མི་དཀྱུས་མ་ཞིག་གི་ངོས་ནས་བརྗོད་ན། ས་བབ་མཐོ་ཚད་སྨི་5200ནི་ཧ་ཅང་མཐོ་པོ་རེད། ཡིན་ནའང་ལྷག་ཕུན་གྱི་ངོས་ནས་བརྗོད་ན་རི་འཛེག་གི་འགོ་འཛུགས་ས་ཙམ་རེད།

ས་བབ་མཐོ་ཚད་ལ་སྨི་5200ཟིན་པའི་ཇོ་མོ་གླང་མའི་སྒར་ས་ཆེན་པོ་ནས་ས་བབ་མཐོ་ཚད་ལ་སྨི་5800ཟིན་པའི་བར་བརྒལ་སྒར་ས་བར་དང་། དེ་ནས་ས་བབ་མཐོ་ཚད་ལ་སྨི་6500ཟིན་པའི་མདུན་སྐྱོད་སྒར་ས་བར་སྐྱོད་རིམ་བཞིན་མགོ་ཡུ་འཁོར་བ་དང་སྙིང་གཡུག་པ་སོགས་གསོ་རླུང་མི་འདང་བའི་སྣང་ཚུལ་ཁྱད་དུ་བསད་དགོས་པ་མ་ཟད། གངས་རྡིབ་དང་རྡོ་ལྷུང་བ་སོགས་ཀྱི་ཉེན་ཁར་ཡང་དོགས་ཟོན་བྱེད་དགོས་ཀྱི་ཡོད།

ཀྲུང་གོ་སྒུལ་བདེའི“5Gཇོ་མོ་གླང་མར་ཁྱབ་པའི”འགན་ལེན་རུ་ཁག་གི་ཁོངས་མི་ཞིག་ཡིན་པའི་ལྷག་ཕུན་དང་ལས་རོགས་ཚོས་དུས་ཡུན་ཉིན་47ནང་ཇོ་མོ་གླང་མའི་སྒར་ས་ཆེན་པོ་ནས་ཇོ་མོ་གླང་མའི་རྩེ་མོའི་བར་གྱི་སྒར་ས་གསུམ་དུ་སྦྲེལ་ཚུགས་གསར་པ་བརྒྱད་བཙུགས་ནས་5Gབརྡ་རྟགས་ཇོ་མོ་གླང་མའི་རྩེ་མོར་ཁྱབ་པར་བྱས་ཡོད།

དགུ་བཅུ་ནང་སྐྱེས་ཀྱི་་བོད་རིགས་ཕོ་གཞོན་དེ་ནི་ཀྲུང་གོ་སྒུལ་བདེ་བོད་ལྗོངས་ཀུང་སི་གཞིས་རྩེ་ཡན་ལག་ཀུང་སིའི་དྲ་རྒྱ་པུའི་དྲ་རྒྱ་བཀོལ་སྤྱོད་བདག་སྐྱོང་པན་ཀྲང་ཡིན་ཞིང་། ཁོང་གིས“རང་ཉིད་ལ་སྦྲེལ་ཚུགས་ཀྱི་སྒྲིག་སྦྱོར་དང་། འཁོར་རྒྱུག སྲུང་སྐྱོང་དང་དེ་བཞིན་འོད་འཁྲིད་ཚི་སྐུད་ཁྲིད་པ་དང་ཚད་ལེན་ཚོད་ལྟ་བཅས་ཀྱི་ལས་ཀའི་ཉམས་མྱོང་ཚང་མ་ཡོད། གལ་ཆེ་ཤོས་ནི་ཏང་ཡོན་ཞིག་ཡིན་པའི་ངས་ཇོ་མོ་གླང་མའི་མཐོ་ཚད་ཚད་ལེན་དང་འཕྲིན་གཏོང་འགན་ལེན་ཧུར་ཐག་བྱ་རྒྱུ་ནི་གཟི་བརྗིད་ལྡན་པའི་ལས་འགན་ཞིག་ཡིན་པས་ང་ལ་གཞན་ལ་དཀྲི་ཐབས་བྲལ་བའི་འགན་འཁྲི་ཡོད”ཅེས་བཤད།

5Gཇོ་མོ་གླང་མར་ཁྱབ་པའི་མགྱོགས་ལམ་རྩ་བ་ནས་མེད། ས་བབ་མཐོ་ཚད་ལ་སྨི་5800ཟིན་པའི་སྒར་ས་ནས་ས་བབ་མཐོ་ཚད་ལ་སྨི་6500ཟིན་པའི་སྒར་སའི་བར་ནི་ཞེང་ཚད་ལི་སྨི་སུམ་ཅུ་བཞི་བཅུ་ཡོད་པའི་རྡོ་ཧྲུག་ལམ་རེད། ལྗིད་ཚད་ལ་ཏུན་8ཟིན་པའི་སྦྲེལ་ཚུགས་ཀྱི་འཕྲིན་གཏོང་སྒྲིག་ཆས་དང་འཛུགས་སྐྲུན་དངོས་ཟོག་ཚང་མ་རྟ་ཟོག་དང་མིས་སྒལ་པར་ཁུར་ནས་རི་རྩེར་དབོར་དགོས་ཀྱི་ཡོད།

ཚད་འཇལ་ཆ་འཕྲིན་བསྐྱར་གཏོང་དང་5Gཐད་གཏོང་འགན་ལེན་བྱ་ཆེད། ལས་ཀར་འཐུས་ཤོར་གཏན་ནས་བཏང་མེད། ལྷག་ཕུན་གྱི་ཚོགས་པར་ཁྱོན་མི་གྲངས་12ཡོད་པ་དེ་དག་གིས་སྒྲིག་ཆས་སྒྲིག་སྦྱོར་དང་སྲུང་སྐྱོང་གི་འགན་ཁུར་ཞིང་། གཡར་གཟར་འཁྱགས་རི་སྒྲོལ་རྗེས་མུ་མཐའ་མེད་པའི་གནམ་ལ་ཟུག་འདྲའི་འཁྱགས་གླིང་བརྒྱུད་ནས་འཁྱགས་པ་ལྷུང་བའི་ཉེན་ཁ་རེ་རེ་ལས་སྒྲོལ་མཐར་ལྷག་ཕུན་སོགས་ཚང་མ་ས་བབ་མཐོ་ཚད་ལ་སྨི་6500ཟིན་པའི་མདུན་སྐྱོད་སྒར་སར་སླེབས་ནས་སྦྲེལ་ཚུགས་སྐྲུན་འགོ་ཚུགས།

“དེ་དུས་ངའི་ལག་ཐོགས་ཁ་པར་ལ་5Gབརྡ་རྟགས་འབྱོར་སྐབས་ང་ཚོའི་ལས་ཀར་གྲུབ་འབྲས་ཐོབ་སོང་སྙམ་ནས་ཧ་ཅང་དགའ་པོ་བྱུང”ཞེས་ལྷག་ཕུན་གྱིས་བཤད།

སྦྲེལ་ཚུགས་བཙུགས་ཐུབ་པ་ཙམ་གྱིས་ལས་འགན་མཇུག་འགྲིལ་བ་མཚོན་གྱི་མེད་ལ། དེ་དང་ཆབས་ཅིག་རྒྱུན་རིང་བཅའ་སྲུང་བྱེད་དགོས་ཀྱི་ཡོད། ས་བབ་མཐོ་ཚད་ལ་སྨི་6500ཟིན་པའི་སྒར་ས་དེར་འདྲེ་ཡི་སྒར་ས་ཞེས་བརྗོད་སྲོལ་ཡོད། ཆེད་ལས་རི་འཛེག་སྦྱོང་བརྡར་བྱེད་མྱོང་མེད་པའི་ལྷག་ཕུན་གྱི་ངོས་ནས་བརྗོད་ན་ཉིན་ལྟར་སྙིང་རུས་དང་སྙུགས་ཤེད་ཀྱི་ཚོད་བགམ་ཞིག་རེད།

སྒར་སའི་སྦྲ་གུར་ནང་ལྷག་ཕུན་དང་ལས་རོགས་ཚོས་གདན་བཅུ་གྲངས་བརྩེགས་དགོས་ཀྱི་ཡོད་མོད། འོན་ཀྱང་སྒང་གི་གདན་ཁ་ཤས་རློན་པ་ཆགས་པ་དང་ཞོགས་པ་ལངས་སྐབས་གདན་དང་ཉལ་ཆས་ཐོག་བཞའ་འཁོར་ལ། ཉིན་མོ་ཡང་དཀའ་ལས་ཧ་ཅང་ཁག་པོ་ཡོད། ཉི་འོད་འཕྲོས་ཏེ་རི་རྩེའི་འཁྱགས་པ་བཞུར་ནས་གུར་སྟེང་རྡོ་ཡང་ཡང་ལྷུང་གི་ཡོད་པས་གཟབ་གཟབ་བྱེད་དགོས་ཀྱི་ཡོད། དེ་ལྟར་ཡུན་རིང་སོང་རྗེས་ལྷག་ཕུན་གྱི་རྣ་ཅོག་དང་ངོ་གདོང་ལ་འཁྱགས་ཤོར་བ་དང་མིག་ལ་གངས་ཕྱིད་ཐེབས་ཡོད།

བཅའ་སྲུང་བྱེད་རིང་ཁ་བ་བུ་ཡུག་འཚུབ་པས་རི་འཛེག་རུ་ཁག་ཕྱིར་འཐེན་ཐེངས་མང་བྱས་ཀྱང་ལྷག་ཕུན་ཕྱིར་འཐེན་ཐེངས་གཅིག་ལས་བྱས་མྱོང་མེད། ཁོང་གིས“གལ་སྲིད་ང་དེར་མ་བསྡད་ན་ས་བབ་མཐོ་ཚད་སྨི་5800དང་ས་བབ་མཐོ་ཚད་སྨི་6500ཡོད་པའི་སྒར་སའི་འཕྲིན་གཏོང་སྦྲེལ་ཚུགས་འགན་ལེན་བྱེད་མཁན་མེད། གལ་ཏེ་སྒྲིག་ཆས་ལ་སྐྱོན་ཤོར་ཚེ་འགན་ལེན་ལས་འགན་ལ་ཕམ་ཉེས་བྱུང་བ་དང་ཁྱད་པར་མེད་པས་གནས་ཚུལ་དེ་རིགས་རྩ་བ་ནས་ཐོན་དུ་འཇུག་གི་མིན”ཞེས་བཤད།

ཉེ་བའི་ལོ་ཤས་རིང་། ལྷག་ཕུན་གྱིས་ཇོ་མོ་གླང་མའི་2020ལོའི་མཐོ་ཚད་ཚད་འཇལ་དང་2023ལོའི་“རྩེར་སོན་ལས་འགན”ཇོ་མོ་གླང་མའི་ཚན་རིག་རྟོག་ཞིབ་ལས་འགན་གྱི་འཕྲིན་གཏོང་འགན་ལེན་ལས་དོན་སྔ་རྗེས་སུ་ལེགས་པར་བསྒྲུབས་ཡོད། པན་ཀྲང་ཡིན་པའི་ཁོང་གིས་ལོ་མང་རིང་ས་མཐོའི་ས་ཁུལ་དུ་དྲ་རྒྱ་ཁྱབ་གདལ་དང་། སྦྲེལ་ཚུགས་གློག་གཏོང་། སྐུད་ལམ་སྲུང་སྐྱོང་སོགས་ཐད་ཕྱོགས་སྡོམ་བྱས་པའི་ཉམས་མྱོང་ཁོངས་མི་ཚོར་བསླབས་པས་ཁོངས་མི་བདུན་པོ་ཚང་མ་དྲ་རྒྱ་སྲུང་སྐྱོང་བྱང་གོམས་ཅན་དུ་གྱུར་ཡོད། ཁོང་གིས“གསོ་རླུང་ཉུང་ཡང་སྙིང་སྟོབས་མི་ཉམས་པ་དང་། དཀའ་ཚེགས་ཆེ་ཡང་དཀའ་སྡུག་ལ་མི་སྐྲག་པ། ས་བབ་མཐོ་ཡང་བསམ་པའི་གོ་རྟོགས་དེ་བས་མཐོ་བ་བཅས་བྱེད་དགོས།‘བོད་སྐྱོད་པ་རྒན་གྲས་ཀྱི་སྙིང་སྟོབས’དར་སྤེལ་བཏང་ནས་དཀའ་ངལ་ལ་མི་སྐྲག་པར་འབད་བརྩོན་ཧུར་ཐག་བྱས་ཏེ་གྲོང་མི་དེ་བས་མང་བར་སྤུས་ལེགས་ཀྱི་བརྡ་རྟགས་འགན་ལེན་ཞབས་འདེགས་ཞུས་ནས་5Gབརྡ་རྟགས་ཡངས་ཤིང་རྒྱ་ཆེ་བའི་ས་གཞི་ཆེ་མོར་ཁྱབ་པར་བྱེད་དགོས”ཞེས་རྟག་ཏུ་ཁོངས་མི་ཚོར་ལྕག་སྐུལ་བྱེད་ཀྱི་ཡོད།