སྐྱས་སྤོའི་འཚོ་བ་མཇུག་འགྲིལ་ནས་རྒྱང་ལམ་གསར་པར་སྐྱོད་འགོ་ཚུགས།

དགུན་ཐོག་མའི་དུས་སུ་དྲོད་འཇམ་ཉི་འོད་དགུང་སྔོན་དབྱིངས་ནས་སྟར་ཆགས་ཀྱི་སྡོད་ཁང་གསར་པར་རབ་ཏུ་འཕྲོས། དེ་ནི་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཀྲོའུ་རྐང་ཚ་རྫོང་འོམ་ཆུ་གྲོང་རྡལ་དཀོན་ལོ་ཚང་གོང་མ་གྲོང་ཚོ་ཡིན་ཞིང་། དེ་ནི་མཚོ་སྔོན་པོའི་འགྲམ་གྱི་འབྲོག་པ་གཅིག་སྡུད་བཀོད་སྒྲིག་གི་གྲོང་ཚོ་གསར་པ་ཞིག་རེད།

2021ལོའི་ཟླ་6ཚེས་8ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་དཀོན་ལོ་ཚང་གོང་མ་གྲོང་ཚོར་ཕེབས་ནས་མང་ཚོགས་ལ་གཟིགས་པ་དང་འཚམས་འདྲི་གནང་བ་རེད། ལོ་གསུམ་ལྷག་ཙམ་རིང་ས་མཐོའི་གྲོང་ཚོ་དེས་སྤྱི་ཁྱབ་ཧྲུའུ་ཅིའི་མངགས་བཅོལ་ཟབ་མོ་བློ་ལ་བརྟན་པོར་བཅངས་ནས་ཐོན་ཁུངས་ཀྱི་ལེགས་ཆ་སྤྱད་དེ་དེང་རབས་སྐྱེ་ཁམས་འབྲོག་ལས་འཕེལ་རྒྱས་གཏོང་བ་དང་། རི་སྔོན་ཆུ་དྭངས་སྲུང་སྐྱོང་བྱེད་པ། གསེར་རི་དངུལ་རི་གཏོད་པ་བཅས་བྱས་ཏེ་མཚོ་བོད་ས་མཐོར་གྲོང་གསེབ་དར་རྒྱས་ཀྱི་ལེའུ་གསར་རྐྱང་ཞིག་རྩོམ་བཞིན་ཡོད།

【“གྲོང་གསེབ་དར་རྒྱས་གཏོང་བར་ཞིང་འབྲོག་པར་འབབ་འཕར་ཡོང་བར་བྱེད་པའི་གཙོ་གནད་འདི་མངོན་གསལ་དོད་པོ་ཡོང་བ་བྱེད་པ་དང་། ས་མཐོའི་ཁྱད་ལྡན་གསོ་ཚགས་ལས་རིགས་དར་རྒྱས་གཏོང་བའི་བྱ་སྤྱོད་ལ་གང་མགྱོགས་སྐུལ་འདེད་གཏོང་བ། ལྗང་མདོག་སྐྱེ་ལྡན་ཞིང་འབྲོག་ལས་འཕེལ་རྒྱས་གཏོང་བ་བཅས་བྱས་ནས་ས་མཐོའི་ཁྱད་ལྡན་ཐོན་རྫས་ཀྱི་སྤུས་རྟགས་གཏོད་དགོས”——ཞི་ཅིན་ཕིང་།】

རྩྭ་ཆུ་བཟང་སར་ནོར་ལུག་འཚོ།

དཀོན་ལོ་ཚང་གོང་མ་གྲོང་ཚོ་ཨུ་ལྷན་གྱི་ཀྲུའུ་རེན་གཞོན་པ་སྐལ་བཟང་རྒྱལ་གྱི་བྱིས་དུས་ཀྱི་དྲན་འཆར་ནང་ཁོང་དང་ཕ་མ་གཉིས་རྟག་ཏུ་སྐྱས་སྤོ་དགོས་ཀྱི་ཡོད། “ལོ་གཅིག་དུས་བཞིར་ཕྱུགས་འཚོ་བ་དང་སྐྱས་སྤོ་དགོས་པས་འཚོ་བ་དཀའ་སྡུག་ཆེན་པོ་ཡོད”སྐལ་བཟང་རྒྱལ་གྱིས་སྐབས་དེ་དུས་ནང་མི་ཚང་མ་སྦྲ་གུར་ནང་སྡོད་ཀྱི་ཡོད་པས། དགུན་ཁ་ལྷགས་པ་འཛུལ་བ་དང་དབྱར་ཁར་ཐིགས་པ་རྒྱག་གི་ཡོད་ཅེས་བཤད། 2014ལོར་སྐལ་བཟང་རྒྱལ་དང་གྲོང་ཚོའི་ནང་གི་འབྲོག་པ་གཞན་དག་གི་སྐྱས་སྤོའི་འཚོ་བ་མཇུག་འགྲིལ་ནས་རྐང་ཚ་རྫོང་གྲོང་འགྲམ་གྱི་འབྲོག་པ་གཅིག་སྡུད་གཞིས་ཆགས་ཁུལ་དུ་གཞིས་ཆགས།

སྡོད་ཁང་གསར་པ་དཀར་ཆ་དོད་ལ་གཙང་སྦྲ་དོད་ཅིང་། སྲོལ་རྒྱུན་གྱི་སྒོ་རའི་ནང་དེང་རབས་ཀྱི་ཆུ་བཤལ་གཏོང་ཐུབ་པའི་གསང་སྤྱོད་ཡོད། དེ་བཞིན་ཕྲུ་གུ་སློབ་གྲྭར་སྐྱོད་པ་དང་རྒན་རྒོན་སྨན་ཁང་བསྟེན་རྒྱུ་ཡང་སྟབས་བདེ་རུ་ཕྱིན་ཡོད། སྐལ་བཟང་རྒྱལ་གྱིས“འཚོ་བ་དེ་ལྟ་བུ་སྔོན་ཆད་རྨི་ལམ་དུའང་འཁོར་མྱོང་མེད”ཅེས་བཤད།

འཚོ་བ་གསར་པས་འཕེལ་རྒྱས་གསར་པར་རེ་བ་སྦྱིན།

“སྲོལ་རྒྱུན་གྱི་སྐྱས་སྤོས་འབྲོག་པའི་ཐོན་སྐྱེད་ཐད་ཁྱིམ་ཚང་གི་གསོ་ཚགས་བྱེད་སྟངས་སྤྱད་པས་གཞི་ཁྱོན་ཆུང་བ་དང་། མ་གནས་མཐོ་བ། ཉེན་ཁ་འགོག་ནུས་ཆུང་བ་བཅས་ཀྱི་ཞན་ཆ་ལྡན་ཡོད། ང་ཚོས་དེང་རབས་ཀྱི་འབྲོག་ལས་དཔེ་སྟོན་རྟེན་གཞི་བསྐྲུན་ནས་འབྲོག་ལས་ཀྱི་ཚན་རྩལ་འདུས་ཚད་མཐོ་རུ་གཏོང་བ་དང་སྲོལ་རྒྱུན་གྱི་འབྲོག་ལས་དེ་དེང་རབས་འབྲོག་ལས་ཕྱོགས་སུ་གང་མགྱོགས་སྒྱུར་དགོས”ཞེས་དགུ་བཅུ་ནང་སྐྱེས་ཀྱི་གྲོང་ཚོའི་ཏང་ཀྲི་པུའི་ཧྲུའུ་ཅི་བསོད་ནམས་ཚེ་བརྟན་གྱིས་གསར་འགོད་པར་བཤད།

སྲིད་གཞུང་གི་ཁྲིད་སྟོན་རོགས་སྐྱོར་འོག་གྲོང་མི་ཚོས་ལག་བསྟར་ཧུར་ཐག་བྱས་ཡོད། 2022ལོར་གྲོང་ཚོའི་ནང་གི་འཇོན་ཐང་ཅན་བསོད་ནམས་དབང་ཕྱུག་གིས་འབྲོག་དུད་39དང་མཉམ་དུ་སྐྱེ་ཁམས་འབྲོག་ལས་མཉམ་ལས་ཁང་བཙུགས་ནས་ལེགས་བསྡུས་ཞིབ་གཉེར་དོ་དམ་དང་ཚན་རིག་དང་མཐུན་པའི་ངང་ཕྱུགས་རིགས་གསོ་ཚགས་བྱེད་པའི“ལམ་བུ་གསར་པ”འཚོལ་ཞིབ་བྱས། “2023ལོར་མཉམ་ལས་ཁང་ལ་ཡོང་འབབ་སྒོར་ཁྲི་57བྱུང་བ་དང་ལུག་མགོ་གྲངས་630དང་འབྲི་གཡག་མགོ་གྲངས་180བཤས་བཏང་ཡོད”ཅེས་བསོད་ནམས་དབང་ཕྱུག་གིས་བཤད།

གྲོང་གསེབ་དར་རྒྱས་གཏོང་བར་ད་དུང་ཤེས་ལྡན་པར་བརྟེན་དགོས། ཉེ་བའི་ལོ་ཤས་རིང་། དཀོན་ལོ་ཚང་གོང་མ་གྲོང་ཚོ་ནས་སློབ་གྲྭ་ཆེ་མོར་ཚུད་པའི་སློབ་གྲྭ་ཆེ་མོ་བ་80ལྷག་ཙམ་སྔ་རྗེས་སུ་སློབ་མཐར་ཕྱིན་ནས་ཕ་ཡུལ་དུ་ལོག་སྟེ་ལས་གཏོད་བྱེད་པའི་ཚ་རླབས་ཤིག་འཕྱུར་ནས་ས་མཐོའི་གྲོང་ཚོར་རྣམ་པ་གསར་པ་ཞིག་བཏོད།

2022ལོར། ལོ་21ལ་སླེབས་པའི་རྡོ་རྗེ་རྒྱལ་ཕ་ཡུལ་དུ་ལོག་རྗེས་གྲོང་ཚོར་དྲ་གྲགས་སྐྱོང་གསོའི་སྒྲིག་གཞི་ཞིག་བཙུགས་ནས་དྲ་ཐོག་ཚོང་དོན་ལས་སྟེགས་བརྒྱུད། རྒྱལ་ཡོངས་ཀྱི་གྲོགས་པོ་ཚོར་གྲོང་ཚོའི་ནང་གི་ཚགས་ཤ་དང་ལུག་ཤ་དང་། ནས་ཀྱི་སྦི་རག་སོགས་འོས་སྦྱོར་ངོ་སྤྲོད་བྱས་ཡོད། རྡོ་རྗེ་རྒྱལ་གྱིས“མི་དེ་བས་མང་བས་ངའི་ཕ་ཡུལ་ཤེས་རྟོགས་དང་འདི་གའི་ཉིན་བཞིན་འཕེལ་རྒྱས་དང་འགྱུར་ལྡོག་འགྲོ་བའི་རྣམ་པ་མཐོང་རེ་བྱེད་ཀྱི་ཡོད”ཅེས་བཤད།

སྐལ་བཟང་རྒྱལ་གྱིས“སྐྱེ་ཁམས་འབྲོག་ལས་དང་། མཚོ་སྐོར་ཡུལ་སྐོར། དྲ་ཐོག་ཚོང་དོན་བཅས་འཕེལ་རྒྱས་བཏང་བ་བརྒྱུད། ཚང་མའི་ལས་ཞུགས་གདམ་ག་མང་དུ་ཕྱིན་པ་དང་། ས་མཐོའི་ཁྱད་ལྡན་མི་རིགས་གྲོང་ཚོ་ཐོག་མར་ཆགས་པ། འབྲོག་པ་མང་ཚོགས་ཀྱི་ཡོང་འབབ་མང་དུ་ཕྱིན་པ། འཚོ་བའི་མདུན་ལམ་སྔར་བས་ཡངས་སུ་ཕྱིན་ཡོད”ཅེས་བཤད།

མི་དང་མཚོ་མཉམ་གནས་ཀྱིས་འཆར་གཞི་གསར་པ་བཀོད།

【“མཚོ་སྔོན་པོའི་སྐྱེ་ཁམས་སྲུང་སྐྱོང་དང་ཁོར་ཡུག་བཅོས་སྐྱོང་ཐད་ཀྱི་གྲུབ་འབྲས་ནི་ལས་སླ་པོར་ཐོབ་པ་ཞིག་མིན་པས་གཅེས་སྤྲས་ལྡབ་བརྒྱ་བྱས་ཏེ་ཟམ་མི་ཆད་པར་སྲ་བརྟན་དང་རྒྱ་སྐྱེད་གཏོང་དགོས”——ཞི་ཅིན་ཕིང་།】

“བྱིས་དུས་སུ་གྲོང་ཚོའི་རྩྭ་ཁ་ཧ་ཅང་ཡག་པོ་ཡོད”སྣང་དཔལ་ཚེ་རིང་གིས་སེམས་རྩ་འཁོལ་པོས་གསར་འགོད་པ་ཁྱིམ་དུ་འོ་ཇ་འཐུང་བར་གདན་དྲངས་ནས་གྲོང་ཚོའི་འདས་དོན་སྐོར་གླེང་ཞིང་། ཁོང་གིས“མཚོ་སྔོན་པོའི་མཐའ་འཁོར་ནི་གནའ་སྔ་མོ་ནས་བཟུང་སྐྱེས་བུ་དམ་པ་འཁྲུངས་ས་དང་རྩྭ་ཆུ་བཟང་བའི་གནས་ཤིག་ཡིན། རྗེས་སུ་མི་འབོར་རིམ་བཞིན་མང་དུ་ཕྱིན་ནས་རྩྭ་ཐང་ཉམས་ཞན་དུ་འགྲོ་འགོ་ཚུགས་ཡོད”ཅེས་བཤད།

དཀོན་ལོ་ཚང་གོང་མ་གྲོང་ཚོ་མཚོ་སྔོན་པོའི་བྱང་ངོགས་སུ་ཆགས་ཤིང་། ཉེ་བའི་ལོ་ཤས་རིང་མཚོ་སྔོན་པོའི་སྐྱེ་ཁམས་ཁོར་ཡུག་སྲུང་སྐྱོང་དང་འཚོ་གནས་བྱེད་སའི་རྩྭ་ར་སྲུང་སྐྱོང་བྱ་ཆེད། གྲོང་ཚོའི་ནང་གི་འབྲོག་པ་49རྫོང་དེའི་སྐྱེ་ཁམས་བདག་སྐྱོང་བར་གྱུར་པ་དང་། སྣང་དཔལ་ཚེ་རིང་ནི་དེའི་གྲས་ཤིག་རེད།

(པར་ངོས་གཉིས་པར་གཟིགས)(པར་ངོས་དང་པོར་མཐུད) གཟའ་འཁོར་རེར་འགན་འཁུར་བའི་ཡུག་ཁུལ་དུ་སྐོར་སྲུང་ཐེངས་གཉིས་གསུམ་བྱེད་ཀྱི་ཡོད། དེས་ན་ས་ཆ་གང་དུ་རྩྭ་ཆུ་བཟང་བ་དང་རི་གང་དུ་རྩྭ་སྐྱེ་ཡོད་མེད་གསལ་པོར་ཤེས་ཀྱི་ཡོད། གསར་འགོད་པའི་སྣེ་འཁྲིད་དེ་དགུན་དུས་འབྲོག་ར་ནས་གྲོང་སྡེའི་འཐུང་ཆུའི་ཆུ་འགོར་འབྱོར་སྐབས། སྣང་དཔལ་ཚེ་རིང་གིས“ལྟོས་དང་། སྔོ་ཐིང་ཐིང་གི་རྩྭ་ཐང་དང་དྭངས་གཙང་གི་ཆུ་མོ་ནི་ང་ཚོས་སྲུང་སྐྱོང་བྱས་པའི་འབྲས་བུ་རེད”ཅེས་བཤད།

སྐྱེ་ཁམས་ཁོར་ཡུག་ལེགས་སུ་ཕྱིན་ནས་རི་སྐྱེས་སྲོག་ཆགས་རིམ་གྱིས་མང་དུ་སོང་ཡོད། “རྩྭ་ཐང་གི་ཉེ་འཁོར་གང་སར་དགོ་དམར་་མཐོང་རྒྱུ་ཡོད”ཅེས་སྣང་དཔལ་ཚེ་རིང་གིས་མྱོང་ཚོར་ཟབ་མོས་བཤད། དགོ་དམར་ནི་མཚོ་སྔོན་པོའི་ཁུལ་དུ་འཚོ་སྡོད་བྱེད་པའི་རྩ་ཆེའི་སྲོག་ཆགས་ཤིག་ཡིན་པ་དང་། ལྟ་ཞིབ་ཚད་ལེན་གྱི་གྲངས་གཞི་ལས་མངོན་པར་མིག་སྔར་གྲངས་འབོར་དེ་སྲུང་སྐྱོང་བྱས་མ་ཐག་པའི་མགོ་གྲངས་300ཡང་མ་ཟིན་པ་ནས་ད་ཆའི་མགོ་གྲངས་3400ལྷག་ཙམ་བར་མང་དུ་ཕྱིན་ཡོད།

གྲོང་ཚོའི་རྒྱབ་ཀྱི་རྩྭ་ཐང་དུ་ཤིང་ཁང་ཆུང་ཆུང་མང་པོ་མཐོང་རྒྱུ་ཡོད་པ་དེ་ནི་གྲོང་ཚོས་ཡུལ་སྐོར་འཕེལ་རྒྱས་གཏོང་ཆེད་བསྐྲུན་པའི་དམངས་སྲོལ་གནས་ཚང་རེད། “གྲོང་ཚོའི་ཡུལ་སྐོར་ལྟ་སྐོར་ཚོགས་པས་ཉིན་གཅིག་ནང་མང་ཤོས་སུ་ཐེངས་8ཙམ་སྣེ་ལེན་ཞུ་གི་ཡོད། ང་ཚོས་ཇི་ལྟར་བྱས་ནས་ཡུལ་སྐོར་ལས་རིགས་དང་འབྲོག་ལས་མཉམ་འགུལ་སྔར་བས་ཡག་པོ་བྱས་ཏེ་གྲོང་མི་ཚོར་སྐྱེ་ཁམས་སྲུང་སྐྱོང་གི་གྲུབ་འབྲས་ལོངས་སུ་སྤྱོད་དུ་འཇུག་པ་དང་ལས་གནས་སྔར་བས་མང་པོ་གཏོད་རྒྱུའི་ཐད་བསམ་གཞིག་བྱེད་ཀྱི་ཡོད”ཅེས་བསོད་ནམས་ཚེ་རིང་གིས་སེམས་རྩ་འཁོལ་པོས་གྲོང་ཚོའི་མདོ་ནས་ཡོང་བའི་ཡུལ་སྐོར་བ་བསུ་བཞིན་དེ་ལྟར་བཤད།

“མཐུན་སྒྲིལ”མེ་ཏོག་མཚོ་ངོགས་སུ་རབ་ཏུ་བཞད་པ།

【“ཀྲུང་ཧྭ་མི་རིགས་ཀྱི་ཁྱིམ་ཚང་ཆེན་པོའི་ནང་ཚང་མས་སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་ནས་སྤུན་ཉེ་འཆམ་མཐུན་དང་ཕན་ཚུན་ལྟ་སྐྱོང་བྱས་ཚེ་གཞི་ནས་མི་རིགས་བསྐྱར་དར་གྱི་ཕུགས་འདུན་རླབས་པོ་ཆེ་མངོན་འགྱུར་ཐུབ་པ་དང་། མི་རིགས་མཐུན་སྒྲིལ་ཡར་ཐོན་གྱི་མེ་ཏོག་གཞི་ནས་ནམ་ཡང་མི་ཉམས་པར་བཞད་ཐུབ”

—— ཞི་ཅིན་ཕིང་།】

གྲོང་ཚོའི་རྒྱལ་སྒོ་ཆེན་པོ་བརྒྱུད་སྐབས་མཐུན་སྒྲིལ་ཐང་ཆེན་མིག་མདུན་དུ་གསལ་པོར་མངོན།

ཐང་ཆེན་དབུས་ཀྱི་བརྐོས་བརྙན་ཞིག་ཧ་ཅང་མངོན་ཆེ་ཞིང་། དེ་ནི་ཁ་ཕྱེ་བའི་དཔེ་དེབ་ཀྱི་ནང་གཞི་དཀར་ལ་ཡིག་འབྲུ་དམར་པོས་བོད་རྒྱ་སྐད་ཡིག་གཉིས་ཀྱི་ཐོག་ནས“མཐུན་སྒྲིལ”ཞེས་བྲིས་ཡོད་པ་དང་། དེའི་ཐོག་ལག་གཉིས་ཀྱིས་སེ་འབྲུའི་རྡོག་རེ་བཀྱག་ནས་མི་རིགས་མཐུན་སྒྲིལ་སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་ཞེས་འཁོད་འདུག

2021ལོར་སྤྱི་ཁྱབ་ཧྲུའུ་ཅི་དཀོན་ལོ་ཚང་གོང་མ་གྲོང་ཚོར་ཕེབས་སྐབས་འབྲོག་པ་བསོད་ནམས་ཚེ་རིང་གིས་ནང་མི་རྒན་གཞོན་གྱི་སྣེ་ཁྲིད་དེ་སེམས་རྩ་འཁོལ་པོས་སྤྱི་ཁྱབ་ཧྲུའུ་ཅི་ཁྱིམ་དུ་གདན་དྲངས་ནས་དཀར་གཙང་མཇལ་དར་བསྒྲོན། བསོད་ནམས་ཚེ་རིང་གིས་སེམས་འགུལ་ཆེན་པོ་ཐེབས་བཞིན་དུ་འབྲོག་པའི་འཚོ་བ་སྐྱིད་པོ་དེ་ཏང་གི་སྲིད་ཇུས་བཟང་པོ་དང་ཁ་འབྲལ་ཐབས་མེད་པས་གུང་ཁྲན་ཏང་དང་སྤྱི་ཁྱབ་ཧྲུའུ་ཅིར་སྙིང་དབུས་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་བཤད།

བསོད་ནམས་ཚེ་རིང་གི་ཁྱིམ་ནས་ཞལ་གྱེས་རྗེས། གྲོང་མི་ཚོས་སྤྱི་ཁྱབ་ཧྲུའུ་ཅི་ཕེབས་པ་མཐོང་འཕྲལ་དགའ་སྤྲོའི་ངང་ལམ་འགྲམ་དུ་ཡོང་ནས་དགའ་འབོད་བྱེད་བཞིན་དུ་འཚམས་འདྲི་ཞུས། སྤྱི་ཁྱབ་ཧྲུའུ་ཅིས“ཀྲུང་ཧྭ་མི་རིགས་ཁྱིམ་ཚང་ཆེན་པོའི་ནང་ཚང་མས་སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་ནས་སྤུན་ཉེ་འཆམ་མཐུན་དང་ཕན་ཚུན་ལྟ་སྐྱོང་བྱས་ཚེ། གཞི་ནས་མི་རིགས་བསྐྱར་དར་གྱི་ཕུགས་འདུན་རླབས་པོ་ཆེ་མངོན་འགྱུར་ཐུབ་པ་དང་། མི་རིགས་མཐུན་སྒྲིལ་ཡར་ཐོན་གྱི་མེ་ཏོག་གཞི་ནས་ནམ་ཡང་མི་ཉམས་པར་བཞད་ཐུབ”ཅེས་གསུངས་ཡོད།

ན་ནིང་ལོ་53ལ་སླེབས་པའི་ཚེ་དཔལ་རྡོ་རྗེར་འགྲིམ་འགྲུལ་ལས་འཛོལ་ཁྲོད་རྨས་སྐྱོན་ཚབས་ཆེན་ཕོག་པ་དང་སྨན་རིན་གྲབས་གསོག་བྱ་ཆེད་ནང་མི་ཚང་མར་སེམས་ཁྲལ་ཆེན་པོ་བཟོས། འོན་ཀྱང་གཟའ་འཁོར་གཅིག་ཀྱང་མ་སོང་བར་གྲོང་མི་ཚོས་རང་འགུལ་ངང་ནོར་ལུག་དང་དངུལ་སྨར་ཞལ་འདེབས་བརྒྱབ་ནས་ཚེ་དཔལ་རྡོ་རྗེའི་ནང་མི་ཚང་མ་དཀའ་ངལ་ལས་སྒྲོལ་རོགས་བྱས། ཁོང་གིས“ཚང་མས་རོགས་རམ་གནང་བར་ཐུགས་རྗེ་ཆེ་ཞུས་པ་དང་། སླད་ཕྱིན་ང་ཚོས་ལག་གཉིས་ལ་བརྟེན་ནས་མཛེས་སྡུག་ལྡན་པའི་འཚོ་བ་བཏོད་དེ་ཚང་མར་དྲིན་ལན་འཇལ་རྒྱུ་ཡིན”ཞེས་བཤད།

ལོ་3ལྷག་ཙམ་རིང་དཀོན་ལོ་ཚང་གོང་མ་གྲོང་ཚོས་མི་རིགས་མཐུན་སྒྲིལ་ལ་སྐུལ་འདེད་གཏོང་བའི་ལས་དོན་དེ་དུས་བདེའི་གྲོང་གསེབ་འཛུགས་སྐྲུན་དང་། “སྐར་མ་རིམ་ཅན”གྱི་ཀྲི་པུའུ་འཛུགས་གཏོད། “ཀུན་མཐོང་ལས་གཞི”སོགས་ཀྱི་ལས་དོན་དང་ཟུང་འབྲེལ་གཏིང་ཟབ་བྱས་ནས་མི་རིགས་མཐུན་སྒྲིལ་གྱི་མེ་ཏོག་འོམ་ཆུའི་ངོགས་སུ་རབ་ཏུ་བཞད་པར་བྱས་ཡོད།

ཟླ་9ཚེས་27ཉིན། བསོད་ནམས་ཚེ་བརྟན་གྱིས་སེམས་འགུལ་ཆེན་པོ་ཐེབས་བཞིན་གྲོགས་ཚོགས་ནང“ང་རང་དེ་རིང་སྤྱི་ཁྱབ་ཧྲུའུ་ཅི་ཞལ་མཇལ་བྱུང་བས་དངོས་འབྲེལ་སྤོབས་པ་ཆེན་པོ་སྐྱེ་ཡི་འདུག ད་ཆའི་ཡོད་ཚད་སེམས་ནང་དྲན་སྐབས་བཀའ་དྲིན་ཚོར་གྱི་འདུག རླབས་ཆེན་མེས་རྒྱལ་སྔར་བས་དར་རྒྱས་གོང་འཕེལ་ཡོང་བའི་སྨོན་འདུན་ཞུ་རྒྱུ་ཡིན”ཞེས་བསྐུར། དེ་ཉིན་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གཟེངས་བསྟོད་ཚོགས་ཆེན་པེ་ཅིང་དུ་འཚོགས་ཤིང་། དཀོན་ལོ་ཚང་གོང་མ་གྲོང་ཚོའི་གྲོང་མི་ཨུ་ལྷན“རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མཉམ་སྡེབ”ཀྱི་མཚན་སྙན་ཐོབ་པ་དང་བསོད་ནམས་ཚེ་བརྟན་གྱིས་ལྗིད་ཏིག་ཏིག་གི་གཟི་བརྗིད་མཚན་སྙན་དེ་འཁྱེར་ཡོད།

ཉི་ཟེར་ས་མཐོའི་གྲོང་ཚོར་འཕྲོས། ཐང་ཆེན་ཐོག་གི“མཐུན་སྒྲིལ”ཞེས་པའི་ཡིག་འབྲུ་དེ་གཉིས་འོད་མདངས་ལྷག་པར་འཚེར།

བསོད་ནམས་ཚེ་བརྟན་གྱིས“མི་སེམས་མཐུན་ན་ངར་ཤུགས་དེ་བས་འཕེལ་ཐུབ། ང་ཚོས་མུ་མཐུད་འབད་བརྩོན་བྱས་ནས་འཚོ་བ་སྔར་བས་བདེ་སྐྱིད་ལྡན་པ་ཞིག་སྐྱེལ་ཐུབ་པ་བྱ་རྒྱུ་ཡིན”ཞེས་བཤད།

（སྒྱུར་ཞུས་པ་རིག་རྡོར་དང་མཚམས་གཅོད）