“ཀྲུང་གོས་འབྲེལ་ཡོད་ཕྱོགས་ཁག་དང་མཉམ་དུ་མུ་མཐུད་མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་ཆོག་པའི་འཕེལ་རྒྱས་ཀྱི་གྲོས་རིམ་དོན་འཁྱོལ་བྱ་ཆེད། ཀྲུང་གོའི་བློ་གྲོས་དང་ཀྲུང་གོའི་ཇུས་གཞི་ལེགས་སྐྱེས་སུ་ཕུལ་ནས་རྩྭ་ཤ་མོའི་ལག་རྩལ་དེ་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་མི་དམངས་ལ་བདེ་སྐྱིད་སྐྲུན་པའི་རྩྭ་ཤ་མོ་ལ་འགྱུར་བ་བྱེད་འདོད་ཡོད། རྩྭ་ཤ་མོའི་ལག་རྩལ་ནི་ཀྲུའུ་ཞི་ཞི་ཅིན་ཕིང་སྐུ་ངོ་མས་དར་སྤེལ་དང་སྐུལ་འདེད་བཏང་གནང་བ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་མང་པོར་ཕན་པ་བསྐྲུན་པའི་འཕེལ་རྒྱས་མཉམ་ལས་ཀྱི་རྣམ་གྲངས་གལ་ཆེན་ཞིག་རེད། ཀྲུའུ་ཞི་ཞི་ཅིན་ཕིང་གིས་རྩྭ་ཤ་མོའི་ལག་རྩལ་གྱི་རྒྱལ་སྤྱིའི་མཉམ་ལས་ལ་དོ་ཁུར་ཡུན་རིང་གནང་བ་དང་། ཀྲུང་གོའི་དམིགས་བསལ་ལག་རྩལ་ཡིན་པའི་རྩྭ་ཤ་མོས་རྒྱལ་སྤྱིའི་འཕེལ་རྒྱས་མཉམ་ལས་ཁྲོད་བཏོན་པའི་དགེ་མཚན་ལྡན་པའི་ནུས་པ་གལ་ཆེན་ལ་ཚད་མཐོའི་གདེང་འཇོག་གནང་ཡོད།

2014ལོར་ཀྲུང་ཧྥི་རྒྱལ་ཁབ་གཉིས་ཀྱི་འགོ་ཁྲིད་པའི་ཐུན་མོང་སྐུལ་འདེད་འོག ཀྲུང་གོས་ཧྥི་ཅིར་རོགས་སྐྱོར་བྱས་པའི་རྩྭ་ཤ་མོའི་ལག་རྩལ་དཔེ་སྟོན་ལྟེ་གནས་བཙུགས་ཡོད། 2023ལོར་ཀྲུང་གོས་ཧྥི་ཅིར་རོགས་སྐྱོར་བྱས་པའི་རྩྭ་ཤ་མོའི་ལག་རྩལ་དཔེ་སྟོན་ལྟེ་གནས་ལ་བརྟེན་ནས་ཀྲུང་གོ་དང་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་ཀྱི་རྩྭ་ཤ་མོའི་ལག་རྩལ་དཔེ་སྟོན་ལྟེ་གནས་ཧྥི་ཅིར་དངོས་སུ་སྤྱོད་འགོ་ཚུགས་ཡོད། ཉེ་ཆར། འདི་ག་ཚགས་པར་གྱི་གསར་འགོད་པས་ཀྲུང་གོ་དང་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་ཀྱི་རྩྭ་ཤ་མོའི་ལག་རྩལ་དཔེ་སྟོན་ལྟེ་གནས་སུ་བསྐྱོད་དེ་ས་གནས་ས་ཐོག་ཏུ་བདེ་སྐྱིད་མཚོན་པའི་རྩྭ་ཤ་མོས་ཧྥི་ཅིར་ཕན་འབྲས་བཏགས་པར་བཅར་འདྲི་བྱས་ཏེ་རྩྭ་ཤ་མོའི་ལག་རྩལ་གྱིས་ས་གནས་དེ་གའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བ་དང་མི་དམངས་ལ་བདེ་སྐྱིད་བསྐྲུན་པར་ནུས་པ་གལ་ཆེན་ཐོན་པ་ཉམས་ཚོར་བྱས་པ་རེད།

དཔེ་སྟོན་ལྟེ་གནས་ཀྱི་གསོ་སྤེལ་ཁང་དུ་བསྐྱོད་སྐབས་ཆེད་མངགས་འདེབས་གསོ་བྱས་པའི་ཚོན་ཁྲ་ཅན་གྱི་ཤ་མོ་དག་མེ་ཏོག་ལྟར་རབ་ཏུ་བཞད་འདུག དཔེ་སྟོན་ལྟེ་གནས་ཀྱི་ཀྲུང་གོའི་ལག་རྩལ་མི་སྣས་འཚོལ་ཞིབ་ཧུར་ཐག་བྱས་ཏེ་ས་གནས་དེ་གའི་གནམ་གཤིས་དང་ས་རྒྱུའི་ཆ་རྐྱེན་དང་ཟུང་འབྲེལ་གྱིས་སྲོལ་རྒྱུན་གྱི་ཐབས་ཤེས་མི་ཉུང་བ་ཞིག་སྤྱད་དེ་སྤུས་ལེགས་ཀྱི་རྩྭ་ཤ་མོ་བཏབ་པ་དང་ཤ་མོ་སྣ་ཚོགས་འདེབས་གསོ་བྱས་པས་ས་གནས་དེ་གའི་ཞིང་པར་ཕན་པ་དངོས་ཐོབ་ཡོད།

ཀྲུང་གོའི་རིགས་གཅིག་མཁས་ཅན་གྱི་མཛུབ་ཁྲིད་ཞིབ་ཚགས་འོག ཧྥི་ཅིའི་དམངས་ཚོགས་ཀྱིས་ཕིང་ཀུའུ་དང་། ཀོ་ཤ། ཤ་མོ་ཅི་ཚུང་སོགས་ཟས་སྤྱོད་ཤ་མོ་རིགས་7འདེབས་སྟངས་རིམ་བཞིན་ཁོང་དུ་ཆུད་ནས་ཡོང་འབབ་མངོན་གསལ་དོད་པོས་མང་དུ་སོང་ཡོད། དཔེ་སྟོན་ལྟེ་གནས་ཀྱི་རིགས་གཅིག་མཁས་ཅན་སུའུ་རི་པའེ་ཡིས“ཞིང་དུད་ཀྱིས་ཁང་པའི་རྒྱབ་མདུན་གྱི་བེད་མེད་ས་ཆ་སྨི་ངོས་གྲུ་10ཡི་ཐོག་རྩྭ་ཤ་མོ་འདེབས་གསོ་བྱས་ཏེ། ལོ་གཅིག་ལ་ཕིང་ཀུའུ་ཐེངས་བཞི་བཏབ་ན་ཕིང་ཀུའུ་སྤྱི་རྒྱ་1200ཙམ་ཡོང་གི་ཡོད་པ་དང་ཡོང་འབབ་བསྡོམས་འབོར་སྔོན་དཔག་བྱས་ན་ཧྥི་ཅིའི་སྒོར་མོ་ཁྲི་2(ཧྥི་ཅིའི་སྒོར་མོ་1ལ་མི་དམངས་ཤོག་སྒོར་3ཙམ་ཡིན་པ)ཟིན་གྱི་ཡོད་པས། ས་གནས་དེ་གའི་ཞིང་པའི་ལོ་རེའི་ཆ་སྙོམས་ཡོང་འབབ་ལས་ཧ་ཅང་མང་བ་ཡོད” ཀྲུང་གོ་དང་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་ཀྱི་རྩྭ་ཤ་མོའི་ལག་རྩལ་དཔེ་སྟོན་ལྟེ་གནས་དེའང་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་ཀྱིས་རྩྭ་ཤ་མོའི་ཐོན་ལས་འཕེལ་རྒྱས་གཏོང་བའི་དཔེ་སྟོན་རྟེན་གཞི་གལ་ཆེན་ཞིག་ཏུ་གྱུར་ཡོད་ཅེས་བཤད།

ཀྲུང་ཧྥིའི་རྩྭ་ཤ་མོའི་མཉམ་ལས་ལས་ཀྲུང་གོས“ཉ་འཛིན་སྟངས་སློབ་པའི”བློ་རྒྱ་ཡངས་ལ་ཉམས་དོད་པོས་གསལ་འགྲེལ་བྱས་ཡོད། ད་བར་དཔེ་སྟོན་ལྟེ་གནས་ཀྱིས་ཧྥི་ཅིར་གསོ་སྦྱོང་འཛིན་གྲྭ་དུས་ཐེངས་50ལྷག་ཙམ་གྲུབ་འབྲས་ཐོབ་པའི་ངང་གཉེར་བ་དང་ཡུལ་དེ་གའི་རྩྭ་ཤ་མོའི་ལག་རྩལ་ཤེས་ལྡན་པ་2700ལྷག་ཙམ་གསོ་སྐྱོང་བྱས་ཡོད། རྣམ་གྲངས་ཚོགས་ཆུང་གི་ཀྲུང་གོའི་རིགས་གཅིག་མཁས་ཅན་གྱིས་ད་དུང་རྟག་ཏུ་ཐག་རིང་ལུང་ཁུག་ཏུ་བསྐྱོད་དེ་དཔེ་སྟོན་འདེབས་འཛུགས་དང་ལག་རྩལ་མཛུབ་ཁྲིད་བྱེད་ཀྱི་ཡོད། སློབ་མ་འབོར་ཆེན་ཞིག་གིས་ལག་ལེན་ནང་ཞུགས་པ་བརྒྱུད་རྩྭ་ཤ་མོ་སྡེབ་སྦྱོར་དང་། རྩྭ་ཤ་མོའི་ལྟོ་ཆས་བཟོ་སྟངས། ས་བཀབ་ནས་ཕིང་ཀུའུ་འདེབས་འཛུགས་སོགས་ཀྱི་རྩལ་ནུས་རབ་དང་རིམ་པ་ཁོང་དུ་ཆུད་ཡོད། “ང་ཚོས་ད་དུང་ཧྥི་ཅིའི་ས་གནས་དེ་གའི་སློབ་གྲྭ་འབྲིང་ཆུང་གི་སློབ་མ་1000ལྷག་ཙམ་ལ་ཆོབ་ཚ་བའི་གསོན་ཉམས་ལྡན་པའི‘རྩྭ་ཤ་མོའི་སློབ་ཁང’བཙུགས་ནས་ཁོང་ཚོ་རྩྭ་ཤ་མོའི་གསར་གཏོད་གྲུབ་འབྲས་ལ་སྤྲོ་སྣང་སླེབས་པར་བྱས་ཡོད། དེ་དང་ཆབས་ཅིག་ང་ཚོས་ཧྥི་ཅི་བ་77ཀྲུང་གོར་སྔར་བས་སློབ་སྦྱོང་དང་ཟབ་སྦྱོང་བྱེད་པར་བཏང་ཡོད། ང་ཚོས་ད་དུང་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་ཀྱི་རྩྭ་ཤ་མོའི་ལག་རྩལ་གསོ་སྦྱོང་འཛིན་གྲྭ་དུས་ཐེངས་དང་པོ་གཉེར་ནས་ཞི་བདེ་རྒྱ་མཚོ་ཆེན་པོའི་གླིང་ཕྲན་རྒྱལ་ཁབ་11ལ་ལག་རྩལ་རྐང་འཛིན་ཤེས་ལྡན་པ་34གསོ་སྐྱོང་བྱས་ཡོད”ཅེས་ཀྲུང་གོས་ཧྥེ་ཅིར་རོགས་སྐྱོར་བྱས་པའི་རྩྭ་ཤ་མོའི་ལག་རྩལ་དཔེ་སྟོན་ལྟེ་གནས་ཀྱི་རྣམ་གྲངས་ཚོགས་ཆུང་གི་ཙུའུ་ཀྲང་ལིན་ཤིན་ཧྲེང་གིས་བཤད།

（བསྟན་འཛིན་བློ་གྲོས་ཀྱིས་བསྒྱུར། པ་ཕན་དང་བསྟན་བློས་ཞུས）