ཧའེ་ཨན་ཅའོ་སློབ་ཆེན་ཁུང་ཙི་སློབ་གླིང་ནི་ཀག་ནའི་དབུས་རྒྱུད་ས་ཁུལ་གྱི་ལོ་རྒྱུས་ཀྱི་གྲགས་ཅན་གྲོང་ཁྱེར་ཧའེ་ཨན་ཅའོ་རུ་གནས་པ་དང་ནུབ་རྒྱ་མཚོ་ཆེན་པོ་དང་ས་འབྲེལ་ཡིན། དེ་ནི་ཀག་ནའི་ཁུང་ཙི་སློབ་གླིང་གཉིས་པ་དང་། ཧུའུ་ནན་གྲོང་ཁྱེར་སློབ་གླིང་དང་ཧའེ་ཨན་ཅའོ་སློབ་ཆེན་གྱིས་མཉམ་ལས་བྱས་ནས་བཙུགས་པ་ཞིག་རེད། 2016ལོར་སྒོ་བྱང་བཀལ་ནས་སྤྱོད་འགོ་ཚུགས་ཚུན། ཁུང་ཙི་སློབ་གླིང་གི་སློབ་ཁྲིད་ཁྱབ་ཁོངས་ནང་ཧའེ་ཨན་ཅའོ་སློབ་ཆེན་གྱི་རྒྱ་ཡིག་དངོས་གཞིའི་ཚན་ཁག་གི་ཆེད་ལས་དང་དེ་བཞིན་ཧའེ་ཨན་ཅའོ་ཡི་ས་གནས་ཁག་གི་རྒྱ་ཡིག་སློབ་ཁྲིད་ས་ཚིགས་15ཚུད་ཡོད་པ་དང་སློབ་མ་ཁྲི་1.1ལྷག་ཙམ་ཡོད་པ་རེད། འདི་ལོ་ཧའེ་ཨན་ཅའོ་སློབ་ཆེན་ཁུང་ཙི་སློབ་གླིང་གི་སློབ་མ་དབྱི་དབྱི་དང་ལི་ཧུའེ་ཀྲེན་ལ“རྒྱ་སྐད་སྦྲེལ་ཟམ”འཛམ་གླིང་སློབ་འབྲིང་སློབ་མའི་རྒྱ་ཡིག་འགྲན་བསྡུར་སྐབས་བཅུ་བདུན་པའི་ཀག་ནའི་འགྲན་ཁུལ་གྱི་དམིགས་བསལ་བྱ་དགའ་དང“རྒྱ་སྐད་སྦྲེལ་ཟམ”འཛམ་གླིང་སློབ་གྲྭ་ཆེ་མོ་བའི་རྒྱ་ཡིག་འགྲན་བསྡུར་སྐབས་ཉེར་གསུམ་པའི་ཀག་ནའི་འགྲན་ཁུལ་གྱི་དམིགས་བསལ་བྱ་དགའ་སོ་སོར་ཐོབ་པ་རེད། ལི་ཧུའེ་ཀྲེན་གྱིས“རྒྱ་ཡིག་སྦྱངས་པས་ངའི་མཐོང་རྒྱ་ཆེ་རུ་ཕྱིན་པ་དང་ཉམས་མྱོང་ཕུན་སུམ་ཚོགས་སུ་ཕྱིན་སོང”ཞེས་བརྗོད།
“ཁུང་ཙི་སློབ་གླིང་དེ་ཀག་ནའི་རྒྱ་ཡིག་སློབ་ཁྲིད་དང་ཀྲུང་གོ་དང་ཀག་ན་རྒྱལ་ཁབ་གཉིས་པོའི་རིག་གནས་སྤེལ་རེས་ཀྱི་ལས་སྟེགས་གལ་ཆེན་ཞིག་ཏུ་གྱུར་ཡོད”ཅེས་ཧའེ་ཨན་ཅའོ་སློབ་ཆེན་ཁུང་ཙི་སློབ་གླིང་གི་ཀྲུང་གོ་ཕྱོགས་ཀྱི་ཡོན་ཀྲང་ཨའོ་ཡ་མེ་ཡིས་གསར་འགོད་པར་བརྗོད་པ་དང་། ཧའེ་ཨན་ཅའོ་སློབ་ཆེན་ཁུང་ཙི་སློབ་གླིང་དུ་ད་ཆ་ཀྲུང་གོའི་དགེ་རྒན་5དང་ས་གནས་དེ་གའི་དགེ་རྒན་6ཡོད་པ་རེད། དགེ་རྒན་ཚོས་རྒྱ་ཡིག་སློབ་ཁྲིད་ལས་དོན་ལ་ཧ་ཅང་དགའ་པོ་བྱེད་ཀྱི་ཡོད་པ་དང་། ས་གནས་དེ་གའི་སློབ་མ་དང་མཛའ་གྲོགས་ཟབ་མོ་ཡང་ཆགས་ཡོད། སློབ་གླིང་གིས་རྒྱ་ཡིག་གསོ་སྦྱོང་དང་སློབ་ཁྲིད་ལ་མཐོང་ཆེན་བྱེད་ཀྱི་ཡོད་པ་མ་ཟད། ཀྲུང་གོའི་རིག་གནས་ལ་སློབ་མ་ཚོས་དགའ་པོ་བྱེད་རྒྱུར་དེ་བས་མཐོང་ཆེན་བྱེད་ཀྱི་ཡོད། སློབ་གླིང་དེས་ས་གནས་དེ་གར་ཕུལ་བྱུང་གི་རྒྱ་ཡིག་ཤེས་ལྡན་པ་ཁག་གཅིག་གསོ་སྐྱོང་བྱས་པ་དང་ཁོང་ཚོ་སློབ་གྲྭ་ཐོན་རྗེས་མང་ཆེ་བ་ཀྲུང་གོ་དང་ཀག་ནའི་དཔལ་འབྱོར་ཚོང་དོན་མཉམ་ལས་དང་རིག་གནས་སྤེལ་རེས་སོགས་ཀྱི་ཁྱབ་ཁོངས་ནང་ཞུགས་ཡོད།
ལོ་24ལ་སླེབས་པའི་ལིའུ་ཤིང་གིས་རྒྱ་ཡིག་སྦྱངས་ནས་ལོ་4སོང་བ་དང་། ན་ནིང་ཁོང་ཀྲུང་གོར་དབྱར་སྒར་ལ་ཞུགས་པའི་གོ་སྐབས་རག་ནས་ཀོང་ཀྲོའུ་དང་ཧྲང་ཧའེ་སོགས་གྲོང་ཁྱེར་དུ་བསྐྱོད་མྱོང་ཡོད། ལིའུ་ཤིང་གིས“ཀྲུང་གོའི་དེང་རབས་ཅན་འཕེལ་རྒྱས་ཀྱི་གྲུབ་འབྲས་ཀྱིས་ང་ལ་བག་ཆགས་ཟབ་མོ་བཞག་བྱུང་། ཀྲུང་གོའི་དམངས་ཚོགས་ཀྱི་མཛའ་སེམས་ཀྱིས་ཀྱང་ང་ལ་དྲོ་སྐྱིད་ལྷག་པར་སྦྱིན་བྱུང་། ངས་ཀྲུང་གོའི་ཞིམ་ཟས་མང་པོའི་བྲོ་བ་མྱངས་མྱོང་ཡོད་ལ། ཀྲུང་གོར་གྲོགས་པོ་མི་ཉུང་བ་ཞིག་ཀྱང་བསྒྲིགས་ཡོད། སླད་ཕྱིན་ཀག་ནའི་མི་དེ་བས་མང་བར་རྒྱ་སྐད་སློབ་པ་དང་རང་ཉིད་ཀྱི་ནུས་པ་གང་ཡོད་བཏོན་ནས་ཁོང་ཚོས་ཀྲུང་གོ་རྒྱུས་ལོན་དང་ཤེས་རྟོགས་དེ་བས་ལེགས་པ་ཐུབ་པར་རོགས་རམ་བྱ་རྒྱུའི་རེ་བ་བྱེད་ཀྱི་ཡོད”ཅེས་བརྗོད།
ཧའེ་ཨན་ཅའོ་སློབ་ཆེན་ཁུང་ཙི་སློབ་གླིང་གི་ཀག་ན་ཕྱོགས་ཀྱི་ཡོན་ཀྲང་ཨོའུ་ཧྥུ་ལི་ཡིས་གསར་འགོད་པར་ཧའེ་ཨན་ཅའོ་སློབ་ཆེན་1962ལོར་བཙུགས་པ་དང་ཀག་ནར་བསྔགས་བརྗོད་ཆེན་པོ་ཐོབ་པ་དང་ཤུགས་རྐྱེན་ཡང་ཆེན་པོ་ལྡན་ཡོད། “ཁུང་ཙི་སློབ་གླིང་བཙུགས་པ་དེས་ཧའེ་ཨན་ཅའོ་སློབ་ཆེན་གྱི་སློབ་ཚན་བཀོད་སྒྲིག་ཕུན་སུམ་ཚོགས་སུ་ཕྱིན་ཡོད། མིག་སྔར་ཀག་ནའི་སློབ་གསོ་པུའི་མངགས་བཅོལ་ལྟར་ཧའེ་ཨན་ཅའོ་སློབ་ཆེན་ཁུང་ཙི་སློབ་གླིང་གིས་ཀག་ནའི་སློབ་ཚན་རྩ་གནད་ཞིབ་དཔྱད་ཨུ་ཡོན་ལྷན་ཁང་དང་མཉམ་དུ《ཀག་ནའི་ས་གནས་དེ་གའི་སློབ་འབྲིང་གི་རྒྱ་ཡིག་སློབ་ཚན་རྩ་གནད》རྩོམ་འབྲི་བྱེད་བཞིན་ཡོད”ཅེས་ངོ་སྤྲོད་བྱས། ཨོའུ་ཧྥུ་ལི་ཡིས“འབྱུང་འགྱུར་རྒྱལ་ཁབ་གཉིས་པོས་མཐོ་སློབ་དབར་གྱི་མཉམ་ལས་ལ་ཤུགས་སྣོན་བརྒྱབ་ནས་ཀག་ན་དང་ཀྲུང་གོའི་དབར་གྱི་མི་ཆོས་རིག་གནས་སྤེལ་རེས་སྔར་བས་ཟབ་ཏུ་གཏོང་རྒྱུའི་རེ་བ་ཡོད”ཅེས་བརྗོད།
（ཉི་དོན་དང་བསོད་ནམས་ལྷ་མཚོས་སྒྱུར་ཞུས་བྱས）