འདི་ག་ཚགས་པར་ཁང་དུ་པེ་ཅིང་ནས་གློག་འཕྲིན་འབྱོར་གསལ། ཉེ་ཆར། ཁྲོམ་ར་ལྟ་འདོམས་སྤྱི་ཁྱབ་ཅུས་ཀྱིས་ཁྲོམ་ར་ལྟ་འདོམས་ཀྱི་ཡིད་རྟོན་སླར་གསོའི་རྒྱལ་ཡོངས་ཀྱི་གཅིག་གྱུར་ལས་སྟེགས(གཤམ་དུ“གཅིག་གྱུར་ལས་སྟེགས”ཞེས་བསྡུ་རྒྱུ)གསར་སྤེལ་འཛུགས་སྐྲུན་ལ་སྐུལ་འདེད་གཏོང་རྒྱུའི་ཁྱབ་བསྒྲགས་བྱས་ཤིང་། སྔོན་དཔག་བྱས་ན་འདི་ལོའི་ལོ་མཇུག་གམ་ཡང་ན་སང་ལོའི་ལོ་སྟོད་དུ་དྲ་ཐོག་ནས་སྤེལ་ཏེ་ལས་ཕྱོད་ཆེན་པོས་ཡིད་རྟོན་སླར་གསོའི་ལས་དོན་སྤེལ་བར་ཕྱོགས་ཡོངས་ནས་འདེགས་སྐྱོར་བྱ་རྒྱུ་རེད།

གཅིག་གྱུར་ལས་སྟེགས་བསྐྲུན་རྗེས་གཉེར་སྐྱོང་བྱེད་པོར་ཁྲིམས་འགལ་དང་ཁ་དན་ཚིག་ལ་མ་གནས་པའི་ཆ་འཕྲིན་འདྲི་རྩད་དང་ཡིད་རྟོན་སླར་གསོའི་རེ་ཞུའི་ཞབས་ཞུ་མཁོ་འདོན་བྱ་རྒྱུ་རེད། གཉེར་སྐྱོང་བྱེད་པོས་རྒྱལ་ཁབ་ཁེ་ལས་ཀྱི་ཡིད་རྟོན་ཆ་འཕྲིན་ཡོངས་བསྒྲགས་མ་ལག་གི་གློག་རྡུལ་ལག་ཁྱེར་ཐོ་འགོད་ཀྱི་གཅིག་གྱུར་ལས་སྟེགས་བརྒྱུད་སྲིད་འཛིན་ཆད་གཅོད་དང་། གཉེར་སྐྱོང་རྒྱུན་གཏན་མིན་པའི་མིང་ཐོ། ཁྲིམས་འགལ་དང་ཁ་དན་ཚིག་ལ་མ་གནས་པ་ཚབས་ཆེན་གྱི་མིང་ཐོ་སོགས་ཀྱི་ཁྲིམས་འགལ་དང་ཁ་དན་ཚིག་ལ་མ་གནས་པའི་ཆ་འཕྲིན་མཐེབ་སྣོན་གཅིག་གིས་རང་ངོས་ཀྱི་ཡིད་རྟོན་གནས་ཚུལ་ཕྱོགས་ཡོངས་ནས་ལྟ་ཐུབ་ཀྱི་ཡོད་པ་རེད། རྒྱལ་ཡོངས་ཀྱི་རིམ་ཁག་ཁྲོམ་ར་ལྟ་འདོམས་སྡེ་ཚན་གྱིས་ཡོངས་བསྒྲགས་བྱས་པའི་ཁྲིམས་འགལ་དང་ཁ་དན་ཚིག་ལ་མ་གནས་པའི་ཆ་འཕྲིན་ཁག་མཐེབ་སྣོན་གཅིག་གིས་གཉེར་སྐྱོང་བྱེད་པོས་ཡིད་རྟོན་སླར་གསོའི་རེ་ཞུ་བྱེད་ཆོག་ལ་ཞིང་ཆེན་སྒྲོལ་བའི་གྲངས་གཞི་བརྒྱུད་ལམ་བརྒྱུད་ཡུལ་གཞན་ནས་ཡིད་རྟོན་སླར་གསོ་བྱེད་ཐུབ། སྡེ་ཚན་གཞན་དག་གིས་རྒྱལ་ཁབ་ཁེ་ལས་ཀྱི་ཡིད་རྟོན་ཆ་འཕྲིན་ཡོངས་བསྒྲགས་མ་ལག་ནང་ཁྲིམས་ལྟར་ཡོངས་བསྒྲགས་བྱས་པའི་སྲིད་འཛིན་ཆད་གཅོད་སོགས་ཀྱི་ཁྲིམས་འགལ་དང་ཁ་དན་ཚིག་ལ་མ་གནས་པའི་ཆ་འཕྲིན་ཡང་གཅིག་གྱུར་ལས་སྟེགས་ཐོག་ནས་དྲན་སྐུལ་ཐུབ་པ་དང་མཐེབ་སྣོན་གཅིག་གིས་གཉེར་སྐྱོང་བྱེད་པོར་ཡིད་རྟོན་སླར་གསོའི་ཐབས་ལམ་དུས་ཐོག་ཏུ་ཤེས་སུ་བཅུག་ནས་གཉེར་སྐྱོང་བྱེད་པོའི་ཡིད་རྟོན་སླར་གསོ་ཡོང་བར་རམ་འདེགས་བྱས་ཡོད།