ཤིན་ཧྭ་གསར་འགྱུར་ཁང་ཧང་ཀྲོའུ་ནས་གློག་འཕྲིན་འབྱོར་བ་གཞིར་བཟུང་། ཉེ་ཆར། ཀྲུང་གོའི་ཕྱི་འབྲེལ་པུའུ་དང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལས་དོན་གྱི་མཐོ་རིམ་ཀྲོན་ཡོན་གཞུང་དོན་ཁང་གིས་ཐུན་མོང་ཐོག་གཉེར་བའི་དཔལ་འབྱོར་དང་། སྤྱི་ཚོགས། རིག་གནས་བཅས་ཀྱི་ཁེ་དབང་སྐོར་གྱི་རྒྱལ་སྤྱིའི་གླེང་མོལ་ཚོགས་འདུ་ཧང་ཀྲོའུ་རུ་འཚོགས་པ་རེད། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཕྱི་འབྲེལ་པུའི་པུའུ་ཀྲང་ཝང་དབྱིས་ཀྱིས་ཡིག་ཐོག་ཤིས་ཚིག་བསྒྲོན་པ་རེད།

ཝང་དབྱིས་ཀྱིས། ཀྲུང་གོས་མི་དམངས་ལྟེ་བར་འཛིན་རྒྱུ་མཐའ་འཁྱོངས་བྱས་ནས་དུས་རབས་ཀྱི་རླབས་རྒྱུན་དང་རང་རྒྱལ་ཁབ་ཀྱི་གནས་ཚུལ་ལ་འཚམ་པའི་འགྲོ་བ་མིའི་ཐོབ་ཐང་འཕེལ་རྒྱས་ཀྱི་འགྲོ་ལམ་ཐོག་བསྐྱོད་དེ། ཀྲུང་གོའི་འགྲོ་བ་མིའི་ཐོབ་ཐང་གི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་རྒྱུར་སྐུལ་འདེད་བཏང་བས། དཔལ་འབྱོར་དང་། སྤྱི་ཚོགས། རིག་གནས་བཅས་ཀྱི་ཁེ་དབང་འགན་ལེན་ཆུ་ཚད་སྐས་རིམ་གསར་པ་ཞིག་ཏུ་སླེབས་ཡོད། ད་ལོའི་ཟླ་7པར་ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་རྒྱལ་ཁའི་ངང་འཚོགས་ཏེ། ཀྲུང་གོས་ཕྱོགས་ཡོངས་ནས་སྒྱུར་བཅོས་སྔར་བས་ཟབ་ཏུ་གཏོང་བ་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་བརྗིད་ཆེའི་འཆར་གཞི་བཀོད་ཡོད་ལ། དེས་ཆུ་ཚད་སྔར་བས་མཐོ་བའི་ཐོག་ནས་ཀྲུང་གོ་མི་དམངས་ལ་དཔལ་འབྱོར་དང་། སྤྱི་ཚོཌ། རིག་གནས་བཅས་ཀྱི་ཁེ་དབང་འདྲ་མཉམ་ངང་ལོངས་སྤྱོད་ཐུབ་པའི་ཆ་རྐྱེན་བཟང་པོ་ཞིག་ཀྱང་སྐྲུན་ཐུབ་ངེས་རེད། ཀྲུང་གོས་མུ་མཐུད་རྒྱལ་ཁབ་ཁག་དང་མཉམ་འབྲེལ་རྒྱལ་ཚོགས་ཀྱི་སྒྲིག་གཞི་དང་མཉམ་དུ་མིའི་རིགས་ཡོངས་ཀྱི་ཐུན་མོང་རིན་ཐང་མཐའ་འཁྱོངས་བྱས་ཏེ་བདེ་འཇགས་ལ་བརྟེན་ནས་འགྲོ་བ་མིའི་ཐོབ་ཐང་ལ་སྲུང་སྐྱོང་བྱེད་པ་དང་། འཕེལ་རྒྱས་ལ་བརྟེན་ནས་འགྲོ་བ་མིའི་ཐོབ་ཐང་ལ་སྐུལ་འདེད་གཏོང་བ། མཉམ་ལས་ལ་བརྟེན་ཏེ་འགྲོ་བ་མིའི་ཐོབ་ཐང་ལ་སྐུལ་འདེད་གཏོང་བ་བཅས་ཀྱི་བྱེད་སྟངས་དར་སྤེལ་བཏང་ནས། གོ་ལ་ཧྲིལ་པོའི་འགྲོ་བ་མིའི་ཐོབ་ཐང་གི་བྱ་གཞག་སྐྱོན་བྲལ་དང་རྒྱུན་མཐུད་ཆོག་པའི་འཕེལ་རྒྱས་འགྲོ་བར་སྐུལ་འདེད་གཏོང་རྒྱུ་ཡིན་ཞེས་བརྗོད་པ་རེད།

ཁོང་ཀོ(པུའུ)དང་། ཁོ་ཐེ་ཏི་ཝོར། མོ་རི་ཐ་ནི་ཡ། ཡེ་མེན་སོགས་རྒྱལ་ཁབ་དང་ས་ཁུལ་གྱི་རྩ་འཛུགས་50ཙམ་གྱི་པུའུ་ཀྲང་དང་། སི་ཅུས་རིམ་པའི་གཞུང་ཕྱོགས་ཀྱི་འཐུས་མི། མཉམ་འབྲེལ་རྒྱལ་ཚོགས་ཀྱི་རིགས་གཅིག་མཁས་ཅན། འགྲོ་བ་མིའི་ཐོབ་ཐང་གི་མཐོ་རིམ་ཀྲོན་ཡོན་གཞུང་དོན་ཁང་གི་དཔོན་རིགས་སོགས་གླེང་མོལ་ཚོགས་འདུར་ཞུགས་ཡོད་པ་རེད།

（སྐལ་མཆོག་གིས་བསྒྱུར། བསྟན་བློས་ཞུས）