ཟླ་11པར་རྒྱལ་ཡོངས་ཀྱི་ཡུལ་མིའི་འཛད་སྤྱོད་རིན་གོང་གི་སྟོན་གྲངས(CPI)དུས་མཚུངས་ལས་0.2%འཕར་བ་དང་འཕར་ཚད་ཟླ་བ་གོང་མ་ལས་བརྒྱ་ཆའི་གྲངས་0.1ཆག་པ།

ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཚེས་9ཉིན་རྒྱལ་ཁབ་བསྡོམས་རྩིས་ཅུས་ཀྱིས་ཁྱབ་བསྒྲགས་བྱས་པའི་གྲངས་གཞི་ལས་མངོན་པར་གཞིགས་ན། ཟླ་11པར་རྒྱལ་ཡོངས་ཀྱི་ཡུལ་མིའི་འཛད་སྤྱོད་རིན་གོང་གི་སྟོན་གྲངས(CPI)དུས་མཚུངས་ལས་0.2%འཕར་བ་དང་འཕར་ཚད་ཟླ་བ་གོང་མ་ལས་བརྒྱ་ཆའི་གྲངས་0.1ཆག་པ་དང་། བཟའ་བཅའ་དང་ནུས་རྒྱུའི་རིན་གོང་འཐེན་པའི་ལྟེ་བའི་CPIམུ་མཐུད་འཕར་ནས་དུས་མཚུངས་ལས་0.3%འཕར་བ་དང་། འཕར་ཚད་ཟླ་བ་གོང་མ་ལས་བརྒྱ་ཆའི་གྲངས་0.1འཕར་ཡོད་པ་རེད།

བཟའ་བཅའི་རིན་གོང་འཕར་ཚད་ཆག་པ་དེས་CPIཡི་འཕར་ཚད་ཆག་པར་སྐུལ་ཁྲིད་བྱས་ཡོད། གྲངས་གཞི་ལས་མངོན་པར། ཟླ་11པར་བཟའ་བཅའི་རིན་གོང་དུས་མཚུངས་ལས་1.0%འཕར་བ་དང་འཕར་ཚད་ཟླ་བ་གོང་མ་ལས་བརྒྱ་ཆའི་གྲངས་1.9ཆག་ཡོད། བཟའ་བཅའི་ཁྲོད་ཕག་ཤ་དང་སྔོ་ཚལ་སོས་པའི་རིན་གོང་13.7%དང་10.0%སོ་སོར་འཕར་ནས་འཕར་ཚད་ཆག་པ་དང་། ཤིང་འབྲས་སོས་པའི་རིན་གོང་ཟླ་བ་གོང་མར་4.7%འཕར་བ་ནས་0.3%ཆག་པ། ཚགས་ཤ་དང་། ལུག་ཤ བཟའ་སྣུམ། བྱ་ཤའི་རིགས། འབྲུ་རིགས་བཅས་ཀྱི་རིན་གོང་ཆག་ཚད་1.1%ནས་13.5%བར་ཡིན་པ་རེད།

（གནམ་ཕྱུག་རྒྱལ་གྱིས་བསྒྱུར། ཚེ་བརྟན་སྒྲོལ་དཀར་གྱིས་ཞུས）