འདི་ག་ཚགས་པར་ཁང་དུ་པེ་ཅིང་ནས་གློག་འཕྲིན་འབྱོར་གསལ། ཉེ་ཆར། འགག་སྒོ་སྤྱི་ཁྱབ་ཧྲུའུ་ཡིས《འགག་སྒོའི་ཚོང་གཉེར་ཁོར་ཡུག་སྔར་བས་ལེགས་སུ་བཏང་ནས་ཁེ་ལས་འགག་སྒྲོལ་སྟབས་བདེ་ཡོང་བར་སྐུལ་འདེད་གཏོང་བའི་བྱ་ཐབས་དོན་ཚན་བཅུ་དྲུག》བཏོན་ནས། མིག་སྔར་ཕྱི་ཕྱོགས་ཚོང་དོན་ཁེ་ལས་ཀྱིས་ཡོངས་ཁྱབ་ངང་དོ་ཁུར་བྱེད་པའི་མདོ་གནད་དང་། འགག་གནད། དཀའ་གནད་བཅས་ཀྱི་གནད་དོན་ལ་དམིགས་ཏེ་ཕྱི་ཕྱོགས་ཚོང་དོན་གྱི་སྒུལ་ནུས་གསར་པ་སྐྱེད་སྲིང་དང་། ཕྱི་ཕྱོགས་ཚོང་དོན་གྱི་སྤུས་ལེགས་ནང་འདྲེན་དང་སྤུས་ལེགས་ཕྱིར་གཏོང་ལ་སྐུལ་འདེད། ཁེ་ལས་ཀྱི་མ་གནས་དམའ་རུ་དང་ཕན་འབྲས་ཆེ་རུ་གཏོང་བར་རོགས་རམ། རྒྱལ་སྒྲོལ་ཚོང་དོན་སྟབས་བདེ་ཅན་གྱི་ཆུ་ཚད་མཐོར་གཏོང་བཅས་ཕྱོགས་བཞིའི་ཐད་ནས་དེ་མཚུངས་ཀྱི་རོགས་སྐྱོར་བྱེད་ཐབས་བཏོན་ཡོད་པ་རེད།
རྒྱལ་སྒྲོལ་གློག་རྡུལ་ཚོང་དོན་སིལ་ཚོང་ཕྱིར་གཏོང་དང་དྲ་ཐོག་ཉོ་སྒྲུབ་ཀྱི་ཁྲལ་མེད་སིལ་ཚོང་ནང་འདྲེན་འགག་སྒོ་ལས་བརྒལ་ནས་ཚོང་ཟོག་ཕྱིར་སློག་ཚོད་ལྟའི་ཁྱབ་ཁོངས་ཆེ་རུ་བཏང་ནས་རྒྱལ་སྒྲོལ་གློག་རྡུལ་ཚོང་དོན་གྱི་ཁྲལ་དངུལ་ཁག་ཐེག་གློག་རྡུལ་ཅན་ཕྱོགས་ཡོངས་ནས་ཁྱབ་གདལ་བཏང་ཡོད། དེ་དང་ཆབས་ཅིག་ཁྲལ་མེད་ཉམས་གསོ་དང་། ཁྲལ་མེད་བསྐྱར་བཟོ། ཁྲལ་མེད་སྣུམ་མཁོ་འདོན་སོགས“ཁྲལ་མེད+”ཀྱི་ལས་རྣམ་གསར་པ་འཕེལ་རྒྱས་ལ་སྐུལ་འདེད་བཏང་ནས་ཕྱོགས་བསྡུས་སྒོ་ཁྲལ་མེད་ཁུལ་དང་རང་མོས་ཚོང་དོན་ཚོད་ལྟའི་ཁུལ་ཕུད་པའི“སྣེ་གཉིས་ཕྱིར་གནས་པའི”ཁྲལ་མེད་ཉམས་གསོའི་ཚོད་ལྟ་རྒྱ་ཆེར་གཏོང་རྒྱུར་རྒྱབ་སྐྱོར་བྱས་ཡོད།
སྤུས་ལེགས་ནང་འདྲེན་ཐད། གཙོ་བོ་ནུས་རྒྱུའི་གཏེར་ལས་ཐོན་རྫས་དང་འབྲུ་རིགས་དང་བཟའ་བཅའི་ཐོན་རྫས་ནང་འདྲེན་འགན་ལེན་བྱས་ཡོད། ནུས་རྒྱུའི་ཐོན་ཁུངས་ཀྱི་ཚོང་ཟོག་ཞིབ་བཤེར་བྱེད་ཐབས་སྒྱུར་བཅོས་མུ་མཐུད་ཟབ་ཏུ་བཏང་ནས་ནང་འདྲེན་གཏེར་ཁའི་ཐོན་རྫས་ནང་འདྲེན་གྱི་དམིགས་སའི་གནས་ཀྱི་ཞིབ་བཤེར་ཁྱབ་ཁོངས་བརྟན་པོའི་ངང་རྒྱ་ཆེར་བཏང་བ་དང་། ཤ་རིགས་དང་། ཆུའི་ཐོན་རྫས། དཀར་ཆུ་སོགས་དམངས་འཚོའི་ཐོན་རྫས་ཆོག་འཐུས་འཕེལ་རིམ་ལ་སྐུལ་འདེད་བཏང་ཡོད། སྤུས་ལེགས་ཕྱིར་གཏོང་ཐད། གཙོ་བོ་རླངས་འཁོར་ཕྱིར་གཏོང་སྔར་བས་སྟབས་བདེ་ཡོང་བ་དང་ས་གནས་ཀྱི་ཁྱད་ལྡན་འབྲུ་རིགས་དང་བཟའ་བཅའི་ཐོན་རྫས་ཕྱིར་གཏོང་བྱེད་ཚད་རྒྱ་ཆེར་གཏོང་རྒྱུར་སྐུལ་འདེད་བཏང་ཡོད། འབྲུ་རིགས་དང་བཟའ་བཅའི་ཐོན་རྫས་ཕྱིར་གཏོང་གི་ཁྱབ་ཁོངས་སུ“ཁག་ཐེངས་ཞིབ་བཤེར”གྱི་ཚོད་ལྟའི་ལས་དོན་འཚོལ་ཞིབ་བྱས་ནས་སྤེལ་ཏེ་ཕྱི་ཕྱོགས་གྲོས་མོལ་དང་ཕྱིར་གཏོང་ཁེ་ལས་ཕྱི་ཕྱོགས་སུ་ཐོ་འགོད་འོས་སྦྱོར་བྱེད་ཤུགས་ཆེ་རུ་བཏང་ཡོད།