འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་1ཉིན་གློག་འཕྲིན་འབྱོར་གསལ། ཉེ་ཆར། རྒྱལ་སྲིད་སྤྱི་ཁྱབ་ཁང་གི་མོས་མཐུན་ཐོབ་པ་བརྒྱུད། རྒྱལ་ཁབ་འཕེལ་སྒྱུར་ཨུ་ལྷན་གྱིས་བཟོ་བཅོས་བརྒྱབ་ནས་བཏོན་པའི《ནུབ་རྒྱུད་ས་ཁུལ་གྱི་སྐུལ་སྤེལ་རིགས་ཀྱི་ཐོན་ལས་དཀར་ཆག（2025ལོའི་དེབ）》（གཤམ་དུ《དཀར་ཆག（2025ལོའི་དེབ）》ཅེས་བསྡུ་རྒྱུ）རྒྱལ་སྲིད་སྤྱི་ཁྱབ་ཁང་ལ་ཞིབ་བཤེར་གཏན་འབེབས་བྱ་རྒྱུར་ཕུལ་ནས་མོས་མཐུན་ཐོབ་རྗེས་ལག་བསྟར་བྱ་རྒྱུའི་ཁྱབ་བསྒྲགས་བྱས་ཏེ་2025ལོའི་ཟླ་1ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན་པ་རེད།

ནུབ་རྒྱུད་ས་ཁུལ་གྱི་སྐུལ་སྤེལ་རིགས་ཀྱི་ཐོན་ལས་གཉེར་སྐྱོང་ཁེ་ལས་ལ་ཁྲལ་ཚད་15%ཉུང་འཕྲི་བྱེད་པ་ལྟར་ཁེ་ལས་ཀྱི་ཐོབ་ཁྲལ་བསྡུ་བ་ནི་ནུབ་རྒྱུད་ཐོན་འབྱེད་ཆེན་མོའི་སྲིད་ཇུས་གལ་ཆེན་གྱི་གྲས་ཤིག་རེད། རྒྱལ་ཁབ་འཕེལ་སྒྱུར་ཨུ་ལྷན་གྱི་འབྲེལ་ཡོད་འགན་འཁུར་བས་ཉེ་བའི་ལོ་ཤས་རིང་། ནུབ་རྒྱུད་ས་ཁུལ་གྱིས་སྐུལ་སྤེལ་རིགས་ཀྱི་ཐོན་ལས་སྲིད་ཇུས་ལག་བསྟར་གཏིང་ཟབ་བྱས་པར་ཕན་འབྲས་མངོན་གསལ་དོད་པོ་ཐོབ་ཡོད། གཅིག་ནི་ཁེ་ལས་འཕེལ་རྒྱས་ཀྱི་ཡིད་ཆེས་ཇེ་ཆེར་ཕྱིན་ཞིང་། 2021ནས་2023ལོའི་བར་དཀར་ཆག་དང་ནུབ་རྒྱུད་ཐོན་འབྱེད་ཆེན་མོའི་ཁེ་ལས་ཀྱི་ཐོབ་ཁྲལ་གྱི་གཟིགས་སྐྱོང་སྲིད་ཇུས་ལག་ལེན་བསྟར་བ་བརྒྱུད། ནུབ་རྒྱུད་ས་ཁུལ་དུ་ཁྱོན་ཁེ་ལས་ཀྱི་ཁྲལ་འབབ་སྒོར་དུང་ཕྱུར་4000ལྷག་ཙམ་ཆག་ཡང་ངམ་རྩ་ཆག་བཏང་ནས་ནུབ་རྒྱུད་ས་ཁུལ་གྱི་ཁེ་ལས་འཕེལ་རྒྱས་ལ་རྒྱབ་སྐྱོར་ནུས་ལྡན་བྱས་པ་དང་། གཉིས་ནི་ཐོན་ལས་ཕྱོགས་སྒྱུར་རིམ་སྤོར་ལ་སྐུལ་སྤེལ་བཏང་ཞིང་། སྐུལ་སྤེལ་རིགས་ཀྱི་ཐོན་ལས་སྲིད་ཇུས་བརྒྱུད་དམིགས་ས་ཡོད་པའི་སྒོ་ནས་ནུབ་རྒྱུད་ས་ཁུལ་དུ་ཁྱད་ཆོས་དང་དགེ་མཚན་ལྡན་པའི་ཐོན་ལས་དང་། གསར་དར་ཐོན་ལས། མ་འོངས་པའི་ཐོན་ལས་བཅས་འཕེལ་རྒྱས་གཏོང་བར་སྐུལ་ལྕག་བྱེད་པ་དང་ཡུལ་བབ་དང་བསྟུན་ནས་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་བར་སྐུལ་ལྕག་བྱས་པས་མིག་སྔར་ནུབ་རྒྱུད་ས་ཁུལ་དུ་གློག་རྡུལ་ཆ་འཕྲིན་དང་། སྒྲིག་ཆས་བཟོ་སྐྲུན། སྐྱེ་དངོས་གསོ་རིག་དང་སྨན་རྫས་སོགས་ཁྱབ་ཁོངས་སུ་འཐབ་ཇུས་རང་བཞིན་གྱི་གསར་དར་ཐོན་ལས་ཁྱུ་ཚོགས་9དང་སྔོན་ཐོན་བཟོ་སྐྲུན་ལས་རིགས་ཁྱུ་ཚོགས་5ཆགས་ཡོད་པ། གསུམ་ནི་ནུབ་རྒྱུད་ས་ཁུལ་གྱི་དཔལ་འབྱོར་འཕེལ་རྒྱས་ལ་སྐུལ་འདེད་བཏང་ཞིང་། ཉེ་བའི་ལོ་ཤས་རིང་། ནུབ་རྒྱུད་ས་ཁུལ་གྱི་དཔལ་འབྱོར་བརྟན་པོ་འཕར་ནས་2023ལོར་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་5.5%འཕར་བ་དང་གཞི་ཁྱོན་ཡན་གྱི་བཟོ་ལས་ཀྱི་འཕར་ཐང་6.1%འཕར་ནས་ཚང་མ་ཁུལ་ཆེན་བཞིའི་ནང་གི་ཨང་དང་པོར་སླེབས་ཏེ་དཔལ་འབྱོར་བསྡོམས་འབོར་དང་མི་རེའི་ཆ་སྙོམས་ཡོང་འབབ་ཀྱིས་རྒྱལ་ཡོངས་ཀྱི་ཆུ་ཚད་ནང་བཟུང་བའི་བསྡུར་ཚད་བརྟན་པོ་འཕར་ཡོད་ཅེས་བཤད་པ་རེད།

དཀར་ཆག་ནང་ནུབ་རྒྱུད་ཐོན་འབྱེད་ཆེན་མོའི་ཁེ་ལས་ཀྱི་ཐོབ་ཁྲལ་གྱི་གཟིགས་སྐྱོང་སྲིད་ཇུས་སྤྱོད་རྒྱུར་འཚམ་པའི་ཐོན་ལས་ཀྱི་ཁྱབ་ཁོངས་གཏན་འཁེལ་བྱས་པ་དེ་ནི་ཁེ་ལས་ཀྱིས་སྲིད་ཇུས་དེ་ལོངས་སུ་སྤྱོད་ཐུབ་མིན་གྱི་གཞི་འཛིན་ས་གཙོ་བོ་ཞིག་ཡིན་ལ་ནུབ་རྒྱུད་ས་ཁུལ་གྱི་ཐོན་ལས་འཕེལ་རྒྱས་ཀྱི་ཁ་ཕྱོགས་ལ་ཁྲིད་སྟོན་བྱེད་པའི་ཡིག་ཆ་གལ་ཆེན་ཞིག་ཀྱང་ཡིན་པ་དང་པར་གཞི་གོང་མ་དེ་2020ལོའི་དེབ་ཡིན་པ་རེད། ད་ཐེངས་བཟོ་བཅོས་བརྒྱབ་ནས་བཏོན་པའི《དཀར་ཆག（2025ལོའི་དེབ）》ནང་དེ་སྔའི་གྲུབ་ཆའི་སྒྲོམ་གཞི་དང་ནང་དོན་གཙོ་བོ་སྤྱིར་ན་རང་སོར་བཞག་ཡོད་པ་རེད། བཟོ་བཅོས་བརྒྱབ་རྗེས་ཞིང་ཆེན་གཞིར་བཟུང་ཁག་དབྱེ་བའི་ནུབ་རྒྱུད་ས་ཁུལ་གྱི་སྐུལ་སྤེལ་རིགས་ཀྱི་ཐོན་ལས་ཁྱོན་564ཡོད་པ་དེ་2020ལོའི་དེབ་ལས་29འཕར་སྣོན་བྱུང་བ་དང་འཕར་ཚད་5.4%ཟིན་ཡོད། ཁ་སྣོན་བརྒྱབ་པའི་ས་བཅད་གཙོ་བོ་ཁྱད་ལྡན་ཞིང་འབྲོག་དང་། གློག་རྡུལ་ཆ་འཕྲིན། ཐོན་ཁུངས་ལས་སྣོན་ཞིབ་ཚགས། སྒྲིག་ཆས་བཟོ་སྐྲུན་སོགས་ཁྱབ་ཁོངས་སུ་གཅིག་སྡུད་བྱས་ཡོད་པ་རེད།