འདི་ག་ཚགས་པར་ཁང་དུ་ཐེན་ཅིན་ནས་གློག་འཕྲིན་འབྱོར་གསལ། ཐེན་ཅིན་གྲོང་ཁྱེར་གྱི་ཕྱི་ཕྱོགས་དང་འབྲེལ་བའི་ཚོང་བསུའི་ལས་དོན་ས་ཚིགས་ཐོག་མ་ཟླ་12ཚེས་3ཉིན་པིན་ཧའེ་ཁུལ་གསར་གྱི་རྒྱལ་མཚམས་འཛུལ་སྒྲོལ་ཞབས་ཞུའི་ཚོམས་ཆེན་དུ་དངོས་སུ་སྤྱོད་འགོ་ཚུགས་ཤིང་། ཐེན་ཅིན་གྲོང་ཁྱེར་གྱི་2024ལོའི་ཚོང་གཉེར་ཁོར་ཡུག་གི་སྤུས་ཚད་མཐོར་གཏོང་བྱ་སྤྱོད་ཇུས་གཞིའི་ནང་གི་ལས་འགན་གཙོ་བོ་ཞིག་ཡིན་པའི་ངོས་ནས། ཐེངས་འདིར་ཕྱི་ཕྱོགས་དང་འབྲེལ་བའི་ཚོང་བསུའི་ལས་དོན་ས་ཚིགས་འཛུགས་སྐྲུན་ནི་ཐེན་ཅིན་དཔལ་འབྱོར་གསར་སྤེལ་ཁུལ་དོ་དམ་ཨུ་ལྷན་གྱིས་སྣེ་ཁྲིད་དང་སྡེ་ཚན་མང་པོ་མཉམ་དུ་ཞུགས་ནས་སྐུལ་འདེད་བཏང་བའི་ཕྱོགས་བསྡུས་རང་བཞིན་གྱི་སྒྱུར་བཅོས་ཤིག་ཡིན་ལ། ཐེན་ཅིན་དཔལ་འབྱོར་གསར་སྤེལ་ཁུལ་གྱི་ཚོང་བསུའི་ལྟེ་གནས་ཀྱི་ཁེ་ལས་དང་འབྲེལ་བའི་ཞབས་ཞུའི་ཁོར་ཡུག་འཛུགས་སྐྲུན་ཁྲོད་ཀྲུང་གོའི་བྱང་ཕྱོགས་ཀྱི་གཅིག་འཐུས་རྣམ་པའི་ཕྱིར་སྐྱོད་ཞབས་ཞུའི་རྟེན་གཞི་བསྐྲུན་རྗེས་ཚོང་གཉེར་ཁོར་ཡུག་ལེགས་སུ་གཏོང་བའི་འཚོལ་ཞིབ་གཞན་ཞིག་ཀྱང་ཡིན་པ་རེད།

དེའི་ནང་ཕྱི་རྒྱལ་བ་ཀྲུང་གོར་ཡོང་ནས་ལས་ཀ་བྱེད་སྐབས་དོན་དག་གཅིག་གི་ཞབས་ཞུའི་ཆེད་དོན་ཁུལ་གྱིས་གཙོ་བོར་ཕྱི་རྒྱལ་བ་ཀྲུང་གོར་ཡོང་ནས་ལས་ཀ་བྱེད་པའི་ཆོག་འཐུས་དང་། གནས་སྡོད་ལག་ཁྱེར། རྗེས་མཐུད་ཀྱི་མི་སྤྱོད་ཐོ་འགོད། སྤྱི་ཚོགས་འགན་བཅོལ་ཐོ་འགོད་བཅས་གཉེར་སྐབས་ཕྲེང་སྦྲེལ་མ་ཐུབ་པར་ས་ཆ་མང་པོར་ཡར་རྒྱུག་མར་རྒྱུག་ཐེངས་མང་བྱེད་དགོས་པའི་གནད་དོན་ཐག་གཅོད་བྱ་རྒྱུ་དང་། ཐེན་ཅིན་དཔལ་འབྱོར་གསར་སྤེལ་ཁུལ་གྱིས་ཆ་རྐྱེན་གལ་ཆེན་དང་ལྷུ་ཚིགས་ཉུང་དུ་བཏང་བ་བརྒྱུད་གྲོང་ཁྱེར་དེ་ཡོངས་ཀྱི་སྔོན་ལ་ཕྱི་ཁོངས་མི་སྣ་ཀྲུང་གོར་བསླེབས་རྗེས་རྒྱལ་མཚམས་འཛུལ་སྒྲོལ་སྐར་ཁུང་དུ་ཐེངས་གཅིག་ལས་འགྲོ་མི་དགོས་པར་ལས་ཀའི་ཆོག་འཐུས་དང་། གནས་སྡོད་ཆོག་འཐུས། ལས་མི་སྤྱོད་པའི་ཐོ་འགོད། འགན་བཅོལ་ནང་ཞུགས་པའི་ཐོ་འགོད་བཅས་ཀྱི་འགྲོ་ལུགས་གཉེར་ཐུབ་པ་བྱས་ཡོད་པ་དང་། ཞབས་ཞུའི་ཁྱབ་ཁོངས་གྲོང་ཁྱེར་དེ་ཡོངས་ལ་ཁྱབ་ཡོད་པ་རེད། (དམ་ཆོས་མི་ཕམ་གྱིས་བསྒྱུར། པ་སངས་ཀྱིས་ཞུས)