ཨ་ཧྥེ་རི་ཁར་གཞུང་ལམ་སོགས་རྨང་གཞིའི་སྒྲིག་བཀོད་བསྐྲུན་ཡོད་ཅིང་། དེ་ནི་དར་རྒྱས་ཆེ་བའི་རྒྱལ་ཁབ་ཞུགས་འདོད་མེད་པ་ཞིག་རེད། ཨ་ཧྥེ་རི་ཁ་དང་ཀྲུང་གོས་ད་དུང་རིག་གཞུང་སྤེལ་རེས་དང་སློབ་གསོའི་མཉམ་ལས་སོགས་ལ་ཤུགས་སྣོན་བརྒྱབ་ནས། རིག་གནས་མཉམ་འདྲེས་དང་ཤེས་དཔལ་ཕན་ཚུན་དཔྱད་གཞིར་འཛིན་པར་སྐུལ་འདེད་བཏང་ཡོད་ཅེས་བརྗོད།

པ་པ་ཏོ་སིའི་ཙུང་ལི་མོ་ཐེ་ལི་ཡིས། རྒྱལ་ཁབ་ཆེ་ཆུང་གང་ཞིག་ཡིན་རུང་ཚང་མ་འདྲ་མཉམ་ཡིན་པས། ཚང་མས་སྣེ་མང་ཅན་གྱི་འཛམ་གླིང་ལ་རང་རང་གི་ནུས་པ་འདོན་ཐུབ། གོ་ལ་ཧྲིལ་པོའི་འགྲན་སློང་མདུན་དུ་རྒྱལ་ཁབ་ཆེན་པོ་གང་ཞིག་ཡིན་རུང་རང་གཅིག་པུས་ཁ་གཏད་གཅོག་ཐབས་བྲལ་བས། རྒྱལ་ཁབ་ཁག་དབར་མཐུན་སྒྲིལ་མཉམ་ལས་བྱེད་དགོས་ཞེས་བརྗོད།

ཧོང་ཏུ་ར་སིའི་ཕྱི་འབྲེལ་པུའུ་ཀྲང་ལེ་ནཱ་ཡིས། ཀྲུང་གོ་དང་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཁག་གིས་ཕན་ཚུན་བརྩི་འཇོག་དང་གཉིས་ཁེ་གཉིས་ཕན་གྱི་འབྲེལ་བ་འཕེལ་རྒྱས་གཏོང་བཞིན་ཡོད་ཅེས་བརྗོད།

སྐབས་འདིའི་ཏེ་ཧའི་གླེང་སྟེགས་ཀྱི་དུས་ཡུན་ཉིན་གཉིས་ཡིན་པ་དང་། བརྗོད་དོན་གཙོ་བོ་ནི“གསར་གཏོད་བྱེད་རྒྱུ་ཁ་ཚ་དགོས་གཏུགས་སུ་གྱུར་ཡོད”ཅེས་པ་དེ་ཡིན་པ་དང་། ཡན་ལག་གླེང་སྟེགས་དང་བགྲོ་གླེང་ཚོགས་འདུ་ཐེངས་བཅུ་གྲངས་འཚོགས་ཡོད་པ་རེད།