ཇུན་གར་གཤོངས་སའི་ཤར་རྒྱུད་དུ་འབིགས་འཕྲུལ་གྱི་སྒྲ་ལྡིར་ལྡིར་གྲགས་ཤིང་། ཀྲུང་གོ་རྡོ་སྣུམ་ཤིན་ཅང་སྣུམ་ཞིང་ཡན་ལག་ཀུང་སིའི་ཅི་ཆིང་སྣུམ་ཞིང་ལས་སྒྲུབ་ཁུལ་གྱི་ཅིང་ལི་ཏུའུ་ཞུའེ་པེའོ་ཡིས“སྔོན་ཆད་གཡམ་སྣུམ་ཁྲོན་པ་ཞིག་འབིགས་པར་ཟླ་བ་གསུམ་ཙམ་འགོར་གྱི་ཡོད། ད་ཆ་ཟླ་བ་གཅིག་ལས་འགོར་གྱི་མེད། མིག་སྔར་སྣུམ་ཁྲོན་107འབིགས་ཟིན་པ་དང་སྣུམ་ཁྲོན་གསར་པ་105སྤྱོད་འགོ་ཚུགས་པས་གཡམ་སྣུམ་ཏུན་ཁྲི་བརྒྱ་ཐོན་སྐྱེད་བྱེད་པའི་ནུས་པ་ལྡན་ཡོད”ཅེས་ངོ་སྤྲོད་བྱས།

གཡམ་སྣུམ་ནི་སྤྱིར་བཏང་གི་རྡོ་སྣུམ་སྔོག་འདོན་ལས་དཀའ་ཚེགས་ཧ་ཅང་ཆེ་བས། སྨི་3000ལྷག་ཙམ་མན་གྱི་ས་རིམ་ཁྲོད་ནས་མཐུག་ཚད་སྨི་གཅིག་གཉིས་ཟིན་པའི་རྡོ་སྣུམ་ཆགས་རིམ་གནད་ལ་འཁེལ་པོས་འཚོལ་དགོས་ཀྱི་ཡོད། ཅི་ཆིང་སྣུམ་ཞིང་ལས་སྒྲུབ་ཁུལ་གྱིས་ས་རིམ་དབྱེ་འབྱེད་དང་སྣུམ་ཁྲོན་འབིགས་པ་སོགས་ཀྱི་གཡམ་སྣུམ་གསར་སྤེལ་གྱི་འགག་རྩའི་ལག་རྩལ་གྱི་དཀའ་གནད་རབ་དང་རིམ་པ་བསལ་ནས་གསར་སྤེལ་གྱི་ཕན་འབྲས་ཆེ་རུ་དང་ཐོན་ཚད་མཐོ་རུ་ཤུགས་ཆེན་བཏང་ཡོད། འདི་ནི་ཤིན་ཅང་སྣུམ་རླངས་ཐོན་ལས་སྤུས་ཚད་མཐོ་བའི་འཕེལ་རྒྱས་ཀྱི་བསྡུས་རིས་ཤིག་ཡིན་ཞིང་། 2023ལོར་ཤིན་ཅང་གི་སྣུམ་རླངས་ཐོན་སྐྱེད་བྱེད་ཚད་ཏུན་ཁྲི་6606ཟིན་ནས་ལོ་གསུམ་བསྟུད་མར་རྒྱལ་ཡོངས་ཀྱི་ཨང་དང་པོར་སླེབས་ཡོད།

2023ལོའི་ཟླ་8པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཤིན་ཅང་ཡུ་གུར་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ཤིན་ཅང་ཐོན་སྐྱེད་འཛུགས་སྐྲུན་པིང་ཐོན་གྱི་ལས་དོན་སྙན་སེང་གསན་སྐབས། “ཐོན་ཁུངས་ཀྱི་ལེགས་ཆ་དང་། ས་ཁོངས་ཀྱི་ལེགས་ཆ། ཐོན་ལས་ཀྱི་རྨང་གཞི་བཅས་ལ་གཞི་ཚུགས་ནས། ཚན་རྩལ་གསར་གཏོད་ལ་སྐུལ་འདེད་ཤུགས་ཆེན་གཏོང་བ་དང་། ཁྱད་ལྡན་ལེགས་ཆའི་ཐོན་ལས་སྐྱེད་སྲིང་དང་སྟོབས་ཆེར་གཏོང་བ། གསར་དར་ཐོན་ལས་འཕེལ་རྒྱས་ཧུར་ཐག་གཏོང་བ་བཅས་བྱས་ཏེ་ཤིན་ཅང་གི་ཁྱད་ཆོས་དང་ལེགས་ཆ་མངོན་པའི་དེང་རབས་ཅན་གྱི་ཐོན་ལས་མ་ལག་མགྱོགས་མྱུར་སྐྲུན་དགོས”ཞེས་ནན་བཤད་གནང་ཡོད།

ཟླ་10ཚེས་8ཉིན། རྒྱལ་ཁབ་ནུས་རྒྱུ་ཚོགས་པའི་ཧ་སྨི་ནུས་རྒྱུ་འདུས་གྲུབ་གསར་གཏོད་རྟེན་གཞིའི་རྣམ་གྲངས་སྐྲུན་འགོ་ཚུགས་ཤིང་། རྣམ་གྲངས་དེར་མ་དངུལ་བསྡོམས་སྒོར་དུང་ཕྱུར་1700བཏང་སྟེ“རྡོ་སོལ་དང་། སྣུམ། སོལ་རླངས། རྫས་འགྱུར། ཚ་ནུས། གློག ནུས་རྒྱུ་གསར་པ”བཅས་གཞི་གཅིག་ཅན་གྱི་ཐོན་ལས་འཁོར་འབྲེལ་བཏོད་ཡོད། རྣམ་གྲངས་བསྐྲུན་རྗེས་དངོས་སུ་ལས་ཞུགས་ལས་གནས་5500དང་ཤུགས་སུ་ལས་ཞུགས་ལས་གནས་ཁྲི་3ཙམ་མང་དུ་འགྲོ་རྒྱུ་རེད།

ཚོད་འཛིན་ཁང་ནས་རྡོ་སོལ་སྔོག་འདོན་མ་ལག་ལ་རྒྱང་ཁྲིད་བཀོལ་གཏོང་ཚོད་འཛིན་བྱེད་ཅིང་། དེའི་འགྲམ་གྱི་ལྗིད་ཐེག་རླངས་འཁོར་གྱིས་བསྡུ་རུབ་དང་དབོར་འདྲེན་བྱེད་པ་དང་བརྒྱུད་རིམ་ཧྲིལ་པོར་མི་མེད་ཁ་སྒྱུར་བྱེད་ཀྱི་ཡོད། དབྱི་ཝུའུ་ཅང་ནཱ་རྒྱུ་ཆ་གསར་པ་ཚད་ཡོད་ཀུང་སིའི་ཏུང་ཧྲི་ཀྲང་ཀྲང་ཅའོ་ཡིས“ཀུང་སིས་ཧྥུའུ་ཡིའུ་མའེ་ཐོན་ཁུངས་ཀྱི་ཐོན་ལས་ཞིབ་འཇུག་ཁང་དང་ཚན་རྩལ་ཞིབ་འཇུག་གསར་སྤེལ་ལྟེ་གནས་བཙུཌ་ནས་རང་འགུལ་ཅན་དང་རིག་ནུས་ཅན་གྱི་ཆུ་ཚད་རྒྱུན་ཆད་མེད་པར་མཐོ་རུ་བཏང་ཡོད། མིག་སྔར་ཐོན་ལས་འཁོར་འབྲེལ་དེ་ལྕགས་རིགས་མཱེ་བཟོ་བ་དང་གར་ཚད་མཐོ་བའི་བསྲེས་ལུད་ཐོན་སྐྱེད་བྱེད་པའི་བར་སྣུར་སྲིང་བྱས་པས། རྡོ་སོལ་ཏུན་རེའི་རིན་ཐང་སྒོར་300ནས་སྒོར་3000བར་ཆེ་རུ་ཕྱིན་ཡོད”ཅེས་བཤད།

སྣུམ་རླངས་རྩད་ཞིབ་གསར་སྤེལ་དང་ནུས་རྒྱུ་གསར་པ་དང་རྒྱུ་ཆ་གསར་པ་གསར་སྤེལ་བེད་སྤྱོད་སོགས་ཀྱི་གཙོ་གནད་ཁྱབ་ཁོངས་ལ་དམིགས་ནས། ཤིན་ཅང་གིས་ཚན་རྩལ་རྣམ་གྲངས་གལ་ཆེན་ཁག་གཅིག་བཀོད་སྒྲིག་བྱས་ཏེ་འགག་རྩའི་ལག་རྩལ་འགག་སྒྲོལ་བྱེད་ཤུགས་ཆེ་རུ་བཏང་ཞིང་། 2023ལོར་ཤིན་ཅང་གི་ཁེ་ལས་ཀྱི་ཞིབ་འཇུག་དང་ཚོད་ལྟ་འཕེལ་རྒྱས་ཀྱི་འགྲོ་གྲོན་ལ་སྒོར་དུང་ཕྱུར་84.67ཟིན་པ་དང་མཐོ་གསར་ལག་རྩལ་ཁེ་ལས་529མང་དུ་ཕྱིན་ཡོད།

ནའོ་མའོ་མཚོའི་རླུང་ཁུལ་གྱི་བྱེ་ཐང་དུ་རླུང་ནུས་གློག་འཕྲུལ་གྱི་འཕྲུལ་ཚན་ཆེན་པོ་ཞིག་སྒྲིག་སྦྱོར་བྱེད་བཞིན་ཡོད་ཅིང་། རྣམ་གྲངས་ཀྱི་འགན་འཁུར་བ་ལུའོ་དབྱིན་དབན་གྱིས“ཀྲའོ་ཝ་15དང་རླུང་འཁོར་གྱི་མཐོ་ཚད་སྨི་180ཙམ་ཟིན་གྱི་ཡོད། ད་ཡོད་རླུང་འཁོར་དང་བསྡུར་ན་ཐོན་ཁུངས་སྤྱོད་པའི་ལས་ཕྱོད་ཆེ་རུ་ཤུགས་ཆེན་ཕྱིན་པ་དང་ཆ་སྙོམས་ཀྱི་འཛུགས་སྐྲུན་མ་གནས་དམའ་རུ་ཕྱིན་ཡོད”ཅེས་བཤད།

ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི《གཏན་འབེབས》ནང“ལག་རྩལ་མཐོ་བ་དང་། ནུས་ཕྱོད་ཆེ་བ། སྤུས་ཚད་མཐོ་བ་བཅས་ཀྱི་ཁྱད་ཆོས་ལྡན་པའི་ཐོན་སྐྱེད་ནུས་ཤུགས་འཕེལ་རྒྱས་གཏོང་དགོས”ཞེས་བཏོན་ཡོད། ཐོན་ལས་ཚོ་འདུས་ཆེན་པོ་བཅུར་དམིགས་ནས། ཤིན་ཅང་གིས་ཐོན་ལས་ཚོ་འདུས་འཕེལ་རྒྱས་ཀྱི་སྤུས་ཚད་མཐོ་རུ་དང་ཕན་འབྲས་ཆེ་རུ་རྒྱུན་མཐུད་བཏང་སྟེ། ས་གནས་ཀྱི་ཁྱད་ཆོས་དང་ལེགས་ཆ་ལྡན་པའི་དེང་རབས་ཅན་གྱི་ཐོན་ལས་མ་ལག་མགྱོགས་མྱུར་སྐྲུན་བཞིན་ཡོད།

(པད་ཆོས་ཀྱིས་བསྒྱུར། པ་ཚེས་ཞུས)