➝ ཅང་སུའུ་ཞིང་ཆེན་ཧོའེ་ཨན་གྲོང་ཁྱེར་ཤུས་དབྱི་རྫོང་སན་ཧོ་ཞིང་རས་ཞིང་ལས་འཕྲུལ་ཆས་སྤྱད་དེ་ཆུ་འབྲས་མྱུར་བསྡུ་བྱས་ཏེ། འབྲུ་རྡོག་གཅིག་ཀྱང་མ་ལུས་པར་བསྡུ་བའི་འགན་ལེན་བྱས་ཡོད། ཀྲང་ཀྲའོ་ཅུན་གྱིས་པར་བླངས།

􀲓 ནང་སོག་རང་སྐྱོང་ལྗོངས་ཐུང་ལེའོ་གྲོང་ཁྱེར་ཁོར་ཆིན་གྱི་ཞིང་འཕྲུལ་ཁ་ལོ་བས་རླངས་འཁོར་ནང་ཨ་ཤོམ་བླུག་བཞིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་ལེན་ཀྲེན་གྱིས་པར་བླངས།

འདི་ག་ཚགས་པར་ཁང་དུ་པེ་ཅིང་ནས་གློག་འཕྲིན་འབྱོར་གསལ། ཚེས་29ཉིན། རྒྱལ་ཁབ་འབྲུ་རིགས་དང་དངོས་ཟོག་གྲབས་གསོག་ཅུས་ཀྱིས་ཁྱབ་བསྒྲགས་བྱས་པའི་གྲངས་གཞི་ལས་མངོན་པར། མིག་སྔའི་བར་རྒྱལ་ཡོངས་སུ་རིམ་རྩིས་བརྒྱབ་ན་སྟོན་འབྲུ་ཏུན་དུང་ཕྱུར་1.2ཉོ་སྒྲུབ་བྱས་པ་དང་ཉོ་སྒྲུབ་བྱེད་ཚད་ལོ་གོང་མ་ལས་མགྱོགས་པ་ཡོད་པ་མ་ཟད། ཉོ་སྒྲུབ་ལས་དོན་བདེ་བླག་ངང་སྤེལ་བཞིན་ཡོད་པ་རེད།

ས་ཁོངས་ནས་བལྟས་ན། ལྷོ་ཕྱོགས་ཀྱི་བར་སྨིན་དང་ཕྱི་སྨིན་གྱི་ཞན་ཏའོ་ཆུ་འབྲས་ཉོ་སྒྲུབ་བྱེད་ཚད་བརྒྱ་ཆ་བཞི་བཅུ་ནས་ལྔ་བཅུ་བར་ཟིན་པ་དང་བྱང་ཤར་གྱི་ཅིང་ཏའོ་ཆུ་འབྲས་བརྒྱ་ཆ་ཉི་ཤུ་ཙམ་ཟིན་པ་དང་། ཧྭ་པེ་དང་བྱང་ཤར་རྒྱུད་ཀྱི་ཨ་ཤོམ་ཉོ་སྒྲུབ་བྱེད་ཚད་བརྒྱ་ཆ་ཉི་ཤུ་ནས་སུམ་ཅུ་བར་ཟིན་པ། བྱང་ཤར་ས་ཁུལ་གྱི་སྲན་ཆེན་གཅིག་སྡུད་ཐོག་མང་དུ་གཏོང་བའི་དུས་མཚམས་སུ་སླེབས་ནས་ཉོ་སྒྲུབ་བྱེད་ཚད་བརྒྱ་ཆ་བཅུ་དང་ཕྱེད་ཀ་ཙམ་ཟིན་ཡོད། རིན་གོང་ཐོག་ནས་བལྟས་ན། མིག་སྔར་བར་སྨིན་དང་ཕྱི་སྨིན་ཆུ་འབྲས་ཉོ་སྒྲུབ་ཀྱི་ཆ་སྙོམས་རིན་གོང་རྒྱ་མ་རེར་སྒོར་1.3ཙམ་ཟིན་ནས་སྤུས་ཀ་ལེགས་ལ་རིན་གོང་ལེགས་པའི་ཁྱད་ཆོས་མངོན་གསལ་དོད་པོ་ཡོད།

འདི་ལོ་འབྲུ་རིགས་ཐོན་ཁུལ་གཙོ་བོའི་ཞིང་ཆེན་ཁག་གིས་སྲིད་ཇུས་ཀྱི་རོགས་སྐྱོར་བྱེད་ཤུགས་མུ་མཐུད་ཆེ་རུ་བཏང་ནས་རྒྱལ་ཡོངས་ཀྱི་སྲན་ཆེན་འདེབས་ཁྱོན་མུའུ་དུང་ཕྱུར་1.5ཡན་ཟིན་རྒྱུ་རྒྱུན་འཁྱོངས་ཐུབ་པ་དང་སྐྱེ་འཚར་རིང་གནམ་གཤིས་ཡག་པོ་བསྟན་པས་སྔོན་དཔག་བྱས་ན་ཐོན་འབབ་ལོ་གསུམ་བསྟུད་མར་ཏུན་ཁྲི་2000ཡན་རྒྱུན་འཁྱོངས་ཐུབ་རྒྱུ་རེད།