1949ལོའི་ཟླ་11ཚེས་23ཉིན་ཨར་པ་ནི་ཡས་དངོས་སུ་ཀྲུང་གོ་དང་ཕྱི་འབྲེལ་བཙུགས་པ་རེད། ལོ་75རིང་ཀྲུང་ཨའི་འབྲེལ་བར་དུས་རབས་ཀྱི་འཕོ་འགྱུར་དང་རྒྱལ་སྤྱིའི་འགྱུར་ལྡོག་མང་པོ་བརྒྱུད་ནས་འཕེལ་རྒྱས་ཀྱི་རྣམ་པ་བཟང་པོ་མུ་མཐུད་རྒྱུན་འཁྱོངས་ཐུབ་སྟེ་རྒྱལ་ཁབ་གཉིས་དང་རྒྱལ་ཁབ་གཉིས་པོའི་མི་དམངས་ལ་དངོས་དངོས་རྗེན་རྗེན་གྱི་ཕན་པ་ཐོབ་ཡོད།

དངོས་སྒྲུབ་མཉམ་ལས་ནི་ཀྲུང་ཨའི་འབྲེལ་བའི་འཛད་མེད་ཀྱི་སྒུལ་ཤུགས་ཡིན་པ་དང་། ཆུ་ཚད་སྔར་ལས་མཐོ་བའི་གཉིས་ཁེ་གཉིས་ཕན་ཡོང་བར་བྱ་རྒྱུ་ནི་རྒྱལ་ཁབ་གཉིས་པོའི་ཐུན་མོང་གི་འབད་བརྩོན་བྱེད་ཕྱོགས་ཡིན། ཀྲུང་ཨའི་ཁེ་ཕན་ལ་མཐུན་ས་མང་བ་དང་། དཔལ་འབྱོར་གྱི་གསབ་རེས་རང་བཞིན་ཆེ་བ། མཉམ་ལས་ཀྱི་མི་མངོན་པའི་སྟོབས་ཤུགས་ཆེ་བ་བཅས་ཡོད། ཉེ་བའི་ལོ་ཤས་རིང“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་ཀྲུང་གོ་དང་ཡོ་རོབ་དབུས་ཤར་རྒྱལ་ཁབ་ཀྱི་མཉམ་ལས་ཀྱི་སྣེ་ཁྲིད་འོག་ཀྲུང་ཨའི་དངོས་སྒྲུབ་མཉམ་ལས་ལ་གཡུར་ཟའི་གྲུབ་འབྲས་ཐོབ་ཡོད། 2023ལོར་ཀྲུང་གོ་ཉིད་ཨར་པ་ནི་ཡའི་ཚོང་དོན་རོགས་ཟླ་ཆེ་གྲས་གཉིས་པར་གྱུར་ནས་ཨར་པ་ནི་ཡའི་སྦྲང་རྩི་དང་དཀར་ཆུའི་ཐོན་རྫས་ཀྲུང་གོར་ཕྱིར་གཏོང་ཆོག་པའི་བརྒྱུད་རིམ་ལེགས་གྲུབ་བདེ་བླག་བྱུང་བས་ཞིང་ལས་ཐོན་རྫས་ཀྲུང་གོར་ཕྱིར་གཏོང་བྱེད་ཚད་མང་དུ་རྒྱུན་མཐུད་ཕྱིན་ཡོད། ད་ལོའི་ཟླ་དང་པོ་ནས་དགུ་པའི་བར་ཀྲུང་ཨའི་ཚོང་དོན་དངུལ་འབོར་ཨ་སྒོར་དུང་ཕྱུར་8.39ཟིན་ཡོད། ཀྲུང་ཨ་ཕྱོགས་གཉིས་པོས་ཁྱབ་ཁོངས་ཁག་གི་མཉམ་ལས་ཀྱི་མི་མངོན་པའི་སྟོབས་ཤུགས་སྔར་བས་སྔོག་འདོན་བྱས་ནས་རྒྱལ་ཁབ་གཉིས་པོའི་འབྲེལ་བ་འཕེལ་རྒྱས་འགྲོ་རྒྱུར་གསོན་ཤུགས་གསར་པ་བསྣན་ཡོད།

ད་ལོའི་ཟླ་9པར་ཨར་པ་ནི་ཡར་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་གིས་ཨར་པ་ནི་ཡའི་དཔལ་འབྱོར་དང་། རིག་གནས། གསར་གཏོད་བཅས་པུའུ་དང་མཉམ་ལས་བྱས་ཏེ“2024ལོའི་ཀྲུང་གོའི་རིག་གནས་གཟའ་འཁོར”གཉེར་བ་དང་། དེའི་རིང“ཀྲུང་ཨའི་དབར་ཕྱི་འབྲེལ་བཙུགས་ནས་ལོ་75འཁོར་བར་དྲན་གསོ་ཞུ་བའི་མཉམ་འབྲེལ་རི་མོའི་འགྲེམས་སྟོན”དང“ཀྲུང་གོའི་གློག་བརྙན་གཟའ་འཁོར”“ཀྲུང་གོའི་ཞིམ་ཟས་དུས་ཆེན”སོགས་སྣ་མང་ཕུན་སུམ་ཚོགས་པའི་རིག་གནས་བྱེད་སྒོ་གཉེར་བས། ས་གནས་དེ་གའི་དམངས་ཚོགས་དང་ཕྱི་རྒྱལ་གྱི་ཡུལ་སྐོར་བ་ཁྲི་ཕྲག་མང་པོའི་ཡིད་དབང་བཀུག་ཡོད། ཐི་ར་ན་སློབ་ཆེན་གྱི་ཁུང་ཙི་སློབ་གླིང་2013ལོར་བཙུགས་པ་ནས་བཟུང་། རིམ་རྩིས་བྱས་ན་ཨར་པ་ནི་ཡའི་སློབ་མ་5000ཙམ་བསྡུས་པ་དང་ས་གནས་དེ་གའི་གཞོན་ནུ་དེ་བས་མང་བས་རྒྱ་ཡིག་སློབ་སྦྱོང་བྱས་པ་བརྒྱུད་ཀྲུང་གོར་རྒྱུས་ལོན་དང་ཀྲུང་གོ་ཤེས་རྟོགས་བྱུང་ཡོད། 2023ལོར་ཀྲུང་ཨ་ཕྱོགས་གཉིས་པོས་ཕན་ཚུན་རྒྱལ་གྲོལ་ཐོངས་མཆན་འགོད་མི་དགོས་པའི་གྲོས་མཐུན་དང་ཡུལ་སྐོར་མཉམ་ལས་ཀྱི་བསམ་ཤེས་དྲན་ཐོར་མིང་རྟགས་བཀོད་པས་རྒྱལ་ཁབ་གཉིས་པོའི་མི་སྣ་འགྲོ་འོང་དེ་བས་སྟབས་བདེ་དང་མང་དུ་ཕྱིན་ཡོད།

ཕྱི་འབྲེལ་བཙུགས་ནས་ལོ་75འཁོར་བའི་འགོ་འཛུཌ་ས་གསར་པའི་ཐོག་རྒྱལ་ཁབ་གཉིས་པོས་རིམ་པ་ཁག་གི་འགྲོ་འོང་ལ་སྔར་བས་ཤུགས་སྣོན་བརྒྱབ་སྟེ་སྲོལ་རྒྱུན་མཛའ་གྲོགས་རྒྱུན་འཛིན་དང་། དངོས་སྒྲུབ་མཉམ་ལས་ཟབ་གཏོང་། མི་ཆོས་རིག་གནས་སྤེལ་རེས་རྒྱ་ཆེར་གཏོང་བ་བཅས་བྱས་ནས་ཀྲུང་ཨའི་འབྲེལ་བའི་དེ་བས་མཛེས་སྡུག་ལྡན་པའི་འབྱུང་འགྱུར་རྒྱུན་ཆད་མེད་པར་གཏོད་རྒྱུ་རེད།

（རྩོམ་པ་པོ་ནི་ཨར་པ་ནི་ཡར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཡིན）

(པ་ཕན་གྱིས་བསྒྱུར། བསྟན་བློ་དང་པ་ཕན་གྱིས་ཞུས)