ཤིན་ཧྭ་གསར་འགྱུར་ཁང་ཟི་ལིང་ནས་གློག་འཕྲིན་འབྱོར་གསལ། གསར་འགོད་པར་རྒྱལ་ཁབ་གློག་ཤུགས་མ་འཇོག་ཚོགས་པ་རྨ་ཆུའི་སྟོད་རྒྱུད་ཆུ་གློག་གསར་སྤེལ་ཚད་ཡོད་འགན་འཁྲི་ཀུང་སི（རྨ་ཆུ་ཀུང་སི་ཞེས་བསྡུ་རྒྱུ）ནས་ཤེས་རྟོགས་བྱུང་བར། ཚེས་8ཉིན་རྨ་ཆུ་ཀུང་སི་གཏེར་ལེན་ཁའི་ནུས་མང་གསབ་རེས་ཀྱི་དུས་ཐེངས་དང་པོའི་ཆན་ཝ་ཁྲི་100ཡི་འོད་ཤུགས་རྣམ་གྲངས་དྲ་སྦྲེལ་གློག་གཏོང་ཐུབ་པ་དང་། རྣམ་གྲངས་དེ་བསྐྲུན་རྗེས་མཚོ་སྔོན་གྱིས་རྒྱལ་ཁབ་ཀྱི་ནུས་རྒྱུ་གཙང་མའི་ཐོན་ལས་ཀྱི་མཐོ་ས་བསྐྲུན་པར་རམ་འདེགས་ཐུབ་རྒྱུ་རེད།

མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཀྲོའུ་གཏེར་ལེན་ཁ་གྲོང་ཁྱེར་གྱི་ཐོན་སྒོ་ནུབ་མའི་འོད་ཤུགས(ཚ་ནུས)ཐོན་ལས་གླིང་དུ་གནས་པའི་གཏེར་ལེན་ཁའི་ནུས་མང་གསབ་རེས་རྣམ་གྲངས་ཀྱི་གློག་འདོན་འཕྲུལ་འཁོར་ནས་གློག་འདོན་ཚད་ཆན་ཝ་ཁྲི་220ཟིན་རྒྱུའི་འཆར་གཞི་བཀོད་པར། ད་ཐེངས་སྤྱོད་འགོ་ཚུགས་པའི་དུས་ཐེངས་དང་པོའི་འོད་ཤུགས་རྣམ་གྲངས་ཀྱི་གློག་འདོན་འཕྲུལ་འཁོར་ནས་གློག་འདོན་ཚད་ཆན་ཝ་ཁྲི་100ཟིན་ཞིང་། དེར་ཁྱོན་འོད་ཤུགས་ལིང་ཚེ་298ཡོད་པ་དང་། གཏན་འཇགས་སྒྲོམ་བཀྱག་ཆ་ཚང་ཁྲི་4.5དང་། ཤེལ་གཟུགས་རྐྱང་པའི་འོད་ཤུགས་ལྷུ་ལག་ཁྲི་228.5ཙམ་བསྒར་ཡོད་པ་མ་ཟད། ཆན་ཧྥུའུ་330ཡི་གློག་ཤུགས་འཕར་ཚུགས་1དང་ཆན་ཧྥུའུ་35ཡི་ཕྱོགས་བསྡུས་ས་ཚུགས་10ལེ་ལག་ཚང་བའི་འཛུགས་སྐྲུན་བྱས་ཡོད་པ་རེད།

རྣམ་གྲངས་དེ་ནི་ཧྲའན་ཤིས་རྨ་ཆུ་ནུས་རྒྱུ་ཚད་ཡོད་འགན་འཁྲི་ཀུང་སིས་སྐྲུན་འགན་ཁུར་ཞིང་། ཀུང་སི་དེའི་སྤྱི་ཁྱབ་ཅིང་ལི་གཞོན་པ་ཀྲང་ཅུས་ཚའེ་ཡིས་ངོ་སྤྲོད་བྱས་པར་གཞིགས་ན། རྣམ་གྲངས་དེའི་གློག་རྫས་ཀྱི་ལྷུ་ལག་བརྗེ་སྒྱུར་བྱེད་ཚད་20.4%ལྷག་ཙམ་ཟིན་ཡོད། རྣམ་གྲངས་སྤྱོད་འགོ་ཚུགས་རྗེས་སྔོན་དཔག་བྱས་ན་ལོ་ལྟར་ནུས་རྒྱུ་གཙང་མའི་གློག་ནུས་ཆུ་ཚོད་ཆན་ཝ་དུང་ཕྱུར་20ཙམ་མཁོ་འདོན་ཐུབ་རྒྱུ་དེ་ལོ་ལྟར་ཚད་ལྡན་རྡོ་སོལ་ཏུན་ཁྲི་61.99ཙམ་གྲོན་ཆུང་བྱེད་པ་དང་དབྱང་གཉིས་ཐཱན་འགྱུར་ཏུན་ཁྲི་186.47ཙམ་འབུད་ཉུང་དུ་གཏོང་བ་དང་མཚུངས་པས། ས་གནས་དཔལ་འབྱོར་ལྗང་མདོག་འཕེལ་རྒྱས་ལ་སྐུལ་འདེད་གཏོང་བར་དོན་སྙིང་གལ་ཆེན་ལྡན་ཡོད་པ་རེད།