ཤིན་ཧྭ་གསར་འགྱུར་ཁང་གྲོང་ཁྱེར་ཕ་རི་སི་ནས་ཟླ་12ཚེས་3ཉིན་གློག་འཕྲིན་འབྱོར་གསལ། ཚེས་3ཉིན་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱིས་གསར་འགྱུར་སྤྱི་བསྒྲགས་སྤེལ་ནས། ཀྲུང་གོའི་ཝུའུ་ཧན་གྲོང་ཁྱེར་ཚུད་པའི་གོ་ལ་ཧྲིལ་པོའི་གྲོང་ཁྱེར་10ལ་2024ལོའི་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱི་སློབ་སྦྱོང་རྣམ་པའི་གྲོང་ཁྱེར་གྱི་བྱ་དགའ་ཐོབ་ཡོད་ཅེས་བརྗོད་པ་རེད།

སྤྱི་བསྒྲགས་ནང་བྱ་དགའ་ཐོབ་པའི་མིང་ཐོ་དེ་ཚེས་2ཉིན་སོ་ཏི་ཨ་རབ་ཀྲུའུ་པེ་ལེ་རུ་འཚོགས་པའི་རྒྱལ་སྤྱིའི་སློབ་སྦྱོང་རྣམ་པའི་གྲོང་ཁྱེར་གྱི་ཚོགས་ཆེན་སྐབས་དྲུག་པའི་འགོ་ཚུགས་མཛད་སྒོར་ཁྱབ་བསྒྲགས་བྱས་ཤིང་། སྐབས་འདིའི་ཚོགས་ཆེན་ཚེས་5ཉིན་བར་འཚོགས་པ་རེད།

སྤྱི་བསྒྲགས་ནང་ཝུའུ་ཧན་གྲོང་ཁྱེར་2016ལོར་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱི་གོ་ལ་ཧྲིལ་པོའི་སློབ་སྦྱོང་རྣམ་པའི་གྲོང་ཁྱེར་གྱི་དྲ་རྒྱར་ཞུགས་པ་དང་། དེས་རྒྱུན་མཐུད་སློབ་གསོ་དང་ཚེ་གང་སློབ་སྦྱོང་གྲོང་ཁྱེར་འཕེལ་རྒྱས་ཀྱི་འཐབ་ཇུས་སུ་བཅུག་ནས་སྡེ་ཚན་སྒྲོལ་བའི་མཉམ་ལས་ལ་སྐུལ་འདེད་གཏོང་བ་དང་སློབ་སྦྱོང་རྣམ་པའི་སྡེ་ཁུལ་དང་སྤྱི་པའི་སློབ་གསོའི་ཞབས་ཞུར་ཤུགས་སྣོན་རྒྱག་རྒྱུ་རེད། གྲོང་ཁྱེར་དེས་དངོས་ཚན་དང་གྲངས་འཛིན་གྱི་རྨང་གཞིའི་སྒྲིག་བཀོད་ཟུང་འབྲེལ་བྱས་ནས་སྣ་མང་ཅན་གྱི་སློབ་སྦྱོང་གོ་སྐབས་མཁོ་འདོན་བྱ་རྒྱུ་རེད་ཅེས་བརྗོད་ཡོད།

ངོ་སྤྲོད་བྱས་པར་གཞིགས་ན། མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱི་སློབ་སྦྱོང་རྣམ་པའི་གྲོང་ཁྱེར་གྱི་བྱ་དགའ་2015ལོར་བཙུགས་པ་དང་ལོ་གསུམ་རེར་ཐེངས་རེ་འདེམས་ཀྱི་ཡོད་ཅིང་། མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱི་གོ་ལ་ཧྲིལ་པོའི་སློབ་སྦྱོང་རྣམ་པའི་གྲོང་ཁྱེར་དང་དྲ་རྒྱའི་ཁོངས་མིའི་གྲོང་ཁྱེར་ལ་ཕྱོགས་ནས་སྒོ་དབྱེའི་ངང་དཔྱད་འདེམས་བྱེད་ཀྱི་ཡོད། དེའི་དམིགས་ཡུལ་ནི་སློབ་སྦྱོང་རྣམ་པའི་གྲོང་ཁྱེར་འཕེལ་རྒྱས་གཏོང་བའི་བརྒྱུད་རིམ་ནང་ཡར་རྒྱས་མངོན་གསལ་དོད་པོ་བྱུང་བའི་གྲོང་ཁྱེར་ལ་གཟེངས་བསྟོད་བྱ་ཆེད་ཡིན་པ་རེད།

（ལྷག་ཚེ་དང་བུ་ཁྲིད་ཀྱིས་སྒྱུར་ཞུས་བྱས）