འདི་ག་ཚགས་པར་ཁང་དུ་པེ་ཅིང་ནས་གློག་འཕྲིན་འབྱོར་གསལ། ཉེ་ཆར་འགྲིམ་འགྲུལ་སྐྱེལ་འདྲེན་པུའུ་སོགས་སྡེ་ཚན་གསུམ་གྱིས《རླངས་འཁོར་འཇོག་ས་དང་ངལ་གསོའི་ཁོར་ཡུག་སྔར་བས་ལེགས་སུ་བཏང་ནས་ཟོག་འདྲེན་རླངས་འཁོར་གྱི་ཁ་ལོ་བར་སེམས་ཁུར་དང་གཅེས་སྐྱོང་བྱ་རྒྱུའི་སྐོར་གྱི་བརྡ་ཐོ》མཉམ་དུ་བཀྲམ་ནས་ཟོག་འདྲེན་རླངས་འཁོར་གྱི་ཁ་ལོ་བའི་ཁྲིམས་མཐུན་ཁེ་དབང་སྔར་བས་འགན་ལེན་གྱིས་གཞུང་ལམ་ཟོག་འདྲེན་ལས་རིགས་སྤུས་ཚད་མཐོ་བའི་འཕེལ་རྒྱས་ལ་མགྱོགས་མྱུར་སྐུལ་འདེད་གཏོང་རྒྱུ་རེད།
བརྡ་ཐོའི་ནང་བཏོན་དོན། སྣུམ་སྣོན་ས་ཚིགས་རྣམ་པའི“ཁ་ལོ་བའི་ཁྱིམ་གཞིས”མུ་མཐུད་སྐྲུན་དགོས། ས་གནས་ཁག་གི་འགྲིམ་འགྲུལ་སྐྱེལ་འདྲེན་གཙོ་གཉེར་སྡེ་ཚན་དང་བཟོ་ཚོགས་རྩ་འཛུགས་ཀྱིས་སྣུམ་སྣོན་ས་ཚིགས་ཀྱི་ད་ཡོད་ཞབས་ཞུའི་སྒྲིག་ཆས་གང་ལེགས་སྤྱད་དེ་སྣུམ་སྣོན་ས་ཚིགས་རྣམ་པའི“ཁ་ལོ་བའི་ཁྱིམ་གཞིས”བསྐྲུན་རྒྱུར་མུ་མཐུད་སྐུལ་འདེད་བཏང་ནས་ཟོག་འདྲེན་རླངས་འཁོར་གྱི་ཁ་ལོ་བར་གོང་ཁེ་གོ་ཆོད་དང་སྟབས་བདེའི་ཞབས་འདེགས་ཡག་པོ་ཞུ་དགོས། དེ་དང་ཆབས་ཅིག་འགག་སྒོའི“ཁ་ལོ་བའི་ཁྱིམ་གཞིས”སྐྲུན་པར་སྐུལ་འདེད་གཏོང་རྒྱུར་འཚོལ་ཞིབ་བྱེད་དགོས། རྒྱལ་མཚམས་འཛུལ་སྒྲོལ་གྱི་ཟོག་འདྲེན་རླངས་འཁོར་གྱི་ཁ་ལོ་བ་བསྡུ་འགྲེམ་གྱི་ཁྱད་ཆོས་དང་དོན་དངོས་ཀྱི་དགོས་མཁོ་དང་ཟུང་འབྲེལ་བྱས་ནས། ཡུལ་བབ་དང་བསྟུན་ཏེ་རྒྱལ་སྤྱིའི་འགག་སྒྲོལ་འགག་སྒོ་དང་། འགག་སྒོའི་ཟོག་འགྲེམས་བགྲོད་ལམ་གྱི་དངོས་ཟོག་བསྡུ་འགྲེམ་ལྟེ་གནས། འགག་སྒོའི་ཟོག་འགྲེམས་གླིང་ཁུལ། རྒྱལ་མཚམས་འཛུལ་སྒྲོལ་གྱི་ཟོག་འདྲེན་རླངས་འཁོར་གྱི་ཁ་ལོ་བ་བསྡུ་འགྲེམ་ཁུལ་སོགས་ལ་བརྟེན་ནས། རིག་གནས་དྲིལ་བསྒྲགས་དང་། རླངས་འཁོར་འཇོག་པ་དང་ངལ་གསོ་བ། འཚོ་བའི་ཞབས་ཞུ། ལས་སྒོ་གཉེར་བ། འཕྲལ་སྡོམ་འགན་ལེན་བཅས་གཞི་གཅིག་ཏུ་འདུས་པའི་འགག་སྒོའི“ཁ་ལོ་བའི་ཁྱིམ་གཞིས”འཚོལ་ཞིབ་བྱས་ནས་བསྐྲུན་ཏེ་རྒྱལ་མཚམས་འཛུལ་སྒྲོལ་གྱི་ཟོག་འདྲེན་རླངས་འཁོར་གྱི་ཁ་ལོ་བའི“འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག”བཅས་ཀྱི་གནད་དོན་ཐག་གཅོད་བྱེད་དགོས།
བརྡ་ཐོ་གཞིར་བཟུང་། གོམ་སྟབས་རྗེས་མར་མྱུར་བགྲོད་གཞུང་ལམ་གྱི་ཞབས་ཞུ་ཁུལ་དུ་ཟོག་འདྲེན་རླངས་འཁོར་འཇོག་ས་མང་དུ་གཏོང་རྒྱུ་རེད། མྱུར་བགྲོད་གཞུང་ལམ་གྱི་ཞབས་ཞུ་ཁུལ་དུ་བཞག་པའི་ཟོག་འདྲེན་རླངས་འཁོར་གྱི་སྣུམ་གྱི་བདེ་འཇགས་འགན་ལེན་ལ་ཤུགས་སྣོན་རྒྱག་པའི་རྨང་གཞིའི་ཐོག་བདེ་འཇགས་ཞབས་ཞུའི་འགན་ལེན་ཁྱབ་ཁོངས་རྒྱ་སྐྱེད་འཚོལ་ཞིབ་བྱས་ནས་ཟོག་འདྲེན་རླངས་འཁོར་གྱི་ཁ་ལོ་བ་བློ་བདེ་པོའི་ངང་རླངས་འཁོར་འཇོག་པ་དང་བློ་བདེ་པོའི་ངང་ངལ་གསོ་རྒྱག་ཐུབ་པ་བྱེད་རྒྱུ་རེད།
(པ་ཕན་གྱིས་བསྒྱུར། པ་ཚེ་དང་པ་ཕན་གྱིས་ཞུས)