འདི་ག་ཚགས་པར་ཁང་དུ་པེ་ཅིང་ནས་གློག་འཕྲིན་འབྱོར་གསལ། གསར་འགོད་པར་ཀྲུང་གོ་འཕྲུལ་ཆས་བཟོ་ལས་མཉམ་འབྲེལ་ལྷན་ཚོགས་ནས་ཤེས་རྟོགས་བྱུང་བར། ཟླ་བ་དང་པོ་ནས་བཅུ་པའི་བར། རང་རྒྱལ་གྱི་འཕྲུལ་ཆས་བཟོ་ལས་ཀྱི་རིན་ཐང་འཕར་མ་དུས་མཚུངས་ལས་5.5%འཕར་ནས། ཐོན་རྫས་ཐོན་སྐྱེད་དང་ཕྱིར་ཚོང་སྤྱིར་ན་བརྟན་པོ་ཡོད་པ་དང་། ཕྱི་ཕྱོགས་ཚོང་དོན་འཕེལ་རྒྱས་མྱུར་པོ་ཕྱིན་པ། སྤྱིའི་འཁོར་སྐྱོད་རྣམ་པ་བརྟན་ལ་ལེགས་སུ་ཕྱིན་པ་བཅས་རེད།

ཐོན་སྐྱེད་དང་ཕྱིར་ཚོང་ཐད་གཙོ་གནད་ལྟ་ཞིབ་ཚད་ལེན་བྱས་པའི་འཕྲུལ་ཆས་ཐོན་རྫས་སྣ་ཁ་122ནང་ཐོན་རྫས་སྣ་ཁ་72ཐོན་འཕར་བྱུང་ནས་བསྡུར་གྲངས་བཟུང་ཚད་59%ཟིན་ཏེ་སྤྱི་ཡོངས་ན་ནིང་གི་ཆུ་ཚད་ལས་ལེགས་པ་ཡོད་པ་དང་། མ་འཇོག་ཐད་རྒྱལ་དམངས་དཔལ་འབྱོར་ཁྲོད་ཀྱི་ཀུན་སྤྱོད་སྒྲིག་ཆས་དང་། ཆེད་སྤྱོད་སྒྲིག་ཆས། རླངས་འཁོར་ལས་རིགས་བཅས་དང་འབྲེལ་བ་ཡོད་པའི་གཏན་འཇགས་རྒྱུ་ནོར་ལ་མ་འཇོག་བྱེད་ཚད་ཚང་མ་དུས་མཚུངས་ལས་འཕར་བ་དང་། ཕྱི་ཕྱོགས་ཚོང་དོན་ཐད་ཟླ་བ་དང་པོ་ནས་བཅུ་པའི་བར་འཕྲུལ་ཆས་བཟོ་ལས་ཀྱི་དངོས་ཟོག་ཉོ་ཚོང་གི་ཕྱིར་གཏོང་དངུལ་འབོར་ཨ་སྒོར་དུང་ཕྱུར་7107.7ཟིན་པ་དེ་དུས་མཚུངས་ལས་9.4%འཕར་ནས་རྒྱལ་ཡོངས་ཀྱི་དངོས་ཟོག་ཉོ་ཚོང་གི་ཕྱིར་གཏོང་དངུལ་འབོར་གྱི་24.3%བཟུང་ཡོད།

དོ་སྣང་བྱེད་དགོས་པ་ཞིག་ལ་སྒྲིག་ཆས་བཟོ་སྐྲུན་ལས་རིགས་ཀྱི་མཚོན་ཚུལ་ཧ་ཅང་ཡག་པོ་ཡོད་ཅིང་། ཟླ་བ་དང་པོ་ནས་བཅུ་པའི་བར་སྒྲིག་ཆས་བཟོ་སྐྲུན་ལས་རིགས་ཀྱི་རིན་ཐང་འཕར་མས་གཞི་ཁྱོན་ཡན་གྱི་བཟོ་ལས་ཡོངས་ཀྱི་བསྡུར་ཚད་ཀྱི་34.0%བཟུང་བ་དང་། ཟླ་བ་20བསྟུད་མར་30%ཡན་རྒྱུན་འཁྱོངས་ཐུབ་ནས་བཟོ་ལས་འཕར་རྒྱུར་ལེགས་སྐྱེས་འབུལ་ཚད་42.7%ཟིན་ཏེ“གྲུ་རྡོའི”ནུས་པ་རྒྱུན་ཆད་མེད་པར་མངོན་གསལ་དོད་དུ་ཕྱིན་ཡོད་པ་རེད། དེའི་ནང་ཟླ་བ་10པར་གཞི་ཁྱོན་ཡན་གྱི་སྒྲིག་ཆས་བཟོ་སྐྲུན་ལས་རིགས་ཀྱི་རིན་ཐང་འཕར་མ་དུས་མཚུངས་ལས་6.6%འཕར་ནས་འཕར་ཚད་གཞི་ཁྱོན་ཡན་གྱི་བཟོ་ལས་ཚང་མ་ལས་བརྒྱ་ཆའི་གྲངས་1.3གྱིས་མཐོ་བ་ཡོད་པ་དང་ཟླ་བ་15བསྟུད་མར་གཞི་ཁྱོན་ཡན་གྱི་བཟོ་ལས་ཚང་མ་ལས་མཐོ་བ་ཡོད་པ་རེད།