འདི་ག་ཚགས་པར་ཁང་དུ་ཧྥུའུ་ཀྲོའུ་ནས་ཟླ་12ཚེས་5ཉིན་གློག་འཕྲིན་འབྱོར་གསལ། ཚེས་5ཉིན། 2024ལོའི“རྒྱུད་གཅིག་ལམ་གཅིག”གི་ཚོང་པའི་མཐུན་ཚོགས་ཚོགས་ཆེན་གྱི་འགོ་ཚུགས་མཛད་སྒོ་ཧྥུའུ་ཅན་ཞིང་ཆེན་ཧྥུའུ་ཀྲོའུ་གྲོང་ཁྱེར་དུ་གཉེར་བ་རེད། ཧྥུའུ་ཅན་ཞིང་ཨུད་ཀྱི་རྒྱུན་ཨུ་དང་ཧྥུའུ་ཀྲོའུ་གྲོང་ཨུད་ཀྱི་ཧྲུའུ་ཅི་ཀུའོ་ཉིང་ཉིང་དང་། མི་དམངས་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་པ་གཞོན་པ་ཚུའེ་ཧྲི་ཤིན་འགོ་ཚུགས་མཛད་སྒོར་ཞུགས་པ་དང་འབྲེལ་ཤིས་ཚིག་ཀྱང་བསྒྲོན་པ་རེད།

ད་ཐེངས་ཀྱི་ཚོགས་ཆེན་གྱིས“‘མཚོ་ཐོག་ཧྥུའུ་ཀྲོའུ’ཡིས་གྲུ་གཡོར་བསྒྲེངས་ནས་མཚོ་ཐོག་འགྲུལ་བཞུད་བྱས་ཏེ་མཚོ་ཐོག་དར་གོས་ལམ་བུའི་མཉམ་ལས་ཀྱི་ལེའུ་གསར་པ་མཉམ་དུ་རྩོམ”ཞེས་པ་བརྗོད་དོན་གཙོ་བོར་བྱས་པ་དང་། དེའི་དམིགས་ཡུལ་ནི་མཉམ་སྦྲེལ་མཉམ་མཐུད་ཀྱི་ནུས་ལྡན་ལས་སྟེགས་བསྐྲུན་ནས“རྒྱུད་གཅིག་ལམ་གཅིག”མཉམ་སྐྲུན་རྒྱལ་ཁབ་ཀྱི་དཔལ་འབྱོར་ཚོང་དོན་དང་། རིག་གནས། ཚན་རྩལ་སོགས་ཁྱབ་ཁོངས་མང་པོའི་སྤེལ་རེས་མཉམ་ལས་དང་དེ་བཞིན“མཚོ་ཐོག་དར་གོས་ལམ་བུ”དར་རྒྱས་གོང་འཕེལ་ཡོང་བར་སྐུལ་འདེད་གཏོང་རྒྱུ་དེ་རེད། ཚོགས་ཆེན་དེ་འགོ་ཚུགས་མཛད་སྒོ་དང་། རིམ་མཚུངས་ཡན་ལག་གླེང་སྟེགས་དྲུག ཐོན་ལས་རྟོག་ཞིབ་བྱེད་སྒོ་བཅས་ཁག་གསུམ་ལ་ཕྱེ་ནས་ཕྱི་རྒྱལ་གྱི་སྲིད་ཕྱོགས་མི་སྣ་གལ་ཆེན་དང་། ཀྲུང་གོར་བཅའ་སྡོད་གཞུང་ཚབ་པ། ས་གནས་དེ་གའི་ཞིང་ཆེན་དང་གྲོང་ཁྱེར་གྱི་དཔོན་རིགས། རྒྱལ་ཁབ་ཕྱི་ནང་གི་ཚོང་པའི་མཐུན་ཚོགས་ཀྱི་འགན་འཁུར་བ་བཅས་དང་དེ་བཞིན་འབྲེལ་ཡོད་ཁྱབ་ཁོངས་ཀྱི་གྲགས་ཅན་རིགས་གཅིག་མཁས་ཅན་དང་ཁེ་ལས་ཀྱི་འཐུས་མི་མང་པོ་ཚོགས་འདུར་གདན་དྲངས་ཏེ། སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་དང་། གོ་ལ་ཧྲིལ་པོའི་ཚོང་པའི་མཐུན་ཚོགས་ཀྱི་ཐོན་ཁུངས་སྦྲེལ་མཐུད། “མཚོ་ཐོག་དར་གོས་ལམ་བུའི”དཔལ་འབྱོར་ཉོ་ཚོང་མཉམ་ལས་སོགས་ཀྱི་བརྗོད་གཞིའི་སྐོར་ལ་སྤེལ་རེས་བྱས་པ་རེད།

(པ་ཕན་གྱིས་བསྒྱུར། པ་ཚེ་དང་པ་ཕན་གྱིས་ཞུས)