ཤིན་ཧྭ་གསར་འགྱུར་ཁང་གྲོང་ཁྱེར་ཕ་རི་སི་ནས་གློག་འཕྲིན་འབྱོར་བ་གཞིར་བཟུང་། ཚེས་6ཉིན་ཕ་རི་སིའི་ནུབ་རྒྱུད་ཀྱི་ལ་ཏེ་ཧྥང་སིར་ཧྥ་རན་སེའི་མཐོ་རིམ་ཕྱི་ཕྱོགས་ཚོང་དོན་སློབ་གླིང་ཁུང་ཙི་སློབ་གླིང་གི་སྒོ་བྱང་འགེལ་བའི་མཛད་སྒོ་འཚོགས་པ་དང་། དེ་ལས་ཧྥ་རན་སེའི་ཁུང་ཙི་སློབ་གླིང་ཨང་བཅོ་བརྒྱད་པ་བཙུགས་པ་མཚོན་ཡོད།

སྒོ་བྱང་འགེལ་བའི་མཛད་སྒོའི་ཐོག་ཧྲན་ཏུང་ནོར་དཔལ་སློབ་ཆེན་གྱིས་ཧྥ་རན་སེའི་མཐོ་རིམ་ཕྱི་ཕྱོགས་ཚོང་དོན་སློབ་གླིང་ལ་ཡིག་རིས་བརྩམས་ཆོས་50ཙམ་ཞལ་འདེབས་བརྒྱབ་ཅིང་། ཧྥ་རན་སེར་བཅའ་སྡོད་ཀྲུང་གོའི་གཞུང་ཚབ་ཆེ་མོ་ཁང་དང་། ཧྥ་རན་སེའི་སློབ་གསོ་པུའུ། ཧྥ་རན་སེར་ཡོད་པའི་ཀྲུང་གོའི་ཚོང་དོན་ལས་རིགས་སོགས་ཀྱི་འཐུས་མི་80ཙམ་བྱེད་སྒོར་ཞུགས་ཡོད་པ་རེད། （གནམ་ཕྱུག་རྒྱལ་གྱིས་བསྒྱུར། ཚེ་བརྟན་སྒྲོལ་དཀར་གྱིས་ཞུས）